John 7 - Ohiatonhseratokénti

Tsiatak-aton nateioteriȣasonterakȣen tsinihoiaton Roiatatokenti San.

¹ GALILE ok teshastekafaskȣe ne Iesos, aseken iah tohoianerasehakȣe ne Iesos ne Judé niiaonsare, neh tsi ronȣaiatisakskȣe ne Sitaeronon nahonȣario.

² Onen are thoha iaonsakaheȣe tsini onentanoronse ne Sitaeronon Ratinatonkȣa ȣentanoronson.

³ Nok ne tehontennontere ȣahonȣenhase: Sasatenti ne kentho nok Judé niionsase, aontiesenhake ahontkatto oni nehne ne sentiokȣa tsini saiotenseroten.

⁴ Iah seʼsʼ ȣahi teiakotasetonhaties tsi iakoiotaties niienre ȣakeriȣakȣarision. Tsi eh nisierha, satotasi ki tsinonkati nonkȣene.

⁵ Aseken akȣekon netehontennontere iah tethonȣetakȣenne.

⁶ Iesos tontasakaȣenhase: Areko teio nakennisera; ok tanon tiotkon nise tiseȣatesenniio.

⁷ Iah teietshiȣens nonkȣeokon, nok tanon ionksȣens, neh tsi kheriȣasȣase tsini ieȣeiennaksen.

⁸ Ȣasene nise nonȣa nekenh ȣentanoron; iah nii sekon nonȣa eh tiiake ne kenh ȣentanoron, aseken areko tiieiohe nakennisera.

⁹ Neok ne ȣasakorori neh nikarihoten nok ok iehenteron Galile.

¹⁰ Nok tanon nonen sishonatention ne rontatekenhokonha, ethone onen ne raonha ȣahatenti eh ȣarete, iah ki tanon ȣene tekenhatie ok otasetonkeha.

¹¹ Sitaeronon ronȣaiatisakonhatieskȣe tsiniȣentanorons, nok rontonnionskȣe: Kah nires?

¹² Eso tsi iakottaronnionkȣe nonkȣeokon ne raonha raiatatake. Otiake iontonhakȣe tronkȣetaieri. Nok otiake iontonhakȣe: iah sakonikonrhatenni nonkȣesonha.

¹³ Iah ki sane akȣa onka tetkariȣakȣarisiatakȣe ne raiatatake, netsi ronȣatitsaniskȣe ne Sitaeronon.

¹⁴ Nok onen neh nahoten asennen siiotonniserohestston ne ȣentanorons, Onen ȣahataȣeiate ne Iesos ononsatokentikoȣane, nok eh sakotatiskȣe.

¹⁵ Nok ne Sitaeronon rotinerakȣaskȣe, ronton: Kah neneh nithoha tsi rariȣaienteris tsini kaiaton Oiatonseratokentike, iah seȣahi nonȣenton tethoteȣeienston?

¹⁶ Iesos tontasakoȣennaȣeron, nok ȣahenron; Iah iihne tetioientakon nakeriȣatatsera; eh tanon nonkati tioientakon tsinonkati ne thakatorion.

¹⁷ Toka onka kiok enhonikonraierite, enhaienterhane ne kariȣatatsera; Katehsiken, niiohne kenh nitiaȣenon, toka ken ok ii tiȣakatennikonra tsi ȣaktare.

¹⁸ Onka raonha raotennikonra raststa tsi ratatis, ne ki neraonha rahorensarontsera rehsaks; nok tanon neneh rehsaks raorensarontsera ne thotorion, neh oriȣiio, iah oni tekaien ne kanikonrhaton ne raonhake.

¹⁹ Iah kenhnaha Moïs tetsiseȣaianerenseraȣi? Nok sane iah onka tsi nitsion tekakaenhions tsiniiothare ne kaianerensera. Nahoten takȣaiatisakta naskȣario?

²⁰ Tontahonniron nonkȣeokon: Sanesonronontseraien ȣahi. Onka iesaiatisaks naiesario?

²¹ Iesos tontahariȣaserako, nok ȣasakaȣenhase: Enskat iakateȣeiennonni, nok akȣekon ok seȣanerakohon.

²² Nok sane nise, ne tsi Moïs etsihseȣaȣi ne iontateȣarakȣetarons, iahse sane Mois-ne tetiohientakon neh tanon tsinonkati ne kanisera, hetsiseȣaȣarakȣetarons ne ronkȣe nʼaȣentatokentike.

²³ Toka nonȣa aȣentatokentike rateȣarakȣetarons ne ronkȣe, neneh tosa aonsonteȣate tsiniiotsiate ne Mois raoianerensera, oiah kati kenh nitiseȣatierase niihne neh tsi raiatakȣekon ne ronkȣe sahitsiente aȣentatokentike ȣenniserate.

²⁴ Tosa neok teseȣaiatoret tsiniiot tsi kaieronni, neh tanon tehseȣaiatoret tsinitkariȣaieri.

²⁵ Ethone otiake ne Jerusalem-aka ȣaonniron: iah kenh naha neh teken ne tehonȣatonȣentsioni ahonȣario?

²⁶ Onen tanon nonȣa kenh iatesakorihoseratha tsi rothare, nok iah othenon tehonȣenni: tokase nonȣa onen enhotiriȣaientereon ne ratikorason tsi oriȣiio onȣe neh kehiken ne Keristos?

