Genesis 46 - Ohiatonhseratokénti

Ne Jacob Rahwatsirakwé꞉kon Egypt Niahshakoiaʼtenhawe

¹ Nó꞉nen ne Israel tahatáhsawen waʼthatáhakwe iaháhawe akwé꞉kon tsi nahoʼtén꞉shonʼs ró꞉ien tánon iahá꞉rawe Beer-sheba nón꞉we, tánon katshé꞉nen wahoteʼskónthaʼse ne Rawenni꞉io ne ne roʼníha Isaac Raoní꞉io í꞉ken.

² Ne Israel tsi ní꞉ioht ne waʼthotierónnionʼse ne tsi niwahsón꞉tes ne Rawenni꞉io tsi wahohtháhrhahse, tánon wahén꞉ron, “Jacob, Jacob.” Tánon tsi waʼtharihwaʼserá꞉ko, “Kén꞉ʼen í꞉keʼs.”

³ Eʼthó꞉ne ne Rawenni꞉io wahén꞉ron, “Í꞉i ne Ní꞉io, ne Raoní꞉io ne iaʼníha; tóhsa sáhteronʼn ne Egypt niáhse, aseʼkénh kwáh ne enkoniónniaʼte naesewentiohkowáhnha ne nón꞉we.

⁴ Enkoniatiaʼtónʼthahse tsi nienhénhse ne Egypt, tánon kwáh shé꞉kon tentkoniaʼténhawe; tánon kwáh Só꞉se rahtsaʼnà꞉ke tenhiaròn꞉weke nó꞉nen enhsíheie.”

⁵ Eʼthó꞉ne ne Jacob tontahahtén꞉ti ne Beer-sheba; tánon ne raonekenhteronʼtsheraʼshónʼahs ne Israel wahonwaiaʼtíta ne ronwaʼníha Jacob, tánon ne kenʼ nihonná꞉saʼs ratiksaʼokón꞉ʼahs, tánon ne rotiniákhonʼs, wenniseré꞉ske wahotihonwí꞉sere ne ne Pharaoh tehshakoteʼserehtatenniehtén꞉ti.

⁶ Iaʼkonwatiiaʼténhawe ne raotitshenenʼó꞉konʼs ó꞉ni raonawenhshón꞉ʼahs ne rotiientá꞉ʼon tsi watonhontsá꞉ien ne Canaan, tánon Egypt niahón꞉ne. Ne Jacob kwáh rahwatsirakwé꞉kon ratikwekonhátie,

⁷ raonekenhteronʼtsheraʼshón꞉ʼas, tánon ne shakotereʼokón꞉ʼahs raónha ratikwekonhátie, ne shakoioʼokón꞉ʼahs tsonathonwí꞉senʼs, tánon ne raonekenhteronʼtsheraʼshón꞉ʼahs shakotiioʼokón꞉ʼahs tsonathonwí꞉senʼs kwáh rahwatsirakwé꞉kon Egypt niahshakoiaʼténhawe.

⁸ Ne kiʼ tsi nihotihsennoʼtén꞉shonʼs ne Israerʼró꞉nons, ne ne Jacob tánon ne shakoioʼokón꞉ʼahs, ne Egypt niehoné꞉non, ne ne Reuben, ne ne kwáh thokstén꞉ha ne Jacob roién꞉ʼa,

⁹ tánon ne kí꞉ken raonekenhteronʼtsheraʼshón꞉ʼahs ne Reuben: Hanoch, Pallu, Hezron, tánon ne Carmi.

¹⁰ Ne Simeon raonekenhteronʼtsheraʼshón꞉ʼahs: ne ne Jemuel, Jamin, Ohad, Jachin, Zohar, tánon ne Shaul, ne nenʼ ne ne Canaanró꞉non ión꞉kwe roién꞉ʼa.

¹¹ Ne Levi raonekenhteronʼtsheraʼshón꞉ʼahs: ne ne Gershon, Kohath, tánon ne Merari.

