Isaiah 8 - Ohiatonhseratokénti

Né Isaiah Roʼiénha Né Waʼtenietensthákwen Ne Assyria Tsi Enhatinenhrenhte

¹ Eʼthó꞉ne ne Roiá꞉ner wahakénhase, Iatéset kensthenrowánen tánon thóh shiá꞉ton ne thiʼkánionk ohiatonkwasón꞉has, “Ne raohiatakweniʼiósera Maher-shalal-hash-baz.”

² Kwáh ienkheiaténhaʼwe ne iatetiá꞉ti teniʼiá꞉se ne rotirihwató꞉ken nahionkerihwanirátʼtse, né꞉ne ratsihénstatsi Uriah tánon ne Zechariah ne ne roiénha ne Jeberechiah.

³ Tánon thóh iahá꞉ke tsi tsakonónhshote ne iakotó꞉kenhse naheiató꞉ken, tánon iakowiraientásere tánon wahonwanákeraste raksáha. Eʼthó꞉ne ne Roiá꞉ner wahakénhase, ne tsenátont Maher-shalal-hash-baz;

⁴ asèken nohénton ne raksá꞉ha ahoteriéntarahne nahénron “Rákeni” khés “Nisténha,” nahokwahséhtsheras ne Damascus tánon tsi nikanenskwenháton ne Samaria kwáh kí ienhá꞉hawe ne Assyria ronnontí꞉io.

⁵ Né Roiá꞉ner shé꞉kon sahatʼthárahʼse:

⁶ Tsioríhwa kí꞉ken onhkweʼshón꞉ʼa waʼhekénron nonekanos ne saktíken ne Shiloah Kahionhatátie, tánon sahotiwistanáwenhse rahohénton ne Rezin tánon ne Roiénha Remaliah;

⁷ Né꞉se waón꞉ni, ne Roiá꞉ner tashakohawíten ne teiotenonianíton enwenhnó꞉ton ne tsi kaniataratátie, ne ronhnontí꞉io ne Assyria tánon akwé꞉kon ne raoiatanerakwáhtshera; enwatnekawenhráton ne tsi kanatseratátie tánon iatenwatnekaríne natsaktónhtie;

⁸ Kwáh iatenhwatnekaréni ne Judah tsi ní꞉ioht ne iawenhnóton, tánon iotnekawenhrá꞉ton, kwáh enwatnekakahráhthate kwáh tsi niió꞉re tsi nitsakoniáshote tánon tsi natehiotehonstsakaráhwen kwáh tentkarohróks꞉te tsi nateshonhontsakáron, Ó Immanuel.

⁹ Iatesewá꞉tsest, í꞉se ne tsonhontsakwékon, tánon kwáh teiasatʼtókwahte; Sewatahón꞉satat, í꞉se ahinónhson nió꞉re tisewanakeraseráiens: sewahshátstek, ók kwáh kíʼ enhietsisénhni; sewathateweienénhtan nahisewaterí꞉io ók kwáh kíʼ enietsisénhni!

¹⁰ Sewatenikonrón꞉ni, ók kíʼtenkatástonhke; sewatáti tsi níkon tesewatonhontsóni, ók iáh kí othénen thahonterihwaténtis, asèken Ní꞉io iakwahkwékon.

¹¹ Asèken ne Roiá꞉ner waʼhatthárahse tsi niʼkaríhwes kaʼshátste tsi tehakatsanáhere, tánon wahakaronhkáthen ne tó꞉sa thóh nón꞉we nakaténti tsi nihatiweienóthens kí onhkweshón꞉has, ratónhnions:

¹² “Tóh꞉sa ne senátont ioteriwashé꞉ton ratiʼkwékon kí onhkweshónhas ne ratinatónhkwah ioteriwashé꞉ton, tánon tó꞉sa ne saterónhkwen tsi nahóten katerónhkwah, tó꞉sa saterón꞉kwen.

¹³ Ók ne Sakoiá꞉ner ne ronterí꞉ios ratironhiakerónons, rahonháha-khók tetʼkánerat tsi roiatatokénti í꞉ken; rahónha khók taiotenonhianítonke tsi atsetsaníseke,

¹⁴ Kwáh raón꞉ha ne kanatatokénti enkén꞉hake, né nonénhia néh thóh tehiakaónkwas nonkweókons; asèken ne tehotinonsàkes NʼIsraerʼronónke kwáh ne enháton nosténhra ne tsakositsiátstha—né꞉ne waterístaien tánon tewanikárare ne tsi ratinákere ne Jerusalem.

¹⁵ Iakotsokó꞉waʼnen thóh nón꞉we nentsiakosí꞉tiake; kwáh kíʼ enhatiʼiatiénenhne tánon enhotikaréhwate; thenhonwatiniká꞉rahrake tánon enhiakoiéna.”

Né Ratikwekónʼne Isaiah

¹⁶ Sewahwanerénkʼkon ne tetiontaterihwiʼiosténhnis, sewanekentó꞉renn ne karihonhnienhnítshera tsi rónhnes ne iaʼkwakwekonháties.

¹⁷ Kwáh kí enhiʼiateráraʼte ne Roiá꞉ner, ne raón꞉ha thóh thotʼkonsashé꞉ton tsi thóh nónshó꞉te ne Jacob, tánon rahonháke nón꞉we nikáien nakahraráhtsera.

¹⁸ Satkátho, í꞉i tánon ne ratiksaokónhas tsi nikáiens ne Roiá꞉ner thaʼkáwi ne wenéstha tánon iakonerakwahténhnis Israerʼronónke tsi nithoteniéton ne Sakoiá꞉ner ne ronterí꞉ios ratironhiakeró꞉nons, thóh nón꞉we thénteron tsi tsionónhte ne Zion.

¹⁹ Nón꞉wa tó꞉ka nonkweshón꞉has eniesénhase, “Wáhs ne seiateniénten ne sakonatʼthonserátkenhse tánon ne sakotinikonrí꞉sak ne ronenheiónserons; iáh kéhn tehiówenk nonkweshónhas néh asakotinikonrík꞉sake né raʼotihiatonhnishón꞉ʼahs, ne ne ronenhé꞉ions ne raotirihwáke ne ronónnhe,

²⁰ né꞉ne karihonhnienhnítshera tánon ne tionthateriwiʼiostenhnítha?” Orihwiʼiohónwe, tsi niiákon ne kí thóh ní꞉ioht tsi iontátis kwáh kí iáh tahiakoiéntahne nahiakórenhne!

²¹ Kwáh enhontóhetste tsi thenhonhnonhontsíʼiake, kwáh í꞉ken tsi thoʼtinikonhrénhen tánon rontonkáriaks; nó꞉nen rontonkáriaks, kwáh rotinakwénhen tánon enhonwakenrenhserón꞉ni ne raotinonhtí꞉io tánon ne raotiní꞉io èhʼneken iatenhontkáneren,

²² khés ohontsáke thensontʼkáneren, ók nék khók kí enhiontʼkátho ne teionikónrharah tánon tetsiókaras, ne tetsiokaráston ne kanikonraronhiakénsera; tánon thóh ienhonwahtiʼiatón꞉ti tsi tetsokaraskówa.