Jeremiah 11 - Ohiatonhseratokénti

Jeremiah Tánon Ne Ateriwahsehronniátshera

¹ Ne Roiá꞉ner wahakénhase,

² “Satahónsatat tsi nikawenhnóten ne ateriwasehronniátshera. Sehró꞉ri nonhkweshón꞉a ne Judah ó꞉ni ne Jerusalem

³ ne tsi Í꞉i, ne Watiá꞉ner Khení꞉io ne Israel, wahkheʼiénhaʼse ne karewahtátshera kwáh tsi niaʼtehionkwétahke ne iáh tahiontewénhnarahkwe tsi nikawenhnóten kí꞉ken ateriwahsehronniátshera.

⁴ Ne ne ateriwahsehronniátshera ne kheʼhionniénni ne sakothisotʼthonkonkénʼen ne ne sahthontatʼkhehiatínekenʼwe ne Egypt, nonhwénhtsia thóh niʼiotónʼne tsi ní꞉ioht ne kwáh tehiotsenhanonhiáni ne rahotiriwáhke. Kheró꞉ri nahionkewénhnarahkwe tánon éhtho nihatí꞉ier tsi niwahkatenná꞉hon. Kheró꞉ri tó꞉ka enhionkewénhnarahkwe, ronónha ne akonhkwetahshón꞉a enhónton tánon Í꞉i ne Raotí꞉io enkénhake.

⁵ Ethóhʼne enkwé꞉ienste tsi nikhehiarahratsʼténni ne sakotisotʼthonkonkénʼen tsi entekhéhion ne ionhontsáresen ó꞉ni ne iohontsí꞉io tsi ónen ne ratíhawe.” Wakíron, “Hen, Saiá꞉ner.”

⁶ Ethóhʼne ne Roiá꞉ner wahakénhase, “Wáhs tsi khanatowáhnen ne Judah niaháse tánon ne kanathakónsons ne Jerusalem. Thóh nónhwe iaserihówanat nakateriwanhotátshera tánon sehró꞉ri nonhkweshón꞉a nahontahónsahtaʼte tsi nikawenhnhóten ne ateriwahsehronniátshera tánon nahontewénhnarahkwe.

⁷ Sahthontakhehiatínekenhwe ne sakothisotʼthonkonhkénʼen ne Egypt, Kwáh tohkénʼen tsi wahkheretiaron nahionkewénhnaraʼkwe, tánon iewakʼkontákwen tsi kheretsiárons nonhkweshón꞉ʼa shé꞉kon nónhwa kénʼen wenhniseráhte.

⁸ Ók iáh kíʼ tehonatahonsahtáton iáh ó꞉ni tehonatewenhnaráhkwen. Khékenk, ratikwékon iahathikónhtahkwe tsi wahontenontsistahnírahte tánon sénha wahonnonhkwetaʼhétkenʼne. Kheró꞉ri nahontiénaʼwasthe ne ateriwasehronniátshera, ók iáh tehonathontáton. Sók kíʼ tahkhéhion akwékon ne karewathátshera tsi nikahiatónnion.”

⁹ Ethóhʼne ne Roiá꞉ner wahakénhase, “Nonhkweshón꞉a ne Judah ó꞉ni ne Jerusalem rohnaʼtenikonhronniháties tsi nòkwa ní꞉i.

¹⁰ Thóh nionsahónʼne tsi nithatiʼriwahneraháksʼkwe ne sakothisotʼthonkonhkénʼen, ne ne iáh tehonatʼthontháton ne èthoh nahatíhieʼre tsi niwáhken; né wakonhwathisénnaien ne thikáhionk niʼiohokónha. Tetsáron ne Israel ó꞉ni ne Judah tehotihiákon ne ateriwaʼsehronniátshera tsi nikhesenhénni ne sakotisotʼthonkonhkénʼen.

¹¹ Káti nónhwa Í꞉i, ne Watiá꞉ner, wakhehiaronkáten tsi enthékaʼwe ne kahkaronniátshera ne ronhnónhake, tánon iáh thahatiniákenʼne. Tánon nónen iatenhothihénreʼte nakonháke nakhehiénahwaʼse, iáh thakhehiatahónsahthaʼte.

¹² Ethóhʼne nonhkweshón꞉a ne Judah ó꞉ni ne Jerusalem thóh nienhónʼne ne ne niʼiohokónhas tsi nikáien ne ronwanatienkwahronniatenni tánon rononhake iatenhothihenrete nahonwathihiatahkéna. Ók nètho niʼiohokónhas iáh tahathikwéni nashakothihiatakéna nónen kí꞉ken kariwaiesáhtshera énwahwe.