¹² Ne Judah raonekenhteronʼtsheraʼshón꞉ʼahs: ne ne Er, Onan, Shelah, Perez, tánon ne Zerah (ók ne Er, tánon ne Onan tsi watonhontsá꞉ien ne Canaan nón꞉we nihonenhé꞉ion); tánon ne raonekenhteronʼtsheraʼshón꞉ʼahs ne Perez ne ne Hezron tánon ne Hamul.

¹³ Ne raonekenhteronʼtsheraʼshón꞉ʼahs ne Issachar: ne ne Tola, Puah, Jashub, tánon Shimron.

¹⁴ Ne Zebulun raonekenhteronʼtsheraʼshón꞉ʼahs: ne ne Sered, Elon, tánon Jahleel.

¹⁵ (Ne kí꞉ken raotinekenhteronʼtsheraʼshón꞉ʼahs ne Leah tánon ne Jacob, tho tsi watonhontsá꞉ien ne Paddan-aram nón꞉we nihonanakerá꞉ton, skátne ne sakoién꞉ʼa Dinah; ne tiokwékton raonekenhteronʼtsheraʼshón꞉ʼahs ó꞉ni ne tsonathonwí꞉senʼs shakoioʼokón꞉ʼahs ahsen-niwáhsen áhsen nihá꞉ti).

¹⁶ Ne Gad raonekenhteronʼtsheraʼshón꞉ʼahs: ne ne Ziphion, Haggi, Shuni, Ezbon, Eri, Arodi, tánon Areli.

¹⁷ Ne Asher raonekenhteronʼtsheraʼshón꞉ʼahs: Imnah, Ishvah, Ishvi, Beriah, tánon ne rontenoʼsénha Serah. Ne Beriah raonekenhteronʼtsheraʼshón꞉ʼahs꞉ne ne Heber tánon Malchiel

¹⁸ (ne Kíʼ ne Zilpah aonekenhteronʼtsheraʼshón꞉ʼahs, ne ne kahnhaʼtsheraʼkénhen, ne ne Laban shakaonkweʼtá꞉wi ne shakoién꞉ʼa Leah; tánon náonha tánon ne Jacob iá꞉iaʼk iawén꞉re nihá꞉ti rotiwiraièn꞉tahkwe).

¹⁹ Naonekenhteronʼtsheraʼshón꞉ʼahs ne Jacob ró꞉ne Rachel: ne ne Só꞉se tánon ne Benjamin.

²⁰ Ne Só꞉se Egypt tsi watonhontsá꞉ien nón꞉we, nihonanakerá꞉ton ne Manasseh tánon ne Ephraim, ne ne Asenath konʼwanisténha né sakoién꞉ʼa ne Potiphera, ne ratsihenhstatsiʼ kén꞉ʼen ne On, nón꞉we.

²¹ Ne Benjamin raonekenhteronʼtsheraʼshón꞉ʼahs, ne ne Bela, Becher, Ashbel, Gera, Naaman, Ehi, Rosh, Muppim, Huppim, tánon Ard,

²² (ne Kí꞉ken ne Rachel aonekenhteronʼtsheraʼshón꞉ʼahs, ne ne Jacob shakonakerátston—kaié꞉ri iawén꞉re nihá꞉ti nakwé꞉kon).

²³ Ne Dan roién꞉ʼa: ne ne Hushim.

²⁴ Ne Naphtali raonekenhteronʼtsheraʼshón꞉ʼahs: ne ne Jahzeel, Guni, Jezer, tánon Shillem

²⁵ (ne kí꞉ken ne tsá꞉ta nihá꞉ti naonekenhteronʼtsheraʼshón꞉ʼahs ne Bilhah, ne ne Laban raohnhaʼtsheraʼkéhen ne shakaonkweʼtá꞉wi ne shakoién꞉ʼa Rachel, Jacob tánon ne Bilhah ne shakonanakerátston).

