Jeremiah 8 - Ohiatonhseratokénti

¹ “Né thóh nenhkaháwiʼke ne raotiʼstienhokonkenʼénsʼkwe ne rotinonhtí꞉ioskwe ne Judah ó꞉ni ne rothikháres, ne rothitokenséhaʼkwe, tánon nakorénsons ne Jerusalem ienáhkerehkwe, enskathakwénhke nahtsiathonkwáhkons.

² Tsi ní꞉ioht nakaró꞉ronhke tánon akahiathátenhke, ne raotiʼstienhokónhas thóh nenhʼhiothónhake tsi ní꞉ioht ne óhtha iakonhonsahresensthákwah onhwenhtsiáke kahkéhron. Tánon tsi tenhwahrehniáthonke thóh tsi iohráhkhothe, tánon ne asontʼténhnekhe karáhkwah, tánon ne tsi iotsistokwahrónʼnions, né kí꞉ken nonhkwehshón꞉a ienonhrónhkwahkwe tánon ne tahieriwásniehʼne, tánon ne konhwaterihwaiénhnisʼkwe ó꞉ni konhwathisénhnaiensʼkwe.

³ Tánon nonhkweshón꞉a ne kí꞉ken ronhnonkwehtahétsens tsi nikáien iatehonahthaténron, né thóh nónhwe nihathinahkeréhnion tsi nonhwéshons nahtekhehiarehniá꞉thon, né enthatiráhko nahonníheie tsi ní꞉ioht nahonnónhnheke. Í꞉i, ne Watiá꞉ner Wakeshastsʼtenserowáhnen, wakatáhti.”

Kariwáhneren Tánon Ne Karehwatátshera

⁴ Ne Roiá꞉ner wahakró꞉ri nakʼkheró꞉ri ne rahonkwetahshón꞉a, “Nónenh ónhka enhahiatiénenhʼne, iáh kén tahteshá꞉tas? Nónenh ónhka ensatʼthahatéwahthe, iáh kén tehsátʼthons?

⁵ Nonhtséren káti, akonhkwetahshón꞉a, tsi tahkwatʼkarahthénion tánon kwáh iáh thathiʼtisehwákthons? Ietʼtsihiatienawásthon ne sehwahiatónʼnis tánon iáh tesehwatʼthóntats ne Í꞉i nòkwah nathahontésehwe.

⁶ Kwáh wakatahonshí꞉ioste, ók iáh kíʼ oriwí꞉io tsi tesehwahthatí꞉on. Kwáh iáh ónhka ne tsi nítion tehtsisehwathateriwásthani ne sehwariwahetkénsehras; kwáh iáh tsi nítion tesehwaʼriwahnónhton, ‘Onh nahó꞉ten tahonkaterientahweriéhon?’ Kwáh tsi sehwahiatátʼtions tsi nithisehwanónhwes tsi eh nisehwahiérah, tsi ní꞉ioht ne kosáhtens tehiotskénnion nahonteriʼiósehrah.

⁷ Séhkon ne kawirahkaʼrénies ioteriéntahre kíʼ nónenh tahónthaʼwe; orítes, kentarakonhá꞉ka, ó꞉ni ne tsiskóko ronahteriéntahre nónenh tahonshahonnáthaʼkwe. Ók nakonhkwetahshón꞉a, iáh tesehwahianerenserahientéris tsi ní꞉ioht tsi tkwaniarotáhron.

⁸ Onhní꞉ioht tsi askwéni nashíron shanikonrowánenh tánon sehriwaientéri natianerénsehras? Sehwatʼkátho, ne kaianerénsehras ne tehotiteniónkwen ne iáh tehotiriwahkwahríshions ratiʼiátons.

⁹ Ne tionkwetahshón꞉a ne rontenikonhratʼthókha kwáh enhonwanahtéhaʼte; tehonahnithonniénni tánon rothihiathotaréhon. Rothikenronníhon nakewenhnaʼsónhas; nahó꞉ten ónenh rothí꞉ien ne kanikonhrowahnáhtshera?

¹⁰ Káti kwáh ahonkwetahsehsónhas tentetʼkhéhion ne rahotihentahsónhas tánon ne rothiniákons né nonhnè sá꞉ka. Kwáh onhkwetahkwékon, ahiakonkwetowahnénhke tánon kénk nahiesénnaske, hionteniéntha kanikonhráhton tsi ní꞉ioht tsi ahiontʼwistónni. Akwékon ne rothitó꞉kenhse ó꞉ni ne rothikháres sahkothinikonhrahténnis nonhkweshón꞉a.

¹¹ Thóh nihonahthatiéren tsi shí꞉ken ní꞉ioht nakonhkwetahshón꞉a tsi ronatʼkarewahthánions nék khók ne tehonahtenátʼkonhs. ‘Akwékon skénnenk thíken,’ tsi rónton, kwáh séh iáh skénnenk tèken.

