Hosea 10 - Ohiatonhseratokénti

NʼIsraerʼró꞉nons Raotirihwaneraháktsheras Tánon Tsi Nihonwatiié꞉nen

¹ Nisraeró꞉non kwáh í꞉ken tsi iokwáts tsi ní꞉ioht tsi watenenharí꞉sehres tsi niwé꞉so wahianihiontʼtha. Ne sénha wé꞉so enwahianihiónten sénha kí wé꞉so ensrónh꞉ni ne ietsenhará꞉kwa; ne raonakeráhsera tsi nenhioianerásthen, sénha kí wahaianeráste ne kanawahatashón꞉as ne tsi raterenhnaientáhkwa.

² Ne raoneriá꞉ne iáh tehiorihwató꞉ken; ó꞉nen kí enhontkéthate ne raotinhí꞉tshera. Ne Roiá꞉ner kwáh thenharihtánion ne tsi ratitsenharáhkwas, tánon enharihwenthóhsehron ne raotinawahataʼshón꞉as.

³ Nón꞉wak nek nenhonhní꞉ron: “Iáh tehionkwahnontiiotserá꞉ien, asè꞉ken iáh teshakwahkweniénstha ne Roiá꞉ner, tánon ne ronnontí꞉io—onhnahó꞉ten ahakwé꞉ni tsi nashonkwaiérase?”

⁴ Owenhnóskonk tsi rontá꞉tis; né꞉ne iáh othé꞉nen tekástha tsi nihatirihwaní꞉rats nenhontsianerenhserón꞉ni; káti kaianerénhsera tiokethó꞉tha kwáh thóh ní꞉ioht kwáh né꞉ne iakónhontarástha tsi nón꞉we nikenhtarakarát꞉ton ne kahentà꞉ke.

⁵ Ne Samaria nihatinákeres wahotihiatísonkwe né꞉ne tionhnóns꞉kwaron owí꞉ra owistanó꞉ron kahiatón꞉ni wakarihón꞉ni ne Beth-aven nón꞉we. Ne nahonkweʼtashón꞉as kwáh enhiontsiónhnionkwe, tánon né kahiatón꞉nis konwashén꞉naiens ratitsihénstatsis kwáh thenhotihénrete ne entkarihón꞉ni, ne tsi ahohiatanerakwáhtshera tsi é꞉ren tsawéton.

⁶ Né꞉tho kwáh Assyria nón꞉we nienhatihá꞉we ne enhonwakarhiákthen ne ronnontí꞉io. Ne Ephraim kwáh enwatéhen, tánon Nisrael kwáh enwathéhen nahohiatón꞉ni entkarihón꞉ni.

⁷ Ne Samaria ronwanontí꞉io enhatsiatháton kwáh tsi ní꞉ioht nawénhke iokaró꞉kera.

⁸ Ne onotoharahkéson ne Aven nón꞉we, ne nahorihwaneraháktsheras Nisrael, kwáh kí enkarihwathón꞉tonke. Ohíktas tánon onionwáras entkontehiá꞉ron ne tsi ratitsenharáhkwas. Kwáh enkonwanénhase ne tsi ionontarónhnions, sewateróhrok, tánon ne tsi ionhniarónhnions, Taskwahró꞉rok.

⁹ Tsi ná꞉he sihothenhniseraténionskwe ne Gibeah shisewarihwaneraháties, O Israel; thóh nón꞉we iehonatasónhtere. Iáh onté꞉ken nateriiósera tsahiakononhterá꞉ne ne Gibeah?

¹⁰ É꞉tho ne nakasnanektsherá꞉kon iakhehiatsatónhti ne tsi nihatiweienhnátʼsen nonkweshón꞉as ne nakheré꞉wate; tánon niakahontsakeró꞉nons enhionhnitsokwahró꞉roke niahonwanatiaʼtón꞉ti ne nó꞉nen enhonwatirewá꞉tonhke ne tsi natehionáne ne ratirihwaneraháktshera.

¹¹ Ne Ephraim né꞉ne karihonnienhníkwe tionhnónskwaron owí꞉ra ne niahonweskwahníhakwe nakawáheke nonátsia, tánon sakenónsthate ne kaniásake; ók kwáh kí enkónhnien ne Ephraim ne tahontonhontsárihte; ne Judah ó꞉nenk tsi enkentarakaráhtho; né Jacob ó꞉nenk tsi rahónha thenhatatenonhonrhiák꞉se.

¹² Ne sewathatsiénthos ne karihwakwahrihshióntsheras; ne sewaienthó꞉ko ne iorihwató꞉ken kanoronkwáhtshera; tesakenrawénhrie tsi nón꞉we nisatonhontsaserón꞉ni; asè꞉ken ó꞉nen iehióhe natsiatísake ne Roiá꞉ner, ne kí nahónton nahóntare tánon ne ahakenhnóreste ne karihwakwahrishón꞉tshera shón꞉hake.

¹³ Ne satharakaratʼthóston ne karihwahekénhsera, ne tsi saientkwákwen ne iáh tetkarihwaié꞉ri í꞉ken, ne sahiákon nonowenhtashón꞉as í꞉ken. Tiorì꞉wa tsi ne seniahesénhne ní꞉se sashatsténhsera tánon ne tsi nihonatiohkowá꞉nen shonkwè꞉taien ronterí꞉ios,

¹⁴ Ne káti aorì꞉wa tsi niioritstá꞉re nateriióhsera kwáh kí ienhonwanatiaʼtón꞉ti ne shonkweʼtashón꞉as, tánon akwé꞉kon ne sathenhenrashón꞉as enkarihwéntʼthonke, kwáh kí tsi ní꞉ioht ne Shalman tsi sakotónhton ne Beth-arbel ne tewenhniserátekwe sahonterí꞉io ethò꞉ne ne kaʼnisténhseras sakonwatihiaʼtaratiónko skátne nakotiioʼokónha.

¹⁵ Kwáh ki nonhní꞉se thóh nenshaiatáwenh, O Bethel, tiorì꞉wa tsi natehiotenonhianì꞉ton tsi nishonkweʼtahétken. Tsi ienhió꞉renhne ne ronhnontí꞉io Nisraeró꞉nonke kwáh orihwakwé꞉kon tsi enhonwaiátse.