Jeremiah 51 - Ohiatonhseratokénti

Shé꞉kon Wéso Ne Karewahtátshera Enhotíʼraʼne Ne Babyloniaró꞉nons

¹ Kén nahó꞉ten ráton ne Roiá꞉ner, “Kwáh hienkaténieʼthe ne rahoshastsʼténsera ne shakothóntha tsi nòkwah ne Babylon ó꞉ni ne Babyloniaró꞉nons.

² Tehononhóntsathe entʼthónʼne nakonhwáhsehwe, tsi ioweráhre ienkáhaʼwe tsi ní꞉ioht ne káwahe. Kwáh tsík nonhwéson nónhwe nenhthónʼne niakonhwahtsiatónhti nenhwenhniseráhte tsi naʼtenhionikonhrárahke.

³ Tó꞉sa ietʼtsiríhon ne ronhtsikwahrohʼhiaks nahontierónhniaʼthe ne ionhteriʼiostáhkwáh tó꞉sa ó꞉ni tehónnek ne rahotiʼshí꞉kwahras. Kwáh iáh ónhka thaʼhieniákenhne! Kén nahonthahiakóhionʼke tó꞉ka ó꞉ni ahiakosténhaʼke kwáh rahtiʼkwékonh tsi enhonwahnáhthonʼte.

⁴ Enhathihiatiénenhʼne nahonní꞉heʼie rahononhontsáke ne Babyloniaró꞉nons, ronhwahnaháson nahonní꞉heʼie nahonahtaʼkónhsons.

⁵ Í꞉i, ne Watiá꞉ner KeʼNí꞉io Keshastsʼtenseroʼwáhnen, iáh tekhehiatewenhthéton ne Israel ó꞉ni ne Judah, iáh wehrohátien tsi rotiʼriwáhnerenh tsi nòkwah ní꞉i, ne Rotokénti ne Israel.

⁶ Sehwatèko ne Babylonia nónhwe! Sehwahthaʼtenónhstat! Tó꞉sa sewahiéna tsi wahterísthaʼien ne ahorewahtátshera! Roiá꞉ner seh ónenh rahówenk ne kawistáheks ne ahonshaʼhakárhiaʼke; kwáh enkanahnónhake tsi enshaʼkáhrhiaʼse.

⁷ Ne Babylon thóh nikahiató꞉tenhne tsi ní꞉ioht ne owistanóron kátʼtse ne Roiá꞉ner rahtshanáhke ráhaweh, nètho kátshe ne꞉ne róhson nohontsakwéhkon ahatinekírahthe tánon ienhothinahkónhniaʼthe.

⁸ Ók thontahiawénhstsi, ne Babylon ó꞉ni wakonhwahsénhni. Tsehwahsénhtʼthos, tánon táhtion ne ahonónhkwah, Tó꞉ka nónhwa enkahkwéni ne shé꞉konh ahoshaʼkonhwáhtienʼthe.

⁹ Ne thiononhontsá꞉te ne nón꞉we nihatinákeréhkwe wahonhní꞉ron, wahakwateʼnién꞉ten nahiakwasnié꞉nonhke Babylonia ok sótsi wahonkwanísko. Á꞉nion ó꞉nenh tsi tewathénhti. Rawenni꞉io rarewá꞉ton ne Babylon kwáh roshatstenhserakwé꞉kon tánon kwáh roriwéntʼtho.”

¹⁰ Ne Roiá꞉ner sehsonkwahriwahʼsehronhniénhni. Káts, ánion Jerusalem nónhwe ietewahrihówahnat orihwahkwékon tsi nihohieráhnion ne Roiá꞉ner onhkwahʼNí꞉io.

¹¹ Sehwahiotiʼhiónnion ne kaiénkwires! Tésehwak ne tehioniatástha! Asèken ne Roiá꞉ner wahshaʼkahorhiáneronh ne rathiʼshástsʼtes ne Ronhthiʼnonhtí꞉ios ne꞉ne Medes niahathiʼnenhrahsehrónhni tsi nòhkwah ne Babylon tánon akonhwáhthonʼthe. Né kí꞉ken tsi nenh shaʼkarhiákʼthe tsi nòkwah nónhka ne iáh tehiakorihwahkweʼniénston ne Raononhshaʼtokentiʼkó꞉wah. Ne iesakonatsiatóntses ronaterihón꞉tons wahonwatirihónten, “Sewahiotiiónhnion ne sewaienkwí꞉res! Sewaweienénhta ne tesewanientenstáhkwa!

