Jeremiah 22 - Ohiatonhseratokénti

Jeremiah Iaʼhateriwahnhóten Ne Tsi Thohnónhsohte Ne Ronnonhtí꞉io Né Judah Nónhwe

^1-2 Ne Roiá꞉ner wahatró꞉ri iehke ne tsi thohnónsohte ne Rononhtí꞉io ne Judah nónhwe, ne ne tsi tahawatsiratátie ne Táwit. Tánon thóhʼnónhwe hiahtsióri ne rononhtí꞉io, ó꞉ni ne rahonkwetaʼshón꞉as, ó꞉ni nonhkweshón꞉a ne Jerusalem nahiontahonshá꞉tahte tsi nahó꞉ten ne Roiá꞉ner wahénron:

³ “Í꞉i, ne Watiá꞉ner, konnháhon ne ne ahishaʼhióten ne tkariwahiéri tánon ne ioiánere. Tàsheʼne ne iontahtenikonhrahténnis tánon é꞉ren tsi sehwahiatenháwit ne shaʼkonikonhrahtén꞉ni. Tó꞉sa sehiatiéskwen tó꞉ka ó꞉ni ne thaʼsehianikonrhiákʼten ne kenkʼtiʼthoné꞉non, ne tehonthonnahkárhias, tó꞉ka ó꞉ni ne ionahteréhons; tánon tó꞉sa ó꞉ni sehnonhwaʼrhiakónnion ne iáh othènen tehothiníkonh ne kén nónhwe niwahtenátahien.

⁴ Tó꞉ka kwáh é꞉thóh nénhsiehre tsi niʼwakatennháhon, ethóhʼne kíʼ ne Táwit tsi wahaʼwahtsirahtátie ienhonthasónteren nahontenonhtiʼióhake. Tánon ronónha, skátʼke ne ronwahtiʼiótenseh ó꞉ni ne rahonnonhkwetaʼshón꞉a, kwáh ienhathikónhtahkwe tsi enhonthohétsthake tsi iotenhenrahkahróntons ne kénʼen nónhwe nikanónhshoʼte ne kanonhshiʼiótshera ó꞉ni ne enhotihonwiʼsehréshon ne otsiónkwas ó꞉ni kosáhtens enhothiséhshon.

⁵ Ók tó꞉ka iáh tashaʼtewénhnarahkwe naʼkerihwahtátʼtshera, kwáh sehriwahienteríhak tsi wahkathaʼteriwahniráhti nètho kénʼen rononhtí꞉io ronónhsohte tsi kwáh tenwahréhni tsi nenhkariwénhtahne. Í꞉i, ne Watiá꞉ner wakatáti.

⁶ “Ne hiatetsiáti, ne Judah tsi rotiʼnónhsohte ne kanonhtiʼiótshera tsi kwáh eh niʼwatkathotsherí꞉io tsi kíʼ ní꞉ioht tsi ionwenhtsiáien ne Gilead ó꞉ni tsi Iononhtahrónnions ne Lebanon; ók né kíʼ enkónhniaʼte ne iáh othènen tahonsahkariwasthátonʼke tsi nónhwe ne iáh ónhka tahienákerehke.

⁷ Ronónhkwe wahkheʼhiatheniétahne nahatirihwáthonʼte. Akwékon enthatíhaʼwe ne rahothitó꞉kens, enhathihiákons ne watʼkathotsherí꞉ios ne onentahkwénte kanahwaható꞉tons, tánon otsiʼráhke ienhonatiésehron.

⁸ “Nenhwateʼweiennénhtahne ronahtiokowáhnenh ne thiʼhononhontsátes enhontó꞉hetste tánon tenhonthaʼteriwahnónhtonseh nonhtiéren Ní꞉i, ne Watiá꞉ner, eh niwáhtiereh né nihioríwa kíʼ kénʼen kanatowáhnen.

⁹ Ethóhʼne tenhatiʼrihwahsehráko ne iorihónni tsi sehwaʼtewenhthéton ne sehwaʼteriwahʼsehronniátshera tsi naʼtethewáhtereh, ne sehwahʼNí꞉io, tánon ne sewahsénnaien ne thiʼkaniʼiosehrahté꞉nions ó꞉ni sehwahiótenʼse.”

