Isaiah 22 - Ohiatonhseratokénti

Konwaʼronhkaténtis Naʼtkaronhniátshera Ne Jerusalem

¹ Ne tekawenhnathéton ne aorihwàke Nahonrakwáhkon ne Karihotáshion. Onhnahó꞉ten tsi tons nètho ní꞉se tsi iesharátʼthen,

² í꞉se ne kaná꞉non tsi tesewahén꞉rehtha, oritsʼtóskon kanatowanénhke, iotonnáhrat kanatowanénhke? Ne sehiaʼwénhthon iáh né teiakohrhió꞉ton nasarekówa, khés nahonenʼhéionke aterihioseráke.

³ Né iasakoráh꞉shons ratiʼkwé꞉kon skát꞉ne tsi ronahtékwen; tsi wahonwatiʼiéna iáh tehonátsʼton nahénna. Sewakwékon ne wahitsihiatatʼtsénhri wahetsiʼiéna, iawerohátien thóh nió꞉re ahí꞉nonh nió꞉re iahonahtékwen.

⁴ Èthoh káti wakíron: takatharónhtsens, takeríhon nahontkaserowáhnah; tó꞉sa sateniénten naskenikonrahníraʼte ne rahonatkaronhniátshera ne khenoronhkwahkó꞉wa akonkwetaʼshónha.

⁵ Asèken ne Sakoiá꞉ner ne ronterí꞉ios ratironhiakerónons rawenhniseráien ne nahtsarohkwáhtshera tánon enhiontateratatséshon tánon tenhiakonitónhnien nahonrákwahkon ne tahiakotserónhnionhse, enskaríshionke ehʼtàke ensewátionke ne tewasonhthó꞉tonhkwe tánon tehionséntʼto ne kaienawahsétshera tsi iononhtarónhnions.

⁶ Elam rahá꞉we ne kaiénkwire waterá꞉kwah ne tahohonwísere ne otsiónkwas tánon ne ronterí꞉io koshátens tahotisháthentse, tánon ne Kir wakarorók꞉si ne tehioniatastákwah.

⁷ Né kwáh tsioiánere ne iokwénhrare ne satenathaʼráhkwen nahonrakwáhkon ne titkáhere notsión꞉kwas, tánon ne ronterí꞉ios ne rotishá꞉tens kosáhtens wahthatinenhráthate ne tsi iothenhenrakárontes.

⁸ Éhren rohawíton ne ioteroróks꞉ton Judah. Né èhthoh enwenhniseráteke iasatkátho ne ionteriʼiostakwahókons tsi kanónshote ne kará꞉kon,

⁹ tánon wasatkátho tsi niwé꞉so tekarihtánion ne wahshontótons ne raonátakon Táwit, tánon wasnekaróroʼke ne ehʼtàke nón꞉we nihatinékarah.

¹⁰ Ní꞉se waʼshaʼshete tsi níkon kanonshó꞉tons ne Jerusalem, tánon wahshenonsarishiónko ne nahónton né꞉ne ahonsahshaʼthonsonhtónhniaʼte.

¹¹ Wasónhni ne watnekaráhkwa tsi natetsatahshontátere ne tewahsónhtake ne nahonèka nonawerakáion. Ók iáh tsetsiatkáthon tsi nikáien néh nihoiéren, khéhs natskweniénstonke tsi rahónha rontenikonrónhni ne waʼhónhnis tkènhne.

¹² Né thóh entewenniseráteke ne Sakoiá꞉ner ne ronterí꞉ios ratironhiakeró꞉nons iasakonónkkon ne teionhséntʼthos tánon ne ronaktiónhnions, ahiʼsewathatenónkare tánon káiare ahisewatʼtserónhniaʼte;

¹³ ók khèkok atonnarátshera tánon aiontennióten, ronwatinonwarhiákon tehotinákares tánon sakonawéntʼthos teiotinakaronhtónhas, rotiwárakon tánon rotiʼnekirenháties otsítsa. “Áhnion tethewatskáhon tánon tewanekíra, asèken nenhiórenhne entewénheie.”

