Isaiah 3 - Ohiatonhseratokénti

¹ Asèken Nón꞉wa ne Ronontí꞉io ne Sakoiá꞉ner, ne ronterí꞉ios ratironhiakeró꞉nons, Seshakokwenhátie ne Jerusalem ó꞉ni ne Judah tsi nihonwatisnié꞉nons tánon ne kentsiókwas— akwé꞉kon tsi nihatiʼieniahésen ne kanátaro, tánon akwé꞉kon tsi nihatiniahésen nonékanos—

² ronhterí꞉ios tánon ne ronahtatshenniniónton nahonteriʼióhseke, ne ratirihwénhthas ó꞉ni ne rotiʼtokénse, ne tehotkónstha tánon ne thahonkwétaion,

³ né sakohenténhse ne wískson-niwáhsen nihionkweʼtakehátie tánon ne thotonhkwétate, ratsienʼhá꞉iens tánon ne ratiwéiente tahontseronhnionhá꞉ton tánon ne rorenhnáhon nahasakáien.

⁴ Tánon kwáh ne enkónhniate ne ratiksaʼokónhas ahonsahonwatiʼhenténhse, tánon ratiksaʼokónhas enshonwanatkóraste.

⁵ Nonkweʼó꞉kons kwáh kíʼ tenhontatenikonraronhiáʼkente, tsi natehóntere tánon ratikwéʼkon ne tehionhnonsanekʼkhánions; ne kén nitotihiónsas kwáh iáh thahonwatiʼkweʼniéstahke ne thotí꞉ions, tánon ehʼtàke enhonwenhnónhni ne thonattsenhnatónhnions.

⁶ Ónhkhak ó꞉ni kwáh enhonwaiéna ne iathatekénha, né꞉ne saotiʼtára, ionhtónhnions, “Sahtsatawitseráien ne tehionteweiarákwah; í꞉se kí enskwenʼhéntenhse, tánon né kí ken iotstokote ne kariwahiesaton kwáh kíʼ í꞉se enteseniarotaróhke.”

⁷ Ók ne saiá꞉ta kwáh nènhneʼe thenhaséntʼtho ne thóh enwenhniseráteke, ratón꞉nions, “kwáh kí iáh tahonsakatetsiénseke; nakenón꞉skon kwáh iáh tekanataráien khés nahkaiéntahke ne tehiontewehiarákwah; iáh taskónhnien natʼkehénthense nonkweʼó꞉kons.”

⁸ Asèken ne Jerusalem watʼkarakwénhtarane tánon ne Judah wakaiatsénenhne, tsioríhwa tsi nihontátis tánon tsi nihatiweienótens kwáh kí ronwákʼkonte ne Roiá꞉ner, ronateraiatáhkwen ne raoiatanerakwáhtshera tsi thóh í꞉wes.

⁹ Tsi nihatikonshó꞉tens ne tsi iakorihwanirátis; rontró꞉ris ne raotirihwaneraháktsheras kwáh né꞉ne Sodom, iáh kí tehotirihwaséhton. Enshontateriwáhsten! Asèken ronónha iahontátʼkwaʼse ne karihwahetkénhsera.

¹⁰ Ietsiró꞉ri ne iakoiáneren tsi enhotiʼianerásten, asèken ne enhónhneke tsi nahó꞉ten rotiʼioténhen.

¹¹ Enshontateriwásten ne rotiníkon! Tsioríwa oriwiioʼónwe tsi enwahekʼkénhake ne raotiʼriwàke, asèken ne ne ratitsanáke tsi nihioioténhen.

¹² Nakonkwetashón꞉ahs ratiksaokónhas ne ronwatiwisátha, tánon konnónkwe ronwanatkoráston. Ó akonkwetaʼshónhas, ne ietʼtsihénthenhse wahitsihiónhnien wahetsiiʼathaharáhkwahte, tánon watsetsiʼianitonhniáthen tsi sewahátatse.

¹³ Né Roiá꞉ner tonhtahátaʼne ne taharihwakéna ne raorihwasónhas; tethátas nasakoríwenhte nonkweshónhas.

¹⁴ Ne Roiá꞉ner iahatáhweiaʼte nasakoriwenhtánion ne thohtí꞉ions tánon ne sakotihénthense rahonkweʼtashón꞉ʼahs: Kwáh í꞉se iesewasaháton ne tsi kanenharaientʼtóhseron; tsi nahoténsons ietsinenskwenháton ne iakothenténion sewanonskónsons ieskakérons.

¹⁵ Nahóten sewéntons tsi watsetsinenstsákon nakonkwetaʼshónhas, tsi wahetsikonsakénhrieh ne iakotenténion? Ráton ne Roiá꞉ner Sakoní꞉io ne ronterí꞉ios ratironhiaʼkeró꞉nons.

¹⁶ Né Roiá꞉ner kwáh ó꞉ni wahén꞉ron: ne tsioríhwa nahkoioʼokónhas ne Zion tsi nikonhtatónhni tsi kónhne kontiniasaráties, tehiotikararihénʼen tsi nihionathariotáties tsi natekontkatónhnions, kénk natekontikhahéshons tsi kónhne, ionatʼwistanihióntons tsi nihiotiraséstons ne kontiʼtsiraokwáhkes;

¹⁷ Ne Roiá꞉ner ne ensakononwatʼtáten nahiotinonkwíserenhne kwáh onahónstha enkónton ne kontinontsínes ne Zion akohioʼokónhas, tanon ne Roiá꞉ner kwáh kokʼnón꞉we thenrónhni ne tsi iotiríhwaien.

¹⁸ Ne thóh enwenhniseráteke ne Roiá꞉ner kwáh ensakókwah ne karasestánions ne kontiʼtsirahokwáhkes, tánon ne konnitsiátstha;

¹⁹ tánon né satekarákwien konhnitsiástha, tekontenentsawitanátstha, tánon ne tekontniasaniátstha;

²⁰ ne aonenhnonwaró꞉re katsiweióntonte, ne kontenenstsorokstákwah, ne aotitʼneksaókons, ne iontsatakonhonstákwah onerókwahs, tánon ne ateraswiʼiósera aknió꞉tas;

²¹ ne kontisénhnare anisnónsawis tánon kontinionsáke iokakwentenhtónnion;

²² ne ionthenhniotákwah atserónhniahs, ne tekonteweiaráhkwahs, wakóhses atiátawis, tánon naotiná꞉tas;

²³ ne teioshokwátes ahonatsherónhnias, ne waniatarí꞉ios ahonatserónhnias, ne tekontenonwaranátʼtas, tanon ne kontaharoróktas.

²⁴ Tsi ní꞉ioht ne ionhtshaʼtakonhonstákwah akónste, kwáh kíʼ enkonhtí꞉iatakerashé꞉ke; tánon tsi ní꞉ioht ne káneks, aserí꞉ie; tanon tsi ní꞉ioht ne kwáh ahiotikotsiʼiósehke, onahónsta íken; tanon tsi ní꞉ioht ne kwáh kanóron wakóses, tekakʼkhánion tsi kanítkhon káiare; tsi ní꞉ioht ne ioràse akénhake, atehénhsera í꞉ken.

²⁵ Ne tionkwetaʼshónhas ronhnónkwe asarekówa enhotírioʼte tánon ne tionkwetaʼshónhas ronhterí꞉ios ateriʼioseráke ne enhonhníheʼie.

²⁶ Tánon ne aówenk tsi iothenhenrenhtónhnions enhiakonikonratsénhseke tánon enhiakotiónhnionhke; konwatewenhtéton, kwáh kí ohontsáke enwanítskote.