Genesis 7 - Ohiatonhseratokénti

Ne Tehiotenonhianíton Iawehnotónnion

¹ Ethò꞉ne ne Roiá꞉ner wahawénhase ne Noah, “Wá꞉s kahón꞉wakon iashatíta, í꞉se tánon ne swatsirekwé꞉kon, asèkenʼh waʼkatkátho tsi shón꞉hahak khók tehshonkweʼtaié꞉ri nakhén꞉ton nón꞉wa nikaháwi.

² Iaʼsheiaʼtenháhseron tsá꞉ta niioianakehátie né꞉ne ionatenahskwakkwénienʼs né꞉ne naón꞉ton naieʼwá꞉rake tánon nahonwátatshe né Roiá꞉ner né꞉ne ratítsiʼn tanon notiʼnhéhtien; tánon tsoíana né kontitsénens ne iáh teionatenahskwatkwéniens, né꞉ne ratí꞉tsiʼn tánon nonhétien;

³ tánon tsá꞉ta niioianakehátie notsiʼtenʼokón꞉ʼas ne tsi karonhiá꞉te, né꞉ne ratítsiʼn ó꞉ni notiʼnhéhtien, ne nakonwatinónhstate tsi niiotitiohkó꞉tens ne nohontsakwé꞉kon nón꞉we nakonnónhnheke.

⁴ Ásekenʼh tsá꞉ta nón꞉ta niió꞉re kwáh entkaténniehte naiokén꞉nore ne tsi ionhwentsá꞉te né꞉ne kaié꞉ri niwenhniseráhsen tánon kaié꞉ri niwahshontáhsen nenhkarihwé꞉shonke; tánon kwáh tsi niaʼtehá꞉ti ne ronónhnhe ne tsi ionhwentsá꞉te ne kheiaʼtíson kwáh kíʼ ensekheiáhtonʼte ne tsi ionhwenhtsá꞉te.”

⁵ Tánon ne Noah kwáh akwé꞉kon tho nahá꞉iere tsi nihohnhá꞉on ne Roiá꞉ner.

⁶ Ne Noah iá꞉iak tewenʼniáwe shaʼtehaohseriiá꞉kon ne shonwenhnotonʼkó꞉wa ne tsi ionhwentsá꞉te.

⁷ Tanon ne Noah skátne ne raonekenhteronʼtsheraʼshón꞉aʼs oni ne ró꞉ne tanon ne raonekenhteronʼtsheraʼshón꞉aʼs rontatronaʼaʼshón꞉as, kahón꞉wakon iahontitárion, ne nahatiʼniá꞉kenʼne tsi nonkwá nohné꞉kanos tsi nenwenhnó꞉ton.

⁸ Ne ionatkwéniens konhtitshé꞉nens, ó꞉ni ne iáh teionatkwéniens, tánon noná꞉tiakes otsiʼtenʼokón꞉ʼa tánon ne niaʼtekón꞉ti ne konté꞉seres nonhontsá꞉ke,

⁹ tekontiiaʼtakeháties, ne꞉ne ratí꞉tsiʼn ó꞉ni notiʼnhéhtienʼs, kahón꞉wakon iakontitárion skátne ne Noah, kwáh kiʼ tsi nihonhá꞉on ne Rawenni꞉io ne Noah.

¹⁰ Tsá꞉ta nónta ohnakén꞉ke nohné꞉kanos nawenhó꞉ton waʼkahnekó꞉ne ne tsi ionhwentsá꞉te.

¹¹ Ne iahiákhaton shatewenʼniáwe niioseʼrá꞉ke shihrónhnhe ne Noah, ne tewenhniʼtakéhaton, ne tsatákhaton iawén꞉re shiwenhniserakéhaton né tsi niwenhnítarakwe, ne tho siwenhniserá꞉tehkwe kwáh akwé꞉kon ne tsi niiohnaweró꞉tonʼskwe ne kwáh tiohnó꞉tes tontonteráʼné꞉kare, tanon ne tsi ionenhstonkwakahrón꞉tonʼs ne karonhiá꞉ke ontehnhohtonkwenhá꞉ton.

¹² Waʼokén꞉nore ne tsi ionhwentsá꞉te kaié꞉ri niwenhniseráhsen tánon kaié꞉ri niwahshontáhsen.

