Job Tánon ne Raoronhiakensera 41 - Ohiatonhseratokénti

¹ “Haskwé꞉ni ken natiarioká꞉wineha ne katsinoniowá꞉nen ne kaniatarakekowá꞉ne í꞉wes né꞉ne áhaste ne ionriokawinethakwa á꞉ria, khés naserí꞉ie ahtsenahsanérenke?

² Haskwé꞉ni ken nhó꞉nota iaséhta ne raniónsake khés né꞉ne ohíkta tasóheste ne ranhó꞉kwake?

³ Ahiá꞉nhitentaʼse onʼtéken nahonshatsiát꞉kawe? Kwáh onhtèken sak aronhni tsi ahatá꞉ti?

⁴ Kwáh onhtéken aʼhí꞉tsatsiá꞉nerenhseronhni kwáh ken ièntsatenhawe naʼtsatenaskón꞉niate ne tsi nen꞉we aʼkén꞉hake?

⁵ Kwáh ken thóh ní꞉ioht tsi atsiátswatakwe tsi ní꞉ioht nó꞉tsitenha? Khés kwáh aksnerenhke nene aotirihwake ne shonkwetashón꞉ʼahs ken nitiotiionsas?

⁶ Kwáh ken ne ronhtenhninonʼs ahonskenenhá꞉ton thóh ní꞉kon ahá꞉tikarhiá꞉ke nahié꞉saninon? Kwáh ken tahontatsakón꞉hase nerahón꞉ha tsi natehón꞉tere ne rónt꞉kerons?

⁷ Hasʼkweni ken né꞉ne thahón꞉tasherorók꞉te ne tsi ronhé꞉ware ne hié꞉hiakoshikwahronhtsetakwah? Khés ne tatsenontsistó꞉hestakwe ne ionhrió꞉kawinetakwah?

⁸ Tó꞉ka tatsiá꞉tsanahren, kwáh kí ensehiarake naterí꞉iose tánon tó꞉sa nón꞉wenhton thóh nonsatier!

⁹ Né tsi nihorahratseraièn onterihwanirate tsi iáh tho tèhiot; kwáh káti ken í꞉ken tsi thonikonrenhen?

¹⁰ Iáh onʼka thóh nió꞉re tsi tehié꞉niakatste naʼhié꞉re tahonwanikón꞉rahren; Onʼka ahié꞉kweni ne natkenton tahié꞉tane?

¹¹ Onʼka ahié꞉kweni natkenton nahontaièn nètho nahonsahikariakse? Akwé꞉kon ne tá꞉ke nakaronhiati í꞉ih akawenk!

¹² “Kwáh iáh thá꞉takatotate tsi ní꞉ioht ne rasí꞉nakesons, khés tsi natehiotenón꞉hianiton ne raoshaststenhsera, khés tsi niió꞉ianere ne tsi rostsientaronhnion.

¹³ Onʼka ahié꞉kweni nahierisi ne atste nokwá꞉ti í꞉ken ne raotseronhnia? Onkaʼahiekwé꞉ni ne rahiatát꞉tha niaièn ne tsi tehianió꞉sane?

¹⁴ Onka aiekwʼé꞉ni tahonwaská꞉rawe? Ne tsi nihiotʼteron tsi nihanó꞉tsoton.

¹⁵ Né tsi rotstaronhnion nene ratenaies í꞉ken, kwáh ákta tsi tekará꞉nekhanion tsi ní꞉ioht ne kwáh kanoton í꞉ken.

¹⁶ Iáh nenska thóh nió꞉re tsi ákta akénhake shé꞉kon iáh kí nowé꞉ra thá꞉kakweni niá꞉we tsi natetsiatere.

¹⁷ Kwáh enskák ié꞉ken tsi natekakhanion; tehionatatsená꞉wakons tánon iáh tahonton ne takakhá꞉shionke.

¹⁸ Nó꞉nen tenhó꞉tionste teioswát꞉tes, tánon ne raká꞉rakes kwáh né꞉ne tsi ne taiorá꞉kwinekenhenhatse.

¹⁹ Tsi rasaká꞉ronhte tká꞉iakens nó꞉tonhkwah; tehiotsirát꞉te tká꞉iakenstakwah.

²⁰ Tsi tehá꞉nionkaronhte tká꞉ièn꞉kwahrinekens, kwáh né꞉ne teionekonhtses ontat tánon katʼtse.

²¹ Ne raonhní꞉sera wateká꞉tha tanon tewateranekaronʼs, tánon tkenʼtón꞉kwinekens tsi rasaká꞉ronhte.

²² Rá꞉niarake nón꞉we niká꞉ien ne kashaststenhsera, tánon khaniakatstensera rahó꞉henton tehiononhniakwen.

²³ Tsi nateká꞉nanetarion ne raowá꞉ron akwé꞉kon teionatatsená꞉wakons; tsi nihioniron ne raierón꞉ke iáh tewatotrianerons.

²⁴ Ne rawé꞉ri thóh ní꞉iohniron tsi ní꞉ioht nó꞉nenhia, thóh ní꞉iohniron tsi ní꞉ioht ne kwáh ken ní꞉khanenhiaha iethé꞉takwah onénhia.

²⁵ Nó꞉nen thenhá꞉tane kwáh kí rothí꞉teronhni; ne ratishaststes éhren enhonnete nónen enwát꞉wastsake.

²⁶ Thóh sá꞉ne nasarekó꞉wa tahó꞉hiatonko iáh kí teokarewá꞉tha, iáh ó꞉ni ne oshí꞉kwahra, khés kaièn꞉kwire, khés ne kaʼniá ne ieioshí꞉kwahnorhare.

²⁷ Thóh nithá꞉tas ne karistatsi tsi shí꞉ken ní꞉ioht ne kawá꞉he akénhake, tánon ne otsínekwar nikaristothen thóh ne nithá꞉tas kwáh né꞉ne ioièn꞉tát꞉ken akénhake.

²⁸ Ne ahén꞉na iáh thá꞉kakweni nahó꞉tekwahte; iáh ó꞉ni ne iehiá꞉konenhiontsetakwah né꞉tho, né꞉ne iewatons oshé꞉waseri.

²⁹ Ne kaniowanen thóh nithá꞉tats tsi ní꞉ioht ne kawá꞉he; rasterís꞉tha tsi niiohniá꞉kare ne iehiakoshí꞉kwarón꞉tseta.

³⁰ Ne ranekwentó꞉kon thóh nihió꞉iotiies tsi ní꞉ioht ne tehiotshetá꞉rihons oʼtá꞉ra; neh tehsareniatas ne iohiotiies ne ionawasthanawenhke.

³¹ Tehanekontié꞉tha ne kaniatarakekó꞉wane; tánon tehanonwafatha kaniatarakekó꞉wane kwáh nene onón꞉kwa katʼtse.

³² Tsi niehawenon kwáh nene tsiostharáté iohathatse; onkak nene ahionnontonhnionhwe ne kaniatarakekowane kwáh nene iakonontistaraken í꞉ken.

³³ Nónwentsiá꞉ke iáh onka ne satahontahó꞉natʼteke, né꞉ne karió kwáh iáh othennon tehatsá꞉nis.

³⁴ Kwáh akwé꞉kon tesakokkarontsiense ne ronthatonhni; né꞉ne rón꞉wanontí꞉io ne ronthatonhni teonatenonhnianitons kontirhiós.”