Isaiah 30 - Ohiatonhseratokénti

Ne Iáh Othénen Teiorí꞉honte Ne Egypt Ne Kaniahésen

¹ Óh, ne ratiʼristónh꞉nis ratiksaʼokónha, rá꞉ton ne Roiá꞉ner, ronón꞉ha ronateriwatsʼteríston tsi niwatenikonrónh꞉ni, ók iáh kí í꞉i tewaká꞉wenk; ronónha ronhnitsioʼkonhniánions, ók konwátkonte tsi niwakenikonró꞉ten, iahotiʼiestonhátie ne karihwanerahák꞉tshera ne thóh karihwanerahaktsherákon;

² Ronhnónha wahontaterá꞉kwase ne Egypt nón꞉we niahónhne ákwa iáh tehotiriwanontón꞉ni nakehiatenikónron, né thóh nón꞉we iahontekwáhsen rahononstatsherákon ne Pharaoh, tánon nahonhnésake nahontaskwahérakwe tsi iotasátare ne Egypt;

³ Né káti aoríhwa ne raoʼnonstátshera ne Pharaoh kwáh ne ienwáhton satehénsera, tánon ne tsi waskwáhereh thóh tsi iotasátare ne Egypt enieshasenhnákʼsate.

⁴ Asèken eʼthohsàne ne rahonkwetashón꞉has ne ronaterihóntons Zoan nón꞉we iehónhnes tánon ne ronwatátsiaʼse Hanes iahónhnewe,

⁵ onhkwetakwékon tewetha nahiontéhen onhkwéne nón꞉we nénhtewe né꞉ne iáh thahatikwéni ne tahonwahtiriwásnieʼse, nètho ne káhas kakʼnikáien kaiatakenáhtshera khéhs tahionthateriwásnieʼse, ók nék khók ne iotéhat tánon natehénsera.

⁶ Ne tsi niwáton tsi nókwa ne kontitshénens ne Negeb. Thóh tsi ionhontsáien ne teionikonráhrat tánon ionhnikonraronhiákent, né꞉ne otinétsens kénreks tánon ne ratonriá꞉iens kénreks, ne óniare tánon ne kátshes óniare, iehatíhas ne raoʼtikwahséhtseras tsi nihiotíkete ne tewahóntes, tánon ne raonatʼtsiokowátsheras thóh kará꞉tse tsi nihiotinowakwáhronhte ne iotiniaʼkwáhere, rononhàke nonkweókons ne iáh thahatikwéni naʼsakonateriwatsʼterísthase.

⁷ Asèken ne Egypt aohienawaséhtshera iáh othènon tekarihwástha tánon ahóskonk thí꞉ken, ne káti waʼhónni né wakenátonkwe, “Rahab tsi rénskote sakʼthí꞉ken.”

⁸ Wáhs ó꞉nenh, shiá꞉ton rahotiʼhénton thóh ostenhràke, tánon shiá꞉ton thóh kahiatonserákon, ne káti nó꞉nenh ienkáhewe né nakariwanirátonhke ne tsi nénhwe enkénhake.

⁹ Asèken kén né ne ratiʼristanónhwe onkweʼhó꞉kon, iáh tehotí꞉ien nawetakwénhtshera ratiksaʼokónha, né꞉ne ratiksaʼokónha ronón꞉ha kwáh iáh tahonatʼthóntene ne raorihonnienhnítshera ne Roiá꞉ner;

¹⁰ Ronnónha sakonénhni ne iehatiʼrihwákens, “Tó꞉sa sewatkátho”; tánon ne rotitó꞉kense, “Tó꞉sa iasewarihwáken tsi nahó꞉ten tkariwaiéri nonkwahrihwàke; né takwahtháras ne waterihwatiéʼsens í꞉ken, ne iaʼsewarihwàke ne tekarihwarastánion,

¹¹ É꞉ren í꞉set ne tsi iohatátie, ó꞉ia sashaʼthahítha, Tó꞉sa shé꞉kon tionkwaʼtónhtenn tsi nòkwah ne Roiatatokénti í꞉kenk ne Israel.”

