Jeremiah 15 - Ohiatonhseratokénti

Ne Kariwahiesáhtshera Wahotihiatórenʼne Nonhkweshón꞉a Ne Judah Nónhwe

¹ Ethóhʼne ne Roiá꞉ner wahakénhase, “Shé꞉kon ne Mahís o꞉ni ne Samuel né kénʼen aníthake ahionkanitenthaséheke, kwáh iáh thaʼkhenatónhase kí꞉ken onhkweshón꞉a thènen ne kenténron. Sehiónnien ne ahéren ahónnhethe; sehiónnien ne éhren rónnhek tsi nónwe níhkes.

² Nónen enhieshariwahnónhtonse kahnónhwe niahónʼne, sehró꞉ri tsi wáhken: Ótiake né tehonwahtihiathónkwen ne kanhrahtharinhétshera enhotírhiothe— kwáh ehʼnónhwe nienhonthahíʼne! Ótiake né tehonwahtihiatónkwen nateriʼiosehráhke nónhwe nahonníheie— kwáh kíʼ ehʼnónhwe nienhonthahíʼne! Ótiake né tehonwahtihiathónkwen né athonkarhiákon enhotírhiote— kwáh kíʼ ehʼnónhwe nienhonthahíʼne! Ótiake né tehonwahtihiatónkwen né hiahonwahtihiaténhaʼwe ne tsitiontatenonhtónkwah— kwáh kíʼ ehʼnónhwe nienhonthahíʼne!

³ Í꞉i, ne Watiá꞉ner, iaʼtewahkeriwahiénthaʼse kaiéri nihiorihwáke tsi nenhotihiátahwen: aterihiosehráhke nónhwe nenhonwahtinonhwahrhiákon; ne raothiʼierontahsónha érhar enhathisehréson; otsitenhokónha enhónnheke ne rahothihierónta, tánon ne karahkónha konhtírhio enkonhtetʼkwísa tsi niaʼtenhiothaténronke.

⁴ Enkhehiónnien nonhkweshón꞉a ohontsakwékon nahonwahtiterónkwen tioríhwa tsi nihohiéren ne Hezekiah roiénha ne Jerusalem nónhwe ne shihononhtí꞉io ne Judah.”

⁵ Ne Roiá꞉ner ráton, “ónhka tenhiesharóton, nonhkweshón꞉a ne Jerusalem, tánon ónhka ahiakonikonhrátsen tsi nòkwah ní꞉se? Ónhka iatekahiéri tsi nikaríwes tahiéthaʼne nahieriwíshaʼke onhʼní꞉se nihiothonhátie?

⁶ Íseh ne tiónkwe tahkwahkenronníhon; waskwahtswahthénien. Káti hiatkanénhstste tánon watkwahskwáhsehron tioríwa tsi wattetkwisénheʼie tsi niwahkathatienahwákon tsi niwahkenahkwénhʼen.

⁷ Kwáh tsi niatekanáhthake ne tsi ionwenhtsáte iakwahʼhiatónti ne tsi iahó꞉the tsi ní꞉ioht ne kawáhe. Wakwáhthonte, akonhkwetashón꞉a, Wakhenonhwahrhiakon ne ietʼtsihienokónha tioríhwa tsi iáh thatesehwatáhon tsi nikariwáksen tsi nisehwahwehiennótens.

⁸ Sénha hionatsiokowáhnen ionateréhons konhtíteron ne tionhontsáke tsi ní꞉ioht nonehsahrónkwas natsatʼtáttha. Wakhenonhwarhiakónʼnion ne tionkwetaʼshón꞉as ne kén nithohthihiónsa né kwáh shiʼhonahthakaríhte tánon wahkhehiónnien ne kanisténsehras nakonhthironhiáken. Kwáh thonthahiawénhstsi tsi wahkhéhienthe ne karonhiakénsehra ó꞉ni ne kateronkwáhtshera.

⁹ Ne kanisténsera ne tsáta niháti wahakóthonse ne ronwatihiohokónha wahakonikonhráhthon, ionthonrhiótha. Nakawenhnísera né iatewakkarahténi ne tetiókaras; kwáh íken tsi iakotehénʼen tánon iakawehrhiashaʼnónhwaks. Enkheríhon ne tesehwatátʼtions naʼiettsinonhwahrhiákon tsi nítion né shé꞉kon tiónnhe. Í꞉i, ne Watiá꞉ner, wakatáti.”

Jeremiah Roiá꞉ner Wahoriwahkátatʼtse

¹⁰ Tsi nióre tsi iáh tewakatʼtsennónhni kónhkwe! Nonhtiéren ne akenisténha tsi ionkenahkerátston ne tsi ionwenhtsáte? Ónenhk tsi kwáh niaʼtehionkwetahke ne tsi ionwenhtsáte tsi tehiakwahriwahkéna. Iáh tewakatwisthaʼníhen iáh ó꞉ni tehionkwisthaʼníhen; shé꞉kon kíʼ hiontkenrensehrónni.