¹² Sewahniataʼrahkétsko ne ionterihiostáhkwah tsi nòkwah ne Babylon! Shaʼietʼtsitsiokwahiésten ne ratiʼnikónhrahre tánon teietʼtsítas nahontenhnikonhráhren. Sewahtaʼtewenienhnénhtan nahisehwahnénhrenhte,” asèken ne Roiá꞉ner kwáh enharihwahiérihte tsi nihotenikonrónhni tsi nòhkwah ne Babylon.

¹³ Í꞉se ne tiónkwe ne kanahtátʼtha sehwenhterónhton sewahkwáhtse tsi níkonh sehwahteniataʼréhnions, kowáhnenh sehwáhien ne iotkeronhtáhkwah, ók ne sáhkwenk ne tsi ieiótʼthe ónhweh. Ne tsi sónnhe enkahiákon kwáh tsi ní꞉ioht ne ónhkak wahesehrihiétiaʼke.

¹⁴ Ne Roiá꞉ner Roshastsʼtenserowáhnenh kwáh tsi rónhnhe rorihwahnirátston kwáh ronahtsiokowáhnenh enteshakohiaténhaʼwe niakonwahtsatónti ne Babylon kwáh enthonenhiotónhake tsi ní꞉ioht ne hiohonwáhrahreh tsistáraʼre, tánon kwáh enhonskwahrahrónhnion tsi ieshaʼsénhnion.

Ne Teharihwaʼkwáhtha Ne Tahonwanonhweráthonkwe Ne Ní꞉io

¹⁵ Ne Roiá꞉ner tsi rahonhontsíshon raoshastsʼténsera róhstʼton, rahónʼa raoʼnikonhrohwahnhátshera rótston tsi rahonhontsíshon tánon wahthaʼtirónhten ne tsi karonhiáte.

¹⁶ Ne nónenh enhatáhti, enkáwehre ne tsi karonhiáte. Enhatsikerahriónhnion éhneken ne tsi ionhwenhtsáte. Enthaʼténieʼte ne tahonninhekarahwáhnion skátʼke nokennorésehra tánon enhanonhtónko ne tsi rahthaʼkwenianientákwahs ne takawehráhthaʼse

¹⁷ Ne tahonthaʼhonwatenienténsʼthe, onhkwetakwékon tsiakotónhnokʼthe; tánon kwáh iáh othènen tehiakóien ne kahiatorehtáhtshera! Ratiʼhiatonhniseronhniánions, ók ne kahiatonhnisónhas kwáh enhonwahnahtéhaʼthe ne ronhwahtiʼhiatíson, asèken tsi nihatiʼhiatóten iáh tó꞉kenske tèken. Asèken iáh tehonnónhnhe iáh ó꞉ni tehothishastsʼtenseráhien.

¹⁸ Ne kahiatónhnis iáh othènen tehatiriwásthas; rohthinhówenhs! Ienkáhewe nónenh kwáh ratiʼkwékon enhonwahnáhthonʼte.

¹⁹ Ók ne Sakoní꞉io ne Israerʼró꞉nons iáh ne kahiatónhni tèken! Kwáh rahonhatsíwah norihwahkwékons rohshahánion tsi nihiothánions, ne rahonkwetaʼshón꞉a thóh ratiʼhiátareh, kwáh rahónʼa shakokweniénston. Né꞉ne Roiá꞉ner Roshastsʼtenseroʼwáhnen ne raoʼsénhna.

Ne Roiá꞉ner Raoʼnekonhrèstha

²⁰ Ne Roiá꞉ner ráton, “Babylonia, i꞉se nahkenekonhrèstha, naʼkateriʼiostáhkwah tsi wahterí꞉io. Í꞉se wakonhiásʼthe ne thaʼkhenénhstsake nonhkweshón꞉a ó꞉ni ne tsi kanahkerahserahkéronhs,

²¹ Tsi tinikwéhkonh tenhkhehiathá꞉rihthe ne koshá꞉tens ó꞉ni ne rohthishá꞉tens, ne thaʼkasehrehtaríhthonʼke ne otsiónhkwas ó꞉ni ne ronhwahnahthóhres,

²² nahonwahthiʼnonhwahrhiakónhnion ne ronhnónhkwe ó꞉ni ne konhnónhkwe, rohtiksténhas tánon ne ratiksaʼokónhas, ne nithohʼthihiónsas ó꞉ni ne iáh tehiothiniáʼkhonhs.