Jeremiah Raoʼteriwahnhothátshera Ne Rahoriwáhke Ne Joahaz

¹⁰ Tiónkwe ne Judah, tó꞉sa tesehwaséntʼtho ne Rononhtí꞉io Josiah aharihónni; tó꞉sa sehwaktiónnion tsi rahwenhéion. Ók katsitowáhnenh tesehwahséntʼtot ne Joahaz rahoriwáhke, ne roiénha; hiahonwahiaténhaʼwe, iáh nonhwénhton thatahónthare, iáh nonhwénhton tahonshaʼhatkátho nonhwénhtsa tsi nónhwe niʼhonahkeráhton.

¹¹ Ne Roiá꞉ner ráton ne rahoriwáhke ne Josiah roiénha Joahaz, né teshonatʼthakwénni ne roʼníha ne ronnonhtí꞉ioʼkwe ne Judah, “Éhren rahwèthon ne kén nónhwe, iáh nonhwénhton tahthahontáʼre.

¹² Thóh nónhwe ienrénheʼie ne ó꞉ia tkanakerahsehráien nónhwe nieʼhonwahiaténha, tánon iáh nonhwénhton tahonshaʼhatkátho kíʼ kénʼen ionhontsáien.”

Ne Jeremiah Raoʼteriwahnhothátshera Ne Rahoriwáhke Ne Jehoiakim

¹³ Tsi nikarihwahiesahtsheroʼwáhnenh nónhka ne ne roʼtenonhshonniáton ne iáh tetkariwahiéri tánon né rokowahnáhthon ne kanikonhráton; shaʼkahonniénnis ne rahonkwetaʼshón꞉a sehwatiéren tsi ahothihióten tánon iáh teshaʼkokárhiakʼse tsi natehonahténtion.

¹⁴ Enhariwahiésha nónhka ráton, “Enkataʼtenonhshónnien ne kanonhsohwáhnen enhionatʼthowanénhsehke ne kanhotʼtsoharáhke.” Sók kíʼ wahaʼnonhstonkwahkaʼrónten ne tsi ronónhsohthe, onenhthakwenthétsheras wahashontónniaʼthe, tánon onekwéntahra tahakontieráhrho.

¹⁵ Sénha onhtèken ne ahishón꞉nien nahsehnonhtiʼiotsheriʼióhake tó꞉ka ne ashaʼaʼthatenonhshonniáten ne onenhtakwenthétshera, sénha ne ahiotkwenienstónhake tsi ní꞉ioht ne otsiakhésons? Ne ianíha kwáh íken tsi ionwéhsenʼne tsi ní꞉ioht tsi rónnheʼkwe. Kwáh íken tsi tkariwaiérikwe ó꞉ni ioiánerekwe, tánon kwáh íken tsi wahohianerásthen ne kwáh tsík nahó꞉ten kén niaʼháiere.

¹⁶ Kwáh íken tsi ioiánereh tsi nashaʼkotiérahse ne iakóten, tánon akwékon ioiánereh tsi naháwenhne ne rahoriwáhke. Thóh kíʼ niʼiáwenhs nahonwahientériʼke ne Roiá꞉ner.

¹⁷ Ók nék khók satkátos ne hiateshiáti ahisahianerásten; sehnonhwahrhiákons ne iaʼtehotiníkon tánon kwáh kahetkénsera tsi sehronhiakéntha ne shonkwetaʼshon꞉a. Ne Roiá꞉ner rotahtíhon.

¹⁸ Éhtho káti, ne Roiá꞉ner ráton tsi nòkwah ne Josiah roiénha Jehoiakim, ne ne ronnonhtí꞉io ne Judah: “Iáh ónhka thahiontiónnion tsi rahwenhéion iáh ó꞉ni tahiaiéron, ‘Tsi niwahétken, onhtiaténro, tsi niwahétken!’ Iáh ónhka tahiakonikonhrátsen ne rahorihwáhke iáh ó꞉ni tathahionséntho, ‘Ratianer! Rakenonhtí꞉io!’

¹⁹ Ne kahkweniensthátshera ne teskaieróntahre ne tewahóntes akonwahiatháta, ienhonwahiatísehre tánon átste nonhtenhenráti ne Jerusalem ienhonáhti.”