¹³ Nonhkweshón꞉a ne Judah tóh níkons rothiniʼioseráiens tsi kíʼ níkon rotiʼnataiénton ne kanatowánenhs, tánon ne ienakeréhnion ne Jerusalem kwáh eh nihiawetatʼtsáni tsi rothikétskwen ne ietsienharáhkwa naʼkonwahtienkwaronniáten nètho iáh tehiotehensehráien ní꞉io Baal tsi kíʼ níkonhs tekanatokenháton ne kanatowánenh.

¹⁴ Jeremiah, tó꞉sa saterénnaien nakonháke tó꞉ka ó꞉ni askaniténthaʼse ne ronónha rahotirihwáke. Ne nónen tehonanikónrhare tánon entionkenáton nakheiénahwaʼse, kwáh iáh tahkhehiatahónsahthaʼte.”

¹⁵ Ne Roiá꞉ner ráton, “Nónhkwe ne khenorónkwa kariwahétken tsi nihontiéra. Kahnithatihianerensehrénhas nakenonhsatokéntiʼke ahonnésehke? Rónnereh onhtèken enhatikwéni ne tahatítasʼte ne kariwaiesáhtshera tsi ronrahratsthánions ó꞉ni tsi rathítats tsi konhwanatsiatatʼtsahátha ne katʼtshénens? Ethóhʼne onhtèken enshonthonnáren?

¹⁶ Iehioterátsʼthon ne khenathónkwen ne iotenerahthakáte iakenʼiehwátha karónta, kwáh titkáhere ne wahí꞉ios; ók nónhwa, thóh ní꞉ioht tsi iotsarókwen tsi ní꞉ioht ne iowérenh enkatékʼkahte nahonerahthasónha tanon tentiákon ne ahonenhrahsónha.

¹⁷ “Í꞉i, ne Watiá꞉ner, Keshaststenserowánen, kwénteron ne Israel ó꞉ni Judah; ók kíʼ nónhwa kariwahiesáhtshera tkheteronkwáhtha. Kwáh ronónha iahontátʼkwahse tioríhwa tsi wahétken tsi nahóntiere; wahonkenakónhni né tsi wakonhwatátseh nakonhwatienkwaronniáten ne Baal.”

Wahontenikonhrónni Onhnahonwaié꞉raʼse Ne Jeremiah Tsi Rónnhe

¹⁸ Ne Roiá꞉ner wahakaronkáten tsi nihontenikonhrónnis ne iónksons tsi nahiontiéraʼse.

¹⁹ Eh nikonhnhótenʼne tsi ní꞉ioht ne teiotinakarontónʼa owíra iakonhwahiaténhaʼwe nakonhwanonwarhiákon, tánon iáh tewakateriéntarahkwe tsi í꞉i nónhwe nihontenikonhrónnisʼkwe ne karihwahétken. Ronthónhakwe, “Ánion tewahróntsiak tsík sénha shé꞉kon iotakaríʼte; áhnion tsi tewárhio ne ne kwáh tó꞉sa ónhka ahonsahonwehiárahke.”

²⁰ Ethóhʼne wakaterénnaien, “Sashaststenserowánen Saiá꞉ner, í꞉se ne tkariwaiéri teshiatorètha; í꞉se sehiatenikonrátkenʼse nonhkweshón꞉a ó꞉ni tsi nihononhnhóten. Sesnónhke nónhwe nátsien nakeriwahson꞉a; káti tahkeríhon ne akateróh꞉rohke tsi nenhsehshekárhiase kí꞉ken onhkweshón꞉a.”

²¹ Nonhkweshón꞉a ne Anathoth tehonahthonwenhtsióniʼne nahionkenonhwarhiákonʼke, tánon wahonkró꞉ri tsi enhionkenonhwarhiákon tó꞉ka ientkónhthakwe nakateriwanhóten ne Roiá꞉ner raotheriwahnhotátshera.

²² Sók káti ne Roiá꞉ner Roshaststenserowánenh wahénron, “Kwáh enkheréwahte! Ne kenʼnithothihiónsa rahonnonhkwetaʼshón꞉a tsi wahterí꞉io nónhwe nenhonwatírhio; ne shaʼkotiʼiohokón꞉a athonkarhiákon enhotírhiote.

²³ Watʼkwathákwen ne kawistáheks nahontakáhaʼwe ne kariwahiesáhtshera ronónhake ne Anathoth, tánon nónen énwahwe nètho kawistáheks, kwáh iáh ónhka tsiatahiotáhteʼre.”