Genesis 3 - Ohiatonhseratokénti

Né Tiotierenhtáhkwen Karihwanerenʼáktshera Tánon Tsi Niiakohrewáhtha

¹ Kí ó꞉niare ne tiaonhá꞉ʼa tkaʼnikonhrhá꞉tha ó꞉ni tkatsítsho tsi nihá꞉ti ne kontírios shakoiaʼtíson ne Roiá꞉ner Rawenni꞉io. Nó꞉niare waharihwanónʼtonhse ne tsothonwí꞉sen, “kwáh ken ne Rawenni꞉io wahiaró꞉ri ne tóhsa ahsá꞉iake ne tsik nakarontó꞉ten ne kahéhtakon kerite?”

² Ne ión꞉kwe wahawenhá꞉se nó꞉niare “Enwá꞉ton kwak tsik niwahió꞉ten aetewá꞉iake tsi ní꞉ioht tsi kehrí꞉ton ne kahéhtakon;

³ ók ne Rawenni꞉io wahén꞉ron, ‘Nek khók thí꞉ken ne shátekahehtí꞉hen non nikéhrhite, Rawenni꞉io shonkenihró꞉ri ne tóhsa aiatiá꞉iake neʼthó kéhrite tánon kwáh tóhsa ó꞉ni nek khók ne iaiakeniié꞉na, tóka tho neniakení꞉iere eniakeníheie.’”

⁴ Ók nó꞉niare waʼtioriwaʼserákwahse ne ión꞉kwe, “Iáh tó꞉kenske té꞉ken; iáh thahsíheie;

⁵ asèkenh roterièn꞉tare ne Rawenni꞉io nó꞉nen entsà꞉iake, tentsatkahkwaríhsi, tánon tho nenseniiaʼtó꞉tenʼne tsi ní꞉ioht ne Rawenni꞉io, entsaterièn꞉taraʼne nahò꞉ten ne ioiánere ó꞉ni ne karihwáksen.”

⁶ Káti nó꞉nen ne ión꞉kwe ontkáhtho tsi niiorontanehrákwaht, tánon ó꞉ni ónhte wáhi tsi niwahiákon naiòn꞉iake ne aʼohik, tánon onnonhtónnionhwe ónhte wáhi tsi niionehrákwaht naiakoʼnikonhrowáhna. Sók kiʼonhianiiontá꞉ko tánon ón꞉iake. Tánon ó꞉ni wahó꞉ianonte ne ró꞉ne, ók wahá꞉iake.

⁷ Eʼthó꞉ne kwáh tenitsà꞉ron wathiatkakwarísi, tánon wahiáttoke tsi raotinéhonʼk khók thí꞉ken; iáh oʼthé꞉nen tehonatsherón꞉ni sók ne waniníkhonnion ne tionhnionwarontonhakówa onerahteʼshón꞉as watnikhánion tánon ne wahiateniiontahtserónniaʼte tánon ne wá꞉iaste.

⁸ Wahonathontene ne Roiá꞉ner Rawenni꞉io kahéhtakon tehotekhahahkwenhátie né shiaʼtewatshéntho nó꞉nen shonsonhsón꞉tanohste nokarasnéha shikaʼhá꞉wi, tánon ne rón꞉kwe ó꞉ni ne ró꞉ne wahonwatahséhten tsi non nikehrhí꞉tons ne kahéhtakon.

⁹ Nok ne Roiá꞉ner Rawenni꞉io iahoná꞉ton ne rón꞉kwe tánon waʼhá꞉wenhase, “Kaʼnón꞉we ní꞉ses?”

¹⁰ Tontaharihwaʼserá꞉ko, “Waʼkonwenná꞉ronke ne kahéhtakon, tánon ónkteronʼne, tiorí꞉wa tsi akenéhonʼk thí꞉ken tánon wakatashete.”

¹¹ Waʼhén꞉ron, “Ónhka iesahró꞉ri tsi sanéhoskonk thí꞉ken? Wahshá꞉iake kenh tsi niká꞉ien ne konhró꞉ri ne tóhsa ahsá꞉iake?”

¹² Ne rón꞉kwe waʼtharihwaʼserá꞉ko, “Hen, ók ne kí꞉ken ión꞉kwe ne takonkwetʼá꞉wi ne skátne aiakené꞉sheke ne onká꞉ianonte tánon waʼhká꞉iake.”

¹³ Eʼthó꞉ne ne Roiá꞉ner Rawenni꞉io wahrénhahse ne tsothonwí꞉sen, “Nontié꞉ren kí꞉ken tsi tho náhshiere?” Ne tsothonwí꞉sen waʼkén꞉ron, “Thí ó꞉niare waʼtewakeʼnikonhrakén꞉ni tsi waʼká꞉iake.”

