Isaiah 2 - Ohiatonhseratokénti

Tsi Niahawenonhátie Ne Raonónsa Ne Ní꞉io

¹ Né꞉ne raowénhna nètho Isaiah ne roiénha ne Amoz tsi nahatkato tsi no꞉kwáh ne Judah tánon ne Jerusalem.

² Tsi niwenhniseraténions tsi nienkáheʼwe ne tsi rotenonhtáhere ne Roiá꞉ner tsi nón꞉we nikanónshote ne raoʼnonsatokentiʼkówa ne ahonhá꞉ʼa entsotenontáteske tsi níkon ionontarónhnions. Akahontsakwékon thóh nón꞉we iatonhonskénhni nienhonhnéthaʼke.

³ Iakotsokowánenh éntsien tánon enhiaiéron, “Káts, áhnion thóh ietewanontáran tsi rotenontáhere ne Roiá꞉ner, ietewatáwehiat ne raononsatokentiʼkowáne ne raoní꞉io Jacob; ne nahónton nashonkwahrihónhnien tsi nihaweienótens tánon nahónton thóh nón꞉we nahitewaténhti tsi rohatátie.” Asèken Zion nón꞉we entkaiákenhne ne enkahénte ne karihonhnienhnítshera, tánon ne raowénhna ne Roiá꞉ner Jerusalem ne nón꞉we nénhtewe.

⁴ Kwáh tensakohiatórehte tsi natehónteres nonhkweʼó꞉kons, tánon ensakoteriwaʼshónterase ne iakotsokowáhnen ónkwe; ne rahonasarekówa ne sahonónhniate ne ietarakarahthóstha otsiiewéiontha, tánon ne raotishiʼkwáhras iontkwiraseronhniátah ne ohnió꞉kwas sahonnónhniaʼte; nonkweʼó꞉kons iáh shé꞉kon nonhwénhton tahonshahionterí꞉io, iáh ó꞉ni nonhwénton tahonshahatiweienʼtétonke nahonterihiosehrónhni.

Karihwenhtátshera Wahonwatirihowanáthen Ne Rontatkowanátha

⁵ Ó tsi ronónshote ne Jacob, káts, áhnion thóh tewathénhti rahoswathetserákon ne Roiá꞉ner!

⁶ Ó Ní꞉io sehiatewenhtéton ne shonkwetaʼshónha, Ó tsi ronónshote ne Jacob. Kwáh thiʼtatíhere nonkweʼó꞉kons tehontʼkónstas ne tsitkarakwínekens nithonhnétha tánon tehontʼkónstha kwáh tsi ní꞉ioht ne Philistines, tánon tehonatatenenhtsawáhkons ne tihononhontsátes.

⁷ Ne raononhontsáke titʼkáhere ne kawistaráken tánon nowistanóron, tánon iáh tshiehiótokte ne raʼonattsiokowátsheras; ne raononhontsákes kosátens titʼtatíhere tánon iah tshieiótokʼte tsi nihiawetowánens rotiseréthaiens notsiónkwahs.

⁸ Ne raononhontsákes titʼkaiatonhniseráhere; né konwasénhnaiens tsi nahó꞉tens ne rontsanákes ioshaʼhánion, óni tsi nahó꞉tens ne ratisnonhsákes ioshahánion.

⁹ Tánon káti ne rónhkwe kwáh kíʼ enhaniténhte, tánon onhkwetakwékon ehʼtàke iakontónhon— tó꞉sa kí sashenikónhrens, Saiá꞉ner!

¹⁰ Wáhs thóh iasewatáseht tsi iostenhrakarón꞉tons khéhs enhontashetánion ohontsàke nahonteniénten nakonwatékwahse ne Roiá꞉ner raonhakwáhtshera tánon nakonwatashé꞉ten ne raoshatsténhsera ó꞉ni ne raoiatanerakwáhtshera!

¹¹ Tsi tehakánere ne ratatkowánen rónkwe kwáh kíʼ ehtsioserónhnenhte, tánon ne hionthatónhni onhkwetakwékon kwáh kíʼ entsionhnítenhte; tánon rahonhatsíwa ne Roiá꞉ner enhatʼtsenhnakaráthate nètho entewenhniseráte.

¹² Asèken ne Sakoiá꞉ner ne ronterí꞉os ratironhiakerónons tsi rawenhniserahrákwen né sakokkónten ratikwékon ne iontatónhni tánon ne iakotatkowaná꞉ton ensakokkónten tsi niháti ne iakotatʼtharatáton tánon aiesenhnowanénhke;

¹³ kwáh ó꞉ni enhátonhte akwékon ne onenhtakwenhtátsheras ne Lebanon ionhteronhtonhniánion, tánon akwékon enharontátonhte ne onentakwenhtétsheras tánon ne karontésons ne Lebanon; tánon akwékon enharontátonhte ne karíhton ne Bashan;

¹⁴ enhátonte ó꞉ni akwékon ne tsiotenontatónhnions; tánon akwékon ne tiótʼtes ionhniarónhnions;

¹⁵ enháton꞉te ne kanikatésons, tánon akwékon ne tekanatanátʼtons wathenhenró꞉tons;

¹⁶ kwáh ó꞉ni enhanónwahien iekaníhare ne kwáh tkahoniowá꞉nens ne Tarshish nón꞉we, tánon ne kwáh tsioràse kahoniowánens.

¹⁷ Ne iontatkowanátha onhkweʼó꞉kons kwáh kí ehʼtàke enshonwenhnónhni, tánon tsi nihiontatónhni onhkwetakwékon kwáh kí ehʼtàke entiónhton; tánon iatehahiáti ne Roiá꞉ner kwáh éhʼneken enhonhiónhni nètho enwenhniseráteke.

¹⁸ Ne kahiatonhnisónhas kwáh akwékon tsi enhkariwatón꞉thonke.

¹⁹ Enhontasehtánion ne tsi iosthenrakarónhtons khéhs nahontasehtánion nohontsákes, ne nakonwatékwase ne Roiá꞉ner raonhakwáhtshera tánon raoshatstenhsera ó꞉ni ne raohiatanerakwáhtshera, ne nó꞉nen thethaʼtáhne naronhtáwete tsi ionwenhtsá꞉te.

²⁰ Nètho enwenhniseráteke nonkweʼó꞉kons kwáh ne ienhonwanatiéten notsiniónkaron tánon ne tsikerawístiks ne raotiʼiatonhnisónhas ne kawistarákens ó꞉ni nowistanó꞉rons, ronahtatsenhénhni né꞉ne akonwasenhnaiénseʼke,

²¹ nonkweʼó꞉kons enhontasehtánion nostenrokónson tánon ne tsi teionitstenrorénhseron; o꞉ni tsi ioshonwénion nonhontsáke, ne nakonwatékwaʼse ne raonhakwáhtshera Roiá꞉ner, tánon ne raoshatstensera oni raohiatanerakwáhtshera, ne nó꞉nenh thethá꞉taʼne narontaweʼte tsi ionwenhtsá꞉te.

²² Tonsashewatkaraténi tsi nón꞉we nihón꞉nes nonkweʼó꞉kons, aséken ne ronónha nék khók tsi ronhnonhniseráhien tsi tehatiʼnionhkáronhte, asèken tók néh satehón꞉nas ne ronhnón꞉ha?