¹³ Kwáh ne wenhniserá꞉tehkwe ne Noah tánon ne raonekenhteronʼtsheraʼshón꞉ʼa né꞉ne Shem, Ham, tánon ne Japheth, tánon ne Noah ró꞉ne tánon náhsen nikón꞉ti ne rontatronaʼhashón꞉aʼs ne raonekenhteronʼtsherashón꞉a skát꞉ne iahontá꞉weiate ne kahón꞉wakon,

¹⁴ ronónha tánon ne kwáh tsik niaʼtekarió꞉takes, ne taioianénhawe tsi niiotitiohkó꞉tenʼs, tánon kontikwé꞉kon ne tiohnhónskwaronʼs ne taioianénhawe tsi niiotitiohkó꞉tenʼs, tánon kwáh tsi niaʼtekón꞉ti ne konté꞉sereʼs nonhwentsá꞉ke ne taioianénhawe tsi niiotitiohkó꞉tenʼs, ó꞉ni notsiʼtenʼokón꞉a tánon kwáh tsik niaʼtekatsiʼtenʼserá꞉ke tsi naʼkontiiaʼtoʼténhake, tánon kwáh tsi nikón꞉ti ne tekontinerahontshón꞉tonʼs notsitén꞉as.

¹⁵ Kahón꞉wakon iaʼkontítaron skátne ne Noah, tekeʼní꞉shons né꞉ne akwé꞉kon ronnonhnhénion ne꞉ne ronnonniserá꞉ien tsi ronnónhne.

¹⁶ Tánon tsi nihá꞉ti ne iahontáweiaʼte, né꞉ne ratí꞉tsiʼn tánon notiʼnhéhtien ne nakwé꞉kon ronnonhnhénion, iahontáweiate kwáh kíʼ tsi nihotenhnhá꞉on ne Rawenni꞉io; tánon ne Roiá꞉ner tahohnhó꞉ton.

¹⁷ Iaʼkakón꞉tahkwe onhwehnó꞉ton ne tsi ionhwentsá꞉te né꞉ne kaié꞉ri niwenhniseráhsen, tánon kwáh í꞉ken tsi waʼohnotéhshaʼne tánon nohné꞉kanos wakahonwakará꞉tate ón꞉ton ne kahonwé꞉ia onthonwá꞉kerahkwe é꞉ren niió꞉re é꞉neken ne tsi ionhwentsá꞉te.

¹⁸ Nohné꞉kanos waʼohsháststenʼne tánon kwáh í꞉ken tsi taiohnoteshá꞉serek ne tsi ionhwentsá꞉te, tánon ne kahonwé꞉ia onthá꞉wihte nohnekaʼkéhshon.

¹⁹ Eʼthó niió꞉re nohné꞉kanos tsi waʼohsatstenhserowahnha ne tsi ionhwentsá꞉te akwé꞉kon ne tiotenontatónnions nehtà꞉ke naʼkarón꞉iati wakanontò꞉roke;

²⁰ tsi niiohnó꞉tes ne waʼkahró꞉rokste ne tsi ionontahrónnions, tewáhsen wísk niwasí꞉take ontóhetste tsi nitiotenontatónnions.

²¹ Kwáh tsi niaʼtewatonhnhehtserà꞉ke ne rontoriá꞉nerons nonhwentsá꞉te tsi waʼakowéntho kwáh tsi niaʼtekatsitenʼserà꞉ke, tionhnhónskwaronʼs, niaʼtekarió꞉takes, ratikwé꞉kon ne iotiʼonwahráhratieʼs nonhwentsá꞉ke, ó꞉ni kwáh niaʼteionkwé꞉take tsi waʼaé꞉heie.

²² Kwáh tsi nahò꞉ten ne iaonniserá꞉ien ne iaonhwentsatén꞉ke ne tsi teiohnionká꞉ronte nón꞉we nihontónrieʼs tsi wahonníheie.

²³ Ne Roiá꞉ner kwáh akwé꞉kon niaʼshakóhtonhte tsi nahó꞉ten ne iónhnhehkwe ne tsi nonhwentsá꞉ke onkweʼshón꞉ʼas, tánon ne kontitshé꞉nenʼs, tánon ne konté꞉sereʼs tánon notsiʼtenʼokón꞉ʼa ne tsi iówerare; kwáh wahonwanáhtonʼte ne tsi ionwenhtsá꞉te. Nek khók iatehshonatatén꞉ron tsi nihá꞉ti ne Noah ratikwekónhne ne kahón꞉wakon.

²⁴ Énskat tewenʼniáwe tánon wísk niwáhsen niwenhniserá꞉ke iothnekaratá꞉tonhkwe nonhwentsá꞉ke.