¹⁴ Ne Sakoiá꞉ner ne ronterí꞉ios ratiʼronhiakeró꞉nons wahattháraʼse raonhatsíwa thóh kahontákons: Oriwiʼiohónwe kí꞉ken kaní꞉kon tsi iáh tahonsaiesanikónrenhse kwáh tsi nió꞉re iensí꞉heʼie, rá꞉ton ne Sakoiá꞉ner ne Sakoní꞉io ne ronterí꞉ios ratiʼronhiakeró꞉nons.

¹⁵ Káti rá꞉ton ne Roiá꞉ner sá꞉ko Ní꞉io ne ronterí꞉ios ratiʼronhiakeró꞉nons: Káts, wáhs tsiatʼkensèra kí꞉ken ranhátshera, né꞉ne Shebna, rahónha ranonsakweʼní꞉io í꞉ken, tánon tsiénhas:

¹⁶ Nahóten ahisahianerenhseraiéntake ne kénhʼen? Ónʼka ahisewatátenonʼkwe ne kénhen, tsi wahshaʼtattsiatonkhónnien nostenhrákon, thóh nón꞉we naʼsathationhionnien ne kwáh éhʼneken tionitsthénraʼte, tánon wasenenhiará꞉rahke né nón꞉we naʼsathahtenaktónhnien nosthenrákon?

¹⁷ Né Roiá꞉ner ó꞉nenh thó꞉wa hiaʼiaiátonti né꞉ne thenhioníron꞉ke tsi enhiaienawakónhake, Ó shón꞉kwe. Kwáh iathenhotsiherénhenke tsi enhiaiehnawakónhake,

¹⁸ enhiatsinonwaténiaʼte, tánon ienhiaiatónhti tsi ní꞉ioht niaʼiakothenhnotserón꞉ti tsi nón꞉we ne kwáh tehiohontsakáron; thóh nón꞉we nenhsí꞉heʼie, tánon thóh nón꞉we ne shaseretí꞉ios notsiónkwah nenhkakerónhtake, Ó í꞉se natehénsera í꞉ken tsi ronónshote ne hiaʼiatakwenní꞉io!

¹⁹ Kwáh áhtste entkonhiatónhti tsi nisaterí꞉honte, tánon enhtsesarihontáko tsi nón꞉we nísheʼte.

²⁰ Né eʼtho entewenniseráte ienhí꞉nonke nakenhátshera Eliakim ne roiénha ne Hilkiah,

²¹ tánon ne enhihiatahwite ne shatiátawi wakóhses tánon ne enhiʼiatáhnahʼke ne satsathána. Kwáh rahónha enshiríhonte tsi niʼsaianerenseró꞉thenhne ratsanàke ènkʼrenh, tánon rahónha ensakoteniserónhniaʼte ne tsi ratinákere ne Jerusalem tánon nonkweshónhas ne Judah.

²² Thóh ènkren ranenhsáke nahonontónhkwah tsi ronón꞉shote ne Táwit; kwáh kí enhanotónhko, tánon iáh ónhka taiekwéni nahonsahienó꞉ton; rahónha kí ensanhó꞉ton, tánon iáh ónka tahonsaienhotónhko.

²³ Kwáh enhiwánerenhke tsi ní꞉ioht owàhste tsi nón꞉we nihioriwahníron, tánon kwáh anitskwáhra enháton ne tekarénhsaron thóh sakhosotʼthonhkonkénʼen tsi rotinónshote.

²⁴ Tánon rahonhàke enhontsatahnihiónten kwáh tsi nihiótste ne sakosótʼtonkonhkénen tsi rotinónshote, tsi wahawahtsiraʼtátie ó꞉ni tsi nenhóntsere, akwé꞉kon ne katʼtshesónhas, ne teiontʼnekontákwas akwékons ne katshetowánens.

²⁵ Né èhʼthoh entewenhniseràte, rá꞉ton ne Sakoiá꞉ner ne ronterí꞉ios ratiʼronhiakeró꞉nons, nètho ohwàste tsi nón꞉we nikanérenhne hiorihwaníron enhionétskane; kwáh kí enkahiákonke tánon enkaréniene, tánon noriéna ne thóh iorentónhakwe kwáh enwaterihwáton, asèken ne Roiá꞉ner rotatíhon.