Jeremiah 35 - Ohiatonhseratokénti

Jeremiah Tánon Ne Rechabites

¹ Nónenh ne Jehoiakim né roʼníha ne Josiah ne ne shihononhtí꞉io ne Judah nónhwe, ne Roiá꞉ner wahakénhaʼse,

² “Wáhs tsi thathitárahien ne Rechabite niaháse tánon iasehtháras. Ethóhʼne thasehiaténhaf tsi nónhwe ne énskak khók hionákthaien Nononhsatokentiʼkówahne tánon otsítsa séhtats nahatinekírah.”

³ Sók kíʼ kwáh ratiʼtharahkwéhkon ne Rechabite tatkhehiaténhaʼwe—Jaazaniah (ne roiénha ne ó꞉ia Jeremiah ronwáhias, ne ne roʼníha íken ne Habazziniah) tánon ratikwékon ne ronthatekenhokónhas ó꞉ni ne rahotiʼnekenterontsheraʼsónhas—

⁴ tánon tsi Ononhsatokentiʼkówahne takhehiaténhaʼwe. Tsi thóh thinákʼthaien ne ratiʼkwekónʼne ne ne rotokenhséhaʼkwe Hanan ne roʼníha ne ne Igdaliah. Kí꞉ken ionákʼthaien ne ne kanhotsioharáhke ne ne tsi ronákʼthaien ne Maaseiah ne roʼníha ne ne Shallum, iorihowáhnen tsi ní꞉ioht tsi roteríhonte Nononsatokentikówahne, tánon ákta ne tsi ionakʼthaiénton ne ó꞉ia ronahterihóntons.

⁵ Ethóhʼne wahketsetharónnion ó꞉ni nakekʼsahrónnion kwáh kanekanahnónhnion notsítsa rahotiʼhénton ne Rechabites, tánon wahkheiénhaʼse, “Sehwahnekírah.”

⁶ Ók wahthathiriwahseráhko, “Iáh tehiakwahnekírah notsítsa. Ne sahkwahsothʼkénʼen Jonadab ne roʼníha ne ne Rechab sonkwahró꞉ri nonhkwáhtiakes tó꞉ka ó꞉ni ne iakiʼienhokónhas kwáh tó꞉sa nonhwénhton ahiakwahnekírah notsítsa.

⁷ Kwáh ó꞉ni sonkwahró꞉ri ne tó꞉sa ahiakwahtenonhsónni tó꞉sa ó꞉ni ahiakwahiéntʼtho nonhontsáke tánon tó꞉sa ó꞉ni ahiákwah nenharahiéntʼtho tó꞉ka ó꞉ni naʼhiakwahnenhaʼrahnínon. Kwáh sonkwahʼrehtsarónhon ne tiókonhte atohsehráhkon ahiakwenterónthaʼke, ne ne ahónton ne kénʼen kíʼ ionwenhtsáte ahiakwenterónthaʼke, tsi iakwahnáhkereh thóh ní꞉ioht tsi shíken ní꞉ioht ne kenkʼthitionkwénon.

⁸ Kwáh akwékon hionkwahʼtewenhnahráhkwen tsi nihorihwahtáton ne Jonadab theʼsonkwáhwi. Ne iatehiakwahiáti iáh nonhwénhton tehionkwahnekíren notsítsa, ó꞉ni ne hionkwahniákʼkhons, ó꞉ni ne iakihiohokónhas.

^9-10 Kwáh iáh tehiakwahtenonhsónnis ne iontientákwah—atohsehráhkon iakwénteron—iáh ó꞉ni thènen tehionkwaʼnenhaʼrahiéntʼtho, iáh ó꞉ni tehionkwahéntaiens, iáh ó꞉ni tehionkwahnáhtsaien. Kwáh oriwahkwékonh tsi ionkwahʼtewenhnaráhkwen tsi niʼsonkwahró꞉ri ne sahkwahsotʼkénʼen Jonadab.

