Jeremiah 29 - Ohiatonhseratokénti

Ne Jeremiah Iashaʼkohiátonhse Ne Sitaeró꞉nons Ne Babylonia Nónhwe

¹ Rokháres hiahihiátonʼse, ne rotitokénse, ne shakothihéntenʼse nonhkweshón꞉a, tánon rathikwékon ne ronahtiakhésons tsi niháti ne Nebuchadnezzar Jerusalem nónhwe teshakohiaténha nahonwathinhóton ne Babylonia nónhwe.

² Thóhʼne niwakʼkhiáton ne nonahkènhke ne ronnonhtí꞉io Jehoiachin, ne ronisténha, ne kanonhthiʼiótsheras ahonkwetashón꞉as, nohénton iehonnéthon ne Judah tánon ne Jerusalem, ne tehathiristhahiátons, ó꞉ni ne iatèkon rathiʼweientheténion ne sahonwaʼwenhnakeráhkwahthe.

³ Elasah tahíhion ne kahiatónsehra ne roʼníha ne ne Shaphan ó꞉ni ne Gemariah ne ne roʼníha ne Hilkiah, tsi nikáien ne ronnonhtí꞉io Zedekiah ne Judah iehotenietenhni rahonháke ne ronnonhtí꞉io Nebuchadnezzar ne Babylonia nónhwe. Wáhton:

⁴ “Ne Roiá꞉ner Roshastsʼtenserowáhnen, ne sakoʼNí꞉io ne Israerʼró꞉nons, iakoró꞉ris thíken onhkweshón꞉a tsi roriwáhwi ne Nebuchadnezzar Jerusalem nónhwe niʼtehshaʼkohiaténha tsi iashaʼkonhóton ne Babylonia nónhwe:

⁵ ‘Sehwahtenonhsonniánion tánon sewahtehnáthaien. Sewatʼthethonniánion tánon ne ísehwak tsi nahoténsons ne sehwaienthósehrons.

⁶ Sehwániak tánon sewahwirahiéntann. Ethóhʼne iettsiríhon ne ietʼtsiʼienhokónha nahotíniaʼke, káti nónhne ne roʼnónha nahónton nahothiʼwirahiéntahne. Ónenhk tsi ensehwaniʼtsiokwahtehiáron iáh ne ahontesehwaʼsehrónnenhte.

⁷ Ne sewahióten nahiohiánerenʼne ne kanahtowáhnenhs tsi nónhwe tionniénni niahísewe niaʼhisewahtenhóton. Akonháke sehwaterennaiéntak ne ronónha rahothiriwáhke, tsioríwa tó꞉ka enhothihianerásten, i꞉se ki ó꞉ni ensewahianerásten.

⁸ Í꞉i, ne Watiá꞉ner, ne kheʼNí꞉io ne Israerʼró꞉nons, kwahtokaténni ne tó꞉sa sehwahthóntat naʼietʼtsinikonhráhten ne rotitokénse ne skátne sewahnáhkere tó꞉ka ó꞉ni nakorénsons ne rotró꞉ris enhathikwéni ne iahathiriwáhken tsi niaʼhawenonhátie. Kwáh tó꞉sa thènen karíhwah tsiónni ne rahonatetʼtshénsehras.

⁹ Ietsiʼhianhowenhténnis ne Í꞉i aksénnakon. Iáh Íh tieʼkeiateniéton, Í꞉i, ne Watiá꞉ner, Keshastsʼtensherowáhnenh, wakatáti.’

¹⁰ “Ne Roiá꞉ner ráton, ‘Ne nónenh ne Babylonia ne tsáta niwáhsen niʼioserahke enwahtók꞉ten, Enkénesthe nakeriswahshón꞉a ne tionháke tánon enkenónhsthaʼte nakwahrahrátʼtshera ne tahonthakwahiaténhaʼwe ne tsi sehwehtherónton.

¹¹ Asèken oriwiʼiohónwe wahkateriénthaʼre tsi nikwahriwahsehronniénni norihwahsónhas, rá꞉ton ne Roiá꞉ner, ne noriwasónhas nahisehwahianerásten tánon iáh ne tèh ken ne kakaronniátshera, ne nahontakwáion tsi niaʼhawenonhátse ne ne kahrahrhátshera.

