Hebrews 13 - Ohiatonhseratokénti

Onhʼní꞉ioht Tsi Ahontahonwahnikonraʼiérite Ne Rawenni꞉io

¹ Iasewahtasónteren tesewahtatenorónkwak ne tsi sewahriwiʼióston.

² Sewehiárak naʼietʼtsihónkaron ne kenkʼthitiakawé꞉non ne sonwanonskónsons. Thóh kára niháti ne thóh nihotiʼiéren tánon kwáh iáh thènen tehonateriéntaraʼkwe tsi ratironhiakerónons wahonwahtihónkaron.

³ Ietsiʼiehiárat ne ratinótons, tsi shíken ní꞉ioht ne skátʼke sewahnóton, ietsiʼiehiárat ne iakoronhiáken, tsi shíken ní꞉ioht í꞉se ó꞉ni thóh ní꞉ioht tsi sewahronhiáken.

⁴ Ne kaniá꞉tshera kwáh onhkweʼtakwé꞉kon tsi teiotonwentióʼon naʼieriwahkweniénstake, tánon ne rotiniátʼkons ó꞉ni ne iotiniákons ioteriwíson ne ahotirihwahtokénhake tsi naʼtehónteron. Rawenni꞉io enshakoréwahte nónka ne ieweienʼnáksen ó꞉ni ónhka ne iontenakwaiesátha.

⁵ Tóhsa sewahwistanorónkwak, nók sewaktsennonníhak tsi nahoténson sewáhien. Asèken ráwen ne Ní꞉io, “Iáh nonwénton tiakonhiatewénhtethe; iáh nonwénhton tiakonhiáʼkaweh.”

⁶ Ánion kíʼ ionkwahriwahníronk, káti, tánon tewénhron, “Roiá꞉ner sehʼ ratiénawahse, iáh tahonkʼteronní꞉hake. Nahóten ahiekwéni nónka ne oʼthènen naiontiérahse?”

⁷ Sehʼhieiárak ne thóh tihénton iesenhenteséhaʼkwe, tsi wahesataráhkwenh ne Rawenni꞉io raoteriwahnotátshera. Ionshahsanonthónnionf tsi ní꞉ioht tsi ronónhʼnhekwe ó꞉ni ronenhéion, tánon kwáh ne sáhka tsi sehnéste tsi thetsetákwen ne Roiá꞉ner.

⁸ Ié꞉sos Kerístos seh né sahahiáta tsi niʼiohtón꞉ne ne theténre, tánon nónwah wenhniseráte, ó꞉ni ne tsi nén꞉we.

⁹ Tóh꞉sa satʼthóntat ne tsík naorihoténsons naisatʼtaharáhkwahte ne tkarihwahiérike. Kwáh íken tsi iohiánere nakonwahshahtsʼténseron nawéri thóh nón nahontáwe ne Rawenni꞉io raoténrat, tánon iáh né tahiontewénhnaraʼkwe tsi nihioianerenserótens ne kátkhwas; tsi nihiákon né꞉ne iakotehwenhnarákwen iáh thènen tehiakohiatakenáʼon.

¹⁰ Né rohkháres ne teshahkoriwásnieʼse tsi ronterennaiéntakwah ne Sitaeró꞉non iáh tehohianerenseráhien ne ahráhke né thènen wahthéskonʼte ne tsi tewahtienharáhkwah.

¹¹ Ne Sitaeró꞉non rahtsihenstowáhne tháhas ne katshénen aotinekwénsa tsi nónwe né kwáh ionakʼtatokénti ne tahatenonweráhton tsi ahatienkwahrónniaʼte ne kariwáhneren aorihwáhke; nók ne katshénen ahotiʼieróntas watʼtsaháton thóh átsthe tsi nónwe nihonahnátaien.

¹² Asèken ne kí꞉ken aoríhwah ne Ié꞉sos átste nahkanatáti nón nihawenhéion, ehʼnahontáwe nahonsahiakotonnakanónnien nonkweʼókon tsi nòkwa ne karihwáneren né kenikwékon ne rahonekwénhsa.

¹³ Ánion, káti, rahonháke niéteweh thóh nónwe átste tsi nónwe nihonahnátaien tánon tewahtiátaren ne raotehenserá꞉kon.

