Isaiah 31 - Ohiatonhseratokénti

Né Tahonterihwashónteren Ne Egypt Kwáh Iáh Othènon Tekarihwástha

¹ Iothatithénrat tsi nihiákon ne thóh niehiakawénon ne Egypt nón꞉we iakawesák꞉kon ne kaienawaséhtshera tánon ne ronón꞉ha né꞉ne ratiniahésen ne iakosá꞉tens, ne ronón꞉ha thóh né nonhnithonetákwen notsiónkwas tsioríhwa tsi niwé꞉so rotiseré꞉taien tánon ne rotisáhtens kosáhtens tsioríhwa tsi kwáh í꞉ken tsi nihatishátste, ók iáh kí tsatehonwakánere ne Roiatatokénti í꞉ken NʼIsraerʼronónke khés nahonwarihwaʼnontónhni ne Roiá꞉ner!

² Eʼthohsàne rahónha ó꞉ni tsi nihonikonroʼwánen tánon tháhas ne karihwaiesátshera; iáh tesaktháta ne raoʼwenhnaókons, ók thenthátaʼne niahatsatón꞉ti ne tsi kanónshote ne karihwahetkénsera rotihiótens, tánon sakót꞉konte ne ronhwatiʼiénawase tsi niháti rotihióthens ne karihwáneren.

³ Né Egyptró꞉non ónhkwe í꞉ken iáh Rawenni꞉io tèken; ne rahothitsenenhókons rotiwarare, iah kanikónra tèken. Nó꞉nen ne Roiá꞉ner iathenhatsátate, ne ronsniénons kwáh kí thenhatirakwénhtaraʼne, tánon nenhosniénon kwáh nonʼnéʼe enhahiatiénenhne, tánon kwáh ratiʼkwékon tsi enhatiʼhiatáton.

⁴ Asèken ne kí꞉ken aoríwa ne Roiá꞉ner wahakénhase, Kwáh tsi ní꞉ioht ne kènreks khés ne kenʼnithohiónha kénʼreks rotatenakónhni tsi nihotherhiotakéken, tánon—nó꞉nen ne raotiʼtsiókwah ne teiotinakaronhtónha sakotiʼnikónhrare ienhonwatinón꞉ke nahonʼsahonwaseré꞉son— káti ne Sakoiá꞉ner ne ratironhiakeró꞉nons kwáh kí enhtáts꞉nenhte nahaterí꞉io thóh tsi Ionónte Zion tánon thóh tsi ionhniáhere.

⁵ Tsi ní꞉ioht notsitenhokónhas kontʼtíties; éʼneken tsi iakoʼtenontsistatónhnion, káti ne Sakoiá꞉ner ne ratironiakeró꞉nons kwáh enhthá꞉ne ne Jerusalem; kwáh enhthá꞉ne tánon enshaʼniákenthe, kwáh enhanónsthaʼte tánon enshaʼniákente.

⁶ Sasehwá꞉ket rahonhá꞉ke nionhsásehwe í꞉se ne kwáh í꞉ken tsi tehiahosehrénhon tsisewatsiaʼtonhtakwénhni, Ó tsiónhkwe Israerʼró꞉non.

⁷ Asèken nètho entewenhniseráteʼke kwáh sewakwé꞉kon tsi íh꞉seh ienhsewá꞉ti ne sewahiatonnisónhas ne kawistarákens ó꞉ni nowistanórons, tsi nikáien ne sewatsanàkes kariwanerahaktsherákon sewatatʼtsenhénhni.

⁸ “Eʼthòhne ne Assyria kwáh asareʼkówa enhiohiatsiénenhte, iáh ne kenhé꞉ion; tánon né nasarekó꞉wa, iáh nón꞉kwe, kwáh ne enhótonhte; kwáh enhatékwahse nasarekó꞉wa, tánon ne kenhniʼthotihʼiónsas rahonkwetaʼshón꞉has kwáh kí enhonwanatotʼtákwen nahotiʼhióten.

⁹ Né rahokorahkówa kwáh enhatèko tsi nenhoterónhsehke, tánon né rahonkwetaʼshón꞉has ronaterihónton enhontewénhtheʼte ne waniaʼtaróhare kwáh ronateronhnienténhni,” rá꞉ton ne Roiá꞉ner, ne raótsire tsi Zion nón꞉we nikáien, tánon ne raówenk ne iothékha Jerusalem nón꞉we nikáien.