¹² Ethóhʼne enteskwahnáhton. Entísehwe tánon akonháke nónhwe tsi ensehwaterénnaien, ó꞉ni tenkwahriwahseráhkwahse.

¹³ Enskwahiathishá꞉ke, tánon enskwahiatatʼtsénri tioríhwah tsi sehwahrhiashaʼkwékon thisehwethákwen tsi thakwahiatíshaks.

¹⁴ Hén, káhton enskwahiatatʼtsénri, tánon enskwahkwahthákwahse ne tionhontsashón꞉ʼa. Kwáh enskwahiatharó꞉rohke tsi kanahkerahsehrahkérons tánon tsi nonhwésons hiatekwahreniáton, ó꞉ni kwáh tentkwahiaténhaʼwe tsi nónhwe nihionhontsá꞉ien ne kwáhʼthekwá꞉hton tsi kwáh-nahkerahkwáh꞉ton, Í꞉i, ne Watiá꞉ner, wakatháti.’

¹⁵ “Sehwáhton ne Roiá꞉ner thetsiʼsehwáwi ne rothiʼtokénse ne Babylonia nónhwe.

¹⁶ Sehwathahónshaʼtat tsi nahó꞉ten ráton ne Roiá꞉ner tsi nòkwah ne ronnonhtí꞉io ne rahshá꞉riʼne ne kanakeráhsehra ne ne Táwit rahshá꞉riʼneʼne tánon tsi nòkwah nonhkweshón꞉a nètho kanatowáhnen, ne ne, tsi nikáien ne sehwahtátenonhkwe né iáh tiehonwahtiʼhiaténha nahonwahthinhóton.

¹⁷ Ne Roiá꞉ner Roshastsʼtenserowáhnen ráton, ‘Takʼkháwi nateriʼiósehra, athonkharhiákon, ó꞉ni ne kannrahthariʼnhétshera ne ronnonháke, tánon ne enkhehiónhniaʼthe ne wisonkóhwa ne ne sóhtsi iohiátkens nahionhiáke.

¹⁸ Kwáh ne ienkhekónhthakwe naʼteriʼiósera, athonkharhiákon, ó꞉ni kannrahtharinhétshera, tánon kanenhrahkwékon ne tsi ionwenhtsiáte enhiakoteroniénten tsi nahó꞉ten enhiontkátho. Kwáh tsi nonhwéson iaʼtenkhehiaréniaʼthe, nonhkweshón꞉a entionthonnhékon ó꞉ni enhiakotheroniénten ne tsi nahothihiáthawenh. Nonhkweshón꞉a tenhonwahtiʼiéron ó꞉ni rahothisénna enhónsthake tsi nenhatiʼriwahiesáhsehke.

¹⁹ Ne kíʼ thóh nenhothihiáthawenh tioríwah tsi iáh tehonahʼtewenhnharáhkwen naʼteriwahnhothátshera tsi nihiorihwahtó꞉ken ieʼkhehiathenieténnisʼkwe rononháke ne akonhkwethasónhas ne rothitókense. Iáh tehonatʼthontháton nahonahthaʼhonsahtáthonʼke.

²⁰ Sehwahkwékon ne tsi nítsion ne kwahnakerahkwáhthonʼne ne ne Babylonia nónhwe niaʼhísehwe, sewahthahónshaʼtat tsi nahó꞉ten ne Í꞉i, ne Watiá꞉ner, káhton.’

²¹ “Ne Roiá꞉ner Roshastsʼtenseroʼwáhnenh, ne sahkoʼNí꞉io ne Israerʼró꞉nons, tsi nihotharáhkwen ne Ahab ne roʼníha ne ne Kolaiah ó꞉ni ne Zedekiah ne roʼníha ne ne Maaseiah, ne tsi niʼtsisehwahnhowenhténnis ne raosénnhakon. Ráhwenh tsi enshakoʼtsiakwahrísi thóh rahoshastsʼtenserákon ne ronnonhtí꞉io Nebuchadnezzar ne ne Babylonia nónhwe, kwáh tsi tesehwahkánereh rahonʼa enshakononhwahrhiákon.

