Jeremiah 14 - Ohiatonhseratokénti

Ne Tehiotenonhianíton Iahonwenhtsátʼten

¹ Ne Roiá꞉ner wahakénhase tsi nòkwah ne iahonwenhtsátʼten,

² “Judah iotsiónnion; ne ahonatahshón꞉a ne kanatowáhnenhs iawenheionhátse, nahonkwetahshón꞉a onhkwentsiáke ratihiatahkérons tsi nihotinikonhráksens, tánon ne Jerusalem tewahséntʼthos nakonhwaiénahwahse.

³ Ne rohtikwahtsénion iashakonathóri ne rahotináhtsheras nahatinekahkóha onékanos; tsi tsionáhwerohʼte niahónʼne, ók iáh tehothinekatʼtsénrion; shaʼhónnewe iáh thènenh tekanekahráhtse ne rahotitʼtseshón꞉a. Wathonnikonhróh꞉ko tánon wahthonanithónnien, wahontʼkonhsáhsete.

⁴ Né tsioríwa tsi iáh tehiokennóres tánon iostatʼténʼen nonhóntsa, ne ratiʼiéntʼthos tsi nihonahthehénʼen; ranatkonshaséhton.

⁵ Tánon ne kahentáhke ne oskenón꞉ton osténʼha wahothewénhtehthe nónhwak iotewíhrahien tsioríhwa tsi iáh othènenh tehiotʼthontónni.

⁶ Ne karahkónʼa tewahóntes onhnonthoharahkéshon ronhnéton tánon rohnahthónrion tsi ní꞉ioht ne tsí꞉tsios; tehothirónhweks tsioríwa tsi iáh othènenh tehotíhien ne thènenh ahónnheke.

⁷ “Nakonhkwetashón꞉꞉á í꞉i nòkwah tetthonséntthos, ‘Iáh werohhátien nonhkwahriwaʼnerahákʼtshera tsi ionkwahriwáhrhos, thakwahiénawas, Saiá꞉ner, tsi nishaʼrahrátsʼton. Wéso iorihwáhke kwatkarhathénion; ionkwahrihwáneren tsi nòkwah ní꞉se.

⁸ Kwáh ísek khók ne Israerʼró꞉nons ieshaniahésen; ísek khók seskwahniakéntha tsi nòkwah ne kariwahiesáhtshera. Onhnonhtiéren tsi ehnishathatiéren tsi shí꞉ken ní꞉ioht ne thihionkwétahthe akénhake nonhtionwenhtsiáke, tsi ní꞉ioht ne tehonthawénhrie tsiokaráktserak khók tsi nónhwe nenhonnónhweʼte?

⁹ Onhnihiotiéren tsi ehnishá꞉thatieren tsi shí꞉ken ní꞉ioht nónhkak tahionthathonhnékten, tsi ní꞉ioht ne raterí꞉ios iáh othènenh tehoshastsʼtenseráien nahatsniénon? Oriwiʼiohónwe, Saiá꞉ner, tsi tewahkwékon! Í꞉i ne shonkwetahshon꞉a; tó꞉sa takwahtewénhtet.’”

¹⁰ Ne Roiá꞉ner ráton tsi nòkwah kí꞉ken onhkweshón꞉a, “Rohnonhwésʼkwahni nahionkwahtékwahse, ó꞉ni kwáh iáh tahonthahontaʼtheniaróh꞉tahrohke. Káti kwáh iáh othènenh tewahkerientí꞉ios tsi nòkwah ne rohnónha. Kwáh enkehiárahke ne wahétken tsi nihonahtieráhnion tánon enkheréwahte tioríhwa tsi nihotirihwáhneren.”

¹¹ Ne Roiá꞉ner wahakénhase, “Tó꞉sa tahkeriwahnónhtons natkhesniénonh kí꞉ken onhkweshón꞉a.

¹² Shé꞉kon ó꞉ni nahonnenhtóntieʼthe, Kwáh kíʼ iáh thakhehiatahónshathaʼte tsi naʼtehonséntʼthos nakheiénahwaʼseh; tánon ó꞉ni ne kwáh aterennaienthatsherákon tsi akonwahtsatatʼtsahaʼte ne katʼtshénen ó꞉ni nonátsa ahiontthátse, kwáh kíʼ iáh tahionkenikonhrí꞉iosʼthe. Khèʼkhók, ateriʼiosehráhke tsi enkhenonhwahrhiákon tánon athonkarhiákon ó꞉ni kanhrahtarihnétshera.”

¹³ Ethóhʼne wahkíron, “Sanonhtí꞉io Saiá꞉ner, shateriéntahre nètho rothitó꞉kense ronwahtiró꞉ris nonhkweshón꞉a tsi iáh thakaiéntahne nateriʼiósehra ó꞉ni nathonkarhikon, tioriʼíwa tsi sharahrátston, rónton, tsi kwáh nék khók ne skénnen enkaiénthake nonhtionhontsáke.”

