Isaiah 38 - Ohiatonhseratokénti

Né Hezekiah Raohnratarinétshera

¹ Né siwenhniserateʼniónhkwe ne Hezekiah wahononwák꞉ten tánon serèka ahawenhé꞉ionhke. Né rotokénhse Isaiah ne roiénha ne Amoz wahokʼkensèra, tánon wahawénhase, “Ká꞉ti rá꞉ton ne Roiá꞉ner: Sehrihwaserón꞉ni ne tsi sanónshote, asèken ó꞉nenh enshíʼheʼie; kwáh iáh tahonshasatkwahtáko.”

² Eʼthó꞉ne ne Hezekiah asonhtàke niaʼhatiérate, tánon iahaterénhnaien rahonhá꞉ke ne Roiá꞉ner:

³ “Sasehiá꞉ran ó꞉nen Saiá꞉ner, wakonhianiténhten, tsi ní꞉ioht tsi tewakatekhaʼhákwen ne sahénton né꞉ne aóskon tewetákwen tsi kerhiasakwékon í꞉ken, tánon thóh niwatiéren nahó꞉ten ne ioiánere ne sahénton.” Tánon ne Hezekiah otsitówa tsi waʼthaséntʼtho.

⁴ Eʼthó꞉ne ne raowénhna Roiá꞉ner wahohiatóren ne Isaiah:

⁵ “Wáhs tánon sró꞉ri ne Hezekiah, Ká꞉ti rá꞉ton ne Roiá꞉ner, né Raoní꞉io ne iasotʼkénʼen Táwit: Onhkatʼthóntene ne saterénhnaient, wakatkátho ne sakaséri; Ionsakawénhthate wísk-iawénhre niʼioseràke ne tsi nishón꞉nhe.

⁶ Kwáh enskonhniá꞉kente tánon kí kén꞉en kanatowanénke tenhsihiashotarísi ne ronnontí꞉io ne Assyria, tánon entke ne ki kén꞉en kanatowanénke.

⁷ “Né kí꞉ken natenienténhtshera ne sarihwàke tsi nontáwe rahonhàke ne Roiá꞉ner, nètho Roiá꞉ner kwáh kí thóh nenháiare kí nahorihóten waharáratsʼte:

⁸ Satkátho, kwáh enkónhni nahontasá꞉taren tsi niahorakwenhenhátie thóh raorakwahkenhenʼióntha ne Ahaz nahonsonkéte oiéri nihiokhá꞉hake.” Sók kí ne karáhkwah sontʼthá꞉te ne karakwahkenhenʼióntha oiéri nihiokhá꞉hake né tsi nienhiorakwénhen.

⁹ Né꞉ne Ronnontí꞉io Hezekiah rohiá꞉ton kí꞉ken ne Judah nón꞉we, nó꞉nenh iáh shiʼsohnonwák꞉tani tánon shoiewenhtáʼon tsi rononwakʼtaníhaʼkwe:

¹⁰ Wakíron: Nénhtie nenhká꞉rake ne tsi wakatenhniseraténions ó꞉nenk tsi enkathénti; Iahonkaténieʼte ne tsi tsothenhenrakáronʼte ne kenhéion (Sheol) asèken iáh tsatewakókte tsi ní꞉kon iotathénronʼne nakoseraʼókons.

¹¹ Wá꞉kiron, kwáh iáh tahí꞉ken ne Roiá꞉ner ne tsi iohontsáien ne iakónnhe; Iáh shé꞉kon tahonsakheiatʼkátho nonkweshón꞉has ne tsi ienakeré꞉nion tsi ionwenhtsáte.

¹² Né tsi kenákerehkwe watsiaʼtsatekhási tánon éhʼren onthá꞉wite nakonhàke kwáh tsi ní꞉ioht ne teotinakarontónha sakónonʼne raotóhsera; kwáh tsi ní꞉ioht ne raratsʼkentónhni wakatʼwenónhni ne tsi kónnhe; ráʼtiakse tsi nó꞉kwah ne kanonwarónhnis; tsi niwenhniseraténion tsi nió꞉re nokarasné꞉ha iastsiaténhawe né tsi ieiót꞉te;

¹³ Tekaséntʼthos nahiontiénawase kwáh tsi nió꞉re ienhiórenhne; tsi ní꞉ioht ne kénreks akwé꞉kon tehasktsiéntsakon; tsi niwenhniseraténions tsi nió꞉re nokarasnéha iastsiaʼténhawe ne tsi ieiót꞉te.

¹⁴ Kwáh tsi ní꞉ioht ne kentarakónha khés ne ohhakwáronh ehniwakaterihwatieníston, Wakonsèhna tsi ní꞉ioht nórite. Tewatʼkarakenhéion tsi éhʼneken iatetká꞉nere. Ó Saiá꞉ner, tewakenikonrawiʼsenhéion; í꞉se takenikonrárat!

¹⁵ Ók nahó꞉ten akʼkwéni nakíron? Asèken ó꞉nenh ratʼtharáni, tánon kwáh rahónha thóh nihoiéren. Akwé꞉kons iáh tesewátons nahonshonkítaʼwe kwáh kí skenenhasónha tsi tekatekhá꞉hakwahke ne tsi niwakatoseraténions tsioríhwa tsi niʼionikonrák꞉sens nakwahtón꞉nhets.

¹⁶ Ó Saiá꞉ner, né kí꞉ken nahorihoténhshons tsi ní꞉ioht tsi iakónnhe nonkweʼshónhas, tánon thóh kí꞉ken oriwakwé꞉kon nahotónnhets nakenikónra. Óh, saskétsient nahonsonkwahtakaríʼteke tánon saskónnhet!

¹⁷ Oriwiʼiohónwe né natiaʼtakenáhtshera kènhne né꞉ne teiotenonhianíton tsi kí wakenikonhráksenhskwe; ók thontasónhneke ne tsi kónnhe ne tsi tsiosónwaien ne atkaronhniátshera, asèken akwékon í꞉she ieshá꞉tion nakerihwaneraháktsheras tshónnhe nón꞉we nisáien.

¹⁸ Asèken ne kenhéion (Sheol) iáh takakwéni ne tahisanonweráton, ne kenhéion iáh takakwéni ne ahishasénhnaien; tsi nihiá꞉kon nosónhwakon nieʼiakawénon iáh tahónton ne thènen ahonsaotiráreʼke né꞉ne sarihwatokentí꞉tshera.

¹⁹ Né꞉ne iakonnheónwe, né iakonnheónwe, né teiesanonwerátons, tsi kí nikatiéra nón꞉wa wenhniseràte; kaníseras enhonwatiʼtokáhten ne ratiksaʼokónhas ne sarihwatokentítsheras.

²⁰ Né Roiá꞉ner kwáh kí enhakenónsthaʼte, tánon né tehiakwarihwàkwe ne karenhsotarókserons ionterenhnotakwasónhas tsi niaʼtewenhniserákes tsi iatiónnhes, thóh raononsatokentikówaʼne ne Roiá꞉ner.

²¹ Nón꞉wa ne Isaiah ráwenh, “Ánion iehatitonʼwáko ne tionhnionharontonhakó꞉wa, tánon thóh ratíren ne tsi ronatʼkwarotakwáhronhte, né nahónton ahonsahontʼkwahtáko.”

²² Né Hezekiah kwáh ó꞉ni rá꞉wenh, “Nahó꞉ten kí nahotenienhtátshera tsi ó꞉nenk thóh iénhke Raononsatokentiʼkówaʼne ne Roiá꞉ner?”