²³ Tsi tinikwékonh kwáh tenkhehiatárihte ne teiotinahkaronhtón꞉a sahkothinónhʼne ó꞉ni ne katʼtshénenhs, rathiʼiéntʼthos ó꞉ni ne tehiothináhkares tionónhskwahronhs, ó꞉ni ne rahthinenhrahkwenihios tánon ne rathikóras.

Ne Babylonia Ahorehwahtáhtshera

²⁴ “Tsi nenh shaʼteróhroke, kwáh ensetʼkhárhiaʼse ne Babylon ó꞉ni nonhkweshón꞉a ne Babylonia nónhwe ne tsi niwahétken tsi nishaʼkonahtiérahse nakonkwetaʼshón꞉a ne Jerusalem nónhwe,” ráton ne Roiá꞉ner.

²⁵ “Satkátho, O shastsʼtenserowáhnen ionónhte, sonhontiéntʼtos! Í꞉i ne tetsiatátʼtions” ráton ne Roiá꞉ner. “Kwáh ienkonhiéna, tenkonhionhontsoʼiénhten, tánon ne wahkenrontáhkwen ne iotetʼkháhon nónhwe ienkonhiatónti.

²⁶ Kwáh káiase enshá꞉ton tsi nénhwe. Iehióhe shé꞉kon ne shaʼnenhiasónha kwáh iáh nonhwénhton tahonshónston nakanonhsonhniáton. Kwáh kíʼ tohkénʼen tsi ienhieshaʼsaháten,” ráton ne Roiá꞉ner.

²⁷ Sehwahniaʼtarahkétsko ne ieniatarohharáhkwah ne tsi ionwenhtsáte, sehwahhonráhwat nonhkwéhne; né nahonthatewehhienénhtahte nahonterí꞉io ne Babyloniaró꞉nons! Iahitsinónhtkonh ne tsi kanakerahsehrahkéronhs ne Ararat, Mimni, tánon ne Ashkenaz ne iakonhwahtsatónti. Tsi sehwahiataráhko ne rahsenhnowáhnenh nahanenhríhsehre tsi iahiashaʼkotsatónti. Thaʼietʼtsihiaténhaf ne kosáhtens tánon thóh iahionahtsókwahske tsi ní꞉ioht ne tsistárahre.

²⁸ Ietʼtsiweienénhtanh nonhkweshón꞉a nateriʼiósʼsehra tsi nòkwah ne Babylonia. Iahitsínonhk ne rotiʼnonhtí꞉ios ne Media, ó꞉ni ne sahkothihéntenhse tánon ne rohnaterihóntons, tánon ne ronterí꞉ios akwékon tsi nonhwéhsons ne kanahkarehserahkéronhs ne rohnónha ronhsáhrihne.

²⁹ Babylon tehiohiathishón꞉kwah tánon ioterahkén꞉rieh tsi nihioronhiáken, asèken tsi niaʼtehioriwáhke ne Roiá꞉ner rohtenikonhrónhni tsi nòkwah ne ahónha seh thóh ní꞉ioht iáh thènenh thateskahthénion. Ne Babylon kwáh enkariwahhiésha kwáh iáh ónhka éhtho tahonsahienáhkerahke.

³⁰ Ne kwáh thatishástsʼtes nahonkwetaʼshón꞉a ronhterí꞉ios iáh ó꞉nenh tesonterí꞉ios. Rahonahtosehrahkónhsons khók rahthiterónhton. Rohnahnikonhroktháhon. Wahthonatʼthonwisenhtserónhten. Ne rahthinenhrénhtha wahontenonhkwahtetʼthánion tánon wahthatirihthánion ne tsi iohtenhenrahkarónhtons ne kanatowáhnenh.

³¹ Ne rathiriwahkaréhniens tehonthihashiónkwahs rahtítatke nahonwahróh꞉ri ne Ronhnonhtí꞉io ne Babylonia nónhwe nètho rahonátha kwáh tsík nonhwéhson ne kanátakon tsi toʼnahthawehiáton.