²² Nónenh nonhkweshón꞉a ne Jerusalem nónhwe iehonwahtiʼnónhkon nahonwahthiʼnhotónrah ne Babylonia nónhwe nenhónnhereh ónhkak ashakothiʼkarónni, enhonníron, ‘Aiáwenhs ne Roiá꞉ner thóh nahiaiérahse tsi ní꞉ioht ne Zedekiah tánon ne Ahab, tsi nikáien ne ronnonhtí꞉io ne Babylonia nónhwe tiaʼtehnónhnhe tsi shaʼkoteskónhthe!’

²³ Ne ki tsi nenhotiʼhiáthawenh tsioríhwa tsi nihotiʼníkonh ne tehiotenonhianíthon karihwáhnerens—ronahtenahkwahieshá꞉ton tánon ronahnhowenhthánions raosénnakon ne Roiá꞉ner. Ne kí꞉ken ne iotkónhthe tsi nihonikonhró꞉ten ne Roiá꞉ner; rotheriénthare tsi nihonahtiéren, tánon rahonʼá shaʼkóken. Ne Roiá꞉ner rothatíhon.”

Tsi Nihohiáton Ne Shemaiah

^24-25 Ne Roiá꞉ner Roshastsʼtenserowánenh, né shakoʼNí꞉io ne Israerʼró꞉nons, tahákon naʼteriwahnhotátshera ne ne Shemaiah rahorihwáhke ne Nehelam nónhwe, iehothiaʼthonsehrahtheniéthon ne kwáh rahónʼa raosénnahkon né nonhkwetaʼkwékon ne Jerusalem akorihwáhke tánon ne rokhá꞉res Zephaniah né roʼníha ne ne Maaseiah tánon ó꞉ni ne roʼnhatiakhésons ne rothiʼkháres. Kí꞉ken Shemaiah tsi niehohiathónni ne Zephaniah:

²⁶ “Né Roiá꞉ner rokháres wahiónni né rahonákthake ne Jehoiada, tánon nónhwa ónenh kíʼ í꞉se senenhrahkweʼní꞉io Nononhsatoʼkentikówahne. I꞉se shaʼteriwahiénni nahsatkátho ne kwáh niaʼtehionkwétahke ne tehionnonhwahrawénhrie ne íhienre tsi iakoʼthó꞉kense nahehiathó꞉ten oronkwáhsa tahionthatenetsthérenʼke ó꞉ni karísthatsi ahiontatniashá꞉nerenʼke.

²⁷ Nonhtsiéren tsi iáh ethetsiérahse ne Jeremiah ne ne Anathoth tahnáhkere, tsi thóh ní꞉ioht tsi shakotharáhnis nonhkweshón꞉a tsi ní꞉ioht ne rotokénse?

²⁸ Ónenhk tsi tenhonwáhtasʼthe tioríhwah tsi shaʼkoró꞉ri nonhkweshón꞉a ne Babylonia nónhwe tsi karíhwes éhtho nónhwe ienhonwahnahnakerahkwáhton tánon ahówenhk naʼhontehnonhsonniánonh, tánon thóh rahtiteróntak, ronthethonniáhnion, tánon ne rónnek tsi nahoténsons rotiʼientʼthóseron.”

²⁹ Ne Zephaniah wahakewenhnahnhótʼthase,

³⁰ tánon ethóhʼne ne Roiá꞉ner wahakró꞉ri

^31-32 ne iahonwahnahteriwahniéhthaʼse ratikwékon ne ronwahnahnakerahkwáton ne ne Babylonia nónwe kí꞉ken ateriwahnhotátshera tsi nòkwah ne Shemaiah: “Í꞉i, ne Watiá꞉ner, enhiréwahthe ne Shemaiah ó꞉ni ratikwékon tsi nitotwahtsirínonh. Iáh í꞉i tieʼhihiateniéthon, ók éhtho ní꞉ioht tsi wahtsisehwahthárahse tsi shí꞉ken ní꞉ioht ne rotó꞉kense, tánon wahtsiʼtsiónnien nahontesehwéthaʼkwe noʼnhówenhs. Kwáh iáh othènen tahonshaʼhowahtsirahiénthake ne skátke ahisehwahnahkérehke. Kwáh iáh thahatkátho ne iohiáneres tsi nenhkhehiatiérahse nakonhkwetashón꞉a, tioríwah tsi wahshaʼkoró꞉ri nahionkwatkónten. Í꞉i, ne Watiá꞉ner, wakatáti.”