¹⁴ Nonk ne Roiá꞉ner wathariwahsehráko, “Ne rothitó꞉kense akʼsénnakon tsi ronnhowenhtánions; iáh tiekehiateniéton, iáh ó꞉ni thènen tetetkhehiáwi nakhenáhonke, iáh ó꞉ni ne tiowénhna thènen tetkheró꞉ri. Tsi nihonatkháton naʼtettsensehrákon tsi nihatitharáhkwah iáh akonháke nónh tetiawéhnon; tsi nihontró꞉ris kwáh iáh othènen tekariwástha tsi nihonahʼnonhthonniónhon.

¹⁵ Í꞉i, ne Watiá꞉ner, kwahró꞉ris tsi nenhkheʼiérahse kí꞉ken rohtitokénhse tsi nikáien ne iáh tiekhehiateniéton nahontáti nakʼsénnakon ó꞉ni nahonníron nateriʼiósehra ó꞉ni nathonkarhiákon tsi iáh tahkanonhwáhrehke kíʼ ionhwénhtsaien—kwáh tsi wahterí꞉io nónhwe nenkhenonwarhiákon ó꞉ni nathonkarhiákon.

¹⁶ Nonhkweshón꞉a tsi nikáien ne ronwahtiró꞉ri kíʼ nahorihoténshons kwáh ne sáhka tsi enhonwahtinonhwarhiákon. Ne raothihieronthashón꞉a kanathakónson ne Jerusalem ienwáhtionke, tánon iáh ónhka tahontetʼtsénri nahonwatihiatáta. Kwáh kíʼ ratikwékon tsi eh nenhotihiátawen—tsewahkwékon ne rotiniákʼkons ó꞉ni ne shaʼkotihienhokónhas. Kwáh ne enkónhniaʼte nahatikárhiakʼte ne raotiriwahneraháktshera.”

¹⁷ Ne Roiá꞉ner wahakéʼnhane nakʼkheró꞉ri nonkweshón꞉a nakenikonhrakséntshera tánon nahkíron: “Aiáwens ne karáhke tahontnahwénhte ne okásehri tsi niwenhnisehrésons ó꞉ni tsi niwahsontésons, tó꞉sa nonhwénton akátʼkahwe tsi tekaséntʼthos, asèken nakonkwetaʼshón꞉a kwáh í꞉ken tsi ronatkarewáhton tánon kwáh wahetkenstsí꞉en tsi nihotironhiáken.

¹⁸ Nónen kahentháke nienhénke, katkáhthos ne rohnónkwe rahotihierontahsóna tsi nihonwahtírhio ne tsi wahterí꞉io; nónen kanahthakónsons nienhénke, khèkens nonhkweshón꞉a athonkarhiákon rotirhiótha. Ne rothitó꞉kense; o꞉ni ne rotikháres rohtihiotáties ne rahotihioténsehra, ók iáh kíʼ tehothinikonhrahiéntas tsi nihontiérah.”

Nonhkweshón꞉a Wahonwahniténthaʼse Ne Roiá꞉ner

¹⁹ Saiá꞉ner kwáh kén oriwiʼiohónwe tsi sehkenronníhon ne Judah? Nonhtiéren tsi niséhsons ne Zionró꞉nons? Onhnonhtiéren tsi éhtho nióre tsi niwahétken tsi niʼskwakarewáhthon ne ne iáh tahiakwahkwéni ne ahonshahionkwaʼtewihrónnien? Skénʼnon hiakwésaks, ók iáh othènen teiawénhon ne aiohianeréhake; hionkwaskanéhʼkon ne ahonshaʼhiakwahiewénhtahne, ók khèkenk kahterontserahónwe.

²⁰ Hionkwariwáhneren tsi nòkwa ní꞉se, Saiá꞉ner; kwáh hiakwariwahnírats ne hiatehiakwahiáti onhkwahriwahneraháktsheras tánon ó꞉ni ne hiakisotʼthonkonhkénʼens rahotiriwahneraháktsheras.

²¹ Sehiárak tsi nisharahratsthánion tánon tó꞉sa tahkwahkénron; tó꞉sa shatéhat ne Jerusalem, thóh nónhwe nishaʼtenitskwarahtseró꞉te ne shaʼnitskwahrahtsherahtokénti. To꞉sa thétiak ne aterihwasheronniátshera né sáhson tsi nahtethewáhtereh.

²² Kwáh iáh ne kahiatonnisónhas ne ónhkwe konhwatisénnaiens tahkonhthikwéni nahonthakonhténieʼthe nokennorésehra; ne iatekahiáti tsi iotsikerahrónnions iáh thakahkwéni naonhstharahténiaʼte. Isèhke nónhwe nihionkwáhien nonhkwahrahrátʼtshera, Ó Saiá꞉ner onhkwahNí꞉io, tioríwa tsi sonhatsíwak khók kí꞉ken eh nisheránions.