²⁷ Ionkȣaterientare sane tsinithaȣenon ne kenh kaien; nok nonen enhraȣe ne Keristos, iah onka taioterientarake kah nithaȣenon.

²⁸ Ok tatehohenretakȣe ne Iesos tsi Sakotatis nʼononsatokentikoȣane nok raton: takȣaienteri, seȣaterientare oni tsini teȣakenon: nok iah ii teȣakatennikonra tsi teȣakenon; nok ki tanon roriȣatoken ne thakatorion, nok iah tetsiseȣaienteri nise.

²⁹ Riienteri tanon nii: aseken raonhake teȣatientakon, raonha oni thakatorion.

³⁰ Ethone onen ȣahontonienten ahonȣaiena; iah kitanon onka tiiateionisnonsaere neraiatake, aseken areko ȣiiehoteriȣiheȣi.

³¹ Nok kentiokoȣanen nonkȣeokon tahonȣetakȣe, nok iontonhakȣe: nonen henraȣe ne Keristos senha onte kenh isinonȣe tsinenhaiere nioriȣanerakȣatenion tsinihoieren ne kenh kaien?

³² Pharisian ȣasakotiȣennaronkanion tsini iontonnions nonkȣeokon; nok iathonteriȣatieste ne ratitsihenstakȣeniios, ratiriton iasakonatori ahonȣaiena.

³³ Nok ne Iesos ȣasakaȣenhase: Sekon kenh nikariȣessa enteȣakȣekon, onen etho niienske tsi thenteron ne takatennieton.

³⁴ Enskȣaiatisake, iah ki tanon taskȣaiatatsenri, nok tsinonȣe nenkiterontake, iah taheseȣakȣeni iaheseȣaȣe.

³⁵ Ȣahonnironnion ne Sitaeronon: Kah onte niienhenre tsi iah tatsiteȣaiatatsenri? Eh onte kenh nonkȣati niienhenre tsiniieiakaȣenon ne tiiateiakorenihon akenakeraserakon ne Grek, nok Grek ensakorionnien?

³⁶ Nahoten kati neneh kenton tsi raton: Enskȣaiatisake, iah ki tanon taskȣaiatatsenri; nok tsinonȣe nenkiterontake, iah taeseȣakȣeni iaheseȣaȣe?

³⁷ Nok nonen neh nonaken iotonniseroheststakȣen ne ȣentanorons, etho ihres ne Iesos, tehohenretta raton: tokasenonȣa onkakiok roniatathens, karo itret, nok ihine ranekira.

³⁸ Onka taȣetakon niihne, tsiniiot tsi kaiaton nʼOiatonseratokentike, kaihionhiios entkanaȣeroten rahonekȣentakon.

³⁹ (Neh rentonhakȣe, tsihenshakotienhase ne Rotkon Ronikonriioston tsini iakon tiakaȣetakon ne raonhake: Aseken arekoki shitonȣatkaȣen ne Rotkon Roiatatokenti, ne tsi areko tehoronhiakenserentaon ne Iesos.)

⁴⁰ Kentiokoȣanen tsiniiakon ȣaonronke neh nikaȣennoten, iontonhakȣe: Oriȣiio onȣe kehiken tsi Rotokense.

⁴¹ Otiake iontonhakȣe: nehkehiken ne Keristos. Nok notiake iontonhakȣe: Galile kati kenh nentre ne Keristos?

⁴² Iah kenh naha teȣaton ne kaiatonseratokenti, tsi Taȣit raȣatsirakon nentre ne Keristos, tsi oni tiohnatakȣenrare ne Bethlehem, tsi nonȣe nihanakerekȣe ne Taȣit.

⁴³ Ȣationteriȣatihanion kati nonkȣeokon neraonha raiatatake.

⁴⁴ Otiake tsini hati ronnerhakȣe ahonȣaiena; iah ki tanon onka tiiateiosnonsaraon ne raiatake.

⁴⁵ Nese ȣaonni ne ratiriton sahontenti, eh sahonnete tsi thatiteron ne ratitsihenstakȣeniios oni ne Pharisian: tahonniron neneh: oh niiotieren tsi iah tetetsiseȣaiatenha

⁴⁶ Tontahonniron ne ratiriton: Areko nonȣenton teiotetsenrion enskat ne ronkȣe eh nahoieren tsi ahatati tsiniiot ne kenhkaien.

⁴⁷ Nok ne Pharisian tontahonniron: Tokasenonȣa oni nise onen ȣatetsiseȣanikonratsa?

⁴⁸ Iah onte ken onka ne Ratikorason, ok neʼs enʼs ne Pharisian tethonȣetakon?

⁴⁹ Kariȣanoron ki onte oni tsini ionkȣetotons niah othenon teiakoterientare nahoten ne kaianerensera, akȣa aoskon neok ne iotakȣasȣat.

⁵⁰ Nicodeme (neh tohiken nasonthenne rotkenseronnonne ne Iesos neh oni etho raiatare) ȣasakaȣenhase:

⁵¹ Tekaiatoreta kenh nonkȣaianerensera ohenton nahoken ne ronkȣe nok oni naiotokense tsini hotieren?

⁵² Tontahonȣaȣennaȣeron, nok ȣahonȣenhase: iah oni kenh naha nise Galile tetisenon? Seriȣisak, nok seriȣaienterihak tsi iah nonȣenton Galile tethoientakon ne Rotokense.

⁵³ Nok tonsahonreni skatson tsi rotinonsoton.