John 11 - Ohiatonhseratokénti

Enskat-aton iaȣenre teioteriȣasonterakȣen Oriȣatokenti tsini hoiaton Roiatatokenti San.

¹ Bethani nonȣe saiatat nihononȣaktanihakȣe Lazar ronȣaiastskȣe, eh nonȣe niionatenatakȣenrare nʼOnȣari tanon Marta rontennosenha.

² Neh kehiken Onȣari ne ȣenhienakon oni ȣenhienanoron ȣahahokaȣe ne Roianer, nok ok neh nahononkȣis sakarakeȣate; nok ne Lazar rohnonȣaktanihakȣe aonha iatennosenha.

³ Iatiateriȣaniete kati ne rontennosenha tsi itres ne Roianer tiatonne: Saianer onen rohnonȣaktani ne hetsenoronkȣa.

⁴ Nok ȣahenron ne Iesos tsi ȣahariȣaronke: iah ki neneh teiakoriotha neh nikannroten, neok tanon ne Niio raoiatanerakȣatserat, eh naontaȣe ahonȣasennoȣanate ne Niio Roienha,

⁵ Iesos ranoronkȣakȣe ne Marta, nok oni ne tiatatekenha, oni ne Lazar.

⁶ Nok nonen sahariȣaronke tsi rohnonȣaktani ne Lazar, sekon teȣenniserake sahonisko tsinonȣe nireskȣe.

⁷ Ethone onen ȣasakaȣenhase ne raotiokȣa: Judé onen niietsiteȣe.

⁸ Tontahonniron ne raotiokȣa: Saianer! onȣar ok tokara nonta tiosaiatisakskȣe ne Sitaeronon naiesanenhioiake, onen kati ok are eh iensese.

⁹ Tontahenron ne Iesos: iah kenh tekeni iaȣenre tekaȣistaeks ne seȣennisera? onka entiekene enhatenti iah ki tahositiake; aseken neh tehosȣathetakȣa tsi teiosȣathe tsi ionȣentsiate.

¹⁰ Kenh kaien nasonthenne enhatenti enhositiake, aseken iah ki tatehosȣathe tsi teiosȣathe.

¹¹ Nonen saharihokten, ethone ȣasakaȣenhase: Lazar onkȣatenro rohtas. Eh tanon ȣake sahiietane.

¹² Tontahonȣaȣennaȣeron ne raotiokȣa, nok ȣaonniron: Saianer! onenki enshaieȣentane nenhotasseke.

¹³ Nehse neneh ȣahenton ne Iesos tsi raȣenheion, ronnerhakȣe ne rohnonha neh kenh renton nahakotaȣe.

¹⁴ Ethone onen ne Iesos iatharihoserate ȣahenron: Lazar raȣenheion;

¹⁵ Nok ȣakatonnhahero nise seȣariȣake ne tsi iah eh tekeskȣe. Toka eh naontaȣe aonteseȣetakȣe. Enhnio tanon eh ieteȣe.

¹⁶ Ethone nʼAtonȣa Didyme ronȣanatonkȣa, ȣasakaȣenhase ne rontenro: Etho oni nʼii ieteȣe aontonseke enskatne aheteȣenheie.

¹⁷ Nonen siiaharaȣe ne Iesos, ȣahariȣaronke tsi onen kaieri nonta sithonȣaiataten ne Lazar.

¹⁸ Neok nahoten ne ȣisk iaȣenre stade natetiatere ne Bethani tanon ne Jerusalem.

¹⁹ Kentiokoȣanen sitaeronon etho iehotine tsi tiotinonsote ne Marta tanon nʼOnȣari, konȣatinikonranirathe tsi teiohnatennonterakȣen.

²⁰ Akȣa neok ȣakariȣaronke ne Marta tsi tare ne Iesos, oksaok ȣathoteratana, nok nʼOnȣari ok iekenteron.

²¹ Ȣakenron ne Marta tsi ȣahoȣennarane ne Iesos: Saianer! kenthoʼs enʼs aseseke iah naha tahaȣenheion nontiatennosenkenha.

²² Nok ki tanon ȣakaterientare nonȣa tsinikon enhtseneken ne Niio, enthion ne Niio.

²³ Tontahenron ne Iesos: enshatonnhete ne tsiatennosenha.

²⁴ Tontakenron ne Marta; ȣakaterientare tsi enshatonnhete nonen tentiontkestsko akȣekon nonkȣe neh nonen onaken tsi teȣenniseronte.

²⁵ Tontahenron ne Iesos: Ii ne tsi tsiontonnhests oni ne iakaonnhets; onka taȣetakȣon niihne iaȣeronhatien nenhaȣenheion, enhronnheke.

²⁶ Onka ronnhe, thaȣetakon niihne iah nonȣenton tiiarenheie, tisetakȣen kenh neneh?

²⁷ Tontakenron: Tokenske Saianer! Teȣaketakon tsi ise ne Keristos, Niio Iaienha karharastston entesete tsi ionȣentsiate.

²⁸ Nok nonen sakarihokten otasetonke saiohnonksa ne tiatatekenha Onȣari, ȣakenron: kenh itres ne Roianer nok thiennonks.

²⁹ Akȣa neok onronke tontakatenstakȣe nok eh ȣahete.

³⁰ Areko siiehero ne Iesos tsi tionatakȣenrare; sekon eh nireskȣe tsi nonh Marta natehonatatken.

³¹ Kenh kaien ne Sitaeronon neh ratiterontakȣe konȣanikonrorihakȣe nʼOnȣari, ȣahontkatto tsi sotsi tontakatenstatsi oni iakaiakenne, ȣakonȣasere rontonne: tsi thaiatat ȣateȣasenthosere.

