Jeremiah 49 - Ohiatonhseratokénti

Ne Roiá꞉ner Rarewáhthaʼne Ne Ammon

¹ Kén kíʼ nahó꞉ten ne Roiá꞉ner ráwenh tsi nòkwah ne Ammon: “Káh nihónnes ne ronnónhkwe ne Israerʼró꞉nonhke? Iáh kén ónhka tehióien nahonthaʼhátiʼne ne rahononhontsiashón꞉a? Nonhtiéren tsi wahonwahtiríhon nonhkweshón꞉a né konhwahsénhnahiens ne Molech ne ne ahatiʼiéna ne ratitaráhien Gad raotinahkerásera tánon thóh nónhwe nahontenáhthaien?

² Ók táwe ne kawistáheks nónenh kwáh enkhehiónʼnenh nonhkweshón꞉a ne tsi kanatakweʼní꞉io ne Rabbah nahonatʼthóntheʼne tsi nihioronhkwéntstahre tsi wahterí꞉io, tánon kwáh káiaʼse enwáhton tánon nahonahtaʼshónʼas okenráhke enhionhníhake tsi enwatʼtsahátonke. Ethòne ne Israerʼró꞉nons enshatiʼiéna ne raononhontsaʼshón꞉a enshonwahtíkwah tsi nikáien ne ronhwahthiʼnénhskwenʼne.

³ Nonhkweshón꞉a ne Heshbon nónhwe, watotihénrehte! Ai konhwahtónton! Ne konhnónhkwe ne Rabbah, sehwatʼtiónhnion! Káiare í꞉sehwats tánon sehwatʼtiónhnion. Tsiahisewahriwahieʼwáhsehke tsi ísehwes. Ne sewahʼní꞉io Molech enhonwahnakeráhkwahte, skátne ne rothikháres ó꞉ni ne rothinonhtí꞉ios.

⁴ Onhnonhtiéren kí꞉ken tiónkwe ne iáh othènen tesehwáhien ne tewehthá꞉kwen tsi tesehwathaterénhsharon? Ne sewahshastsʼténsera tahioseronhnonhthonhátsie. Onhʼnihiotiéren tsi ne sewahniahésenh ne sewahshastsʼténsera tánon sewáhton kwáh iáh ónhka thá꞉ienhre ne iahieshaʼtiatónti?

⁵ Kwáh tsík niʼtsotserahthá꞉nion tsi entékhaʼwe ne kateronhkwáhtshera ne tionháke. Kwáh tsi sewahiatátʼtion tsi ensewahtèhko, tánon iáh ónhka shé꞉kon tahonsahonwahtiʼhiataró꞉rohke ne tionkwetaʼshón꞉a ronterí꞉ios.

⁶ “Ók ishinonhwéha shé꞉kon ensekʼkwahtsésten ne Ammon. Í꞉i, ne Watiá꞉ner, wakatáti.”

Ne Roiá꞉ner Enharéwahte Ne Edom

⁷ Ne kíʼ tsi nahó꞉ten ne Roiá꞉ner Roshastsʼtenserowáhnenh ráwenh tsi nòkwah ne Edom: “Nonhkweshón꞉a ne Edom ronatónti kén ne ioiánere raotiʼhiatoreʼtátshera? Ne shaʼkonatenikonhráwis iáh kén ónenh tesehwátons nahonshasakotiʼró꞉ri onhnahonshahatí꞉iere? Akwékon kén ne raotiʼnikonhroʼwahnhátshera kakʼtshiehiawénonh?

⁸ Nonhkweshón꞉a ne Dedan, tesehwatkarahténi tánon sehwatèko! Sehwatáhset! Kwáh enkheriwáhthonte ne Esau kawáhtsire tsioríwa tsi ónhnen ónhwe ne kawistáheks nakheréwahte.

⁹ Nónenh nonhkweshón꞉a enhathiʼnenharáhko, ostónha iohienʼtónhak nahonenhrà꞉ke, tánon nónenh ne rathinénhskwas entʼthónne tsi niwahsóntes, nek ienhatíhaʼwe tsi níkonh tehonahthonwenhtsóni.

¹⁰ Tánon káti kwáh íken tsi khenotsthónni ne Esau kawáhtsire tánon wahkerohrótshion tsi nónhwe nihonthasehtákwah, iáh ónenh tahonshón꞉ton nahonsahontásehte. Kwáh kanenhrakwékon ne Edom tsi ronwahnahthónton. Iáh ne sahiátha tsiateshothaténron.

¹¹ Í꞉i takwahthaʼkweniahénhas ne sewakshatashónhas ne tehonthonnahkhárhias, tánon Í꞉ih enkhehiaʼtewehnénhton. Ne ionahtheréhons enwáhton ne Í꞉i ahionkeniáheʼse.

¹² “Tó꞉ka sehnonhwa tsi niháti ne iáh thaʼtehonahténtʼtion nahonwahthiʼréwahte né ahathiʼnekírah ne kátʼtse ne karewahthá꞉tshera, ísewehre onhtèken níse kwáh séh iáh tahisehwatréwahthe? Iáh, ónenhk tsi ensehwahnekírah!

¹³ Í꞉i akonháʼa wakeriwahniráhton nètho kanatowáhnenh ne Bozrah kwáh eniotʼterontónhaʼke tsi nenhiothónhake tánon karáhkon enwáhton, nonhkweshón꞉a tenkonhwahierónhake tánon nahosénhna ne enhónsthaʼke tsi enhathiriwahiesáhsehke. Akwékon nákta kanahtaiéntons kwáh tsi nénhwe káiase enkénhake. Í꞉i, ne Watiá꞉ner wakatáti.”

¹⁴ Wakíron, “Edom, watiéna nateriwahnhotátsera ne ne Roiá꞉ner nónhwe nonhtáwe. Thóh teniéhton ne rariwahkariénes nashakoróhri nonhkweshón꞉a nashakotihiataróhroʼke ne raononhkwetaʼshón꞉a ne ronterí꞉ios tánon nahonthaʼteweiennénhthaʼne ne iahieshaʼtsathónti.

¹⁵ Ne Roiá꞉ner ne enhateriwahténtsiate nahiatsihióhaʼte, tánon iáh ónhka tahieshaʼkweniénsthaʼke.

¹⁶ Ne tsi nisehnáhie ne weshaʼnikonhráhten. Iáh ónhka tehiesatʼtsánis tsi nióre tsi ísere iesatʼtsánis. Tsi ionitstenrhiákon nónhwe nishíteron, ne ne kwáh ononhthaʼkénhiaʼte; ók iawerohátien thóh nióre tsi éhneken ieshíteron tsi ní꞉ioht ne ákweks, nék kík sáhka ne Roiá꞉ner kwáh ki enthiaiátenhte. Ne Roiá꞉ner rothatíhon.”

¹⁷ Ne Roiá꞉ner wahénron, “Ne atkaronhniátshera nenhiohiató꞉renhne ne Edom tsi nióre tsi tenhiotenonhianitónhaʼke kwáh tsi nihiákon ehnónhwe nenhiontó꞉hetste kwáh entionthónhneke ó꞉ni enhiakoterónhsehke.

¹⁸ Kwáh ne sháka tsi nenhiohiátawenh ne Edom tsi niʼiawénhʼen ne Sodom tánon ne Gomorrah, ne nónenh nètho tánon ne ákta kanataiéntons skakonwatiriwáhthonʼte. Iáh ónhka shé꞉kon èhtho tahonskahionnáhkerehke. Í꞉i, ne Watiá꞉ner wakatáti.

¹⁹ Tsi ní꞉ioht ne kénreks thontaharókʼkaʼwe ne kwáh ioterahtó꞉hon ne kaniataratʼtóntie ne Jordan tsi nieʼiawénonh ne kahentí꞉io konwahtiʼterontákwah, kwáh èntʼke tánon enkhehiónnien ne Edomró꞉nons thentsawénhstsi enhontèko ne rahotiʼnakerahseráhkon. Ethòne enhihiataráhko ne rahnenhrahkweʼní꞉io nashaʼkokkórasʼte nonhkweshón꞉a. Ónhka aiekwéni ne ónhkak tahontahionkateniéntenste? Ónhka áienre nahionkenenhrótʼthaʼse? Nahakorahseróh꞉ten ahakwéni nahatsotátʼtshe tsi niwahkatenikonhríson?

²⁰ Káti sewahthahónsahtat tsi niwakatenikonhrónhni tsi nòkwah ne Edomró꞉nons, tánon tsi níkereh nahkheiérahse nonhkweshón꞉a ne tsi kanatowáhnenh ne Teman. Shé꞉kon ó꞉ni ne shakotiʼienokónha kwáh kíʼ tsienhonwahtihiatísehreh, tánon kwáh onhkwetaʼkwékon tsi entionthónnheke.

²¹ Nónenh ne Edom entkahiétenʼne, thóh nióre tsi tenhiothónhare kwáh ohontsaʼkwékon tsi tenhiowíshonʼkwe, tánon tsi nenhwatʼtsitó꞉ko kwáh tsi nióre ne tkanétsker ne Aqaba ienhiakothóntehne.

²² Ne tehontátʼtions ienkonhwatiatónti ne Bozrah tsi ní꞉ioht ne ákweks tehiotasenhthonhátie tsi naʼtehiotehontsakaráhwenh. Ne eh enwenhniseráhteke ne Edom ahonkwetaʼshón꞉a ne ronterí꞉ios kwáh eh nenhotiʼterónhsehke tsi ní꞉ioht ne iónhkwe ioronhiáken tsi iowirahientásehre.”

Ne Roiá꞉ner Enharéwahte Ne Damascus

²³ Kén nahó꞉ten ne Roiá꞉ner ráwenh tsi nòkwah ne Damascus: “Nonhkweshón꞉a ne tsi kanatowáhnenh ne Hamath nónhwe nihienáhkere ó꞉ni ne Arpad tehonataʼtenikónhrahreh tsioríhwa tsi iáh tekarihwí꞉io wahathiriwáhronhke. Ne kahterónhtshera iothohrhiáneron tsi nónhwe nihónnes tsi ní꞉ioht ne kaniatarahkekówah, iáh tehonhorisénhtas.

²⁴ Nonhkweshón꞉a ne Damascus nónhwe rothitsihióʼa tánon kateronhtsherákon tsi wahontèko. Roʼthironhiáken tánon ronhnonhnákʼsen tsi ní꞉ioht ne iónhkwe iowirahienthá꞉sehre.

²⁵ Ne kahsenhnowáhnenh kanatowáhnenh iotʼtsennónhniʼne ók nónhwah onahthóskonh íken.

²⁶ Ne thóh enwenhnisehráhteʼke nahonkwetashón꞉a nithonihiónhsa enhonwahtinonhwahrhiákon ne tsi tekanatoken꞉hátons, tánon ratikwékon ne ahonkwetashón꞉a ne ronterí꞉ios enhonwahnáhthonte.

²⁷ Entsiró꞉ten ne tsi tewahsónhthoʼte ne tekanahtanátʼton ne Damascus tánon enkatenonhkwáhtektaʼnion ne Ronhnontí꞉io Benhadad tsi ronnónhshoʼte. Í꞉i, ne Watiá꞉ner Keshastsʼtenserowáhnen, wakatáti.”

Kahrewahtátshera Rothiʼráhsehre Tsi Rathitaráhien Ne Kedar ó꞉ni Ne Kanahtowáhnen Hazor

²⁸ Kén nahóten ne Roiá꞉ner shakawénhni tsi rathitárahien ne Kedar ó꞉ni tsi kanonhtiʼiotsheráien ne Hazor, ne ne Toʼnonhtí꞉io ne Babylonia nónhwe rohienáhon ne ne Nebuchadnezzar. “Iasheʼhiatsiatónti nonhkweshón꞉a ne Kedar tánon sheʼtsokwáhthont nètho nahkonháka nahathihiató꞉ten!

²⁹ Ietʼtsíkwah ne rahonahtohsehrahsónhas tánon ne rahotitʼtsennenhókonhs, tánon tsi nahoténsons kahkérons ne rahonatosehráhkonhs. Iahetsihiaténhaf ne rahothitsenenhókon iotiniakwáheʼre tánon ietʼtsirorhiánon, ‘Ne kateronhkwáhtshera kwáh tesehwahtsiathá꞉ton!’

³⁰ “Sehwatèko,” ráton ne Roiá꞉ner, “sehwathasehtánion tsi nónhwe nihiosonwéhsons, tiónkwe ne Hazor, asèken ne Ronnonhtí꞉io Nebuchadnezzar rotenikonhríson tsi nòkwah níse, tánon roʼthateweiennenhtáhon naʼtsisehwáhthonte.

³¹ Wáhs tánon iahitsiʼiatsiatónti tí꞉ken ronnonhháhak khók tihontatʼthá꞉wi rotinahtenháwis kentiókwah, ráton ne Roiá꞉ner. Rononhatsíwak khók tihatináhkere ne karáhkon iáh thènenh tewahtenhénrahien iáh ó꞉ni kanèka tehiotenhenrahkáronhte ne rahothináhtakonhs.

³² “Iahitsihiaténhaf ne rahothitshenenhókonhs iotiniakwáhere tánon ne tionónhskwahrons kwáh rahtikwékon i꞉se sehwatʼtshenenhókonhs enshón꞉ton. Tsi iowehráhre iathekhehiaréniaʼthe kí꞉ken onhkweshón꞉a tsi nikáien ne aínonh nióre thatinahkeréhnion. Tánon kwáh tsík nitsiotserahthánion tsi entekhehawíten ne kakahronhniátshera ne ronónhake,” ráton ne Roiá꞉ner.

³³ “Ne Hazor ne ne kahentakéha érhar enhatináhkerehke, tánon tsi nénhwe tsi káiase enkénhake. Kwáh iáh ónhka eh nónhwe tahonshaʼieterónhthaʼke.”

Ne Roiá꞉ner Enharéwahte Ne Elam

³⁴ Kí꞉ken ateriwahnhotátshera Roiá꞉ner taháwenh ne Jeremiah ne ne Elam aoriwáhke ne ne sontahatáshawenh nahatenonhtí꞉iosʼte ne Zedekiah ne ne Judah nónhwe.

³⁵ Kén kíʼ nahó꞉ten ne Roiá꞉ner ráton tsi nòkwah ne Elam: Kwáh enkhehiáthonte ne ahénna róntstha tsi ronhterí꞉ios ne Elam nónhwe—ó꞉ni ne kwáh thaʼthisenhní꞉ios.

³⁶ Kwáh tsík nonhwésons nentekhehiaténhaʼwe ne tehontátʼtions, tánon tekhehiaréniaʼte nonhkweshón꞉a ne Elam nónhwe ne kwáh tsík nahonthahiotsieráhton ne tsi iahóthe. Enhonwahnahnakeráhkwahthe ne tsík nonhwéson tkanakerahserahiénton ne tsi ionwenhtsiáte.

³⁷ Kwáh eniakwahteró꞉senh ne Elam tehontátʼtions ne tahonwahnahtsiathókwahte. Ne tehiotenonhʼianíthon akenahkwáhtshera entkáhawe ne kowáhnenh atkaronhniátshera ne rathihiatakéson nonhkweshón꞉a ne Elam nónhwe, ráton ne Roiá꞉ner. Ne tehontátʼtions asahrekówah énhonste tsi enhonwahtisehréson tsi nióre kwáh enkhehiáthonte.

³⁸ Nakanitskwáhra Elam nónhwe nénhtien, “Ráton ne Roiá꞉ner.” Tánon enkhehiáthonʼte ne raothiʼnonhtí꞉ios.

³⁹ Ók nonàhken entewenhnisehraʼténionke ensekʼkwahthá꞉ko ne raoʼnahtsokowáhtsheras ne Elam ráton ne Roiá꞉ner.