³² Kwáh iahoʼkanèkah tetsóien nahontèko akwékon ne tsi hiohaténion rohthinhóton. Ne watenhenróhtons ne tekanahthanátʼton iotéhkha, tánon ne ronterí꞉ios rohnahteronhienténhni.

³³ Asèken ne Roiá꞉ner Roshastsʼtenserowáhnenh, ne sakoʼNí꞉io ne Israel, ráton: ne Babylon thóh nikahiató꞉ten tsi ní꞉ioht nonátsa ne tsi iewahétʼta oskwenhkaráhke káien, ónenh tóh꞉wah takonwaskwáhsehron. Iáh teskaríwes nahoientkwahkwáhtshera entewahtásahwenh.

³⁴ “Ronhnonhtí꞉io Nebuchadnezzar ne꞉ne Babylon nónhwe wahshonkwahwáhrahke tánon wahteshonkwahnénhstsiaʼke tánon iahashá꞉haʼte nonkwahshastsʼténshera. Iashonkwahtsiathaʼnhékwahne tsi ní꞉ioht ne kwáh tehiotsinonhwahnónhiani tánon wahathenekwénhthike nónhkwah kwáh sehʼtsérah. Teshonkwahhiathiʼnekénhʼen ne kwáh í꞉i onhkwahnahkerahseráhkon.

³⁵ Aiáwenhs ne Babylon ahonshaʼkonhwahkárhiaʼtse tsi níkonh ionkwahteniakatsʼténhni,” rónton ne Jerusalemró꞉nons. “Aiáwenhs ne Babyloniaró꞉nons kwáh akanahnónhake tsi ahonshaʼhonatʼkárhiaʼse tsi níkonh shaʼkothinetkwáhthon,” wáthon ne Jerusalem.

Ne Roiá꞉ner Kwáh Enhasniénonh Ne Israel

³⁶ Ne Roiá꞉ner warénhase ne Jerusalem, “Kwáh Í꞉i tenkonhriwahkénahse ne sariwahshón꞉a, tánon kwáh Í꞉i ensetʼkhárhiaʼke ne shaʼrihwáhke. Enstátʼthaʼte nahoniatharáhshona, ó꞉ni nahonehkanos.

³⁷ Ne Babylon thóh nenhiáwenhne tsi ní꞉ioht ne ioheshastsʼtó꞉koʼte tsi nónhwe ne konhtírhio khók konhtináhkereh. Kwáh tehiótion nahiontkátho; iáh ónhka né nónhwe tahonshaʼienáhkerehke, tánon tsi nihiákon nenhiontkátho kwáh enhiakóteronhne.

³⁸ Ne Babyloniaró꞉non skátʼke tsi enhonthatenahkónhni tsi ní꞉ioht ne kénreks tánon enhontewenhnhóten tsi ní꞉ioht ne kénreks owírah.

³⁹ Tsi nikaríwes rotinahkwénhen kwáh enkhekwahthákwahse nahkhekwahérahse tánon enkhehiónnien nahotiʼnonhwahráhton, tsi nióre ienhontítahwe, ne꞉ne iáh nonhwénhton tahonshaʼhatí꞉ie, ráton ne Roiá꞉ner.

⁴⁰ Ienkhehiaténhaʼwe tsi ní꞉ioht ne teiotinahkaronhtónʼa tánon ne teiotinahkaronhtónʼa rátsinn ó꞉ni ne kaiatákeras ne tsit-konhwahtirhióstha.”

Tsi Nienhiohiátawenh Ne Babylon

⁴¹ Onh né naháwenhne ne Babylon tsi takahiátenhʼne, kashástsʼte Babylon, ohontsakwékon tekonhwahrénhsaronhs! Ohontsakwékon skanórhonhs ne iáh tahonthahonnhéthaʼkwe ne rahthikárahke tsi rontkáthos tsi takahiátenʼne.

⁴² Ne kaniatarahkhekówah tontnekahkaráhthaʼte tánon wahennhóton ne Babylon nónhwe tánon ne tahioróhrotʼthe tsi naʼtehiotenonhianíton iononhtakwahronhtónties.

⁴³ Ne ahonahtowáhnenhs ónenh iáh othènen tetsoríhonte; kwáh seh iahonwenhtsiatʼténhake iotónhon ne꞉ne kwáh iáh ónhka né nónhwe tahonsahionʼnáhkerehke iáh ó꞉ni nónhka thóh nónhwe tahonsahiontohétsthaʼke.

