Joel 1 - Ohiatonhseratokénti

¹ Ne raowenhnahó꞉kons ne Roiá꞉ner tsi nihoiená꞉hon ne Joel ne roiénhane Pethuel:

Ronatsokowanen tsistá꞉rare wahontonhontsorenhne

² Sewatʼthóntet kí꞉ken, ne titionhkweʼtáhions, sewatahónshatat, sekwakwé꞉kon ne thóh sewaná꞉kere ne tsi watonhontsá꞉ien! Ne nikarihó꞉ten nonhwén꞉ton ken thóh nitsawénhon ne tsi nihsewatenhniseraténions, kesʼne ne tsi nihonathenhniseraténionskwe ne ietsisotʼthonkonhkén꞉en?

³ Ientʼtsiró꞉ri ne ietʼtsiʼienokón꞉a kí꞉ken nakarihò꞉ten, tánon ietsirí꞉hon ne ietsiioʼokón꞉as ienshonwatiró꞉ri ne iesehsakotiienokon꞉ʼa, ók ne ronón꞉ha iensehsakotiró꞉ri ne tahatikonhsontóntie aterésehra.

⁴ Tsi nahó꞉ten ne ratihetakárhias tsistá꞉rare iateonénhron, ne iohonwá꞉rare tsistá꞉rare ronékon. Tsi nahó꞉ten ne iohonwá꞉rare tsistá꞉rare ronénhron, ne ionihtionkwahténion tsistá꞉rare ronékon, tánon tsi nahó꞉ten ne ionihtionkwahtánion tsistá꞉rare iatehonénhron, ne ratiheténtʼtos tsistá꞉rare roné꞉kon.

⁵ Sewá꞉hie, í꞉se ne sewanekakástha, tánon tesewasénhto; tánon tesewahénret, sewakwé꞉kon nonenhará꞉keri sewahnekí꞉ra, ne noné꞉kase onenhará꞉keri, asè꞉ken ietsinontákwen ne tsi sewashakáronhte.

⁶ Asè꞉ken rononhontsakeró꞉nons wahatinénhrenhte nakonhontsá꞉ke, ratiʼshátste tánon ronatiohkowá꞉nen; thóh natehatinawiróthens tsi ní꞉ioht ne kénreks, tánon rotinawirhiotí꞉ies tsi ní꞉ioht ne kénreks.

⁷ Wahonkhententʼthó꞉se ne watsiéntʼton watenenharíhseres, tánon wahatisataronhniánion nakerontaʼshón꞉a ne tionhnionwaronhtonhakó꞉wa. Wahatinawahtsistarónko ne karonhtaʼshón꞉as tánon ohontsà꞉ke wahonatseʼshé꞉ron tánon naonenhraʼshón꞉as iáh othé꞉non tetsonawatsístare.

⁸ Sewanikonrát꞉sen, tsi ní꞉ioht ne kawí꞉nonh ká꞉iare iotserón꞉niaton tsi iotʼtiónhnion asè꞉ken tsi niká꞉ien ne rotiniakkhene rawenheion

⁹ Nonátsa tsi nitseiéstha tánon ne ienekirá꞉tha tsi nitseiéstha karihwatón꞉ton ne thóh raononhsatokentikówane ne Roiá꞉ner. Ne ratitsihénstatsis ne teonwarihwásniese ne Roiá꞉ner ronatsiónhnion.

¹⁰ Ne kahentà꞉kes iorihwaieshá꞉hons; nonhóntsa iáh othé꞉nen thatetkánios; asè꞉ken nonátsias karihwatón꞉ton, nonenhará꞉keri iehiostéhon, ne kénhie wathontkári.

¹¹ Sehwanikonhrót꞉then, í꞉se ne sehwaiéntʼthos; tesewahénret, í꞉se ne sewatkwirasehrón꞉nis ne watenenharí꞉sehres, tsi kaiéntʼton nonátsias tánon ne teiotikonstón꞉res; asè꞉ken tsi nitkáhas ne kahentà꞉ke iorihwahiesháhon.

