Isaiah 47 - Ohiatonhseratokénti

Tsi Ehtà꞉ke Wakonhiónhni Ne Babylon

¹ Tasátsʼnenht tánon okenràke shá꞉tien, né꞉ne kawí꞉non í꞉ken ne akoiénha ne Babylon! Onhwenhtsàke ók tsiasátien iáh nanitskwáhraʼne, né nakoiénha ne Chaldea! Asèken iah ó꞉nen né tahonsaiesanatónhkwahke satí꞉wenh tánon iáh tesehsátsʼte.

² Teskahkwentakaraténi ne katheseronniá꞉tha onénha tánon seʼtheserónni, sataharoróksi, sherísi ne satiátawi wakóses, satʼtsinoróksi, iaʼtetsáiak ne tsi kaniataratátie.

³ Tsi sanehóskonk thí꞉ken kwáh kí thenwenehaʼke, tánon ne satehénsera kwáh kí enhiontkathó꞉seron. Kwáh kí entewakenákwen, tánon iáh ónhka thiaʼtahonshónhkenre.

⁴ Né sheʼshonkwahiatákwen—né꞉ne Sakoiá꞉ner ne ratiʼronhiaʼkeró꞉nons né ronwá꞉iast— Rahonhatsíwaʼkhok ne Roiatatokénti í꞉ken NʼIsraerʼronónke.

⁵ Shá꞉tien sák thasatatónhni, tánon tsi tetiókaras niaʼháse, saiénha ne Chaldea! Asèken ní꞉se iáh ó꞉nen ské꞉kon thaʼhonsaiesanatónhkwahke tsoniaró꞉taron tsi kanakeraserá꞉ien.

⁶ Kheʼnakwáhsene nakonkwetaʼshónhas, Waketʼkénte tsi kwatsiratátie; Hiaʼkehiátʼkaʼwe thóh satsanàke, iáh othènon tesehnatónhni ne kenténhron; né꞉ne thoʼthí꞉ions washeʼhiónhnien ne saʼtientaniák꞉ta kwáh í꞉ken tsi iókste.

⁷ Í꞉senh, “Kwáh kí entewakeniaró꞉taron tsi nènhwe enkénhake,” né ká꞉ti tsi iáh tesarihwakéron kí nahorihoténsons ne seriá꞉ne khés nahisisehiaráhon ne tsi ieionateríhokʼte.

⁸ Nón꞉wa thóh nón꞉we nasáronk kí꞉ken, í꞉se ne serihwanorónhkwa nonwesénhtsheras, thóh shískoʼte tsi niʼiorihwaníron, sáton ne seriá꞉ne, “I꞉ik wá꞉hi, tánon iáh ónhka nakóren tekáien tsi nó꞉kwah ní꞉i; Kwáh iáh thaʼkátsien tsi ní꞉ioht ne ioteréhons khés nakerihwaienteríhaʼke ne iakotónhni ratiksaʼokónha”—

⁹ tetsáron kí꞉ken nahorihótens kwáh ensáraʼne kwáh né꞉ne taiontkakwíroʼke, né sewenhnísera nió꞉re: né iakothón꞉ni ratiksaʼokónha tánon ne iakoterehónskon kwáh kí ensárane tsi nenhwatenienthentseriʼióhake, iáh othènon takarihontáko thóh ní꞉ioht tsi asathenhennharáseke tánon tsi naʼteioshatstenseranónhiani tsi natesatʼkónstha.

¹⁰ Kwáh í꞉ken tsi sahiataníron tsi nisonkwetaʼhét꞉ken; washí꞉ron, “Iáh ónhka thaʼtehiontʼkánere.” Tsi nisatenikonratʼthókha tánon ne satʼthokhátshera né wesatʼthaharákwahte, tánon washíron ne serhiá꞉ne, “Í꞉i wá꞉hi, tánon iáh ónhka nakó꞉ren tekáien tsi nokwáhti í꞉i.”

¹¹ Ók karihwahetkénsera ensáraʼne, né꞉ne iáh taskwé꞉ni asathenhennáro tsi éhʼren ahonsáweʼte; né natʼkaronhniátshera kwáh kí ensáraʼne, né꞉ne iáh taskwé꞉ni nahonshaʼshiaʼtínekenwe; tánon ne iorihwaiesáhon kwáh thentsawénhstsi ensará꞉aʼne, né꞉ne kwáh iahʼothènon tesheʼrihwaientéri.

¹² Saterihwató꞉kens tsi nókwah ne sathenhennaráhtsera tánon tsi niʼsewatsiokowánen ne sewathenhénhnaras, né tsi thóh nón꞉we nisahioténhen ne kén shiʼtisahiónha; nontiérenk enwáton nahisaterihwaténtiases, nontiérenk ne tensaréniaʼte katerónhtshera.

¹³ Kwáh tesawisenhéion né tsi niʼhonatsiokowánen ieʼsatenikonrá꞉wis; sheríhon tsi nikáien ronteweiénstha ne tsi karonhiá꞉tes thethatítan tánon iesahiatanónstat, tsi niháti ronhteweiénstha ne tsi iotsistokwahrónhnions, tánon niaʼtewenhnítake nenskarakwáhrake nasontʼthenhnékha ienhatirihwáken onhnahó꞉ten kwáh ahiʼsárahne.

¹⁴ Satʼkátho, thóh nihatiʼhiatóten kwáh né꞉ne kawá꞉he, ótsire watʼtsahátha; iáh thaʼhatikwéni ne ronhnonʼháhak ahonshaʼhonthatsatotárihsi né tsi nihioshatsʼténhsera notónhkwah. Iáh tewaswénhtaien nahontsathatarihatákwen né ní꞉ioht, iáh tekatsíraien nahióntsien nahohénton!

¹⁵ Thóh nonʼní꞉se nenhiotónhake tsi niháti ne skát꞉ne sewahiothénʼen, tsi nihá꞉ti tesewaterihwasonterekwe ne shiʼtisahiónhakwe; ratiʼkwékon wathontáwenre tsi nisahaʼténion; iáh kí ónhka nahonsaʼiesaniákenʼte.