Isaiah 5 - Ohiatonhseratokénti

Né Naʼorénhna Ne Iáh Othènen Tetʼkáhas Tsi Kanenharaiéntʼton

¹ Thó teirihwákwas ne rinorón꞉kwa nakerénhna ne aorihwàke ne tsi rohnenharaiéntʼton: Né kwáh riʼnoronkwahkówa rohentaiéntakwe ne kanenharaiéntʼthon né kwáh tsi nón꞉we tionhontsí꞉io ne tsi ionhniáhere.

² Tsi ní꞉ioht ne tahathontáiake tánon waʼhanenhiaróhroʼke né waʼhaiéntʼtho né kwáh tekaiestáshion watenenharíseres; kwáh satekahetíhen ne watenenharíseres nón꞉we nahanikatóten, waʼhanatʼthaserónhnien tsi nón꞉we naháien ne tewahiaríhtha; rohrahrá꞉kwe ne kanenharí꞉io ahonenharaiéntaʼne, ók ne takáhawe ne karahkónha onénhare.

³ Tánon ó꞉nen ne Jerusalem sewahnákere tánon ne tsiónkwes ne Judah, teskwahiatoréhtas ní꞉i tánon tsi wakatenenhárhare.

⁴ Nahóten shé꞉kon sénha tsi nahontserénhke tsi nòkwah ne wakenenharaiéntʼton ne iáh thóh nahontsiérenke? Nó꞉nen siwakeráhre ne wé꞉so ahonkenenharaienhtáʼhon, onhnonhtiéren tsi karakónha iahónhton?

⁵ Tánon kí ó꞉nen kwáh enkonhró꞉ri nahó꞉ten kwáh tsi nénhtiere ne tsi wakatenenhárhare. Kwáh entʼtóskare ne ókwire waʼthenhenronhniáton, tánon kwáh enkariwáton; kwáh téntrí꞉te nahonshontasónhas, tánon tenwaskwahserónhkwen.

⁶ Kwáh ne enkatonhontsatsesate; kwáh iáh tahontkwiraseronhníhake khés nahionthontháiake, tánon kwáh ne thentsoróhronʼke nonionhwáras tánon ohíktas; kwáh enkenane ne tsi otshataʼókons ne tó꞉sa ahonsaiórane ne thóh nón꞉we nihiokwénhraʼre.

⁷ Asèken ne tsi ronenharaientʼthóhseron néh Sakoiá꞉ner ne ronterí꞉ios ratiʼronhiakerónons ne ne NʼIsraerʼronóns iakoton, tánon nonkweshónhas ne Judah né꞉ne rahonwesénhtsheras tsi nihoientʼthóseron; ne rorará꞉tiene ne kaiánerenh, ók ne wahatkato iakonekkwáhon; ne rorará꞉tiene ne karihwakwahriʼshióntsheras, ók nék khók wahothónhtene tehionséntʼthos!

Nakorihwashónhas Nónkwe Watonhníhen

⁸ Entsisewathateriwásten í꞉se ne iathiʼsewatenonshá꞉ieste wé꞉so kanonshasónhas, ní꞉se sewashonterátie ne kahentashón꞉ʼahs, tsi nió꞉re kwáh nakorénhshons iáh thahonsahiakonatʼtaiéntake kwáh nek khók ne shonháhak, tánon í꞉set khók iatetsisathaténhron nasenákereke nonhontsá꞉ke!

⁹ Ne Sakoiá꞉ner ne ronterí꞉ios ratironhiakerónons kwáh rorihwaniráton tsi niwakathontéhon: Oriwiʼiohónwe tsi wé꞉so kanonsake tsi enkarihwéntʼtonhke, kanonsowánens tánon kanonsí꞉ios, iáh ónka tahonsaieterónhtake.

¹⁰ Asèken ne ó꞉ieri tionhontsaʼkwentátshera ne iotennhárhare kwáh thók khók ní꞉kon entkáhawe skaná꞉kwa, tánon ne oiéri nikawinotseráke kánens skawinótsera khók enwatsenite.