²⁶ Ne tiokwékton tsi nihá꞉ti ne kwáh Jacob raohwá꞉tsireʼs ne ráonha roné꞉non ne Egypt iá꞉iaʼk niwáhsen-iá꞉iaʼk nihá꞉ti, iáh tekonwanahséhton ne shakaonhafhó꞉konʼs.

²⁷ Tehniiáhse ne Só꞉se raonekenhteronʼtsheraʼshón꞉ʼahs, ne ne Egypt nón꞉we nihonanakerá꞉ton, katíʼ ne ratikwé꞉kon ne Jacob raohwá꞉tsireʼs ne Egypt niehoné꞉non tsá꞉ta niwáhsen nihá꞉ti.

Ne Jacob Goshen Nón꞉we Nahatenà꞉taien

²⁸ Ne Israel ohén꞉ton iahoténniehte ne Judah neʼthó iá꞉re tsithén꞉teron ne Só꞉se ne nahonaʼtón꞉hahse tsi nieiothahí꞉non ne ne tahiatátken ne Goshen nón꞉we. Nó꞉nen ienhón꞉newe tsi tiohontsá꞉ien ne Goshen,

²⁹ ne Só꞉se wahshakóhnhaʼne ne raohnhaʼtsheraʼó꞉kon nakonwatiiaʼtaniión꞉ten ne kohsá꞉tenʼs ne tékeni teiokahkwèn꞉tonte oʼtsónhkwa tánon ne wahohonwí꞉sere ne iaʼtahiatátken ne roʼníha Israel ne Goshen nón꞉we. Ne shiaʼthiatátken, ne Só꞉se iahohniá꞉sa ne roʼníha tánon kwáh karí꞉wes waʼthahséntho.

³⁰ Ne Israel wahawènhahse ne Só꞉se, “Ó꞉nen kiʼ thikawenní꞉io akíheie, kwáh í꞉i waʼkatkáhtho tsi shé꞉kon nihsónhnhe.”

³¹ Ne Só꞉se wahshakawènhahse ne rontateʼkoʼokón꞉ʼahs tánon ne roʼníha raohwá꞉tsire, “Kwáh thóh ièn꞉ke tánon enhihroriá꞉na ne Pharaoh, tánon kwáh enhiiènhahse, ‘Ne iakwatatekoʼoʼkón꞉ʼahs ó꞉ni ne rakeʼníha raohwá꞉tsire, ne tsi tionhontsá꞉ien ne Canaan thatinákerehkwe, tahón꞉ne nakonhá꞉ke.

³² Ne ronnón꞉kwe teiotinaʼkarontón꞉ʼa shakotiʼnikón꞉rare, aseʼkénh kontitshé꞉nenʼs tehshakotirihwahshnié꞉se; tánon tahshakotiiaʼténhawe ne teiotinaʼkarontónʼahs ó꞉ni ne kaiaʼtákeras, tánon ne tiohnhónskwaronʼs, tánon akwé꞉kon tsi nihotiièn꞉tahkwe.’

³³ Nó꞉nen ne Pharaoh entehtshisewèn꞉nonke, tánon enhtshisewariʼwanón꞉tonhse, ‘Oh nisewaioʼtenhseró꞉ten?’

³⁴ kwáh iorihwiióhak tsi ehtshisewahró꞉ri ‘kwáh tsi nitiónhnhes tsi katshé꞉nen iethiʼnikón꞉rare, iakwakwé꞉kon tánon ne iakhisothokonʼkénhen’—ne katíʼ naón꞉ton tsi ionhontsá꞉ien ne Goshen nón꞉we naesewenʼterón꞉take, tiorí꞉wa ne Egyptró꞉nons kwáh iáh oh thé꞉nen tehon꞉nehre tahonterihwahsónteren ne teiotinaʼkarontón꞉ʼa shakotí꞉nonhne.”