Haggai 2 - Ohiatonhseratokénti

¹ Ne tewáhsen siwenhniserakéhaton ne tewáhsen énska siwenhniserakéhaton ne tsatákhaton siwenhnì꞉tare, ne raowén꞉na ne Roiá꞉ner rahonhà꞉ke ne rotokénhse Haggai nontá꞉we, ratónhnionskwe:

² Stáras nó꞉nen ne Zerubbabel ne roʼní꞉ha né꞉ne Shealtiel, ne rakó꞉raʼkwe ne Judah, tánon ó꞉ni ne Joshua né꞉ne roʼní꞉ha ne Jehozadak, né꞉ne kwáh è꞉neken tókte ratsihénstatsi, tánon ne iateiakothaténhron nonkweshón꞉as, tánon tsí꞉ronh,

³ Ónhka kenh tsi nítson ne iatesewathaténron nahisewatkátonhke kí kén꞉en kanónshote nohén꞉ton tkénhne tsi nihiononsanerakwáhtonhne? Onhká꞉ti nón꞉wa ní꞉ioht tsi tsisewatkátos? Tsi tesewaká꞉nere ne ken ne kwáh iáh othé꞉non thakénhake?

⁴ Nek kík sá꞉ka saʼnikonranirón꞉hak, Zerubbabel, rá꞉ton ne Roiá꞉ner; saʼnikonranirón꞉hak, Joshua, né Jehozadak, né꞉ne kwáh è꞉neken tókte ratsihénstatsi. Sewaʼnikonhranirón꞉hak, sewakwé꞉kon ne tionhontsakeró꞉nons, asè꞉ken skát꞉ne í꞉tewes ní꞉se, rá꞉ton ne Sakoiá꞉ner ne ratironhiakeró꞉nons.

⁵ Ne kí꞉ken nakaterihwaseronhniá꞉tshera nó꞉nen shatontesewaiá꞉kenhne ne tsi tionontsá꞉ien ne Egypt. Tánon nakeshatsténhsera shé꞉kon sewakwé꞉kon. Tánon tó꞉sa sewatéron.

⁶ Asè꞉ken rá꞉ton ne Sakoiá꞉ner ne ratironhiakeró꞉nons: Kenk nenkarihwésonke, kwáh enkáwake ne tsi karonhiá꞉te óni né tsi ionwenhtsá꞉te ó꞉ni ne kaniatarakeʼkowáhne ó꞉ni ne iahonwenhtsathénhake;

⁷ tánon kwáh enkheiáwake ratikwé꞉kon ne ronhnonhontsakeró꞉nons, ne káti nakotiohkowátsheras onhkweʼtakwé꞉kon ne ronhnonhontsakeró꞉nons nahontakahióntonhke, tánon Kwáh kí ne thentetrá꞉te kí kén꞉en kanónshote ne kaiatanerakwáhtshera, rá꞉ton ne Sakoiá꞉ner ne ratironhiakeró꞉nons.

⁸ Ne kahwistará꞉kens í꞉ih aká꞉wenk, ó꞉ni ne ohwistanó꞉rons í꞉ih aká꞉wenk, rá꞉ton né Sakoiá꞉ner ne ratironhiakeró꞉nons.

⁹ Iáh thahión꞉nise tsi nihiononsanerákwat kí꞉ken Ononsatokentikó꞉wa kwáh sénha ne entionhnonsanerakwátonhke tsi ní꞉ioht nononsakahiónhkwe, rá꞉ton ne Sakoiá꞉ner ne ratironhiakeró꞉nons; tánon ken kí nón꞉we nentkát꞉kawe ne skén꞉nonk thí꞉ken, rá꞉ton ne Sakoiá꞉ner ne ratironhiakeró꞉nons.

¹⁰ Ne tewáhsen-kaié꞉ri shiwenhniserakéhaton ne tiohtónhaton niwenhnítarahkwe, né꞉ne teiohserahkéhaton né꞉tho Darius, ne raowén꞉na Roiá꞉ner rahonhà꞉ke ne rotokénhse Haggai nontá꞉we, ratónhnionskwe:

¹¹ “Ken nahó꞉ten ráton ne Sakoiá꞉ner ne ratironhiakeró꞉nons: ietsirihwanóntons ne ratitsihénstatsis nahó꞉ten wáton ne kaianerénhsera.

¹² Tóka shí꞉ken shaiá꞉ta rahá꞉wi ne kahwaratokentíston thóh kawenón꞉ni raotiaʼtawíhne ne waʼkóshes, tánon natsherón꞉niat ne kawarakwenonniáton iaʼaʼohseron thikánionʼk kanà꞉taro, khés ne tekakwhaiesthanion, khés nonenharakeri, khés né kénhie, khés tsik nakakhoténhake, iotokénhti ken ienwáton?” Ne ratsihénstatsis watharihwaʼserá꞉ko, “Iáh.”