¹⁴ Ne Roiá꞉ner Rawenni꞉io wahrénhahse nó꞉niare, “Tiorí꞉wa tsi kíʼ tho náhsiere; tsi nén꞉we ensathré꞉wate ní꞉se kwáh tsi nikón꞉ti ne kontírioʼs kwáh iaʼtehshiá꞉tik khók ensatkéhtate kí꞉ken kahrewahtáhtshera; kwáh kén꞉en ienwatáhsawen senekwenʼtà꞉ke nón꞉we nensateʼseré꞉sheke tánon oʼkenhrá꞉ke enhsateʼseré꞉sheke okèn꞉ra kí ienhsahnekwanón꞉sheke kwáh tsi nikarí꞉wes enhsónhnheke.

¹⁵ Tanon ne entsien ní꞉se ó꞉niare tánon ne tsothonwí꞉sen ne tentsatatswensehke tánon tsi nathenhontereke ne sehiohokónha tánon nakohiohokónha; thenhianonhtsistarihte, tánon ní꞉se ientshiatiatón꞉ti tánon entshiakó꞉tarike.”

¹⁶ Tsi nonkwá ne tsonthonwí꞉sen wahrènhase nen né꞉ʼe, “Kwáh iaweʼtatshá꞉ni tsi enhseronhiá꞉ken tsi nikarí꞉wes íhshawe naesawiraièn꞉taʼne; karonhiaʼkenhserá꞉kon tsi ensawiraièn꞉taʼne eʼthó sá꞉ne tsi entshiaskanéksheke ne tesení꞉teron; tánon raónha enthianiarotahrhoke.”

¹⁷ Tánon wahawénhahse ne rón꞉kwe, “Ne tsi Wahsheiatahónhsatate ne tisení꞉teron, tánon wahsá꞉iake neʼthó keʼhrhite tsi niká꞉ien ne konhró꞉ri, ‘Ne tóhsa ahshá꞉iake,’ ne tsi tho nahshá꞉tiere, enionhontsáksenʼne i꞉se wahserihón꞉ni; kwáh ioioʼtenhserahní꞉ron ensaioʼténhsheke tsi ní꞉ioht tsi enhsatonhnhihsáksheke tsi nihsónhnes;

¹⁸ ohí꞉kta tánon ohnión꞉wara, entká꞉nio ne sarihwá꞉ke; tánon né꞉ne nohonteshón꞉ʼaʼs ne kanatsoháhrha enhséksheke.

¹⁹ Ó꞉nenk tsi Tenhsáʼtarihenserón꞉hkohte ne skonhsà꞉ke ne naʼón꞉ton nohwénhtsa thé꞉nen aontaká꞉nio; kwáh tsi niió꞉re ohwentsá꞉ke nón꞉we nienséhse; tsi tho nón꞉we nitiesaiaʼténha; okèn꞉ra ní꞉se í꞉ken, tánon shé꞉kon kiʼ oʼkèn꞉ra iensehsá꞉ton.”

²⁰ Ne rón꞉kwe, Eve wahaná꞉tonhkwe ne ró꞉ne, ne tsi áonha kaʼnisténhsera ontená꞉tonhkwe tsi nonkwá nonkweʼshón꞉a.

²¹ Tánon ne Roiá꞉ner Rawenni꞉io kanéhonʼk wahshakohkweʼnionniá꞉ten ne Á꞉ton tánon ne ró꞉ne tánon ne wahshakoiáʼtawiʼte.

²² Eʼtho꞉ne ne Roiá꞉ner Rawenni꞉io wahén꞉ron, “Ó꞉nen kí꞉ken rón꞉kwe tho nihahiató꞉ten tsi ní꞉ioht nonkwáʼtiake enohterién꞉tane nahó꞉ten ne ioiánere ó꞉ni ne karihwáksen. Tanon ó꞉nen nontié꞉renk iaʼtenhanèntshetste ne iahahianiiontáko tsi kéhrhite ne tiakó꞉wis ne ionhnheʼón꞉we, tanon ahá꞉iake, tánon tsi nén꞉we enhronhnhekeʼón꞉we.”

²³ Sók kiʼ ne Roiá꞉ner Rawenni꞉io wahohré꞉kwahte ne kahéhtakon ne Eden, tánon tenhatonhontsá꞉rihte ne tsi nón꞉we nithonwaiaʼténha.

²⁴ Wahoiaʼtínekenhwe ne rón꞉kwe; tánon eʼthó꞉ne tsi tkarahkwínekenʼs nonkwá꞉ti ne kahéhtakon tho nónwe nashakóʼteron ne niʼnikonhrare iotokentis, tánon ne iotsírote naʼshareʼkó꞉wa ne tewatkahrhateníhonhs ne nahiatenʼnikón꞉raren tsi nieiawé꞉non ne tsi kéhrhite ne ionhnheʼónwe.