¹² Ne wahtenenharíseres iostathénen, ne tionhnionhwahronhtonhakó꞉wa onhtakenhé꞉ie. Ó꞉ni ne iotenenhaká꞉te sewahió꞉wane, ne ioneratésons, tánon ne sewahió꞉wanes— akwé꞉kon ne karonhtaʼshón꞉as ne kahentá꞉kes iostatʼthénen; orihwiiohón꞉we, natʼtsenhnonhniátshera tsi ieiohiakén꞉en tsi nón꞉we nihatinákeres nonkweshón꞉has.

¹³ Ká꞉iare sewatierón꞉niat tánon sewaʼnikonráksen, i꞉se ne sehwatsihénstatsis; tesewahénrét tsi nisewariwaié꞉wes ne sehwateriwatsterístons ne tsi ietienharáhkwa. Ká꞉sewe, sewasonhtí꞉iak ká꞉iare sewatstónhak, í꞉se ne tsi sewateriwatsterístase naʼkeNí꞉io! Tiorí꞉wa ne káhkhwa tánon ne ienekiráhtha ne ieshewátats iáh tsesewahióntha raononsatokentikó꞉wane ne Sewaní꞉io.

¹⁴ Sewaʼrihó꞉wanat naʼwenhtónhtiete, ietsihiaʼtaró꞉rok nonkweshón꞉as ne naiotokentí꞉ke raohénton ne Ní꞉io. Ietsihiaʼtaró꞉rok ne thotí꞉ions tánon ratikwé꞉kon ne tsi ionhontsá꞉ien ratiná꞉kere thóh athenhenrá꞉kon ne raononsatokentikó꞉wane ne Sewaní꞉io, tánon iaʼtesewasénhtho rahonhà꞉ke ne Roiá꞉ner.

¹⁵ Oh tsi niiotakwaskwa ne tho entewenniserateke! Asè꞉ken ne rawenhní꞉sera né Roiá꞉ner ákta í꞉wes, tánon né꞉ne kaʼkaronhniá꞉tsheras tsi nénhtewe ne Roshatstenhserowanenhkó꞉wa rahonhà꞉ke.

¹⁶ Iáh ken káhkhwa tewatón꞉ton nonkwahénton tsi thetewakanérakwe, atohnharátshera tánon nahtsenhnonhniá꞉tsheras tsi nokwáh nónhkwa Ní꞉io raononhshatokenhtikó꞉wane?

¹⁷ Ne kanenhashón꞉as tok enwatoké꞉rike ohnonhonró꞉kons, ne tsi ieientáhkwa iáh othé꞉non teská꞉ien; ne tsi ienatsiaientháhkwa kanonsarihshiónkwen tiorì꞉wa nonáhtsias tsi hiotón꞉hon.

¹⁸ Ne kontiʼtshé꞉nens tsi niiononsénren! Ne tionónshkwarons tiehiotiriwaié꞉was tiorì꞉wa tsi iáh tetsotihentháien ne thakonskaʼon; ne nónhne sá꞉ka ne teiotinaʼkarontón꞉a iotironhiá꞉ken.

¹⁹ Íse꞉ke, O Saiá꞉ner, watkasénhto. Asè꞉ken nó꞉tsire onhtsahá꞉te ne kahentá꞉kes; tánon notónhkwas onhtsahá꞉te akwé꞉kon ne karonhtaʼshón꞉as ne kenhentá꞉kes.

²⁰ Iekaníhare ne kontí꞉rhiós teiesatonhontsó꞉ni ne tahontáse tiorì꞉wa ne tsi nón꞉we nikanekónhnions iostéhon, tánon nó꞉tsire onhtsahá꞉te ne kahentá꞉kes ne iahonwenhtsathénhake.