¹³ Ethò꞉ne ne Haggai wahèn꞉ron, “Tókaʼ shí꞉ken ónhkak teiakoiatátson iaʼeié꞉na ne iotokénhti í꞉ken ne iotokénhti watsiotióntane ken?” Ne ratsihénstatsis watharihwaʼserá꞉ko, “Hen watsiotióntane.”

¹⁴ Ne Haggai ethò꞉ne sahèn꞉ron, Káti kwáh ne shaʼorí꞉wa ne kí onkweshón꞉ʼa, tánon kí꞉ken ratitióhkwaien natkénton rónhnes, rá꞉ton ne Roiá꞉ner. Tánon kwáh satéhiot tsi ní꞉kon rotihiothénhen ne rontsá꞉nakes; tánon tsi nahoʼténhsons ne thóh nón꞉we thotiiestánion tsi iáh tehiotʼkwéniens

¹⁵ Ók ó꞉nenh, sewanontonhniónko tsi niahawenonhátie tsi niiotón꞉ne nohénton shontahontáhsawen ne watahtinenʼiaserónnion ne raononsatokentikówane ne Roiá꞉ner,

¹⁶ onhnisewaweienóthenhne? Nó꞉nen nón꞉kak wahón꞉we ne tsi iotónhiote nonátsa iahkoraráhtie tewáhsen nikawinotserá꞉ke enhiakotónhnien, ók oié꞉ri khok nikawinotsherá꞉ke wahakotónhnien; nó꞉nenh nónhkak iahá꞉hen tsitkanakwá꞉here nonenhará꞉keri niahienekotsénhte wísk niwáhsen nikaweró꞉kwahke iakoraratiéne ók tewáhsen khok nikaweróhkhwahke wahakonekaiéntane.

¹⁷ Kwáh wakonhkarón꞉ni tánon akwé꞉kon ne saienʼthó꞉tsheras ó꞉ni tsi nisahiothenʼen ne iakaténiehte ne kwáh ioweraʼtaríhen tánon takakher꞉fonten ó꞉ni wahonenʼón꞉ti; nek kík sá꞉ka iáh thetsisatatrewáton, rá꞉ton ne Roiá꞉ner.

¹⁸ Sewanontonhnión꞉ko kén꞉en wenhniserá꞉te iewatáhsawen, né꞉ne tewáhsen kaié꞉ri niwenhniserakéhaton né wenhnì꞉tare ne tiotonhá꞉ton niwenhnitakéhaton. Tsi ná꞉he ne thóh tewenhniserátekwe tkenskwahráston ne Roiá꞉ner raononsatokentikówa, sewahnontonhnión꞉ko:

¹⁹ Thé꞉nenh ken ne kanenhá꞉sonha iotathenrá꞉hon ne tsi iakehnekeraientháhkwah? Tsi nió꞉re nón꞉wa nonénhare, ne tionhnionwaronhtonhakó꞉wa karón꞉ta, ne wé꞉so iotenénha sewaihó꞉wane, tánon ne iakenhiewátha karón꞉ta shé꞉kon iáh othé꞉non tewahianihióntʼtha. Kwáh kén꞉en wenhniserá꞉te ienwatáhsawen kwáh enkonhiataté꞉riste.

²⁰ Ne raowén꞉na ne Roiá꞉ner tontá꞉we tekení꞉haton ionshontératste rahonhà꞉ke ne Haggai né꞉ne tewáhsen-kaié꞉ri siská꞉rakwe ne tiotonháton siwenhnì꞉tare ratónhnions:

²¹ Stá꞉ras né Zerubbabel, ne rakó꞉ra ne Judah, né꞉tho ó꞉nen thó꞉wa akáwake ne tsi karonhiá꞉te ó꞉ni tsi ionwenhtsá꞉te,

²² tánon enkheshatstenhseráhkhwa tsi kanonhtiiotsheraké꞉rons; kwáh enkatónhte ne raotishatsténhseras ne tsi ratinontiiotsherakérons tánon enkatónhte notiónhkwas ó꞉ni né꞉ne rontihonwí꞉seres; tánon ne akoshá꞉tens ó꞉ni ne rotishá꞉tens kwáh kí enhonhní꞉heie, satihiatatʼtions né꞉ne raosarekó꞉wa ne atatekénhsera enhontirhió꞉te.

²³ Ne thóh enwenhniserá꞉teke rá꞉ton ne Sakoiá꞉ner ne ratironhiakeró꞉nons, kwáh kí ienkoniaténhawe, Zerubbabel nakehnháhtshera, ne roʼní꞉ha né꞉ne Shealtiel, rá꞉ton ne Roiá꞉ner, tánon enkonhiónhnien tsi ní꞉ioht nakatsikwenhtónhke anisnón꞉sawi; asè꞉ken Í꞉ʼi enkoniatará꞉kwen, rá꞉ton ne Sakoiá꞉ner ne ratironhiakeró꞉nons.