Jeremiah 13 - Ohiatonhseratokénti

Ne Niwahniataréhsa

¹ Ne Roiá꞉ner wahatró꞉ri nakatatʼninónhsehra ne kenniwaniaʼtarétsa tánon nakátste; ók wahatró꞉ri ne tó꞉sa awènhke ièkof.

² Sók kíʼ waknínon tánon wakátste.

³ Ethóhʼne shé꞉kon ne Roiá꞉ner sahatʼtháraʼse,

⁴ “Wáhs Euphrates tsitʼkaniataratátie niaháse tánon tsi iotstenrahkáronte iashá꞉sek nètho oniatará꞉a.”

⁵ Káti thóh niaháke iakásehte ákta ne Euphrates.

⁶ Onahkènhke ne Roiá꞉ner sahakró꞉ri Euphrates niéske tánon sekʼkhóha nètho niwahniatarétsa.

⁷ Káti thóh nionsáhke, tánon nó꞉nen sonshaketsénri tsi nónhwe niwakasehthónʼne, wakatʼkátho tsi iohetkénʼen tánon iáh thènen tetsioiánere.

⁸ Ethóhʼne ne Roiá꞉ner shé꞉kon sahatʼtháraʼse,

⁹ “Éthoh kíʼ ní꞉ioht tsi enkhehiáthonʼte ne Judah ó꞉ni ne Jerusalem né tsi nitsatatónni.

¹⁰ Ki ronnonhkwetaʼhétkens iáh tehonatʼthontáton nahionkathahonsahtátonke. Shé꞉kon éhthoh nihotinonhtsistahníron ó꞉ni ronhnonkwetaʼhétken tsi nitiothónʼne, tánon konhwathisénnaien ó꞉ni tekonhwathiriwásnieʼse ne óiah niʼiohokón꞉a. Kwáh káti, éhthoh nenhothiʼiátawen tsi ní꞉ioht kí꞉ken niwaniatarésah ne ne kwáh iáh othènen tehtioiánere.

¹¹ Kwáh tsi ní꞉ioht ne kén niʼwaniataréhsah tsi nihioienawáhkon ne rashionhontáhke, káti ne wakéron nonhkwetahkwékon ne Israel ó꞉ni ne Judah ahionníronhke tsi ahionkhatienawáston. Thóh kíʼ niwahtiéren ne káti ne í꞉i akonhkwetaʼshón꞉a akénhake tánon tenhionkenonhwerahtónsehke ó꞉ni tenhkonhwahrénsaron naksénna; ók iáh tehionkewenhnaráhkwen,”

Ne Otsítsa Watnekaráhkwa Kátʼtse

¹² Ne Roiá꞉ner Rawenni꞉io wahakénhase, “Jeremiah, sehró꞉ri nisraeró꞉nonhs kwáh tsi niaʼtekatʼtshéthake notsítsa watʼnekaráhkwah tsi otsítsa enkanahnónhake. Tenhathiriwahsehráko tsi ronahteriéntahre tsi kwáh niaʼtekatʼtshéthake tsi otsítsa enkanahnónhake.

¹³ Ethóhʼne ietʼtsiró꞉ri Í꞉i, ne Watiá꞉ner, tsi kwáh enkhehiérihtse nonkweshón꞉a notsítsa ne kénʼen ionwenhtsiáte tsi nióre ne ienhothinekáthaʼne: ne ronthinonhtí꞉ios, ne Táwit nónhwe nithonatʼwatsirínon, ne rothikháres, ne rothitó꞉kense, tánon onhkwetahkwékon ne Jerusalemró꞉nons.

¹⁴ Ethóhʼne tenkhehiatáriʼthe tsi ní꞉ioht ne katʼtsheshón꞉a thakatʼtsheténseron, ahonthahiakóhionke tó꞉ka ó꞉ni kenknahonthahiakohiónhake akénhake kwáh kíʼ ne skáka enkénhake. Iáh thahóten ne kenténron, iáh thatahkhehiaróh꞉thon, iáh ó꞉ni ne kenténrat thatahóntʼtaste nahkhenonwahrhiákon.”

Jeremiah Wahshakoronkáhten Tsi Nòkwah Ne Kanahiésehra

¹⁵ nʼIsraerʼró꞉nons, ne Roiá꞉ner rothatíhon! Sehwahnítent tánon ehʼtsisehwahthahónshatat.