⁴⁴ Tánon kwáh entréwahte ne Bel né꞉ne Babylon aoní꞉io, tánon ensetʼtháko ne kahshá꞉kon tsi nahó꞉ten iehioʼnhekwáhnon. Nonhkweshón꞉a iáh ónenh shé꞉kon thatahontáien nahonshaʼkonhwahsénhnaien. Ne tsi wahtenhenró꞉thaʼkwe ne Babylon karehniénton.

⁴⁵ “Takwahtahónshaʼtat, akonhkwetaʼshón꞉a, sehwatèko ne Babylon nónhwe! Sewahtateniákent! Sehwahniákens tsi nòkwah ne tehiotenonhianíton rahonahkwáhtshera ne Roiá꞉ner.

⁴⁶ Ók tó꞉sa tesewahnikonhró꞉ko nónenh ensewatʼthónteʼne nenhtewahtiérenhte ensehwariwáhronhke tahotinénhrihʼne. Asèken iatehioseráhke né thóh ní꞉ioht tsi ensewahriwahrónhkhake. Ethóhʼne kwáh ienkáheʼwe ne tahotiriwahráhsehron ne ratikoráhsons tánon enhonterihioháton tsi natehónteronhs.

⁴⁷ Asèken kwáh oriwiʼiohónwe tsi táhwe ne kawistáheks nónenh kwáh entréwahthe kí꞉ken kanatowáhnenh tánon tsienwahkwekónhke nahohiatonhnisónhas. Kwáh ahonahkerahserahkwékonh tsi enhonwahnatéhate, tánon nahonwehiontashón꞉as kanathakónhsons tenhiahonwehionthontárohke.

⁴⁸ Rahtiʼkwékon ne karonhiáke ó꞉ni ne onwenhtsáke rononhnhénions tenhatiríhwahkwe natonnahráhtshera, othoréhke nónhwe enthatiʼiénthakwe tsi nenhtʼthónʼne ne sahkonahtóntha ronhterí꞉ios niakonwahtiatónhti ne Babylon.” Ráton ne Roiá꞉ner.

⁴⁹ “Kwáh tsi nihioiéren ne Babylon tsi iakononhwahrhiakónhnions nonhkweshón꞉as ne Israeronónhke nónhwe tánon nakorénhshons nakʼtésons nónhwe ne tsi ionhwenhtsáte, káti ónenhk nahonkwetashón꞉as tsi enshonwahtinonhwahrhiaʼkónhnion.

Ne Rawenni꞉io Raoteriwahnhotátshera Tsi Nòkwah Ne Israerʼró꞉nons Ne Babylonia Nónhwe

⁵⁰ “Wáhs tsi nítion ne tsi sehwahniákenʼse nasarehkówa! Tó꞉sa sehwáhtak tánon nahisehwahteró꞉rohke—sehwatèhko tsík sénhak shé꞉kon sewahkwénion! Tsi sehwehiárak ne Roiá꞉ner, iawerohátien tsi aínonh nióre tsohontsáien tisewahnáhkere, tánon tsi sehwanónhshoʼthe ne Jerusalem sewahnonhthonʼniónhet.”

⁵¹ “Hionkihiateháthon,” rónhton nonhkweshón꞉a, “Hionkinikonhraksáhton tánon hionkihiatéhaton tioríhwa ne Roiá꞉ner Raononhsatokentikówa tsi thekentiónston ne꞉ne tihononhontsáte eh nihotiʼiéren.”

⁵² “Hén ráton,” ne Roiá꞉ner, “Ók táwe ne tsi kawistáheks nónenh ne Babylon ahohiatonnishón꞉a kwáh enkarihwahtóntonke. Tsi nenhonnonhséhnen nahonkwetaʼshón꞉a ne tsi ionhontsáte enhiakokthónteneh.

⁵³ Iawerohátien ne Babylon tsi iéwas tsi nitiótʼte ne tsík karonhiáte, ó꞉ni iawerohátien tsi sénha ioshastsʼteserowahnenhenhátie, kwáh kíʼ entekhehiaténieʼte ne tehontátʼtions nakonhwahnénhsko,” ráton ne Roiá꞉ner.

