John 18 - Ohiatonhseratokénti

Satekon-aton iaȣenre teioteriȣasonterakȣen Oriȣatokenti tsini hoiaton Roiatatokenti San.

¹ NONEN saharihokten ne Iesos, ethone Cedron tsi tkanaȣahere niiahare ronhne ne raotiokȣa, ethononȣe niȣatehenraientakȣe iontiataȣaststa, eh kati iahataȣeiate oni ne raotiokȣa.

² Sitas ne rotenninonrene raienterine oni neneh nehnonȣe: aseken iotkate ki ne Iesos eh iohonterorokskȣe ne raotiokȣa.

³ Ȣahonhionkȣeton kati ne Sitas, ne ratitsihenstakȣeniios oni ne Pharisian, Sotar tanon ratiriton, nok etho ȣarete ratihaserenhaȣinontie, oni ne iontatientta.

⁴ Nok ne Iesos roterientaratsion tsini hoiataȣensere, iahatenti nok ȣahenron: Onka hetsiseȣaiatisaks?

⁵ Tontahonniron, Iesos Nazaretronon. Tontahenron ne Iesos: Ii ȣahi. Etho oni neneh raiataratie ne Sitas nene rotenninonrene.

⁶ Ne kati nonen ensakorori ne Iesos tsi ȣahenron: Ii; ohnaken ȣahonatentiate, nok ehtake iahatiiatakerontane.

⁷ Sekon tontasakoriȣanontonse: onka hetsiseȣaiatisaks? nok tontahonniron: Iesos Nazaretronon.

⁸ Tontahenron ne Iesos, kȣarori ȣahi tsi Ii; neh kati nenskȣaiatisakseke, tosa ki othenon ietsiiaststerist ne kenh kaien.

⁹ Neh ȣaonni eh nahaȣenne nakaierine tsini haȣen; iah enskatha teȣakatonkȣetatonni tsinikon takonkȣetaȣi.

¹⁰ Kenh kaien ne Simon Tier, rotasaraniionte asarekoȣa, tahassarotsiate, nok saiatat ȣahoiente ne ratsihenstoȣanen rahonnhatsera, nok iahohontiakte tsi nonkati raȣeientetakon: Malchus ronȣaiastskȣe ne kenh kannhatsera.

¹¹ Nok tanon ne Iesos ȣahaȣenhase ne Tier: sasateȣeienton ne sasarekoȣa. Iah kenh taknekirane tsini haknekarani ne Rakeniha?

¹² Ethone onen ne ronȣakoȣanen ne shotitiokȣa tanon ne Sitaeronon raotiriton ȣahonȣaiena ne Iesos nok ȣahonȣanerenke.

¹³ Nok oksaok Annke niiahonȣasarine: aseken raȣennhonsa kenhne ne Caïph, neh ratsihenstoȣanen kenhne neh sikahaȣis.

¹⁴ Ok neh sakaiatat ne Caïph, sakohnikonratenhenne ne Sitaeronon tsi teiotonȣentsiohon ne saiatat arenheie tsiniiot ne kanenrakȣekon.

¹⁵ Simon Tier tanon sekon saiatat ronȣanonteratiene ne Iesos; nok ne saiatat roienterine ne ratsihenstoȣanen, ok ihne ne Iesos tsi iahataȣeiate rahotehenrakon ne ratsihenstoȣanen.

¹⁶ Astste nenneh nakannhohati ratakȣe ne Tier, nok ne saiatat, ne teiatatienterine ne ratsihenstoȣanen, ionsakaiakenne, nok iatnitharen ne teȣatennhohanonne, aonha kati iahohiatinionte ne Tier.

¹⁷ Nok ne kenh kannhatsera teȣatennhohanonne, ȣahaȣenhase ne Tier: iah kenh nise tesiatare raotiokȣakon ne kenh ronkȣe? tahenron: iah Ii tehken.

¹⁸ Kenh kaien ne ratinnhatsera oni ne ratiriton ȣahontsienhonni, eh ronhnes aseken iothorekȣe, nok shontenhienskȣe; etho kati oni neneh raiatarakȣe ne Tier, rotonhientakȣe oni neneh.

¹⁹ Nok ne ratsihenstoȣanon ȣahoriȣanontonse ne Iesos, ne raotiokȣa raiatatake tsi oni nihorihoten.

²⁰ Tontahenron ne Iesos tsi tontahoȣennaȣeron: ȣakeriȣakȣarision tsini kherori nonkȣeokon; tiotkon tsi ionterennaientakȣa kherionnienni, ononsatokentike oni tsinonȣe nihontkennisahata ne Sitaeronon, nok iah teȣakatroriaton naioteriȣaseton.