¹² Akonkwetashón꞉a, wesehwahtehénʼken tsioríwa tsi nesehwahtiéreh kí꞉ken ioteriwatehasónhas? Iáh, kwáh iáh thènenh tesehwahthehénʼen; akwékon iáh tesehwateriéntahre onhní꞉ioht ne onekwéntahra nahisehwahiató꞉tenʼne! Tánon káti éhtho ní꞉ioht tsi entisehwahiátenʼne tsi ní꞉ioht ne ronátiakes tsi thóh thihiaténʼen; Nónenh enkwahréwahte, thók niensewatókthase. Í꞉i, ne Watiá꞉ner, wakatáti.

¹³ Tewahkatonwenhtsónihʼne nakhehiataró꞉rohke nakonhkwetaʼshón꞉a, tsi ní꞉ioht ne raiéntʼthos tsi rahróroks ne kaienthótsheras; ók né theshontiérens tsi ní꞉ioht ne watenenharísehres iáh tehionenharentónnions, tsi ní꞉ioht ne sehwahiówahʼne karónta ne iáh thènenh tehioiénthon; akwékon noneráhtes iostatʼthénʼen. Né wahonni, nakorenshóns wahkheríhon né ieshontahsónteren nonhwénhtsia.”

¹⁴ “Onh niʼiotiéren tsi iáh othènenh thetewahtiérah?” Ne Rawenni꞉io rahonkwetaʼshón꞉a wahatiriwahnónhton. “Ánion, tsi tetʼkanáhthanen ne wathahenró꞉the nosténra ne tsitkanahtó꞉wahnenh nienhiakwáhtatkhe tánon thóh nónhwe ienhiakwénheie. Ne Roiá꞉ner onhkwahNí꞉io sonkwahriwénhton nahiakwénheie; teshonkwáhwi ne iakorhiótha ahiakwahnekírah, tsioríhwa tsi ionkwahriwáhneren tsi nòkwah ne rahonháke.

¹⁵ Hiakwaskáneks ne skénnenh tánon iakáhewe ne ahonshontetiénton, ók iáh othènenh tehiorihonthákwen; khék kahteronkwahtsheraʼónhwe.

¹⁶ “Ne tehiakwahtátʼtions ónenhk tsitʼkanató꞉wahnenh ne Dan thónnes; hionkwahthónte tsi naʼtehonninionkwísahrons ne raotitʼtienenʼókonhs kosáhtens. Ohontsiakwékon wahtiowisónkwes nónenh ne rahotitʼtienenhókonhs wahonthonnisehrahkarénisʼthe. Ne tehiakwahtátʼtions wahónnewe ne ahathiriwénhtho nonhtionhóntsias tánon kwáh tsi nahoténsons ne kaiénton, nonhkwahnáthakon ó꞉ni akwékon nahonkwetahshón꞉a.”

¹⁷ “Sehwahthatenikonhráhrat!” ne Roiá꞉ner ráton, “Wahkhehiateniéthaʼse nóniare ne tionháke, iotʼniarákʼterons ne ne iáh tahónthon tahkonhwanahróhthon, tánon kwáh enhieshakári.”

Jeremiah Wahshakonikonráksense Ne Rahonkwetahshón꞉a

¹⁸ Nakenikonhrakʼséntshera iáh tahónton ne ahonsahkanikonhrentʼthóthon; Wahkerhiashanónhwaks.

¹⁹ Sahtahonshá꞉tat! Ohontsiakwékon Wakatʼthónte nakonhkwetahshón꞉ʼa tiatenhonséntʼtho, “Ne Roiá꞉ner iáh kén ónenh Zion tèsres? Ne Zion ahonnonhtí꞉io iáh kén ónenh thóh tèsres?” Ne Roiá꞉ner, ronwanonhtí꞉io, wathariwahsehráko, “Onh nonhtiéren tsi waskenakónhni ne tsi wasehsénnaien ne sahiatonnishón꞉a tánon ne tsi watesehʼhiatentʼtsóthaʼse ne iáh othènenh tehatiriwásthas niʼiohʼokónhas?”

²⁰ Nonhkweshón꞉ʼa tiathotihénrete, “Nakennáhke iothohétston, ne kaienthótsheras ioteweiennenhtáhon, ók iáh kíʼ tetionkwahniaʼkénʼen.”

²¹ Tewakherhiasahkwentéhon tioríwah nakonhkwetashón꞉a tsi tehonwanaskwasehronkwáton; wakatʼtiónnion; kwáh íken tsi tewahkáthonʼne.

²² Iáh kén thènenh tetkanonhkwaʼtseráien ne Gilead nónhwe? Iáh kén tethonatetsientsheráien? Nonhtiéren, káti, nakonhkwetaʼshón꞉a tsi iáh teshonwathitiénton?