Job Tánon ne Raoronhiakensera 34 - Ohiatonhseratokénti

Elihu Wahatró꞉ri Ne Rawenni꞉io Raorihwakwarihshióntshera

¹ Ethò꞉ne ne Elihu iahatashónteren tánon wahèn꞉ron:

² “Sewathón꞉tet nakewenhnaó꞉kons, í꞉se ne sewateʼnikonraʼtókas tiónkwe, tánon takwatahónsatat, í꞉se ne sewarihwaienté꞉ris;

³ asè꞉ken nohón꞉ta ioteniénhtha nowenhnaʼshón꞉as tsi ní꞉ioht ne iesákon watkonhonseratkénhse ne kákhwa.

⁴ Á꞉nion ne tewataterá꞉kwas nahó꞉ten ne tkarihwaié꞉ri í꞉ken; á꞉nion tetewaiaʼtóret tsi naʼtetewá꞉tere nahó꞉ten ne ioiá꞉nere í꞉ken.

⁵ Asè꞉ken ne Job rá꞉wenh, ‘Iáh othé꞉non tewakeʼní꞉kon, tánon ne Rawenni꞉io é꞉ren rohawí꞉ton nakerihwenhthá꞉tshera.

⁶ Tsi ní꞉ioht nahonkatonkweʼtakwaríhshion thóh nitiontʼte nahonkenowénhseke; tsi niwakatkarewá꞉ton iáh testieiewénhtas, ethosà꞉ne iáh othé꞉non tewakerihwáneren.’

⁷ Ónhka thóh nahahiatoténhake tsi ní꞉ioht ne Job, raʼnekí꞉ra ne kaierónhsera tsi ní꞉ioht nohnékanos akénhake,

⁸ Thóh nieré꞉tha ne rateroserónhnis ne karihwahetkénhsera rotiió꞉tens tánon skát꞉ne tehontekhahákwa ne rotirihwá꞉neren?

⁹ Asè꞉ken rá꞉wen, ‘Iáh ónhka teiakoianerasthénhnis naionteniénthen ne Rawenni꞉io ahontahonwaʼnikonraié꞉rite.’

¹⁰ “É꞉tho káti, takwatahónsatat, tsi ní꞉tion ne sewaʼnikonraientáskon, ahí꞉non ít꞉ken tsi nahontá꞉we ne Rawenni꞉io ne thé꞉nen nahá꞉iere ne karihwahét꞉ken, tánon tsi nahontá꞉we ne Roshatstenhserowanenhkó꞉wa ne thé꞉nnen nahá꞉iere ne iáh teioiá꞉nere.

¹¹ Asè꞉ken tsi nenhtsoianénhawe ne raotiiothénseras kwáh kí enseshakokáriakse, tánon ne entsoianénhawe tsi nihatiweienó꞉tens ne enhotí꞉raʼne.

¹² Kwáh orihwiiohón꞉we í꞉ken, ne Rawenni꞉io kwáh iáh othé꞉non tahateriwathentsáte ne karihwahetkénhsera, tánon ne roshatstenhserowá꞉nen kwáh iáh thatehaserí꞉ies ne kaiá꞉neren.

¹³ Ónhka ronwashatstenhserá꞉wi tsi nokwáh nohontsakwé꞉kon tánon ónhka ronwaién꞉ni nohontsakwé꞉kon?

¹⁴ Tó꞉ka ne Rawenni꞉io iatahorihwaiéntase iahonsaháhawe ne raoshatsténhsera rahonhà꞉ke niahónsawe, tánon tahontahatihéntho ne raonhní꞉sera rahonhà꞉ke niahónsawe,

¹⁵ akwé꞉kon tsi nahó꞉ten ne iónhne skátne tsi enkón꞉ton, tánon onkweʼtakwé꞉kon okén꞉ra ientiónton.

¹⁶ “Tó꞉ka saʼnikonraiéntas, saʼthóntet kí꞉ken; satahónsatat tsi nahó꞉ten ká꞉ton.

¹⁷ Né ken nónhkak ieriwásons ne kaiá꞉neren ahiontkó꞉raste? Kwáh ken atsenontá꞉nake nónhkak ne kwáh iakorihwakwarí꞉shion tánon iaʼshástste,

¹⁸ Ónhka ne ronhwén꞉ni ne ronhnontí꞉io, ‘í꞉se ne iáh othé꞉non teserihwástha!’ tánon ne ratishenhnowá꞉nens, ‘Í꞉se ne tionkweʼtasénhskwa!’—

¹⁹ raónha ne iáh tetharihwaráhkwa tsi nokwáh ne ratishenhnowá꞉nens, khés ne sénha ashakokwénienste ne rotikwahtsénions tsi ní꞉ioht ne iakó꞉ten, asè꞉ken orihwakwé꞉kon nen kahioténhsera ne ratsáneke?

