Isaiah 57 - Ohiatonhseratokénti

Né Israerʼró꞉nons Ne Iáh Othènon Tekontiriwásthas Raotiʼiatonnisónhas

¹ Né tionkweʼtaiéris ronhnihé꞉ions, tánon iáh ónka othé꞉non tehionsterístha; né rotirihwiʼióstons iehonwatiʼhiathénha, tsi ná꞉he iáh ónhka teiakonikonraiéntas. Asèken ne tionkwetaiéris tsi tiontatsatón꞉ne tsi nó꞉kwah nateraswakʼsénhtshera,

² tánon ienhontáweiaʼte tsi nón꞉we ne skénnonk thí꞉ken; né꞉ne tsi nihá꞉ti ne tkaʼrihwaiéri nón꞉we nihonakʼthahítake kwáh entonterakáren ne raoʼnanitskwáhraʼne.

³ Ók kí ní꞉se, kén꞉en nontá꞉se, í꞉se ietsiʼienʼokónhas ne konthenhénhnaras, í꞉se né ietsiʼienʼokónhas ne rontenakwahiesáthas tánon ne konthohkóktha

⁴ Ónhka ní꞉se thiʼietʼtsiiéron? Ónhka né kén akorihwá꞉ke tsi tesewatʼtsiakarónhston tánon tesewaniʼnekarahwánions? Iáh kén í꞉se teʼietsiʼienokónhas ne rotiʼriwanerahákskons, né sakotiʼiookónhas ne ratiʼnikonrá꞉tha—

⁵ í꞉se né kwáh tisewahiaʼtátets naskanéktsheras ne tsi iorontótons ne karítons, kwáh tsi niaʼtekarónhtakes noronhtáse; í꞉se ne sheʼiawéntʼton ne seiohʼokónhas nahonʼrakwahkónsons, nàkons ne tsi ionitsthenhriá꞉kons?

⁶ Tsi nón꞉we ne tsi tioʼnitstenrakwahríshion nahonrákwahkon thóh nón꞉we nisathaterakwénhni; né꞉né sakwenhkʼónwe í꞉ken; thóh tasnekawéron tsi né washétatʼtse tsi washeʼnekánonte, thisá꞉ha nonátsia né tásheste. Kwáh ká꞉ti kén né skénnon ahonkón꞉ni kí naorihoténhsons?

⁷ Thóh né éhʼneken tánon ne tioʼtenón꞉tates thóh washaʼtenákʼtaien, tánon niahá꞉se nasatienkwarón꞉hiate.

⁸ Isheʼnakanoháti tánon ne tsiʼtewathiʼtserónhni tsi kanonkáronʼte né shonniáton nahonshaʼseiarasthákwahʼke; asèken, né tsi takatewenhtéton, washaʼthatenatʼthorókshiaʼse, eʼthonieshénon, tesathaʼkarónston; tánon í꞉se wesewaterihwasehrónhni ne iaʼteshiá꞉ti skát꞉ne ne ronónha, sanonwéhon ne raotiʼnákʼte, wasekenhénhion tsi raotineʼóhskonk thí꞉ken.

⁹ Wateshatháʼhakwe Molech niaʼháse sehienenhá꞉wi, tánon íʼshikʼnónwe tsi níkon ne satsiaʼtakonhonsthsakwah; iasheʼiaténiete ne ieʼsarihwakareʼniénhnis ahiʼnónhson nió꞉re, tánon iasheʼiaténiete iekaníhaʼre ne oné꞉shon (Sheol)

¹⁰ Waʼteswisénheie tsi nió꞉re tsi tesatawerienháties, ók iáh kí tésenh, “Iáh othènon tekarihwástha.” Shasekʼtsénhri ne saskanék꞉tshera thonʼtahióteke, tánon ká꞉ti iáh theʼsatesatsʼtenhserokʼtáhon.

¹¹ Ónhka wahiaterónhkwe tánon wesaterónhne né ká꞉ti tsi wasanó꞉wenhte, tánon iáh teskehiaʼráhon khés naskanontonniónhon? Iáh kén sák thiwakatatónhni tánon tewakateronhwékon, tánon ká꞉ti iáh tesketsaníkon?

¹² Iáh thaʼtakerihwakènha ne sarihwakwarihshiónhtsheras tánon ne sahioténseras, ók iáh kí né thènen tahiʼsahiatakènha.

¹³ Nó꞉nen iathenshaséntho, áhnion tsi nihonahtiokowánen ne sahiaʼtonhnisónhas né iesahiaʼtanónstat! Tsi iowerá꞉re nenhné꞉e ienkáháwe, énska khók ahonhnísera ieniakoiaténhaʼwe. Ók ónka nakonhá꞉ke enhiontekwáhsen kwáh kí eniehiéna nonwénhtsa tánon akówenk enwáton nakenontatokentíʼke.

Né꞉ne Wahrahráts꞉ton Nahiontatiénawaʼse Tánon Ahonsahionthatétienhte

¹⁴ Kwáh kí enhiaʼiéhron, “Shewakwahtáko, sewakwahtáko, sewahahaserónhni, akwé꞉kon éhʼren sewahawithánion tsi nahó꞉ten tehiotárons nakonkwetaʼshón꞉has raonahahá꞉kes.”

¹⁵ Asèken né aoríhwa rá꞉ton ne éhʼneken tánon né kwáh tótʼte tsi rahónha thóh nón꞉we nihénteron tsi nón꞉we ne tsi nénhwe í꞉ken, né raosénhna né꞉ne Iotokénti: Thóh nón꞉we nikíteron ne kwáh éhʼneken ít꞉ken tánon iotenathatokénti, tánon kí ó꞉ni tsi nihiá꞉kon ne teiakaweriaʼsaríhon tánon tiakonikonrénhen, né náse ahonsónhton nakonikónhra ne tiaʼkonikonrénhen, tánon á꞉se ahonsónhton nakawariáʼne ne teiakaweriaʼsaríhon.

¹⁶ Asèken iáh tsiahontʼkhontákwenhke tsi akherihwarósehke, khés né tsiókonte ahonkenakwénhenhake; asèken eʼthó꞉ne kí nonikónra enwatakénheʼie nakʼkénton, iekaníhare natónnhets ne kwáh Í꞉i wát꞉son.

¹⁷ Tsioríhwa tsi niwahét꞉ken tsi nihonaskénaʼse wakenakwénhenhne; Wakhé꞉iente, wakhekónraʼke tánon wakenakwénhenhne; ók tiókonte thóh niensatí꞉iere tsi nithatiʼweienóthenhne.

¹⁸ Wakatʼkáton tsi nihatiʼweienó꞉tens, ók kí kwáh ensheʼkhétienʼte; Kwáh enkhehéntenhse tánon né ensheʼkhekariák꞉ten ne kanikonranirát꞉tshera, tánon ensheʼkhenikonraní꞉rate ne iakokʼtiónhnion.

¹⁹ Skénnonk, skénnonk, né nahinónsons nió꞉re ít꞉kens tánon naktatsiesónhas í꞉ken, ratónhnions ne Roiá꞉ner; tánon kí enshekhétienʼte.

²⁰ Ók ne iakorihwanerahákskon kwáh né꞉ne ionontakwahrontónhties ne kaniatarakhekówaʼne né꞉ne iáh thahónton thaʼtahontó thate; naoné꞉ka né tiótses nonón꞉wa tánon onawástha.

²¹ Iáh tehotí꞉ien ne skénnon, rá꞉ton nakeʼNí꞉io, ne iakorihwáneren.