¹¹ Entsiʼsewathateriwásten, í꞉se nʼoronhkéhtstsi sewatʼkétskwahs néh iaʼtesewahrátats naisewanekíra ne ionekaníron, né kwáh tsenhsewakárawe tánon ne ahisewanonwahráhtonte notsítsa,

¹² Rotinowahién꞉tons ne ne, kén nikanakwá꞉as, ó꞉ni né ohoró꞉ta ionhterenhnotákwah tánon ne otsítsa, ók sanontonhniónko nètho ne raohioténseras ne Roiá꞉ner, khés nasatʼkátho naohioténhseras ne ratsanákes ioriwakanonhníhon!

¹³ Né꞉se wahónhni nakonkweʼtashón꞉ʼahs wahonhnakeráko asèken tsi iáh othénon teotinikonraién꞉tas; ne raononkwetaʼshónhas ratiʼsenhnowánens atonhkariákon rohtirió꞉tha, tánon ne thiʼkáionk ónkwe kwáh neh enhotírhiote tsi nihotiniatáttens.

¹⁴ Né꞉se wahón꞉ni ne tsi tsiohontsáien ne kenhéion kwáh í꞉ken tsi watonkáriaks tetsiotskaráwenh niahiakotsatanékwahne; ne ratiʼsenhnowánens ne Jerusalem tánon nahonkwetashón꞉ʼahs ronatsiokowánen thóh iehonsnénhtha, nahotsió꞉kwas tánon ratikwékon nahonháke nón꞉we nihonatʼtsenhnakaratáton.

¹⁵ Nonhkweshónhas ronhwenhnonniénhni ne tahontsakéte, onhkweʼtaʼkwé꞉kon tsi ehʼtàke ronhwenhnón꞉ni, tánon tsi natehatiʼkanerónhnion ne hiontatónhni kwáh ronanitènhton.

¹⁶ Ók kiʼ né Sakoiá꞉ner ne ronterí꞉ios ratironhiakeró꞉nons ne ne rotsenhnakaratatónkwen ne raoianerétshera, tánon ne Roiataʼtokénti Ní꞉io rotatenéston tsi rotokénti thóh nónhwe ne karihwaʼkwahrihshionhtsherákon.

¹⁷ Eʼthòne ne teiotinakaronhtónhas owirasónhas kwáh thóh nón꞉we nenkonhtihontáke tsi ní꞉ioht ne tsi konwatiterontáhkwa, ne konwanaresénhston ne teiotinakaronhtónhas owirasón꞉ʼahs thóh nón꞉we nathenhonskáhon tsi nikariwentʼthóhseron.

¹⁸ Ní꞉se enseshataʼteriwásthen, í꞉se neh shé꞉sereh ne kariwáneren ne sathironhtákwen nahosehrí꞉ie nonhówenhs tánon ne kariwahétkens kwáh thóh ní꞉ioht kwáh ne ne otsiónkwa aosehrí꞉ie.

¹⁹ Ónka iónton, “Anion ne Ní꞉io tehosterí꞉hen, ánion tehákats ne raohioténhsera né nahónton ahitewatkáto; Ánion ne rotenikonhrónhni ne Rotokénti Saiá꞉tat Israerʼronónke iostóre tahosteríhen nakánahne, ne nahónton ahionkwahteriéntaraʼne!”

²⁰ Ensesathateriwásthen, í꞉se ne senahtón꞉kwa ne kariwahetkénsera ioiánere tánon ne ioiánere karihwahekénsera ne senahtónhkwah, ónka teshaténies ne tetsiókaras ne tahioswát꞉thene, tánon ne tehioswát꞉the nahontahiókarawe, ónka teshaténies ne iotskárat ne tahiotsiʼkhétarane tánon ne teiotsiʼkhétare ne ahiotskáraʼne!

²¹ Rothithentáhsere, tsi nihá꞉ti ne rónhnereh rontenikonraʼtókhas ne kwáh ronón꞉ha ratiká꞉rakes, tánon thóh nethá꞉kwen tsi nihontkáthos!