¹² Né ká꞉ti aoriwa rá꞉ton ne Roiatatokentiʼónwe Israerʼronónke: Né aoríhwa ne tsi wesakenráhten kí꞉ken owénna, tánon thóh nón꞉we nontasétakwe né꞉ne kaniakatsʼténhsera tánon ne kanikonhráton, tánon ne sehniahésen;

¹³ Né káti aoríhwa kí꞉ken kaní꞉kon kwáh ne enkárhaʼne ne shonhàke kwáh né꞉ne tehiosonhtaríhon ne tsiotasonhtáte, iotakwarón꞉te, tánon skanó꞉rons tahonréh꞉ni, nétho kwáh tenwatʼtóko tenhtsiawénstsi, kwáh okʼshàʼok;

¹⁴ Tsi natkaríhne kwáh thóh ní꞉ioht kwáh né꞉ne raʼtsetónhni rahót꞉tse tsi natewaʼtetʼtshetóko kwáh iáh othènon tekáien nathaniténron. Kénk níwas skakéron iáh tahonsónhton nahonsaieʼniáhese né karístakon aietsirahrá꞉ko, khés ne áhionste naʼienekotsénhtaʼkwe.

¹⁵ Asèken ne aoríhwa rá꞉wenh ne Roiá꞉ner Rawenni꞉io, né꞉ne Rahonhatsíwa Roiatatokénti í꞉ken Israerʼronónke: Tsi nathentése tánon satorísenh kwáh kí eniesahiatanónsthaʼte; sakʼthiʼkénhak tánon tasetakwénhak kwáh kí né sashatsténhsera enkénhake. Ók iáh tesatʼthontáton

¹⁶ tánon wahénron, “Iáh! Kwáh kí entsionkwahshá꞉then tsi entsakwahtèko”— ne káti aoríhwa kwáh kí satèko! Tánon, “Kwáh né enhionkwasáthen ne tehó꞉ka ranaskónhni”— ne káti aoríhwa ne iesásehres kwáh kí thenhotiʼkátonhke!

¹⁷ Énska tewenhniawehetsheráhsen nihionkwétake enhiontèko né꞉ne saiáta khók asakoterónhkwen, nahatíʼteronhkwe ne wísk niháti kwáh kíʼ ensewatèko, tsi nió꞉re í꞉sek khók iatetshiʼsathaténron kwáh tsi ní꞉ioht ne wateniataroharákwah ne kaniakarakénhiaʼte ne onotoharakénhiaʼte, kwáh tsi ní꞉ioht ne kaswenhkaró꞉hare tsi ionhniáheʼre.

¹⁸ Ne ó꞉ni waónhni ne Roiá꞉ner roráhre nahontahiarihwaiéritʼtse; ne ó꞉ni waónhni kwáh thenthá꞉tane nahréneste naʼtanitenhrátsera shonhake. Asèken ne Roiá꞉ner né꞉ne Rawenni꞉io ne roterihwaʼkwahríshion; iakotáskats nonkwetaʼkwékon ne rahónha ronhwará꞉re.

¹⁹ Oriwiʼiohónwe, Ó tsiónkwe ne Zion, ne thóh sewanákere Jerusalem, iáh ó꞉nen shé꞉kon tathahonseʼsewaséntʼtho. Kwáh oriwiʼiohónwe tsi enhotanitenhratsʼkónhake ne tsionhá꞉ke tsi entestsitaʼkétsko; nó꞉nenh enhothóntene, kwáh kí thenhiarihwaserákwahse.

²⁰ Ethohsàne ne Roiá꞉ner nontiérenk éntʼhion ne kanátaro nateraswatʼsénhtshera tánon nonèkanos ne karonhiakénsera, ók ne iarihonhniénhni kwáh né iáh ó꞉nenh tahonsahaʼthaséhtake, ók ne skaràke enhóken ne iarihonhniénhni.

²¹ Nó꞉nenh sehseweientetákwen nòkwahti nienhése khés ne sehsenokwáhti, tsi tesahontakáronhte enkawenhnáronhke ne sahnáken, watónhnions, “Kén nónh꞉we nihiohá꞉te; ne sathahíta.”

²² Eʼthòne kwáh ensitákʼsate ne kawistaráken ioterorókston ne sahiatonhnisónhas tánon ne sáwenk owistanó꞉rons iotstánions. Kwáh kí thensaréniaʼte tsi ní꞉ioht ne tehiótsions oniatarahasónhas, kwáh kí ensehiénhase, “Éʼren í꞉sewet!”

²³ Kwáh enhakenhnó꞉reste tsi nisatsinetarón꞉tion nonwenhtsàke, tánon nonátsias, tsi nentkáhawe nonwenhtsàke, né꞉ne enhiokwatsʼtónhake tánon enkanákerenhne. Nètho enwennhniseráteʼke ne satshenenhókons tionnónskwahrons thóh nón꞉we nenhkontekónhni tsi watenhenró꞉wanenke;

²⁴ tánon ne teonákares tionónskwahron tánon ne tewahóntes ne ratiʼtarakarát꞉thos kwáh kí né enhónhneke ne iaʼwenhnekerát꞉then, né꞉ne waʼséhwenh ne rahkareniátha tánon tehionató꞉ken wáts꞉ton.

