Isaiah 53 - Ohiatonhseratokénti

¹ Ónka tshiaʼkawetákwen tsi nahó꞉ten wahonkwahthón꞉tene? Tánon ónka iontaterihotashiénhni ne ranenhtshàke ne Roiá꞉ner?

² Asèken wahatehiáron ne raohénton kwáh tsi ní꞉ioht ne kénk nitiohiónha kaientʼthó꞉tshera, tánon kwáh né꞉ne otèra watiótkaʼwe ne tsi iahonwenhtsiaʼthénke; iáh othènon tewatʼkatotserí꞉io khés naʼioraséhake tsi nihatʼkatotseró꞉then naʼtsitewatká꞉tho, iáh thaʼhóthen tsi nihatʼkatotseró꞉then né꞉ne atsiʼtewaská꞉neke.

³ Ronwashónhon tánon ronwahtewentéton nakorénshons; né꞉ne rónhkwe ne roronhiáken tánon rarihwaientéris ne kanonwaténtshera; tánon kwáh shí꞉ken tsi ní꞉ioht ne ronatsákes tsi ronatkonshaʼsétons ronwashón꞉hon, tánon tsi naʼtsitewaiéraʼse tsi shí꞉ken ní꞉ioht iáh othènon satanáske.

⁴ Orihwiʼiohónwe tsi rotketáton nonkwaʼnikonranonwakʼténhtsheras tánon iehó꞉ha nonkwakraókons; netʼkik sá꞉ka watsiʼtewakarowanáthen tsi nihonwaientánion, Rawenni꞉io wahohahíʼiakʼse, tánon wahoronhiákente.

⁵ Ók rotʼkarewathánion né í꞉i onkwahrihwaʼneraháktsheras iorihonhníhon, né wathoiathoráraʼke nonkwahrihwaneraháktsheras; rahonhàke wakáraʼne ne karewatátshera né tionʼkwahiewenhtó꞉ton, tánon né tsi nihotʼkarewatánion né tionkwahtiénton.

⁶ Tewaʼkwékon thóh nitewahiató꞉tens tsi ní꞉ioht ne teiotinakaronhtónhas ne kénk tsehionénon; tewaʼkwékon thóh nihionkwahierenhátie tsi nitionkwahnikonró꞉ten, tánon ne Roiá꞉ner rahónha wahoterihwahkerónhaʼse ne karihwanerahát꞉tshera ne tewakwékon onkwahrihwàke.

⁷ Ronwahwiʼsáton tánon ronwaronhiakénton, nek kík sá꞉ka iáh thaʼtehotskwékʼshion; kwáh tsi ní꞉ioht ne tehonakaronhtónha owí꞉ra iahonwasárihne né tsi tseriós꞉tha, tánon kwáh tsi ní꞉ioht ne teiotinaʼkaronhtónhas nètho kónhnete raohénton ne sakononwé꞉riaks kwáh thatehiothó꞉te, ká꞉ti kwáh iáh tatehotskwékʼshion.

⁸ Tsi iotkarenhrakwáhton ne kariwakwahrihshióntshera iehonwaiathénha. Ónka iahiakóhe tsi niahawenonhátie? Asèken ronwahiák꞉se ne tsi watonhóntsaien ne iakonʼnhehónwe, né roiénton ne raoʼtirihwaneraháktsheras nakonkwetaʼshón꞉has.

⁹ Tsi wahonwahtshaʼtonkónhnien skát꞉ne ne ionkwetaʼtsenskohokónhas tánon tsi wahonwahiatháta skát꞉ne ne rotiʼkwahtiénions ehthohʼsáne iáh kí nonwénton teshoʼterihwateʼwáton, tánon iáh ónhka nonwénton teiakhokthontéʼon ne tsi rasakáronte nahonowénton.

¹⁰ Kwáh kí ó꞉ni thóh nithoʼnikonhrihʼióhon ne Roiá꞉ner ne tahonensʼtsiá꞉ke tsi aharonhiáken. Né nó꞉nenh né enshón꞉niate ne tsi rónhnhe ne iàstate ne karihwáhneren aorihwáke, kwáh kí enshaʼkóken ne sakohiohʼokónhas, tánon kwáh kí enronnhé꞉sonhke; rahonháke kí thóh nenhthoʼnikonrihʼióhon ne Roiá꞉ner tsi enhoianerásthen.

¹¹ Thóh kí rahoronhiakenserákon kwáh enhatʼkátho ne kaswaʼthétsera; enhatsénhri nawerientiʼiótshera thóh raotohkhatserákon, ne énska ne roiánere, nakenhá꞉tshera, iakotsiokówanen ensakahónhnien naʼhiakorihwakwahrihshiónhaʼke, tánon rahónha enhatkéthaʼte ne raoʼtirihwaneraháktsheras.

¹² Né ká꞉ti aoríwa kwáh enhirákwaʼse ostónha skát꞉ne ne ratishátsʼtes, tánon kwáh thensakohiakhónhaʼse ne kanénskwen skát꞉ne ne ratiʼshátsʼtes; tsioríhwa tsi iahathatáʼkaʼwe ne kenheiátʼne, tánon éh nontahonwátaʼte tsi ní꞉ioht ne ionkwetaksénskwa; ethohʼsàne wahathá꞉wa ne karihwáneren ne iakotsiokowánen akorihwáke, tánon wasakoʼterenhnaiénhase ne iakorihwaneraháts꞉kon.