Isaiah 32 - Ohiatonhseratokénti

Né Kakorásehra Né꞉ne Karihwaʼkwahrihshióntshera Iekarihwákens

¹ Satkátho, ne ronnontí꞉io kwáh né enhatenonhtí꞉ioste ne karihwaʼkwahrihshióntshera; tánon ne ratiʼkoráshons kwáh ne enhontkóraste ne tkarihwaiérih.

² Né satihiaʼtatʼtshons thóh nenhatiʼhiathothénhake kwáh né꞉ne tsi nónwe nihiontasehtákwah tsi nitsiowerénha, hiakotaséhton tsi naʼtehioweratáse, kwáh né꞉ne watnekíne tsi nón꞉we niʼhiahontsaʼthen, kwáh né꞉ne iorakwahweʼróston ne katsthenrowánen thóh tsi ahonhontsióskon í꞉ken.

³ Ethòne ne ratikarakéshons tsi nihiákon ne iéken kwáh kí iáh thatahonterónhweke, tánon ratihontakéshons tsi nihiákon ne iakótonhte kwáh kí enhiontahónsathaʼte.

⁴ Nonikónra ne tehioskènhniaʼse tenkaiatorethatsheríhioʼke, tánon nawenhnáson ne iawenhnahsanénhtas kwáh ioiánere tsi enwatáti tánon ionikonraiéntat.

⁵ Né tsiaʼkotónhnokʼte iáh ó꞉nen ne tahonsahiontaʼtenatónhkwahke iesenhnowánen, khés ne ienikonrátha ahiontónheke tsiakonkweʼtaiéri í꞉ken.

⁶ Asèken ne tsiakotónhnokʼte tsi iontátsis tehiotenonwaroríhtonhte, tánon né rontenikonhrón꞉nis ne karihwahneraháktshera: né ahothihióten ne iáh tehioterihwaʼkwahríshion í꞉ken, né ahiontháksaʼte naterientaweriéntshera nahonwanikonrakaréwaʼte ne Roiá꞉ner, né ronnonweʼsáta nasakonatewénhtethe ne iontonkáriaks nahotiʼrihwátsaʼses, tánon ne tasakotiʼnonhiánitse ne iakoniatákʼtens tsi nihienekíra.

⁷ Né iakonkwetaʼheténskwah né꞉ne ratiʼnikonrá꞉tha kwáh rononkwetaʼhétken; né rontenikonrónhnis ne kwáh kariwahétken tsi nahatí꞉iere nasakotikarónhni ne iakóten tsi nisakonanowenhténhnis, iawerohátien nónho꞉wen tsi iakorihwaʼnéken ne iakóten tsi tseiériʼtse.

⁸ Ók tsi nikáien ne tsionkwetaʼiéri tsi ronhtenikonrónhnis tkariwaiéri kí í꞉ken, tánon né꞉ne tkariwaiéri í꞉ken ratísehre.

Né Wenhtó꞉ra Iónkwe Wakonwaronhkáten Ne Atkaronhniátshera

⁹ Tesewá꞉tan, í꞉se ne tsi sewathonwí꞉sen ne tisewaterá꞉kaʼre, taʼkwatewennathóntek; í꞉se ne iáh othènon thaʼtesewanikónrare ne raotiʼiatasehtsherasónhas, sewatahónsatat tsi niwákthare.

¹⁰ Isiʼnonweha ne tsiósehra nió꞉re nenhkarihwésonhke ní꞉se kwáh ensahiaʼtíshonkwe, í꞉se ne iáh othènon thaʼtesewanikónrare; asèken nonenharákeri enkanekanó꞉ronhne, ne káhik kwáh iáh tahisewanenharáko.

¹¹ Sewahiatítsont, í꞉se ne tsi sewathonwísen ne tisewaterákaʼre, sewahiatítsont, í꞉se ne iáh othènon thaʼtesewanikónhrare; Sewatseronniáhsi, tánon sewathatenotsʼtónhni, tánon káiare tesewatsakwáhranak.

¹² Sewathatenontahiahatkon tsi nisewanikonrák꞉sens né aorihwàke tsi nikahentí꞉ios, tánon ne watenenharíhseres tsi karihwathónton,

¹³ Asèken ne raonakénra khés nakonkwetaʼshónhas ne ioʼtehiarónhtse nohíktas tánon oniónʼwahras; hén, asèken teshehiaséntʼthos kwáh tsi niaʼtekanónsakes nonkweshón꞉has iakotonhnáraʼkwe thóh kanátakon ne kowánen tsi iotonhnáraʼkwe.

¹⁴ Asèken ne tsironónshote ne ronhnontí꞉io kwáh kí enwatewenhthétonke, ne titkanenhrá꞉rakwe ne kanatowanénhke iáh ónhka tetséteron; ne tsi ionhniáhere tánon ne kanikátote ne tehonnenhraientákwahkwe kwáh tsi iontsientákwah ienwáton né꞉ne tsi nénhwe enkénhake, né raonatʼtsenhnonhniátshera ne tewahóntes enkénhake, thóh enkonwatiʼteronhtákwahke ne kontitshénens;

¹⁵ Tsi nió꞉re ne raonikónra ne Rawenni꞉io éhʼneken entkaiénthaʼkwe tsi entionkwahwerónhase, tánon ne iahonwenhtsiatʼthénhake ne iensewáton nahonsahkahetí꞉ione, tánon tsi nitsohetí꞉iohon karakonkówa ne iensewáton.

¹⁶ Eʼthòne ne tkarihwaiéri enkaiéntaʼne ne iahonwenhtsiatʼthénhake, tánon karihwaʼkwahrihshiónhtshera enwaterihwaténhti thóh tsi niʼiothahiatóhon kahentàke.

¹⁷ Tsi niʼiáwenhs ne karihwaʼkwahrihshióntshera kwáh skénnonk thenwá꞉ton, tánon tsi nenhiáwenhne ne karihwaʼkwahrihshiónhtshera, sák thenkénhake tánon entsiaʼkawethakwénhake tsi nénhwe enkénhake.

¹⁸ Nakonkwetaʼshón꞉has ne enhiakotsenawástonke ne skénnonk tsi aienákereke, né꞉ne kwáh ioriwí꞉io tsi aieterón꞉take, tánon tsi nón꞉we ne sák thí꞉ken iothorihsenhtákwah iokwénhrare í꞉ken.

¹⁹ Né karakhonkówa kwáh kí nenhnéʼe etʼthenwáton, tánon ne kanatowanénhke kwáh kí nenhnéʼe ehtʼtàke enkonhiónhni.

²⁰ Sewatáskats ní꞉se tsi nítsion ne thóh nón꞉we nisewaiéntʼton kwáh tsi nón꞉we niʼkahionhaténions, í꞉se ietsirihwáwi ne tehotinákares tánon ne tewahóntes watenatowánen tsi ahontatewenhní꞉ioʼke.