²² Rotithentáhsere, ne rontatsinástha tsi nihotinekirenháties notsítsa tánon sanikonratsá꞉ni tsi natesnekaiestánions naienekíra,

²³ ronón꞉ha sehshakonatkáwas ne iakoníkon tsioríwa tsi ronwanarahratsʼténhnis athatahwí꞉tshera enhonwanawí꞉hon, tánon tesehiatotʼtakwénhnis ne iáh tehiakoníkon ne raotiʼianerénhseras!

Tsi Iehatirihwákens Ne Tihononhontsátes Tsi Enhenhatinénhrenhte

²⁴ Né꞉se wahónhni, kwáh tsi ní꞉ioht nótsire tsi watʼtsahátha ne kawá꞉he, tánon ne iohontátʼthen tsi ehʼtàke niewétha ne tsi iotónhkote, káti ne raotithé꞉ra enhiótʼken, tánon ne raotiʼtsítsas thenkáthen tsi ní꞉ioht nokénhra; asèken rohtiʼkenhrataníhon ne raoʼrihonhnienhnítshera ne Sakoiá꞉ner ne ronterí꞉ios ratironhiakeró꞉nons. Ó꞉ni rotikenronhnihon ne raowenhnaokons ne Roiatató꞉kenti Saiá꞉ta ne Israerʼronónke.

²⁵ Né káti wahón꞉ni ne raonhakwáhtshera ne Roiá꞉ner tahióteke wahakokʼkónten ne rahonkwetaʼshónhas, tánon iathatsáneste washakokʼkónten tánon washakokónrehke; ne tsi iononhtarón꞉nions wahowá꞉ke, tánon ne raoʼnenhehiontashónhas thóh nahawénhne tsi ní꞉ioht ne watsakwaríshion ne tsi kanatáthatse. Asèken akwékon kíʼken ne raonhakwáhtsera iáh kí éhrenh tetsawéton, tánon ne ratsanáke shé꞉kon kí iotʼtakaráwenh nasakohréhwaʼte.

²⁶ Né raón꞉ha kwáh enhaniatarahkétsko nasakawenésten ne ronhnonhontsakerónons nahinónshons thatinakeréhnion; tánon kwáh ienhrenhnahkáreh tsi iesakonónkʼkons nahontahónhne ne tsi iehiotonhontióktaníhon; Iostóre, tánon enioshátsʼteke tsi èntʼtonhne!

²⁷ Iah ónhka tsi niháti tatehotiwisenhéion, iáh ónhka thatehotiʼiathénhtons, Iáh ón꞉ka tehotiserénhtaras khés nahotitásheke, iáh nénska natsatáhna iáh tahiosaréhshonke, iah ó꞉ni ne ronrashitorókstha òna thaʼtakaiákon;

²⁸ né raotiʼiénkwires iohiotí꞉ies, akwékon ne raonahénhas waserihiotarókʼkhons, ne raoʼtitsenenhókons iakosátens ne aotitsinarenhtákes kwáh né꞉ne onénhia í꞉ken, tánon ne raotiʼkawénhtas notsiónkwas kwáh né꞉ne ioʼtsiskaiónhni tsi teioweratáseh.

²⁹ Ronatonráien kwáh né꞉ne kénreks, kwáh né꞉ne kén titotihiónsas kénreks tsi ronatonhráien; ronatatenakónhni tánon wahonwaiéna ne raotirió꞉ta, iahatíhawe, tánon iáh ónhka taiekwéni nahonsahonwaniákenʼte.

³⁰ Kwáh enhontonráien ne thóh enwenhniseráteke, kwáh tsi ní꞉ioht tsi iorákare ne kaniatarakhekowàne. Tánon ne tseiáta iahiontkátho tsi tionhontsá꞉te— kwáh nènhneʼe nek khók tsi wakaronhióroke. Tánon ne teioswát꞉the né꞉ne tahiokarásthen tsi niʼiotsatarónhnions.