¹¹ Ók nónenh ne Ronnonhtí꞉io Nebuchadnezzar shaʼsakonenhrénhten ne kanakeráhsehra, iaʼtionkwahriwahiénthaʼse ne Jerusalem nahontáhiaʼkwe ne ne ahéren ahiákweʼthe tsi rónhnes ne Babyloniaró꞉nons ó꞉ni ne Syria rahononhkwetaʼshón꞉ʼa ronteriios. Ne aoríhwa Jerusalem nónhwe nihiakwahnákehre.”

^12-13 Ethóhʼne ne Roiá꞉ner Roʼshastsʼtenserowáhnen, ne sakoʼNí꞉io ne Israerʼró꞉nons, wahatró꞉ri ne niáke tánon nahkheiénhaʼse nonhkweshón꞉a ne Judah ó꞉ni ne Jerusalem nónhwe, “Í꞉i, ne Watiá꞉ner, kwáh riwahnonhtónnis nonhtsiéren tsi wesehwahterahiáthaʼkwe naʼskwahthahónsahthaʼte ó꞉ni naʼisehwatewénhnarahkwe naʼkeriwahtátʼtshera.

¹⁴ Ne Jonadab sakoienʼokónha ronatewenhnaráhkwen tsi nihoriwahtáton ne tó꞉sa ahatinekírah notsítsa, tánon kwáh nónhwah ne kénʼen wenhnisehrahténions kwáh iáh ónhka tekahnekírah notsítsa. Ók kíʼ iewakʼkonthákwen tsi kwahtharáhni, tánon kíʼ iáh teskwahwenhnahráhkwen.

¹⁵ Iewakʼkhonthákwenh ieʼkhehiathó꞉res tionháke nahkhenhátsheras ne rothitó꞉kenʼse, tánon ietʼtsiró꞉ri naʼisehwahtiakwahríshi tsi niʼsehwahweienʼnáksens tánon ne sehwahióhten ne tkariwahiéri. Ietʼtsiretiarónhon ne tó꞉sa aietʼtsisénhnaien ne thiʼkaniʼioserahténions, ne ne iaʼisehwahkónthaʼkwe thóh nónhwe naʼisehwenhterónthaʼke tsi ionhwénhtsaien ne tkwáhwi ó꞉ni ne ietʼtsisotʼthonkonkénʼen. Ók kíʼ iáh teʼskwahthahonsahtáton iáh ó꞉ni karíhwah tetionníhon.

¹⁶ Ne Jonadab sahkoienokónhas ronahtewenhnahráhkwen tsi nihonwahthiró꞉ri ne sahkothisotʼthohkonkénʼen thonwahnáhwi, ók níse tiónkwe iáh teskwahwenhnahráhkwen.

¹⁷ Káti nónhwa, Í꞉i, ne Watiá꞉ner Keshastsʼtenserowáhnen, ne kheʼNí꞉io ne Israerʼró꞉non, enkwaiénhaʼse ne tiónkwe ne Judah ó꞉ni ne Jerusalem oriwahkwékon ne kahkaronniátshera ne wahkarahrátston. Kwáh kíʼ thóh nénhtiere tsioríwa tsi iáh tesehwathahonsahtáton nónenh sahkwahthárahse, tánon iáh thaʼtesehwariwahseráhkwen nónenh siakwahnáhton.”

¹⁸ Ethóhʼne wahkheró꞉ri ne Rechabite kentára nètho ne Roiá꞉ner Roshastsʼtenserowáhnen, ne sahkoNí꞉io ne Israerʼró꞉nons, ráwenh, “Sewaʼthewenhnahráhkwen tsi nihotennháhon ne tsi sehwahsothʼkénʼen Jonadab tetsisehwáhwi; akwékon sewahséhron ne rahoriwahtátʼtsheras, tánon akwékon thóh nisewahiénren tsi niʼtsisewahnháhon.

¹⁹ Káti Í꞉i, ne Watiá꞉ner Keshastsʼtenserowáhnen, ne khe Ní꞉io ne Israerʼró꞉nons, wahkaráhratsʼthe nètho Jonadab né roʼníha ne Rechab kwáh tiókonthe tsi roskenrahkéʼthe enhowirahiénthake nahatiotenséheʼke.”