Ne Jeremiah Raoteriwahnhotáhtshera Tsi Niahonenonhátie Ne Jerusalem

²⁰ Tiónkwe ne Jerusalem, wáhs Lebanon niaʼhásehwe tánon tesehwahénret, wáhs tsi tiohontsáien ne Bashan niahásehwe tánon tesehwaséntho; tsi tiononhtáhere ne Moab nónhwe thonthasehwahénret, tioríhwah ne thisehwatenróhʼhonʼne tsi ronwahtisénnion.

²¹ Ne Roiá꞉ner wahiathárahse ne shiʼshahianerasténni, ók iáh tesatʼthontáhton nahishaʼthahonsahtátonʼke. Kwáh éhtho nishiérahkwe tsi náhe shiʼshónʼne; kwáh iáh nonhwénton tahʼtsiatahónshaʼthaʼte ne Roiá꞉ner.

²² Ne ietʼtsihéntenʼse tsi ioweráhre ienhiakohiaténhaʼwe, ne tisehwatenróh꞉honʼne ne ronteríʼioskwe ronwahtíʼienʼne tánon ronwahthinhóton, ne sehwanáthakons iothehénʼen tánon konwahtehénston tioríhwah ne tsi nihioriwáhke ne kariwahétken shaʼhioténʼen.

²³ Thishaʼteráhkare tsi niʼieshaʼhiatahnónhsthaton tsi naʼtekónteres ne onenthakwéntes né thóhʼthíha ne Lebanon nónhwe; ók tsi niʼkenthenthetseroʼwáhnenh nónenh ne karonhiakénsehra tenshaʼkwáhte, ne karonhiakénsehra thóh nenhiotónhake tsi ní꞉ioht ne iónhkwe iowirahientáhsehre!

Ne Rawenni꞉io Enhoréwahte Ne Jehoiachin

²⁴ Ne Roiá꞉ner wahawénhaʼse ne ronnonhtí꞉io Jehoiachin, ne roiénha ne ronnonhtí꞉io Jehoiakim ne Judah nónhwe, “Kwáh tsi niʼioriwí꞉io tsi Í꞉i ne konnhehónwe Ní꞉io, shé꞉kon ó꞉ni nísek khók nawenésthonke tsi akaierónnike naʼnisnonhsahwiʼtsheráhke ne keweienteʼthákwen nakatianáhti, kwáh kíʼ ienkónhrehke

²⁵ tánon ne enthekhéhion nonkweshón꞉a ne rohtíterons, nonhkweshón꞉a ne rònnereh ahieshaʼnonhwahrhiákon. Ronnonhtí꞉io Nebuchadnezzar tánon ne rahonkwetashón꞉a ne ronterí꞉ios entekhéhion ne tsi sónnhe.

²⁶ Kwáh tentʼtianónhtonseh í꞉se tánon ne sahnisténha nahiʼtianakeʼráhko. Thóh nónhwe niénsehne tsi nónhwe ne tesehniʼtiáron iáh thóh nónhwe tethiʼtianakeráhton, tánon tesehniʼtiáron thóh nónhwe iensehní꞉heʼie.

²⁷ Kwáh entiaskáneke ne shé꞉kon ahonsehtiatkáto kí꞉ken kanakeráhsehra, ók iáh nonhwénhton thaʼtahontèsehne.”

²⁸ Wakíron, “Ne ronnonhtí꞉io Jehoiachin thóh kén nihohiatawénhon tsi ní꞉ioht ne tehiotsetaríhon ne íhseh iewáhtion tánon iáh ónhka thaʼtehiakothonwenhtsióni? Né ken aoríhwa ne rahónʼa tánon ne sahkoienʼokónha ronwahʼnahnakerahkwáhton ne tsi tiohontsáien ne kwáh iáh othènen tehathiʼientéri?”

²⁹ O ohóntsa, ohóntsa, ohóntsa! Sewathahónsahtat tsi nahó꞉ten ráwen ne Roiá꞉ner:

³⁰ “Kí꞉ken rónkwe ronwahrewáhton nahóthonseh ne shaʼkohiohokónha, ne ne rónkwe ne kwáh iáh nonhwénhton tahohianerásten. Kwáh iáh thaʼhawahtsirahiénthaʼke ónhka enhiontkórasʼte ne Judah ne ne Táwit tahonshaʼhonatʼthákwen. Í꞉i, ne Watiá꞉ner, wakatáti.”