Ne Babylon Kwáh Tohʼkénʼen Tsi Wakariwahiésa

⁵⁴ “Sewahthahónshatat! Sehwahthónte kén tsi natewahséntʼthos ne Babylon, tsi nihiorónhkat ne kakahronhniátshera ne꞉ne Babyloniaró꞉nons rahononhontsáke nitewéhtha.

⁵⁵ Asèken ne Roiá꞉ner rohriwahthontonhonhátie ne Babylon. Kwáh enháskweʼke. Kahnenhroʼwáhnenh ne tehontátʼtions tsi iekonhwahtiatónties; tsi nihioronhkwénhstare tsi wahterí꞉io kanahtakwékon niehiorónhkat.

⁵⁶ Ne rathiʼnenhrahtóntha ronterí꞉ios iekonhwahtsathóntion ne Babylon. Ne rathishástsʼtes ahonkwetashón꞉a ronwahtiʼiénenh, tánon ne ronhteriʼiostákwah ronhtsanáhke tekáris. Asèken ne Roiá꞉ner Rawenni꞉io rahónʼa tatʼkáhwas ne tkaiéri karewahtátshera, tánon tahahawihátie ne Babylon akwékon tsi natehioténhtion.

⁵⁷ Kwáh enkhehiónnien ne ratikóras nahotinonhwahráhton tánon ne ronhtenikonhratʼthó꞉kas, sakotihéntenʼse, ó꞉ni ne ronterí꞉ios. Kwáh ienhotítaʼwe tánon iáh nonhwénhton tahonshaʼhatí꞉ie. Í꞉i, ne wahkenonhtí꞉io, wakatáti; Í꞉i, ne Watiá꞉ner, Keshastsʼtenseroʼwáhnen.

⁵⁸ Ne tehiotenhenrahnónhiaʼni ne wahtenhénrohte ne Babylon nónhwe onhwenhtsáke enwáhtionhke, tánon ne éhneken tiotʼthónnions ne ioʼtenhenrenhtónnions enwatʼtsahathónhake. Ne raotiʼhioténsehras nonhkweshón꞉a kwáh iáh othènen tsatakéhne; ne raotiʼronhiakénsehra tenhiotónkwahkwe. Í꞉i, ne Watiá꞉ner Keshastsʼtenseroʼwáhnenh, wakatáti.”

Ne Jeremiah Raoʼteriwahnhotátshera Babylonia Nónhwe Iahonténieʼte

⁵⁹ Ne Ronhnontí꞉io Zedekiah ne kwáh ákta roteriwatsʼterísthaʼse ne꞉ne Seraiah, ne roʼníha ne꞉ne Neriah tánon ne rosótʼtha ne꞉ne Mahseiah. Ne꞉ne kaieríhaton shiʼhioserahkehátsie ne Zedekiah sihononhtí꞉io ne Judah nónhwe, Seraiah tánon ne Ronhnonhtí꞉io Zedekiah Babylonia niaháne, tánon ne Seraiah ostónha tahirihónnien.

⁶⁰ Ne Jeremiah kahiatonseráhkonh akwékon rohiatónnionʼkwe akwékon ne kakahronhniátsheras tsi nenhioráhne ne Babylon.

⁶¹ Wahawénhase ne Seraiah, “Nonenh iénsehwe ne Babylon, iorahkareníhak tsi sehwenhnaʼnhóten akwékon kí꞉ken kahiatónhsera.

⁶² Ethòne enshíron, ‘Saiá꞉ner, ísenh tsi kwáh ensehriwáhthonʼte ne Babylon ne káti ne kwáh iáh ónhka nónhkwe tó꞉ka ó꞉ni ne katʼtshénenh ne kénʼen ahonshaʼienáhkerehke. Thóh enkaiénthake ahóskonh enkénhake tánon konhwahteʼwenhtéton tsi nénhwe.’

⁶³ Ethòne, nónenh ènhtsa tsi wahsewenhnaʼnhóten ne kahiatónsehra, onénhia swánerenk, tánon Euphrates kaniataráhke iashá꞉ti.

⁶⁴ Ethòne enhshíron, ‘Éhtho kíʼ nenhiohiátawenh ne Babylon ó꞉ni nahonkwetaʼshón꞉a tsi enhontenónhwahien, iáh nonhwénhton shé꞉kon thahonshaʼhontákerahkwe, tioríhwa ne kakahronhniátshera éntrenh nahonháke.’” Kén onhtókʼten ne Jeremiah raoʼteriwahnhotáhtshera.