Jeremiah 6 - Ohiatonhseratokénti

Jerusalem Né Tekonhwahwáhnen Ne Tehontátʼtions

¹ Ne Benjaminró꞉nons, iasehwahkwísron sehwahthasehtáhna! Sehwahiáken ne Jerusalem! Sehwatátis ne iehonrahwátstha ne Tekoa nónhwe tánon sehwattsennónni sehwatsienkwarónniat nahwenéhake ne Beth Haccherem nónhwe. Kakahronniátshera tánon kariwahiesáhtshera tóh꞉wa ahónwe nothoréhke nénhtewe.

² Tsi nikanahtí꞉io ne Zion, ók kíʼ enkariwahthónton.

³ Rontinonhtí꞉ios thóh nónhwe nenhontenátaien skátke ne rahonnonhkwetashón꞉has ronterí꞉ios. Kanatatʼthóntie enhonthathosehrotónnion, tánon sahtihiatátʼtion kwáh tsi nónhwe nenhonskáneke tsi enhonnátahien.

⁴ Kwáh enhonníron, “Sewahthatewehienénhtan niahisehwahtiathónti Jerusalem! Sehwahthateweienénhtanh! Éntie nenhkárahke ientewahtiathónti!” Ók ethóhne enhonníron, “Sóhtsi ónenh iokárah, ónenh thóhwa iotennisehrohétston, tánon nokarasnhéha ónenh ínhon nióre tsi iothasáhthare.

⁵ Tsi niwahshón꞉tes ienhietihiatiatónti; entewahrihwénhtho ne tekahnahthanákton osténra wahthahénrohte.”

⁶ Ne Roiá꞉ner roshaststenserowáhnen shakonáhon kí꞉ken rontinonhtí꞉ios nahathirontiákon tánon rahthithonhionthónnion onhnaiáwenhne ne tahkonwawáhnahke ne Jerusalem. Ráhwenh, “Kwáh entréwahte kí꞉ken kanahtowáhnen tsioríwa tsi kwáh titkáhereh ne kariwahiesáhtshera.

⁷ Tsi ní꞉ioht ne ionáhwehrohʼte tiókonte ionekaien ne kanekí꞉io, thóh káti ní꞉ioht ne Jerusalem tiókonte áse iahonnihátie nahorihwahetkénsehra. Wakátʼthonte aterihiósehra ó꞉ni kariwahiesáhtshera ne tsi kanahthowáhnen; kanhratharinétsheras tánon iontkarewahthánions nék khók katʼkáthos.

⁸ Jerusalemró꞉nons, kí꞉ken ne tekanikónrahre né ahisharonkáten, tó꞉ka iáh enkonhiatewénhthete; Ne tsi sahnahthowánenh ne enkónhniathe ne kahenthakeʼkó꞉wa, tsi nónh ne iáh ónhka teienáhkere.”

Waterihiosehraʼnónhwe Israel

⁹ Ne Roiá꞉ner Roshastsʼtenserowánen wahakénhase, “Israel kwáh enkonwahnóhare tsi ní꞉ioht ne onénhare kahéthaien kwáh tsi niaʼtewáhiake tsi wahiákwen. Káti ónenhk tsi kwáh niaʼtehionkwéthake tsi ensehʼniákente tsi shé꞉kon iohnákthote.”

¹⁰ Wakʼkeriwahsehráko, “Ónhka enhionkathahónsahthate tó꞉ka enkhethárase tánon nahkheronkáhten? Rothinonhtsisthaʼnírons tánon iáh thahonthóntahte nahonthahónsahthate ne sateriwahnothátshera; enhatisteristhe tsi nahó꞉ten tatró꞉ri nahkíron.

¹¹ Ne shanakwáhtshera tsi nòkwa ne ronónha tiotétsʼnonh ní꞉i nahkonháke, Saiá꞉ner, tánon iáh tatkwéni ne sénha akahthakátsthate.” Ethò꞉ne ne Roiá꞉ner wahakénhase, “Tasáweron nakenakwáhtsera rononhà꞉ke ne ratitsaokónhas thóh tsi kanatʼtathátse tánon thóh tsi ronatsataró꞉ron ne kenhnithotiiónsa. Ne rotiʼiakʼkons one ne iotiʼiákʼkons kwáh ki ienhkonwatiʼtenháhseron, tánon iekaníhare ne kwáh tsakóions kwáh iáh tashionthatenónstate.

¹² Ne rahotinonhsahsónhas akóren tentʼthonwénhnon, tánon ne sáka ne rahothihenʼthasónhas ó꞉ni ne rothiniátʼkonhs. Kwáh enkheréwahte nonhkweshón꞉ʼa ne kénʼen ionwenhtsiáte.

¹³ “Onhkwetahkwékon, ahiesenhnowánenhke tó꞉ka ó꞉ni kentʼnaiesénhnaske, ronteniéntʼtha kanikonhráhthon tsi ní꞉ioht tsi ahontʼwisthónni; iekaníhareh ne rotitó꞉kense ó꞉ni ne rothikháres sahkotinikonhraténnis nonhkweshón꞉ʼa.

¹⁴ Thóh nihonahthatiéren tsi shíken ní꞉ioht nahkonhkwetahshón꞉a nék khók ne tehonahtenákʼkonhs. ‘Akwékon tiehiohiánere,’ rónton, nónenh nahkwékon tiewahétken.

¹⁵ Ronthéhes onhtèken tioríhwa tsi nihonahtiéren kíʼ kén iotheriwatéhas? Iáh, tehonahthehénʼen; akwékon iáh tehonahtheriénthare onhní꞉ioht ne onekwénthara nahathihiathótenʼne. Tánon káti kwáh éhtho ní꞉ioht tsi enthathihiátenʼne tsi kíʼ ní꞉ioht ne ronáhtsiakes; Nónenh enkheréwahthe, kwáh totʼtsienwatót꞉ten ne ronónha. Í꞉i, ne Watiá꞉ner, wakatháti.”