¹⁴ Asèken iáh tsehiotʼkontákwenh tsi kanátaien ne kén꞉en onwenhtsiáke nonkwahʼriwáhke; né tewéshaks ne kanáta tsi nénwahwe.

¹⁵ Ánion tewahtátʼrek, káti, tiotkonʼhónwe ietewáhtat ne kanonwerahtóntshera rahonháke ne Rawenni꞉io né꞉ne onkwahtaʼtewenhniʼiótshera tsi nòkwah ne Ié꞉sos, né꞉ne iewatʼkáwenh tsi nitiawénon ne tsi ieshakáronthe tsi nihiákon ne iakoriwahniráhton tsi rahónha ne Roiá꞉ner.

¹⁶ Tóhsa sewahnikónren nahontesewahriwaʼiérike tsi nahtesewáhteʼre, tioríhwa ne kí꞉ken ne kariwiʼiosehokónhas rawerientiʼiosténnis ne Rawenni꞉io.

¹⁷ Ietsiwenhnaráhkwak ne ietsihéntense ó꞉ni sewáhser ne rahotirihwahshónhas. Kwáh iáh thènen tewahtorisentátie tsi Rahtinikónrahre ne sewahtónnhets, ne tsi ronahteriwahiénni ónenk tsi enʼhonwahnikonrahientáten ne Rawenni꞉io tsi nihotiʼiotenseróten. Tóhka enʼietʼtsiwénhnarahkwe, kwáh ahtsennonniatsherákon tsi enhotiʼióten ne rahotiʼioténserah; tóhka iáh, enʼtatinikónrenne tsi nenhotiʼióten, né ki né꞉ne kwáh iáh ónhka tahiakoiénawahse.

¹⁸ Iashewahkóntat takwahterennaiénhas. Kwáh orihwí꞉io iontiónni nonkweriá꞉ne kwáh iáh thènen teiostónton, tsoríwah tsi néhe tiókonthe tehionkwahtonwenhtió꞉ni ne tkarihwahiéri tsi nahiakwáhtiere.

¹⁹ Tánon kwáh nekén꞉nis sénha wéso tsi ahonteshewahnikonrahkontákwenh tsi aisewahterénnaien ne Rawenni꞉io tsi sénha iostó꞉re tionhá꞉ke iahonshahakathénieʼthe.

Kahnontónkwah Aterénnaien

^20-21 Rawenni꞉io shoketskwenh ne kenheiátʼne ne Sonkwahʼiáner Ié꞉sos, rahónha ne Rohshatsʼtenserowáhnen Shakonónhne ne teiotinakarontónha ne tsi niaʼteionénon ne raonekwénhsa, ehnónwe tsi nénwe nahterihwahseronniátshera tsi kanakentóron. Aiáwens ne Rawenni꞉io né skén꞉nonk tíken ahontáhion kwáh tsík nahoténsons ne ioiánere tahishatonwenhtió꞉nike nahishaióten tsi nitonikonriʼióʼon, tánon aiáwens ne rahónha, rahonháke ne Ié꞉sos Kerístos otionháke ahoióten tsi nitohnikonriʼióʼon. Tánon rahonháke ne Kerístos nón nikáien ne kahiatanerahkwáhtshera tsi nénwe ó꞉ni tiókonthe! Éʼtho naiá꞉wenhne.

Nohnakènkha Owenhnasónhas

²² Kwáh ne kénʼnis, tewahtenroshónhas, nahisewahtahónsataʼthe kwáh sakʼthikénhak kí꞉ken aterihwahnotátshera ne iakonikonkhétskwahs; Asèken kí꞉ken kahiatónserah iekwahʼhiatón꞉ni iáh shóhtsi tèions.

²³ Tewahkatonwenhtió꞉ni nahisewahteriéntarahne nonkwahtatekénha Timothy shohiakén꞉en ne tsi iontatenotónkwah. Tóh꞉ka iostóh꞉re énrahwe, enhiákene nónen enkwáhken.

²⁴ Tehiakhinonwehráhtons ratikwékon ne ietʼtsihéntense ó꞉ni ratikwékon ne Rawenni꞉io rahonkwetaʼshónha. Ne thóh netákwenh ne Italy nónwe teietʼtsinonweráhtons.

²⁵ Aiáwens ne Rawenni꞉io raoténrat tiotkonhón꞉we aisewahkweʼkónhake.