Isaiah 4 - Ohiatonhseratokénti

¹ Tsáta nikón꞉ti konnónhkwe enhonwaʼiéna saiá꞉ta rónh꞉kwe ne thóh entewenhniseráteke; enkontónheke, “Kwáh í꞉i enhiákwahke nonkwáhkhwa tánon ne enhiákwatste ní꞉i onkwatsherónhnias; kwáh nék khók takwahríhon né aionkhinatónhkwahke ne shasénhna; éʼheren takwahakwíten nonhkwatehénsera.”

Né Tsi Niahawenonhátsie Ne Rahotiʼiatanerakwáhtsheras Tsi Niháti Iaʼteonathaʼténhron Ne Zion Nón꞉we

² Né éʼtho enwenhniseráteke ne raonhá꞉te ne Roiá꞉ner kwáh kí í꞉ken tsi enwatehiáron tánon enkowanénhake ó꞉ni enwatʼkatotseriʼióhake tánon enhiorihwanerakwáhtonhke, tánon tsi nahoténsons ne kaienthóseras watonhniátha nonhontsáke kwáh kí ne enhontenáieste tánon ne raotiʼiatanerakwátshera enkénhake niaʼtehonathaténron NʼIsraerʼronónke.

³ Nónka akénhake iaʼtheniakotátere ne Zion nón꞉we tánon thóh enieterónhtake Jerusalem kwáh kí ne enhiakotenatónhkwen iakoiatatokénti í꞉ken, ne nonhkwetaʼkwékon né꞉ne iontatʼtsénare naiakónnheke ne Jerusalem nónhwe,

⁴ ne nó꞉nen ne Roiá꞉ner sakoiatohétston tiókonte ne wískʼkháton iehónhnete nahoiatasetsherashónhas ne Zion tánon shonóhare ne ionekwenhsarónhnionkwe ne Jerusalem thóh kanenhríhen nahoshastsʼtenhserákon ne karihwenhtátshera tánon ne kashastsʼténhsera ne tsi iotétkha.

⁵ Eʼthó꞉ne ne Roiá꞉ner kwáh enhatenatónhni ne tsi iokwénhraʼre ne tsi Ionónhte ne Zion tánon ne tsi nónhwe nihiontʼkenhnisaáhkwah nenhonterénhnaien tenhiotsátahienʼke ne tsi niwenhníseres tánon enhiotsiokwahronhníhake ó꞉ni tsi nateioswát꞉te notónkwah ne ótsire nokarasnéha. Kwáh kí akwékon ne kaiatanerakwáhtshera kwáh enwatoseróhronhke.

⁶ Kwáh thóh nenhiotónhake tsi ní꞉ioht ne watoserowánen, ne enkarakwáhweroste ne tsi niwenhníseres tsi iorakwatarí꞉hen, tánon thóh nónhwe nenhiontasehtákwahke nahontaiakóʼne nónenh iowerashátste tánon nenhiokénhnore.