Israel Ontkénrahthe Ne Rawenni꞉io Rahorihwahshón꞉a

¹⁶ Ne Roiá꞉ner washakawénhase ne rahonkwetaʼshón꞉a: “Tsi thetsiathahásehre iatesehwáhtanh tánon tesehwatʼkathónnionf. Sehwahrihwanónhton ne ohahakáhion tánon kanónhwe ne kwáh tsiohahí꞉io. Thóh nónhwe nashaténti, tánon skénnen tsi enshón꞉nheke.” Ok wahonhní꞉ron, “Iáh, kwáh iáh thahiakwatónhtate!”

¹⁷ Ethóhʼne ne Roiá꞉ner wahshakohiataráhko ne ronterí꞉ios nahonthahónsahthate nahonthakawenhnóthaʼne ne iehonráwatsthe. Ók wahonníron, “Iáh tahiakwahtahónshathaʼte.”

¹⁸ Káti ne Roiá꞉ner wahénron, “Sehwathahónshatat í꞉se ne tiónkwe, tánon sehwahtherientáhranh tsi nenhothihiáthawenh nakonhkwetahshón꞉ʼa.

¹⁹ Shathahónsahtat, onhwénhtsia! Né꞉ne kahrewahthátsheras norihwahkwékon tsi nihonahtenikonhrónni takháwi ne kahkaronniátshera rononháke kí꞉ken onhkweshón꞉ʼa, tsioríhwa tsi wahathikénron nahkerihonniennítshera tánon iáh tehonahtewenhnaráhkwen nakewénhnas.

²⁰ Nahó꞉ten katsteristhákwa ne wenhnekeráhkon tionhkhawitenni ne Sheba nónhwe, ó꞉ni ne iekhwá꞉konhonsthákwa ne ahinónhson nióres tionhontsiaténion? Iáh thatiéna ne rahonahthatawítsheras iáh ó꞉ni tahonkherientí꞉io ne rahothiriwiʼiosehokónhas.

²¹ Tánon káti kwáh enkhehiónnien kí꞉ken onhkweshón꞉ʼa nahothahonahsíhtsiake tánon nahathihiatiénenhʼne. Ne iatatró꞉nah ó꞉ni ne sahkothiʼienhokónhas kwáh enhonníheie, tánon ó꞉ni ne ateró꞉sehras ó꞉ni ne tehonʼnonhsahnekʼkhánions.”

Wahonwahthinénhrenten Othoréke Nonhtháwe

²² Ne Roiá꞉ner ráton, “Nonhkweshón꞉a othoréke nonhtahiakawehnonhátie; rotishastsʼtenserowánenh ahínon nióre tahthináhkehre ronthateweiehnéntas nahonterí꞉io.

²³ Wahthonʼnékwe ne rahonahénnas ó꞉ni ne asahrekówas; rathiniakátsthe tánon iáh tehonherhiása. Thóh ní꞉ioht tsi rahthiwenhnóten tsi ní꞉ioht ne kaniatharahkhekówa nónenh tehiowerahtháse, tsi rothíseh. Ronahthateweiennenhtháhon nahonterí꞉io ne Jerusalem.”

²⁴ “Wahakwariwahronhke,” ronton ne Jerusalemró꞉nons, “tionkwá꞉tianenhen; ne tehionkwawahnenh ne karonhiakensehra ó꞉ni ne kanonhwatʼthentshera tsi nʼi꞉ioht ne iónkwe ioronhiaken tsi iowirahienthasere.

²⁵ Iáh tehiakwatenientʼtha ne kahethake niahiakwe tó꞉ka ó꞉ni ne tsi iohathatie ahiakwatenti, tsioríhwa ne tehiakwatatʼtions tsi ronhennenhawe tánon ne kahteronkwatshera iakwahiatatʼthonties iwes.”

²⁶ Ne Roiá꞉ner washá; kawenhase ne rahonkwetashón꞉ʼa, “Kahiare sehwatʼtseronniat tánon okenrahke sehwatʼkarhateniat. Sehwatʼtionnion kwáh kahkasehró꞉wahnenh tesehwasentʼtho thóh nahiothon tsi shiken ní꞉ioht ne enskat khók iakowiraienthakwe, tsioríhwa nonhka tahre nahiathonte tentsiawenhtsi ienhiatiathonti.

²⁷ Jeremiah, sehiathenienten nahkonhkwetahshón꞉ʼa, tsi ní꞉ioht nenh satʼkense ne karisthatsi, tánon nahishá꞉thokense onhʼnihiothikwenion.

²⁸ Kwáh rathikwekon rothinonhtsistahnirons ionkwetatʼsenhs, thóh nihionirons tsi ní꞉ioht ne otsínekwar nikaristhotens ó꞉ni ne karisthatsis. Rathikwekon kahetkenton, tehonahkwahtahsehatie tánon aktsioken tehonahreniá꞉thonhatie.

²⁹ Ne karisthatsi kwáh íken tsi watharihatha, ók ne kahiase karisthatsis iáh tekawistahnahwenhtha iáh ó꞉ni tahtekanahwenhtha. Kwáh iáh othènen tekariwastha nahonsahkhekwatahko nakonkwetahshón꞉ʼa, tsioríhwa tsi nikáien ne ronnonhkwetahetkens iáh éhren tehonwathihiatenhawitha.

³⁰ Ne enhonwatinahthonkwahke iáh othènen tehathiriwasthas iáh othènen tehiorihonte, tsioríhwa Í꞉i, ne Watiá꞉ner, wakhekenron.”