Job Tánon ne Raoronhiakensera 5 - Ohiatonhseratokénti

Ne Eliphaz Ráton Ne Job Iahatatkwáhse Tsi Nahoiá꞉tawen

¹ “Iatesahénret ó꞉nen; ónhka ken tenhtiesarihwaʼserá꞉kwahse? Ónhka tsi nihá꞉ti ne ratironhiaʼkeró꞉nons nokwáh niá꞉se?

² Tiorì꞉wa ne kanhakwáhtshera iakononwarià꞉kons ne tiakotonhnókte, tánon natakefáshera ne karihón꞉nis nahiaiéheie ne ken nitkaiénha.

³ Wakatkáthon nononwarorihtaʼshón꞉as tsi nihioiá꞉nere tsi ní꞉ioht tsi rotiianerastén꞉nis, ók thontaiawénhstsi wakeriwaiésate ne tsi rateteróntons.

⁴ Ne sakothihioʼokón꞉as ahinonhkó꞉wa tón꞉nes ne skén꞉nonk akénhake, wathonwanaskwáhseron ne tsi iothenhenrakà꞉ronhte, tánon ne nón꞉we iáh ónhka thahontahonwá꞉tine.

⁵ Ne ionthonkárias ne wahónhneke ne rothiientkwáhkwen, tánon iahatí꞉hawe iekaní꞉hare tsi nahó꞉ten ne ohikthó꞉kon nón꞉we nihiotón꞉ni; tánon ne iakoniatá꞉tens kwáh thonennassakè꞉tote tsi nionská꞉neks ne raotikwaséhtshera.

⁶ Asè꞉ken ne karihwahetkénhsera iáh onwenhtsá꞉ke nón꞉we thetewétha, khés ne Kariwakathéntshera iáh seh onwenhtsá꞉ke teʼkánios.

⁷ Asè꞉ken nónkwe tsi iakawenhnakerá꞉ton enhiakohiò꞉ten tsi enhiontonhnísake kwáh tsi ní꞉ioht ne watsiratónkwas tsi è꞉neken niewé꞉tha.

⁸ “Ók kí ní꞉i, Rawenni꞉io ahihiatí꞉shake, tánon Rawenní꞉ioke nón꞉we ná꞉tsien nakerihwaʼshón꞉as.

⁹ Ónhka ne Iorihowá꞉nens tsi nihaieránions tsi nahoʼténhsons iáh tethewakwénes nahionkwaʼnikonhraién꞉taʼne, iorihwanerakwahténions né꞉ne iáh tewaséhtons?

¹⁰ Rakenhnoréstha ne tsi ionwenhtsá꞉te tánon ronehkónties ne kahentá꞉kes

¹¹ è꞉neken ensakahón꞉ni ne è꞉take iontatón꞉nis, tesakohawitén꞉tis ne kaiatanonsthá꞉tshera tsi niiá꞉kon ne iakonikonrátshens.

¹² Teshakoʼnikonriakthénhnis tsi nihonteʼnikonrón꞉nis ne ratiʼnikonrá꞉tha, ne káti ne ratitsá꞉nakes ne tó꞉sa othé꞉non akarihwakanón꞉ni.

¹³ Tesakoʼnikará꞉ras ne ronteʼnikonrathò꞉kas ne kwáh ronónha raotinikonrathaʼtsherá꞉kon, tánon tsi nisakotinikonrá꞉wis ne ratiʼnikonrá꞉tha kwáh iostó꞉re tsi enhonatotʼtase.

¹⁴ Ne waotí꞉rane ne tetiò꞉karas nentiè꞉ne sikahá꞉wi tánon wahonhoserónhko nénhtse sikahá꞉wi tsi ní꞉ioht nasonhthénhne akénhake.

¹⁵ Ók sakonónstats ne iakó꞉ten tsi nokwáh ne raonásares ne ratiniá꞉katste, tsi ratí꞉hawe ne ronhtsánakes ne ratiʼshátstes.

¹⁶ Káti ne iakó꞉ten ronahraratserá꞉ien kí, tánon ne karihwahetkénhsera wátskwes.

¹⁷ “Iakotáskats nón꞉ka ne Rawenni꞉io shesakoharátha; ne káti aorì꞉wa tó꞉sa tsisewakénron nó꞉nenh ne Roshatstenhserowanenhkó꞉wa entsisewatewenhnaiéntonhwe.

¹⁸ Tiorì꞉wa tsi sakoronhiakéntha, ók ensheshakokentorónhnion; shakokarewátha, ók ne ratiánakes tsakoiewenthó꞉tha.

¹⁹ Kwáh enhiaiatanónsthate ne iá꞉iak nihiorì꞉wake ahisateraskwáksenhne; ne tsatá꞉khaton nienwatéraste iáh thaóthen ne kakaronhniá꞉tshera tiahisaié꞉na.

²⁰ Iekaní꞉hare tsi nokwáh natonhkarià꞉kon tsi enshiaiatá꞉ko ne kenhé꞉iatne, tánon nó꞉nen waterí꞉io tsi nokwáh naoshatsténhsera nasareʼkó꞉wa.

²¹ Kwáh ki eniesahiataséhtonhke tsi nokwáh ne ronhnenhná꞉satʼsens, tánon iáh kí tahisaterónhsehke atkaronhniátshera nó꞉nen enwá꞉we.

²² Ne atkaronhniátshera tánon natonhkarhià꞉kon ní꞉se kwáh kí entsté꞉riste, tánon iáh thasetsaní꞉sehke ne kontí꞉rios ne tsi ionwenhtsá꞉te.

²³ Ní꞉se kwáh entsatsianerenhserón꞉ni noneniaʼshón꞉as ne kahentá꞉kes; tánon ne kontí꞉rios kwáh iáh thataiesaʼnikónhraren.

²⁴ Ní꞉se kwáh kí ensaterienʼtá꞉rake ne tsi sahnónshote kwáh kí skén꞉nonk thenkénhake, ní꞉se kwáh iénse ne tsi tisaientatserá꞉ien tánon iáh taserihwánerake.

²⁵ Ní꞉se kwáh kí ensaterienʼtá꞉rake tsi waswatsiratátie tsi enhonatiohkowá꞉nenke, tánon ne seiohokón꞉as kwáh né꞉ne ohonteʼshón꞉as ne tsi ionwenhtsá꞉te.

²⁶ Ní꞉se kwáh thóh nienhénse ne satsatónhkwakon ne nó꞉nenh ensaksthénhake, tsi kí ní꞉ioht nonátsa nó꞉nenh ionorá꞉ri.

²⁷ Ionkwahrihwí꞉sakon kí꞉ken; tánon tó꞉kenske orihwí꞉io í꞉ken. Tánon kwáh iateshiá꞉ti khók í꞉satst.”