Isaiah 9 - Ohiatonhseratokénti

Ne Iakoʼtonhkwetakwaríshon Iakotkoráston Ne Tsi Táhre Ne Ronnontí꞉io

¹ Ók iáh kíʼ tahontahiakohkárawe nakahonháke tsi niʼiákon ne iakohnikonrahronhiákenhkwe. Ne tsi nitsiotohétston taháhawe wahanontánake ne tsi ionhontsáien ne Zebulun ó꞉ni ne tsi ionhóntsaien ne Naphtali, ók tsi niahawenonhátie kwáh kí ne enhrón꞉niate nahionerakwahtón꞉hake tsi niahawenonhátie ne kaniatarakekówa, ne ne í꞉se nokwáti ne Jordan, thóh nón꞉we Galilee ne ne ronhnonʼhontsakerónons.

² Né onhkweʼshón꞉ʼa ne thóh nón꞉we nihiakotahitákhene tsi tetsiókaras kaswathetserowánen waontká꞉tho. Né꞉ne tsi nihiákon ne thóh nónwe niʼienákerekwe ne tsi ionhontsáien ne kwáh tetsiókaraskwe— akahonháke watsioswát꞉thene.

³ Washetsiokówanate ne iakahontsakeró꞉nons, ní꞉se wasehieiarónhase ne raonatʼtsennonhniátshera; sahénton ronatonnáhere kwáh tsi ní꞉ioht tsi ronaʼtsenhnónhni nó꞉nen rotiʼienʼtkwákwen, kwáh tsi ní꞉ioht nonkweshón꞉has tsi ronatʼtsenhnónhni nó꞉nen tehontatsakhonhniónhnis tsi nahoténshons ronahtsiaʼtakweniʼióston ne iehotiháseron.

⁴ Asèken ne ronteniarorókstha ne rotiʼrieniaksthénhni, tánon ne tekaniáronhwe ne ratironkwenakhe, ne raothí꞉nia né sakotiwisáthakwe, í꞉se tesahiákon kwáh tsi ní꞉ioh tón꞉ne tsi tewenhniseratékwen ne Midian nón꞉we.

⁵ Asèken akwé꞉kon ne raonhatashón꞉áhs ne ronterathaientáʼnionre ne ronterí꞉ios tánon akwèkon ne ahtseronniátsheras kawenónhni onekwensá꞉ke kwáh kí enwatsahá꞉tonke tsi ní꞉ioht noièn꞉te thóh otsirá꞉ke.

⁶ Asèken raksáha ronakeráton nonkwariwàke, Roskenrakéta owiráha tionkhiʼiáwi! Ne kahshatsténsera ranenhsáke nón꞉we nikáhere; tánon ne ronhwasénhnawi Roiatanerákwah Ratsenhaieskówa, Roshatstenhserowánen Ní꞉io, né꞉ne tsi nènhwe Kanhísera enkénhake, rahónha Ronwakowánen ne skénnen í꞉ken.

⁷ Né raʼoshatsténhshera kwáh enwahtehiá꞉ron ienhiokontákwen, tánon kwáh iáh tsahontókthen tsi skénnónk enkénhake ne raonitskwáhra ne Táwit tánon ne raonontiʼiótshera. Kwáh kí enhakwahtáko tánon entátswanónhna skát꞉ne ne kaiáneren tánon ne karihwakwahrihshión꞉tsheras kwáh kénhen ienwatáhsawen tánon tsi nénhwe enkénhake. Ne Roiá꞉ner Roshatstenseʼrowanenkówa iateorihwaién꞉tase ne thóh kíʼ ken nenhá꞉iere.

Né Karihwentátshera Rononháke Ne Iontatónhni Tánon Ne Saʼkotironhiakéntha

⁸ Né Roiá꞉ner iaʼhatehwenhnaténieʼte nahonwatkónten ne Jacob, tánon ne wahotírane NʼIsraerʼró꞉nons;

⁹ tánon kwáh onhkwetakwékon tsi iakoteriéntarakwe— ne Ephraim tánon ne tsi ratinakeré꞉nion ne Samaria— ók kanahieserákon tánon tsi rontatónkwetowanátha wahonhníron:

¹⁰ “Ne nikanenhiásas teiotenenhiokeronhténion tsiosénhseron, ók né kíʼ entsitsiónhniaʼte ne kanenhiaserónhnis; ne tsionionwarontonhakówa karonhtsiá꞉kon, ók kwáh kí onentakwenhtétshera karónta entsakwáts꞉te naonák꞉take.”

