Isaiah 54 - Ohiatonhseratokénti

Né꞉ne Tsi Nénhwe Enkénhake Naʼterihwaseronhniá꞉tsera Ne Skénnon Í꞉ken

¹ Tesewaríhwak, Ó tsi nítsion ne iáh tesewahwiraʼientáhon; tiaʼtesewahénret tsi tesewaríwak, í꞉se ne iáh tesewaronhiakénhon nahiʼsewawiraʼiéntane! Asèken nakohiohʼokónhas ne konwatewenhtéton iónkwe kwáh enhionatiokówanenhke tsi ní꞉ioht nakohiohʼokónhas ne ioniá꞉kon, rá꞉ton ne Roiá꞉ner.

² Sewakówanat ne sewatóhsera, tánon ne ioharenhtónhnions ne tsi sewenhterónhtons tewatiʼrónhtak; tó꞉sa tasewatók꞉tat; í꞉tionts ne sewaserí꞉ies tánon iorihwanirón꞉hak tsi sewahwasthoʼtónhnion.

³ Asèken kwáh iathenstakwáhrite ne tsi seweienteʼtákwen tánon ne sehsenekwáti, tánon ne tsi iensatʼwatsiríne kwáh kí enshakonatiénawasʼte niaʼkahontsakeró꞉nons tánon thóh nón꞉we nenhontenatónhni ne watewenhtétons kanataiéntons.

⁴ Tó꞉sa saterónhsek, asèken ní꞉se kwáh kí iáh thaʼsatéhen; tó꞉sa sanikonrókten, asèken iáh kí thaʼseronhiáken natehénsera; asèken ensanikónren natehénsera ne kenshiʼtisahiónha, tánon natehénsera tsi saterehónskon ní꞉se kwáh kí iáh shé꞉kon tahonsasheʼhiárake.

⁵ Asèken ne Iaiatíson né꞉ne teseníteron í꞉ken, ne Sakoiá꞉ner ne ratiʼronhiakeró꞉nons né kí raoʼsénhna í꞉ken; Né꞉ne Roʼiatatokénti Énska í꞉ken NʼIsraerʼronónke né꞉ne shiaʼiatákwen, né Rawenni꞉io í꞉ken nonhontsaʼkwékon né ronhwanatónhkwah.

⁶ Asèken ne Roiá꞉ner iehianáton tsi ní꞉ioht ne ioniá꞉kon konwatewenhtéton tánon ionikonráksens naonikonrákon, tsi ní꞉ioht ne ioniá꞉kon ne rónkwe kenhshiʼthohiónha shaʼkonwatewénhtethe, rá꞉ton ne Rawenni꞉io.

⁷ Asèken kénk nikaríwes wakoniatewénhtheʼte, ok né꞉ne kanoronkwahtsherowánen tsi enskonhiéna.

⁸ Né ioʼtawenhrátonkwe né kanakwáhtshera kénk nikaríwesʼkwe Wakonhiatʼkonsashéthen, ók né꞉ne tsi nénhwe kanoronkwáhtshera kwáh kí thenskonhiaró꞉ton, rá꞉ton ne Roiá꞉ner né shiaʼiatákwen.

⁹ Kwáh né꞉ne tsi nihotenhniseraʼténionsʼkwe ne Noah nakerihwá꞉ke: kwáh kí tsi niwakerihwanirá꞉ton nètho raoʼnekaókons ne Noah tsi kwáh iáh shé꞉kon thaʼhonsontnekawénhraʼte ne tsi ionwenhtsáte, ká꞉ti wakerihwaniráton tsi kwáh iáh shé꞉kon tahonsakonnákwahʼse tánon iáh tahonsakoniaʼtewenhnaiéntonʼwe.

¹⁰ Asèken ne tsi iononténions ahónton nèhren akónhneʼte tánon ne ionhniarónhnions éhren akahawítonʼke, ók nakáwenk ne iorihwatóken kanoronkwáhtshera tsi kwáh iáh éhren takahawítonʼke ne shonháke, tánon naʼkateriwaseronhniátshera ne skénnon í꞉ken kwáh kí iah éhren takahawítonhke, rá꞉ton ne Roiá꞉ner, tsi rahónha ianorónkwah.

¹¹ Ó tsi nisaronhiáken, sahiatakarateniáton ne tsi teioweraʼtáse, tánon iáh teiesénhthenre, ó꞉nenh thó꞉wa ehʼhákʼkeron ne saʼnenhiaʼsónhas iotheserahóntsiʼne, tánon ne ahkonhnonhkonhniáten ne orónhia niwashokóten ne kanenhianó꞉ron.

¹² Kwáh ne enkónhniaʼte ne kanekwenhtaraʼhóntsi niwashokóten kanenhianó꞉ron ne tsi sateniʼkátote ne kanonsakénhiaʼte, ne tsi sathenhenrakarónhtons kawistaʼnoronshónhas né enkénhake, tánon akwé꞉kon ne sathenhenrashónhas né꞉ne kanenhianó꞉rons enkénhake.

¹³ Ratiʼkwé꞉kon ne sehiohʼokónhas kwáh Roiá꞉ner né ensakorihón꞉nien, tánon thenhiotenonianítonhke tsi nenhotiʼkwahtshéhake ne sehiohʼokónhas.

¹⁴ Karihwaʼkwarishiontsherákon ní꞉se nón꞉we nenhsarihwaníronhke; ní꞉se ahí꞉non nió꞉re enteshé꞉seke naʼiesanikonraronhiákente, asèken ní꞉se iáh tahisaterónhseʼke; tánon nahontáwe ne katerontserowánen, asèken iáh tsatákʼta tahontáhwe.

¹⁵ Tó꞉ka ónhkak aieritsthakétsko ne kanakwáhtshera, iáh akonháke tetsawénon; ónhka akénhake aieritsʼtakétsko naʼiesanákwahse enhatiʼiatiénenhne í꞉se enserihónhni.

¹⁶ Satkátho I꞉i rihiaʼtíson ne rawistónhni rahónha iehatón꞉ries nótsire naʼioswenhtáʼteke, tánon ronhniáʼnions ne ionteriʼiosthákwas nahónstonʼke tsi niwatenikonrón꞉ni; Kwáh ó꞉ni rihiaʼtónhni ne ratsesáthas ne nahátonhte.

¹⁷ Iáh thaʼhóthen ne ionteriʼiostákwah ne kasahá꞉nion nahonteshatsiatónhti nahionhianerásthen, tánon kwáh sakʼthensehiónhni ne niaʼtewenhnásake ne tahontahatítaʼne naʼiesahnontánaʼke ne kariwenhthatsherákon. Né kí꞉ken ne raoʼnawenhkónwe ne raonhaʼtserashón꞉has ne Roiá꞉ner tánon né꞉ne raoʼnatesenhniétshera tsi nitsawénon nakonháke, rá꞉ton ne Roiá꞉ner.