²⁵ Né niatehionón꞉take ne tiotenonthatónhnions ó꞉ni tsi níkon ne tiótʼtes ionhniarónhnions kwáh kí enkahionhaténionke nonèkanos—ne wenhniseronhtákwen ne kowánenh tsi nenhiontathawèntʼtho, nó꞉nen ne kanikatótons enkarénenhne.

²⁶ Sénha kí í꞉si nòn꞉we níken tsi nateiostʼwát꞉the Nasonhthenhné꞉kha karáhkwah, thóh kí naʼthenhioswát꞉theke tsi ní꞉ioht nenhtiekhenékha karáhkwah, tánon nenhtiekhenékha karáhkwah tsáta naʼthenhkaiáseren sénha thenhoswát꞉theke, tsi kíʼ ní꞉ioht tsi teioswát꞉the ne tsáta nón꞉ta nikaríhwes, nètho enwennhiseráteʼke nó꞉nen ne Roiá꞉ner enshakokentorónhnion tsi nihotiʼkarewathánions ne rahonkwetaʼshón꞉has, tánon enshesakotsienhthánion tsi nihonatʼkarewatons tsi nishakókonhre.

Naorihwenhtátshera Ne Assyria

²⁷ Satkátho, ne raosénhna ne Roiá꞉ner ahí꞉non nió꞉re nitewètha, iotekenhátie ne raonakwáhtshera, tánon kátens tsi nihioienkwáhrote; né rasàke kwáh ne kanánon naterhiatitkóntshera, tánon ne rawenhnáson kwáh né꞉ne watʼtsahátha ótsire;

²⁸ né rahonhnísera kwáh né꞉ne iotnekawenhráton kahionhatátie né ièwas tsi tsiakoniaró꞉hare— nasakósehwe niakahontsaʼkerónons ne énratsʼte raosehwátha ne atkaronhniátshera, tánon thóh ratirhió꞉tsake nonkweshón꞉has ensakokonwaró꞉taroʼke né nahiakothahará꞉kwahte.

²⁹ Kwáh ensahrenhnaiéntake tsi ní꞉ioht nokarasnéha nó꞉nen ne iotokénti tsi neteiontenonhwerátons iakahonhniseranorónston; tánon iakotonhnáhere nakaweriá꞉ne, kwáh tsi ní꞉ioht nónkak wahióntsien wahontahónsathate tsi nikawenhó꞉te nohorótha ionterenhnotákwah niáhien tsi thotenontáhere ne Roiá꞉ner, né nahosthénra í꞉ken NʼIsrael.

³⁰ Tánon ne Roiá꞉ner kwáh ne enkarihónni ne kwáh í꞉ken ioràse raowénna nahiakothónhtene tánon tsi nontaiawenonhátie nahiakokónhreʼke ne ranentʼtsàke nahiontkátho, thóh aterhiatitkonhtseràkon ne kanakwáhtshera tánon ne iotónhkote ne watʼtsahátha ótsire, ne entkènete tsi nentkanakwahweron tsi nenhiokénhnore tánon thenkaweratáse ó꞉ni enhiowisónhti.

³¹ Né Assyriaró꞉nons kwáh kí enhonateronhiénthen nó꞉nen enhonwaʼwenhná꞉ronhke ne Roiá꞉ner nó꞉nenh enhá꞉iente ne rahònia énratste.

³² Tánon kwáh tsi niʼiorihwàke enhá꞉iente ne karewatátshera nètho Roiá꞉ner rorá꞉ni kwáh né꞉ne iorá꞉kare ne kén nikanhowáha ienakwahék꞉tha tánon ne iehonrawáts꞉tha; roterihiohátie tsi tehanentʼtsateníhons kwáh kí rahónha. Né Roiá꞉ner enhonterí꞉io ne Assyriaró꞉nons.

³³ Asèken ne iotékha kanátaien wahónhnise tkaweienhnenhtáhon; oriwiʼiohónhwe tsi ne kasahathákwen tsi niʼkaweienhnenhtáhon ne ronnontí꞉io raorihwàke, tanon tsi iontsahatákwah iosónhwes í꞉ken tánon tewatakáron, né ótsire tánon nóiente wé꞉so káien; ne rahonhnísera ne Roiá꞉ner, kwáh né꞉ne iontenatentástha í꞉ken, ne enwatekátakwe.