³² Siiaonȣe nʼOnȣari tsi itres ne Iesos, onen oni sahoken, rasitakta ȣateȣatonstsoten, nok ȣakenron: Saianer! nene kentho asesseke iahse thahaȣenheion nʼontiatennosenkenha.

³³ Iesos ȣahaken teȣasenthos oni ne Sitaeronon ne konȣanonteratiene ȣahoiatissonkȣe nok ȣahonikonkararen.

³⁴ Nok ȣahenron: kah nonȣe niseȣaien? Tontahonniron; Saianer kasts nok satkatho.

³⁵ Nok ȣathasentho ne Iesos.

³⁶ Neh ȣaonni ȣahonniron ne Sitaeronon; oriȣiio ȣahi tsi rohnoronkȣakȣe.

³⁷ Nok otiake iontonhakȣe: neh kehiken shotsienton ne teharonȣekonne, iah kati onteken tahokȣenion ne tosa ahaȣenheion ne kenh ronkȣe?

³⁸ Ethone are sekon sahonikonranonȣake ȣahatkatho tsi nonȣe nihaiatat (ioshonhioȣanen kassonhionnine nok ohnenhia kanontektonne.)

³⁹ Ȣahenron ne Iesos: Seȣanenhiarako. Nok tanon ne Marta iatennosenha ne raȣenheion ȣakenron: Saianer! Onen ne kenh ȣakeras; aseken onen kaieri nonta eh sihaiatat.

⁴⁰ Tontahenron ne Iesos: iah kenh tekonrori, nentisetakȣen ensatkatho ne Niio raoiatanerakȣatsera?

⁴¹ Ȣahatinenhiarako kati ne kanontekton tsi raiatat. Nok ne Iesos Karonhiake iahatkatto nok ȣahenron: Rakeni tekonnonȣeratons tsi takeȣennarakȣen, konhiatsennonniase tsi takathontatis.

⁴² Ok se sane siȣakaterientare tsi takeȣennarakȣa; neki ne teionkatiataton raotiriȣa tsi nahoten katon, toka naha eh naontaȣe ahonthontate tsi ise teskatennieton.

⁴³ Nok nonen saharihokten, ȣathohenrete: Lazar tontatsiakenn.

⁴⁴ Ne nakȣa oksaok tontahatkestsko ne raȣenheion, tehanenststerenhatie tehasitaneren oni, nok iakotasta rohnonȣaroron, ȣahenron ne Iesos: hetsiseȣanerensi nok hetsiseȣatka.

⁴⁵ Nese ȣaonni kentiokoȣanen ne Sitaeronon nʼOnȣari konȣanonsorenhonne, ȣahontkatho tsi nahaiere ne Iesos tahonnetakȣe rahonhake.

⁴⁶ Nok notiake, Pharisian neneh sahonȣatiroriana tsi nahaiere ne Iesos.

⁴⁷ Ethone onen ne ratitsihenstakȣeniios oni ne Pharisian Saontkennisa nok ȣahatitsienhaien, nok ȣahonniron: oh niteȣakierha? Aseken kehiken ronkȣe tehaterihokȣatha ne ioriȣanerakȣatenions.

⁴⁸ Tokat ok tatentsiteȣakanerake akȣekon ok enthonȣetakȣe; nok enthonne ne Romain enhionkhiiatonte, ii, onkȣanakerasera, oni nʼonkȣentiokȣa.

⁴⁹ Ethone Saiatat Caiph ronȣaiasts, neh ratsihenstoȣanenne neh sikahaȣis, tahatati, ȣahenron: iah othenon teseȣanikonraientas.

⁵⁰ Nok, iah oni tateseȣaiatoretta tsi onkȣatsennonniat ne saiatat harenheie, ne kanenrakȣekon akoriȣake, kaȣenniio ki tosa aeteȣanitiokȣahton.

⁵¹ Iah raonha tehotennikonra tsi nahoten ȣahenron; nok tanon ne tsi raonha Ratsihenstatsikoȣa kenhne nʼethone, tsi kati niiot ne ȣahonikonrahentete nok tahonenne tahatrori tsi sakaȣenheiasere ne Iesos ne Sitaeronon.

⁵² Iah oni neh ok teken ne Sitaeronon, neh oni nasakoiataroroke nok oni iatasakoiestste ne Niio sakoienhokonha nʼok tiiateiakorehnihonne.

⁵³ Neok kati onen sahatiriȣisake oh onte nahatiiere nahonȣario.

⁵⁴ Nese ȣaonni ne Iesos iah ki onkȣene tesrethakȣe; ok eken tanon ehren ȣarete neh nonȣe, kahentakta tkanataien Ephraim konȣaiats eh niiahare; eh oni iahatien nok oni ne raotiokȣa.

⁵⁵ Onen thoha siiakaheȣe tsini honentanoronse ne Sitaeronon (konȣanatonkȣa Shotonnhestston); kentiokoȣanen kati neh tienakere Jerusalem ȣahente saiontonnhakanonhniahna tsi onen ȣentanoronsere.

⁵⁶ Nok Iesos ronȣaiatisakskȣe, tehontateriȣahnontonnionniskȣe oni Ononsatokentike rontonhakȣe: nahoten iseȣere? iseȣere onteken iah tahontare tsinikariȣes ȣentanoron?

⁵⁷ Kenh kaien ne ratitsihenstakȣeniios oni ne Pharisian sakotirihontonkȣe, nonka aiakoterientarake kah nonȣe nires, ahonȣatirori, eh naontaȣe aontiesenne ahonȣaiehna.