¹⁶ Ehʼtsisehwahkwéniensts ne Roiá꞉ner, sehwaNí꞉io, Nohénton nahontaháhaʼwe ne tetiókaras, tánon enthisahsihʼtiá꞉ke ne tsi ionnonhtahrónnions; nohénton ne kwáh ahonthahakárasʼthe ne ne kaswatʼthétshera saskanékskwe.

¹⁷ Tó꞉ka iáh tahisehwathahonsahtháte, nakwahtónnhets hathaséhtonke tsi tenwahséntho né enkarihónni tsi nisewahnáie; kwáh íken tsi katsithowáhnen tsi tenkaséntho, tánon natkásehri tenwatnahwénhthe tioríhwa ne Roiá꞉ner rahonkwetaʼshón꞉a tsi iahonwathihiaténhaʼwe nahonwatinaskónhni.

¹⁸ Ne Roiá꞉ner wahakénhase, “Tsió꞉ri ne ronnonhtí꞉io ó꞉ni ne ronisténha ianitskwaráhko ne rahonanitskwahráhne, tioríhwa ne watʼkahthotsherí꞉io rahonahnónhwarohʼre tsi thonsènʼne ne nihnonhtsíʼne.

¹⁹ Ne kanahthakónhsons nenhtiéʼne nòkwah ne Judah tsi tekonwanahthánenh; iáh ónhka tahónton né niáhien. Onhkwetahkwékon ne Judah tsi ronwahnahnakerahkwáhthon.”

²⁰ Jerusalem, satʼkátho! Ne iesáhsons othoréhke nonhtahonnenonhátie! Kahniehonénon nonhkweshón꞉a ne ieshaniahésenhne nasehiatennikonhráhren, sonkwetahkénʼen tsi nisehsennhowanáhthaʼkwe?

²¹ Onhnahóten enshíron nónen nonhkwesónha tsi niséhron né꞉ne sahterohserahkénʼen kènʼne tánon ne waheshatiathakwení꞉iosthe? Thóh ní꞉ioht tsi ensehronhiáken tsi ní꞉ioht ne iónkwe iohwirahientáhsehre.

²² Tó꞉ka ensehriwahnonhton onhnontiéren kí꞉ken tsi kwáh akwékon eh ne shahiátahwen— nonhtiéren ne sattserónniat tsi onhterahtiónko tánon waheshasehronniáhshion tánon thontaheshanónhtonse— né tsioríhwa ne shariwahneraháktshera tsi natehiotenonhnianíton.

²³ Ahiekwéni onhtèken ne onhkweshón꞉a tahietéhni tsi nihionsohkóten ne akonhéhont, tó꞉ka ó꞉ni ne tahkoskóhwa ne iohrahkwahrónnions ahonthónthe tsi iohrahkwahrónnions? Tó꞉ka ahiekwéni, í꞉seh ne nék khók sehwahiote ne kariwahétken ahónton nahisehwahweientéthaʼne né sehwahióten ne tkarihwahiéri.

²⁴ Ne Roiá꞉ner kwáh ne he tsi watʼtatthó꞉kwahte tsi ní꞉ioht ne kahwáhe né꞉ne hiehióha ne kahentahkekó꞉wa tehiowerahtháse.

²⁵ Ráhwen kén kíʼ nenhshaiátahwen. Kén ní꞉ioht tsi iatehoriwahiénthase tsi nenhiaiérahse, tsioríhwah tsi ettsiathanikonhrénʼen tánon né tahsehiéthaʼkwe ne rohthinówenhs niʼiohokón꞉a.

²⁶ Kwáh rahónha ne Roiá꞉ner enhiasehronniási tánon enhianotstónni nahiatéhaʼthe.

²⁷ Iáken ètho nishaieráhnion tsi nahoténsons ne rahriwáhshons. Iáken tsi sehnonhteratiésons ne iatehothihiánere niʼiohokónhas ne tsi ionniarónnions ó꞉ni ne tsi kahenthakérons, tsi ní꞉ioht ne rónkwe shakoskáneks ne thehianonhsahnéken ró꞉ne tó꞉ka ó꞉ni tsi ní꞉ioht ne ranaskónhni ráhsehres ne onètien. Tiónkwe ne Jerusalem, sehwarihwaieshá꞉on! Tóh nióre né kwáh tahonthetionkwetaʼhiérihke?