Genesis 25 - Ohiatonhseratokénti

NʼAbraham Keturah Wahotíniake

¹ NʼAbraham óia sahatateniákten, ne ne Keturah konwá꞉iats.

² Tánon wahotinekenhteronʼtsheraièn꞉taʼne, ne ne Zimran, Jokshan, Medan, Midian, Ishbak, tánon ne Shuah.

³ Ne Jokshan ne shakoioʼokón꞉áhs ne Sheba ó꞉ni ne Dedan, tánon ne Dedan ne iesehshakoioʼokón꞉ahs ne Asshurim, Letushim, ó꞉ni ne Leummim.

⁴ Tánon ne Midian shakoioʼokón꞉ahs ne꞉ne Ephah, Epher, Hanoch, Abida, tánon ne Eldaah. Ratikwé꞉kon kí꞉ken ne ne Keturahʼs akoioʼokón꞉as.

⁵ NʼAbraham kwáh tsi nahó꞉ten roientahtsherá꞉ien akwé꞉kon Isaac wahohiatonhserónnien.

⁶ Nok naotinekenhteronʼtsheraʼshón꞉ahs nó꞉ia tehatiiahsé꞉ne ne rotiwiraientá꞉seron ne Abraham niaʼté꞉kon wahshakowíhon, ne ne shé꞉kon sirónhnhehkwe, tánon é꞉ren wahshakoiaʼtenhá꞉wihte tsi non nihanákere ne Isaac. Tsitkarahkwínekenʼs nonkwá꞉ti tionhóntsaien nón꞉we iahshakoténniehte.

Shahrénheie Ne Abraham

⁷ Tsi nihrónhnhehskwe nʼAbraham, énska tewenʼniáwe tsá꞉ta niwáhsen-wísk niiohserá꞉kehkwe.

⁸ NʼAbraham sahatón꞉rie nohná꞉ken waʼaónniaʼte tánon kwáh thóh tsi nithó꞉ionhkwe shahrénheie, tánon iahshakotiaʼtáhrhahse ne rontátenonhkweʼs nohénton thonenhé꞉ion tsi ní꞉ioht ne ráonha.

⁹ Ne raonekenhteronʼtsherashón꞉ʼahs NʼIsaac tánon ne Ishmael, iahonwaiaʼtáta tsi tiohshonwaká꞉ronte ne Machpelah, ne ne tsitkarahkwínekenