Jeremiah 36 - Ohiatonhseratokénti

Ne Baruch Waʼhawenhnhaʼnóten Ne Kahorohthakweʼnónhni Kahiatónsehra Ne Ononsatokentiʼkówahne

¹ Ne kaieríhaton shiʼiohseratátie nètho Jehoiakim né roʼníha ne ne Josiah rahónʼa shiʼhonontí꞉io ne Judah nónhwe, ne Roiá꞉ner wahakénhaʼse,

² “Hiahásko ne kahorohthaʼkwenónhni tánon thóh iásthon kwáh oriwahkwékon tsi nikonhró꞉ri tsi nòkwah ne Israel tánon ne Judah ó꞉ni rathiʼkwékonh tsi niaʼteiakahontsákes. Kwáh oriwahkwékon iásthon tsi nikonró꞉ri ne kwáh sonthontsiérenʼthe wahkonhthárahse, nónen ne Josiah shiʼhononhtí꞉io, tánon tsi nióre nònhwah.

³ Tó꞉ka nónhwah nónen nonhkweshón꞉a ne Judah nónhwe enhónronhke akwékon ne kakahronniátshera tsi niʼwahkatenikonhrónni nahontatkhehawíten, tsi tensontkahrahténi tsi nihatiʼweiennáksens. Ethóhʼne ensheʼkhenikónhrenʼse tsi nihonnonhkwetaʼhétkens tánon tsi nihotiʼrihwáhnerens.”

⁴ Káti sók Baruch iahínonhke ne roʼníha ne ne Neriah tánon tsi nahenrónnion ne Jeremiah, ne Baruch akwékon kahiathonsehráhke wahahiatónnion ne iekahriwáhken nètho Roiá꞉ner tsi nithó꞉wi.

⁵ Ethóhʼne ne Jeremiah wahawénhaʼse ne Baruch, “Kenhóton kíʼ kénʼen tánon iáh thahónton ne Ononhsatokentiʼkówahne niáke.

⁶ Káti í꞉se iaháse Nononsatokentiʼkówahne ne ieskáheʼwe nahonsahiakawenhtóntieʼthe, tánon sehwenhnaʼnhóthas naʼteriwahnhotátsheras tsi nithakáwi ne Roiá꞉ner tsi niʼkahiatónnion kíʼ kénʼen kahorohthaʼkwenónhni. Nètho enwenhnisehráhteʼke kanenhrahkwékon ne Judah nónhwe thóh enhiésehke.

⁷ Tó꞉ka kíʼ nónhwa shé꞉kon tensontkarahténi tsi nihatiʼweiennáksens tánon ahonʼwahriwahnónhtonse ne Roiá꞉ner ahonshaʼsakonikónhrenhse nohénton sóhtsi ahiokaraháthaʼne. Asèken ne Roiá꞉ner ne tehiotenonhianíthon rahonhakwáhtshera tsi ohénton tonwahnaronkahténni.”

⁸ Káti ne Baruch wahawenhnahnhóten ne Roiá꞉ner raowenhnahókonhs ne Ononhsatokentiʼkówahne kwáh tsi ní꞉ioht tsi rihró꞉ri tsi naháiehre.

⁹ Ne tiotónhaton shiwenítare tánon ne ne wískʼkhaton shiʼioseráhthaʼse ne shihononhtí꞉io ne Jehoiakim ne Judah nón꞉we. Nonhkweʼshonʼa wahakawenhtóntiete ne ne aiaié꞉na ne Roiá꞉ner raononwéhtsera. Ne wenhtontié꞉ton kwáh wahontháwa ratikwé꞉kon tsi nihá꞉ti thóh ratináke Jerusalem ó꞉ni tsi nihiá꞉kon tá꞉ien ne tsi tkanatá꞉ke rons ne Judah.

¹⁰ Ethóhʼne, tsi nikaríhwes nonhkweshón꞉a iaʼkothahonsáhteʼkwe, ne Baruch wahshaʼkowenhnahnhótʼtahse ne Jeremiah raoʼwenhnahókonhs ne tsi ronátʼthaien ne Gemariah ne roʼníha ne ne Shaphan, né shakohiatónni ne tsi tehiehiatorehtáhkwah. Kahnhotshoʼharáhke ne teiehiatorehtákwah nónhwe nihonákʼthaien ne ne ákta ne áse tsi ioʼtenhenrahkáhronʼte ne Ononsatokentiʼkówahne.

Ne Kahiatónsehra Waʼhonwahtiʼwenhnahnótʼthaʼse Ne Ronahterihʼhóntons

¹¹ Micaiah, ne roʼníha ne ne Gemariah tánon Shaphan né rosótʼtha, tsi wahothóntheʼne waʼhawennahnhóten ne Baruch tsi niháwenh ne Roiá꞉ner.

¹² Ethóhʼne ronnonhtí꞉io tsi thohnonhshó꞉te niaháre, tsi thaʼhiatónkwah ne shaʼkohiatónni, ratikwékon ne ronahterihóntons ronatʼkenníson. Elishama, né shaʼkohiatónni ne teiehiatorehtákwah, Delaiah ne roʼníha ne ne Shemaiah, Elnathan ne roʼníha ne ne Achbor, Gemariah ne roʼníha ne ne Shaphan, Zedekiah ne roʼníha ne ne Hananiah, tánon ne ronáhtiaʼkes ne ronahterihónton thóh kíʼ nònhne rónnesʼkwe.

¹³ Micaiah oriwahkwékon wahsahkoró꞉ri tsi nahó꞉ten wahothónteʼne ne Baruch wahshaʼkowenhnahnhótʼthaʼse nonhkweshón꞉a.

¹⁴ Ethóhʼne ne ronahterihóntons iahonwénhnonhke ne Jehudi (ne roʼníha ne ne Nethaniah, ne rosótʼtha ne ne Shelemiah, tánon ne ne tehoterehsehráhsereh ne Cushi) nahonwahróri ne Baruch nahontaháhaʼwe ne kahorohthakweʼnónhni kahiatónsera ne ne shaʼkowenhnahnhóthaʼni nonhkweshón꞉a. Baruch thashaʼkohawíhten ne kahorohthakweʼnónhni kahiatónsera.

¹⁵ “Sáhtien,” wahonníron, “tánon tahkwahwenhnahnhótʼthas ne kahorohthaʼkwenónhni kahiatónsera.” Sók kíʼ ne Baruch waʼhawenhnahnhóten.

¹⁶ Sahawenhnahnhotháko, wahthontatkahthó꞉sehron kwáh íken tsi rohtíterons tánon wahonwénhaʼse ne Baruch, “Ónenhk tsi enshaʼkwahró꞉ri ne ronnonhtí꞉io tsi nahó꞉ten wahonkwahtʼthónteʼne.”

¹⁷ Ethóhʼne wahonwahriwahnónhthonhse, “Thakwahró꞉ri, kwáh ónen, onhnihiawénhen tsi nisahiatónnion kí꞉ken? Kwáh kén tiotʼthakwahrishiáton Jeremiah nónhwe nahontaʼhiawénhnonhke?”

¹⁸ Baruch waʼthariwahsehráhko, “Ne Jeremiah kwáh tsowenhnátʼtions tsi roʼtahtíhon nakʼkénton, tánon kahiathonkwahóntsi wahkhiáthonʼkwe ne kénʼen kahorohthakwenónhni kahiathonseráhke.”

¹⁹ Ethóhʼne wahonwahró꞉ri, “Í꞉se tánon ne Jeremiah ahówenhk nahitsathasehthána. Tó꞉sa ónhka iakoterentáranh tsi nónhwe nísehnes.”

Ne Ronnonhtí꞉io Wahátʼtsahaʼthe Ne Kahorohtakwehnónhni Kahiatónsehra

²⁰ Ne ronahterihóntons tsi thaʼhiatónkwah ne shaʼkohiatónnis ne theiehiatorehtákwah ne ne Elishama nónhwe iahonthakweʼniáien ne kahorohthakweʼnónhni kahiatónsehra, tánon tsi thénteron ne Ronnonhtí꞉io niahónne, thóh nónhwe kwáh oriwahkwékon tsi wahonwahró꞉ri ne Ronnonhtí꞉io.

²¹ Ethóhʼne ne Ronnonhtí꞉io iahónonhke ne Jehudi nahakóha ne kahorohthakwenónhni kahiatóhnsera. Ionshaháko ne tsi thaʼhiatóhnkwah ne Elishama tánon wahowenhnahnhótʼthaʼse ne Ronnonhtí꞉io ó꞉ni ratiʼkwékon ne ronahterihóntons ne ronónha rahiatákʼtha ronnhethónkwe.

²² Kosehráhke kénʼne tánon ne Ronnonhtí꞉io ne ne tsi ronónhsohthe ne kosehrahkékha ne wathanahwéston nónhwe nihenterónthaʼkwe otsienháktha renskwahráhkwe roténhionhkwe.

²³ Kwáh tsi niʼiosthóhre ne Jehudi enhá꞉sa tó꞉ka áhsen tó꞉ka ó꞉ni kaiéri nihiosthonterihtsheráhke, ne ronnonhtí꞉io enharahwístsiaʼke ne énratsthe ne kén niwaʼsahrá꞉a ne rahonahthaʼtsheráhkon rehthahástha tánon otsiráhke ienhóti. Thóh kíʼ naháiere tsi nióreh ne kwáh kahiatonsehrahkwékon iahóntsahaʼthe.

²⁴ Ók iáh ne ronnonhtí꞉io ó꞉ni ne rahonkwetasón꞉a ne wahonatʼthónteʼne kí꞉ken owenhnahsón꞉a iáh tehothiʼterónhon iáh ó꞉ni thènenh tehonhenésthon né nahotiʼrahtiónkwenʼke ne raonatʼtsherónnia tsi sahonthaʼteriwásthen.

²⁵ Ethohʼsáne ne Elnathan, Delaiah, ó꞉ni ne Gemariah wahonwahniténthaʼse ne ronnonhtí꞉io ne tó꞉sa ahatʼtháhate ne kahiatónshera, iáh thènenh karíhwah teshaʼkahónhni.

²⁶ Ethóhʼne ne ronnonhtí꞉io wahónnhaʼne ne roiénha Jerahmeel, skátke ne Seraiah ne ne Azriel roiénha tanon ne Shelemiah né roʼníha ne ne Abdeel, nahiontiénah ó꞉ni ne rakhiatónnis Baruch. Ók kíʼ ne Roiá꞉ner sonkeniʼhiathashéthonʼkwe.

Ne Jeremiah Ó꞉ia Sahahiáton Ne Watʼthathonsehrahkweʼnónhnis

²⁷ Nónenh ne ronnonhtí꞉io Jehoiakim shaʼhátʼtsahaʼthe ne kahiatónsehra ne tsi nihiró꞉ri ne Baruch nahahiáthon, ne Roiá꞉ner wahatró꞉ri

²⁸ ó꞉ia ieʼsehkhathonsehráhko tánon oriwahkwékon sekʼkhiáton tsi nitsothónhne ne tsiotierénton kahiatónsehra.

²⁹ Ne Roiá꞉ner wahakró꞉ri nahiʼiénhaʼse ne ronnonhtí꞉io, “Washatʼthiathonsehráhtsahaʼthe, tánon wahsheriwahnónhtonseh ne Jeremiah nonhtiéren tsi rohiáthonʼkwe nètho ronnonhtí꞉io ne Babylonia tsi éntʼreh tánon enhronhontsákʼshaʼthe ne kíʼ ionhontsáien tánon enshaʼkononhwahrhiakónnion nonhkweshón꞉a ó꞉ni ne kontiʼtshénens.

³⁰ Káti nónhwah, Í꞉i, ne Watiá꞉ner, wahkonhró꞉ri, ne Ronnonhtí꞉io Jehoiakim, kwáh iáh nonhwénhton ne ahishaʼwirahiéntahne nahatkórasʼthe ne Táwit rahonahkeráhsehra. Nenhsenʼhéion ne shaʼhierónta átste ienwáhtionhke thenwehnhétonke tsi nenhiorahkwahtharihénhaʼke ne tsi niwenhnísehres tánon nokahrasnéha tsi ne nenhiosahkenseráien.

³¹ Kwáh enhkonréhwahthe, ne sehiohokónha, ó꞉ni ne sonkwetaʼshón꞉a ne rotaterihóntons ne tsoríhwa tsi nikahriwáhnerens tsi nisehwahtiéren. Tánon níse ó꞉ni nonhkweshón꞉a ne Jerusalem ó꞉ni ne Judah kwáh iáh othénenh kariwahtetiónhni tsi nikwahronkahtenhni, tánon káti enthekhawe orihwahkwekon ne kakahronhniátshera tsi niwahkerihowahnáhton.”

³² Ethóhʼne shé꞉kon óia hionshakohrohtharáhko tánon tháhion ne rakʼkhiatónhni Baruch, tánon kwáh oriwahkwékon wahahiáton tsi niwáhken. Kwáh oriwahkwékon shaʼhahiatónnion ne kwáh tsi niʼtsiotónhne ne tiotierénton kahiatónsehra tánon kwáh ne sáhka naʼteriwahnhotátshera tsi nihiró꞉ri.