²¹ Oh kati niiotieren tsi takeriȣanontonnis? neh sheriȣanontons nʼiakoronkanion tsinahoten ȣaken, aseken iakoterientare tsini teȣakatati.

²² Nonen neh sahenron ne Iesos, saiatat karihton eh rahtakȣe, ok neh ne rahonnia ȣahoiente ne Iesos nok ȣahenron: Etho kenh nise niseȣeiente ne taontatseȣennaȣeron ne ratsihenstoȣanen?

²³ Tontahenron ne Iesos: toka onkeȣennannhike, satrori; nok toka nonȣa takeriȣaierite oh kati niiotieren tsi ȣaskiente?

²⁴ Ranerenhatiene ne Iesos ne Ann sihiahotori Caïphke ratsihenstakȣeniioke.

²⁵ Nok ne Simon Tier etho oni neneh ihreskȣe, nok rotenhientakȣe; ȣahonȣenhase kati: iah oni kenh nise tesiatare tsinihati ne raotiokȣa? Sahatonnhiie, nok ȣahenron: iah Ii tehken.

²⁶ Nok saiatat ne ratsihenstoȣanen raonnhatsera iatatenonkȣe ne Tier rohontiakonne, ȣahenron: iah kenh nah oni nise eh tetkonken atehenrakon?

²⁷ Sekon are sahatonnhiie ne Tier, nok ok eh kaȣennaratie ne kitkit tontati.

²⁸ Satontahonȣaiatinekenȣe ne Iesos ne Caïphke, tsi teieiatoretakȣa niionsahonȣasarine (onen siiorhonkene nonkatikȣen), iah tanon tiiehonataȣeiaton tsi teieiatoretakȣa, ne neh tosa ahotinnhistakȣe, senha ok oni anatiȣarake ne Teiotinakarontonha Oȣira Shotonnhestston.

²⁹ Nese ȣaonni tahaiakenne ne Pilat nok ȣahenron: oh nahoten shoteriȣateȣatonhatie ne kenh ronkȣe?

³⁰ Tontahonȣaȣennaȣeron nok ȣahonniron: iah se kentho tahontasakȣaiatenha ne iah onkȣetaksenskȣa takenhake.

³¹ Tontasakaȣenhase ne Pilat: ise ki hetsiseȣaiena nok tetsiseȣaiatoret tsini seȣaianerenseroten. Tontahonniron kati ne Sitaeronon: iah teionkȣateriȣaienni nonka kiok aiakhiionnhiake.

³² Nok nehneh ȣaonni eh nahaȣenne, ne iakaierite tsini kaȣennoten thotati ne Iesos, sahatrori tsini ȣenheiontoten renheiatane.

³³ Sekon kati ionsahataȣeiate tsi tehaiatoretakȣa ne Pilat, nok iahononke ne Iesos, nok ȣahenron: iseken iesanontiio ne Sitaeronon?

³⁴ Tontahenron ne Iesos: ise ken satennikonra tsinahoten saton, kah niiehonenon notiake ne iesarori nii kiatatake?

³⁵ Pilat tontahenron: Sitaeronon kenh nakiatoten? ne ȣahi ne sonkȣeta oni ratitsihenstakȣeniios ȣaonkatsiakȣarisien tsi sonnhe; oh nisatieren?

³⁶ Tontahenron ne Iesos: Iah onȣentsiake tekehnakeraseraien. Tokanonȣa onȣentsiake akaientake nakenakerasera, ahonteriiose nakonkȣeta ne tosa aionkiena ne Sitaeronon; ok ki tiiaȣeriȣakon iah se kenh tekenakeraseraien.

³⁷ Ethone saenron ne Pilat: sanontiio kenh? tontahenron ne Iesos: neh ki nʼakȣa neh ȣakennakeraststakȣen, neh oni teȣakenienton tsi teȣakenon nonȣentsiake nakeriȣanirate ne tkariȣaieri. Onka roriȣatoken, roronken nakeȣenna.

³⁸ Pilat tontahenron: nahoten nehneh nʼOriȣiio? Nok neh sahenron, ionsahaiakenne tsi thatiteron ne Sitaeronon niionsare, nok ȣasakaȣenhase: iah othenon teketsenries nahonnhikon.

³⁹ Ne kati kehiken tsi niseȣarennhaon, nene enskat enskȣatsiakȣarisien tsinihati ratinnhoton tsini ȣentanoronsere ne Shotonnhestston; aeseȣathontate katiken neneh ahonsahiiatsiakȣarisi ne Sitaeronon Ronȣanontiio?

⁴⁰ Nok akȣekon ok are tontahotihenrete ȣahonniron: tosa rahonha kenhak, Barabas niha, onkȣetaksenskȣa kenhne ne Barabas.