¹¹ Saiá꞉ner, akwékon ne rahonatkenrensehronniátshera thóh nahiáwenhne tó꞉ka iáh kahiotenserí꞉io tsi tekonhiótenhse, tó꞉ka iáh tekonhianiténthaʼse ne hiónkswenhs rahothiriwáhke nónhnen shaʼthonihnikonhráhren tánon wahatiʼnikonhrahronhiáken. (

¹² Iáh ónhka tahiekwéni ne tahierístsiaʼke, sénha ne karísthatsi ne othoréke nitsawénonh ne ne tekahiéston ne tehiowístahron otsínekwar.)

¹³ Ne Roiá꞉ner wahakénhase, “Kwáh ienhkhehiató꞉ri ne tehontátʼtions ne hiahatíhaʼwe nashokowáh꞉tshera tánon ne kanoronshóns nakonhkwetahshón꞉a rahonáhkwenk, eh nahontáhwe nakheréwahte tsi nihotiriwahnerahákskon ne tsi ionwenhtsáte.

¹⁴ Kwáh enkhehiónnien ne ne ahonwahtihiótenhse ne tehontátʼtions ne tsi ionwenhtsáte ne kwáh iáh othènen tehathiriwahientéri, tioríwa nakenahkwáhtshera eh ní꞉ioht tsi ní꞉ioht nótsireh, tánon kwáh tsi nénhweh tsi enhiothékhaʼke.”

¹⁵ Ethóhʼne wahkíron, “Saiá꞉ner, í꞉se sahnikonhrahiéntas. Tahkehiárak tánon tatsniénon. Tahkeríhon nahonsatkárhiaʼte tsi niháti ne hionkeronhiakéntha. Tó꞉sa sheʼhiatenikonhkátsʼtat né ahonahteriwahténtiaʼseh nahionkenonhwahrhiákon. Sehʼhiárak tsi í꞉se shaʼriwáhke tsi hionkenikonhrahʼkarewáhtha.

¹⁶ Wahsekthárahse, tánon kwáh tsi niaʼtekawénhnahke tsi wahkathahonshá꞉thaʼte. Ní꞉i i꞉se sonkwétha, Saiá꞉ner Sewenní꞉io Shaʼshastsʼtenserowáhnen, tánon káti ne shaʼwénhna wahkánhaʼne nakwerhiáne natʼtsennónhnia ó꞉ni natnonnharáttsera.

¹⁷ Iáh tewahkatiesáhthon ne tsi nikawistáheks nakóren ahiakwakwekhonhatiésehke, ahionkwahieshón꞉hake tánon ahionkwatenikonhróh꞉rike. Tsi wakatewénhnarahkwe tsi niskhenáhon akonhatsíwak tsi wahkatahtíteron tánon wahkatenahkwawenhráhti.

¹⁸ Nonhtiéren tsi iehiontkhontáhkwen tsi wahkeronhiáken? Nonhtiéren tsi niwahkatkarewáhton tsi iáh testiewénhtas? Nonhtiéren tsi iáh tesehwahthewhirónnis? Né kén ísehre ne taskenikonhrhiáten tsi ní꞉ioht ne watʼnekíne wastátens tsi niwahkénnhes?”

¹⁹ Ne kíh kí꞉ken ne Roiá꞉ner wathariwahsehráko, “Tó꞉ka tentèseh, enskonhiéna, tánon shé꞉kon ensestiótenseh. Tó꞉ka tsi ní꞉ioht ne iáh othenènenh tekariwástha tsi ahishátharahke wahsatró꞉ri ne ioríhonthe ateriwahnhotátshera, íseh shé꞉kon ne akonhkwétah enkénhake ne rotó꞉kense. Nonhkweshón꞉a isèhke nienshón꞉ne, tánon iáh thaʼtehiothonhontsióhon níse rononháke niahonshá꞉se.

²⁰ Kwáh enkonhiasonthónnien ne iohníron otsínekwar tehiowístahron karísthatsi enkénhake tsi nióre ne ne rónnhereh eh nenhiáwenhne. Ensehwaterí꞉io, ók iáh kíʼ tahieshaʼsénni. Kwáh entenikwekónhake nahonthakónhne ó꞉ni nakonhiathanónhsthate.

²¹ Kwáh enkonhniákente tsi nòkwa ne rahotishastsʼténseras ne ionkwetahétkens ó꞉ni ne ratinahthakárias. Í꞉i, ne Watiá꞉ner, wakatáhti.”