Hosea 12 - Ohiatonhseratokénti

¹ Ne Ephraim thóh enontsiatá꞉ren tsi teioweratá꞉se, tánon ne ratiweráhsera kontaseʼkó꞉wa ne tsitkarahkwí꞉nekens nentkawerénhawe; ne tehatinanetárions nonhó꞉wens tánon ne iaothé꞉nen kaianerénhsera tè꞉ken; wahontsanerenhserón꞉ni skátne ne Assyria, tánon ne kénʼie Egypt niahatíhawe.

Ne Kaká꞉res Ateriotarók꞉tshera

² Ne Roiá꞉ner ró꞉ien nasakorihwáro ne Judahró꞉nons; tánon ó꞉ni enhoré꞉wate ne Jacob ne entsoianénhawe tsi nihaweienó꞉tens, tánon ne enshokariákten tsi nihahiothenseró꞉ten.

³ Ethò꞉ne tsi watewiraráhkwa wahateʼnién꞉ten ne tahonatákwen ne iatateʼkénha Esau, tánon ó꞉nen rónhkwe sihotónhon Rawenni꞉io wahiaterí꞉io.

⁴ Raʼronhiakeró꞉non wahiaterí꞉io tánon wahatʼkwé꞉ni, wahthaséntho tánon wahoriwanón꞉tonhse ne kaiatateríhtshera; Bethel nón꞉we naʼthiatátken, tánon thóh nón꞉we natnithá꞉ren.

⁵ Ne Sakoiá꞉ner ne ratironhiakeró꞉nons, Ne raoshén꞉na né꞉ne Roiá꞉ner í꞉ken!

⁶ Ók kí ní꞉se, Saní꞉io nón꞉we nionsáse, ne satienawastónhak ne raʼonoronhkwáhtshera tánon ne kaianéren, tánon tasakontakwénhak tsi tsiaterá꞉rat ne Saní꞉io.

⁷ Ne rothenhninón꞉serote, né raháwe ne kaʼnikonrá꞉tha iekontseriharáhkwa, rahonwéskwani ne tasakoʼnikonkáriate.

⁸ Ne Ephraim iá꞉wenh, “Ah, wakwáhtse, Iatetsá꞉ti wakeró꞉ron natsiokowáhtsera; akwé꞉kon í꞉i wakeró꞉ron iáh ne kanikonrá꞉ton tekatsénron nakonhà꞉ke né꞉tho karihwané꞉renh ne í꞉ken.”

⁹ Í꞉i ne Watiá꞉ner Saní꞉io í꞉ken tsi tionhontsá꞉ien ne Egypt natetkonhiathénha; kwáh kí enkonhiónhnien atoserá꞉kon enseshiterónhtake, ne tsi niwenhniseraráhkwen nakatkhwáhrake.

¹⁰ Wakhewenhnárane ne rotitokénhse; í꞉i seh ne watsiasehránion tsi nahonkʼkathóseron, tánon rononhà꞉ke ne rotitokénhse entékhawe ne kakaronhniá꞉tshera.

¹¹ Ne Gilead thóh nón꞉we tká꞉ien ne karihwanéren, kwáh kí orihwiiohón꞉we tsi iáh othé꞉nen takariwasthátonke. Ne Gilgal nón꞉we ronwanateskóntha ne tionhnónskwarons ratí꞉tsi, káti ne tsi ratitienharáhkwas thóh nenhiá꞉wenhne tsi ní꞉ioht nonénhia iotonhió꞉tons ne tsi kentarakarát꞉tons ne kahentá꞉kes.

¹² Ne Jacob tsi tiohontsá꞉ien ne Aram nón꞉we niahá꞉re, thóh nón꞉we ne nahónton ahanakwahtsénhri ó꞉ia rónkwe wahohiò꞉thenhse wasakothenhnikónhraren ne rahotshenenhó꞉kons teiotinaʼkarontón꞉as.

¹³ Ne Roiá꞉ner rotokénhse iahotó꞉ri né꞉ne tahontasakohiaʼthénhawe nʼIsraerʼró꞉nons ne Egypt iehón꞉nes, tánon tashakorihwasniése.

¹⁴ Ephraim wahét꞉ken tsi ní꞉ioht tsi tahotiná꞉kwen, káti ne Roiá꞉ner thenhotasénhte né꞉ne raoterihwatewathóntsera entkarihón꞉ni tánon ne enshokariákthen ne tsi nihonikonrakarewáhtha.