Isaiah 62 - Ohiatonhseratokénti

Naoʼtesenhniétshera Tánon Naoʼiatakenhá꞉tshera Ne Zion

¹ Asèken né꞉ne Zion aoriwá꞉ke tsi iáh sák thaʼkatatónhni, tánon né꞉ne Jerusalem aoriwáke tsi iáh thakatoríshen, tsi nió꞉re naoʼtesenhniéntshera thenhiostwá꞉theʼne kwáh tsi ní꞉ioht noronkéne, tánon naoʼhiatakenáhtshera kwáh tsi ní꞉ioht tsi iotékha ne iekatsiró꞉hare.

² Né ronhnonhontsakeró꞉nons enhontʼkátho ne satesenhniétshera, tánon ratiʼkwékon ne rontiʼnontí꞉ios né saiatanerakwáhtshera; tánon kwáh osénhnase entiesahsénhnon né꞉ne tsi rasakáronhʼte ne Roiá꞉ner enthátkaʼwe.

³ Ní꞉se thóh nenhsiaʼtoténhake kwáh né꞉ne watʼkatotserí꞉io teiontenonhwaranátstha ne ráhawe ratsanáke ne Roiá꞉ner, tánon né ioràse kanontiʼiótshera aotenonwaranátstha ne ráhawe ratsanàke ne Rawenni꞉io.

⁴ Ní꞉se kwáh iáh shé꞉kon ne tahonsaʼiesanatónkwahke Iesatewenhtéton, tánon né shonhóntsa iáh shé꞉kon ne tahonsakonwanatónhkwahke iáh othènon Tekarihwástha; ók ní꞉se ne eniesanátonhkwe Nakatonnarátshera Ahonháke Kaien, tánon né shonhontsáke né꞉ne enkonwanatón꞉kwahke Ioniá꞉kon; asèken né Roiá꞉ner rawerientí꞉ios shonhàke, tánon né shonhontsáke kwáh kí enhioniá꞉konhke.

⁵ Asèken kwáh tsi ní꞉ioht ne kentiʼthohiónha rónkwe wahatateniát꞉then ne kén nitsohiónha iónkwe, né kí nón꞉neʼe ó꞉ni ne iesanonsonhniénhnis wesewaniáke, tánon tsi ní꞉ioht né roniákon rotonnáhere ahonhàke ne rotiʼniá꞉kon, káti né Rawenni꞉io enhiaʼtonhnahéraʼse nonníse.

⁶ Né tsi satenhenró꞉tons, Ó Jerusalem, thóh tekhetáston ne ronterí꞉ios nahonthenhnikonrá꞉ren; né tsi niwenhniserésons ó꞉ni tsi niwasontésons kwáh kí iáh nonwénhton sák tahontatón꞉ni. Í꞉se ne tsi tsiʼsewehiarakwénhnis ne Roiá꞉ner, tó꞉sa ahatoríhsen,

⁷ tánon tó꞉sa tsi sewatoriséntʼthos tsi nió꞉re ienhsarihwakwahtákwaʼse ne Jerusalem tánon né ensrónh꞉niaʼte nahonsahasenhnó꞉wahnaʼte nonhonhtsaʼkwékon.

⁸ Né Roiá꞉ner kwáh rorihwanirá꞉ton né sahweienhtetá꞉kwen nahanenhtsáti tánon né tsi nihanenhtsashátsʼte: kwáh kí iáh shé꞉kon thaʼtahontakónhion né saná꞉tsa né nahotiʼkwahiéntaʼne ne iesáswenhs, tánon né thiohnonhontsáte kwáh iáh tahatinekíra nonenharákeri né tsi nahó꞉ten í꞉se sahiothénʼen;

⁹ ók tsi niʼiákon né iakothaʼteroróhki kwáh kí né enhónhneʼke tánon thenhonwanonweráton né Roiá꞉ner, tánon tsi niʼiákon ne iakoró꞉ronh kwáh kí né enhatiʼnekíraʼte kanóns꞉kon né iotokénti í꞉ken Náke nonsatokentiʼkówane.

¹⁰ Satóhets, iasatóhetst ne tsi iothenhenrakárontes, sheʼrihwasehrónh꞉nien nonkweʼshón꞉has; sewaʼkwahthaʼkwenháton, sewahahasehronhniánion ne iohahowánen, sehwanenhiaróhrok, sheʼniatarakétskwas nonkweʼshón꞉has.

¹¹ Né Roiá꞉ner teoteriwareniáton né tsi iehiotonhontiotʼtaníhon nió꞉re: Sewènhas nakoiénha Zion, “Satʼkátho, né sahiaʼtakenhátshera taiawenonhátie; né raoʼrihwasehrakwáhsera nikweʼkonhátie né rahónha, tánon né raóʼwenk kakaʼrihátshera raohénton ká꞉ien.”

¹² Kwáh né enhonwatiʼnatón꞉kwahke, “Ronhnonkwetaʼtokénti, Né꞉ne seshakohiatákwen ne Roiá꞉ner”; tánon ní꞉se né entiesahiákʼtieke, “Kahiatisá꞉kon, né Kanatowanénhke iáh Tekonwatewenhtéton.”