²⁰ Kenk nikarì꞉wes sók enhonhní꞉heie; nasónhthen nonkweshón꞉as enhotiiati꞉sonkwe tánon enhontó꞉hetste, tánon ne ratiʼshátstes iehonwatiiathénha iáh nónkwe akotiána thóh teioiéren.

²¹ “Asè꞉ken teshakokanerónhnion tsi nihatiweienó꞉tens nonkwehó꞉kons, asè꞉ken akwé꞉kon ratkáthos tsi natehontekhahákwa.

²² Kwáh iáh káneka ne kwáh tahontahiokaráseke tsi nón꞉we ne ronhnonkweʼtahétkens nahón꞉ton ahontaséhtakwe.

²³ Asè꞉ken iáh teshakorahkwén꞉ni ne kawistáhets ne tsit ónhka akénhake niá꞉ien ne raohénton ne Rawenni꞉io nashakorihwénhte.

²⁴ Teshakoktokwáhta ne ratiʼshátstes ne kwáh iáh othé꞉non taharihwí꞉sake, tánon akorénshons shesakoiaʼtará꞉kwas ne raotinák꞉take.

²⁵ Tiorì꞉wa tsi roterientarastsíhen ne raotiiothénhseras, teshesakokaraténies ne tsi niwashón꞉tes, tánon tehonwahtinénstsias.

²⁶ Shakokónreks ne tsi nihonhnonkweʼtahétkens tsi nikarì꞉wes nakorénshons tehatikánere,

²⁷ tiorì꞉wa tsi iáh ó꞉nen teshonwanonterátses, tánon iáh othé꞉non tehonsterístha tsi nahiotón꞉hake ne raoweiénhnas,

²⁸ káti ne wahatirihon꞉ni tsi nateionsénhthos ne iakó꞉ten niá꞉ien raonhà꞉ke, tánon waothón꞉teʼne tsi teionsénhthos ne iakoroniá꞉ken—

²⁹ Nó꞉nen sák tishotatón꞉ni, ónhka aiekwé꞉ni naieriwaká꞉tate? Nó꞉nen rotkonshasé꞉ton, ónhka aiekwé꞉ni nahonwá꞉ken? Tó꞉ka ken ken tiokwakwé꞉kon akénhake khéhs tionkweʼtátions khók?—

³⁰ káti ne iáh teotiniioserá꞉ien iáh teió꞉wenk nahontkóraste, khés ó꞉ni nón꞉ka tesakonaniká꞉rare nónkwe.

³¹ “Asè꞉ken ónhka ken ahonwén꞉ni ne Rawenni꞉io, ‘Wakatakátstaton ne karewathá꞉tshera; kwáh kí iáh shé꞉kon thahonsatʼsentánion;

³² takerihónhnien tsi nahó꞉ten ne iáh tekatkáthos; tó꞉ka ken niewatié꞉ren ne karihwá꞉neren, kwáh kí iáh shé꞉kon ken tiahonsátiere’?

³³ Kwáh káti ken ethò꞉ne ahonsahiakáriakse nahontesaierítsten, tiorì꞉wa tsi iáh tesanonwéhon? Asè꞉ken ó꞉nenk tsi ensathaterá꞉kwahse, tánon íah ní꞉i; ne kí aorì꞉wa saʼtró꞉ri nahó꞉ten saterièn꞉tare.

³⁴ Tsi niiá꞉kon iaʼkó꞉ien ne kaiatorethátshera kwáh enhionkénhase, tánon ne ronhteʼnikonraʼtókhas kwáh ronón꞉ha enhionkakthón꞉teʼne,

³⁵ ‘Ne Job tsi rathá꞉tis kwáh iáh othé꞉nen teoterièn꞉tare, ne raowenhnahó꞉kons iáh othé꞉non tewatokatsherá꞉ien.’

³⁶ Kaskáneks ken né꞉tho Job nahonwateniénthen kwáh tsi nió꞉re iotón꞉on, tiorì꞉wa tsi nateharihwaʼserákwas ne né꞉tho nihatiié꞉ra ne ionkweʼtatsenokónha.

³⁷ Asè꞉ken iehatashóntera tsi nihotenontsistatsáton ne raorihwanerahaktsherá꞉kon; tehasároks nonwanenhrí꞉en, tánon tehahiaserónhnions ne raowenhnaʼshón꞉as nahotkón꞉ten Rawenni꞉io.”