¹¹ Káti Né Roiá꞉ner washakoshatsʼténseron ne ronterí꞉io raotiʼtsiókwas ne Rezin ne ronwahtísons ne nashakotíson ne Rezin ne niahonwanatsatónhti, tánon wasakotsirónhnien ne tehontátswenhs,

¹² né꞉ne Aramró꞉nons ne tsitʼkarakwínekens nokwáhti ratinákere tánon ne Philistines ne tsi iatewatʼsénhtos nokwáhti ratinákere, tánon tsatehonatskaráwen tsi iakonwatsatanékwahne ne Israel. Asèken akwékon kí꞉ken raonhakwáhtshera iáh tateʼtsiotkaraténion; ne ratsanáke shé꞉kon kíʼ iateótsate.

¹³ Nonkweshón꞉has iáh kí rahonháke nòkwah tseshonénon tsi rahónha sakokónhre, khés nahonwaiatiʼsákon ne Roiá꞉ner ne kwáh èhʼneken thót꞉te ne ratironhiakeró꞉nons.

¹⁴ Sók kíʼ ne Roiá꞉ner waʼhanontsístsiaʼke ne Israel ó꞉ni wahahtashiá꞉ke, ne ioneratésons onhatashónhas tánon ne oiónhwi ne sahenhnísera—

¹⁵ né thotí꞉ions tánon ne ratisenhnowánens né nonhnóntsi í꞉ken, tánon ne rotiʼtokènse ne ronónha sakotiʼrihonhniénhnis noʼnhówens né notáson í꞉ken;

¹⁶ asèken tsi niʼiákon ne ronhnónha wahsakotihenthénse kí꞉ken onhkweshón꞉has tsi wahonwanathaharákwahte, tánon tsi niháti ne ronhnónha wahsakotihenthénse kwáh nék khók ne watesakonanitonniáthen.

¹⁷ Ne káti aoríhwa ne Roiá꞉ner iáh kí tehatonnhahéhra rononháke ne kén nithonihionsas raononkwetashónʼahs, khés nasakotenikonkátsthate ne tehiontonhnakárias tánon ne ionateréhons; asèken kwáh onkwetaʼkwékon tsi iáh teotiniʼioseráien tánon ne rotiʼióte ne karihwahetkénhsera, tánon kwáh iateieshá꞉ke ne tsi tsakowenhninekénʼen ne teiotenonwaroríhtonhte. Asèken akwé꞉kon kí꞉ken ne raonhakwáhtshera iáh sèh tatetsotkaraténion, shé꞉kon kí iatehó꞉tsate.

¹⁸ Asèken ne karihwahetkénsera ió꞉teks kwáh tsi ní꞉ioht nótsire, wattsahátha nonionwá꞉ras tánon nohíktas; né watʼtsenhanetákwa ne karakonkówa, tánon thóh tehiotsienkwarátase eʼken niewétha ne tsi ioienkwáhrote.

¹⁹ Ne ne raonhakwáhtshera ne Sakoiá꞉ner ne ronterí꞉ios ratiʼronhiakerónons nohón꞉tsa otonhontsákʼtsa, ne nohóntsa wahó꞉teke, tánon nonkweshónhas ne wahonwanatsatatʼtsahátaʼkwe notsiráke; iáh ónhka ne tahtesonaʼthateniakénton.

²⁰ Tahonhnitʼtseháton tsi nahonskenenháton natená꞉tshera ne satiʼweienhtethákwen, ók shéhʼki ronhtonhkáriaksʼkwe, tánon akwékon wahontekwísa tsi nahóten kaiéntakwe ne satinekwáhti, ók iáh kí tehonerientí꞉iohon; iekaní꞉hare ne wahónhneke ne ratinentsá꞉kes!

²¹ Ne Manasseh wasakowáhrake ne Ephraim, tánon ne Ephraim ionsahonwanahtsatónhti ne Manasseh, tánon tonhtahiaʼthénrowe tsi iahonwanatsatónhti ne Judah. Asèken akwékon kí꞉kén raonhakwáhtshera iáh kí tatetsiotkaraténion; shé꞉kon kí iatehó꞉tsate.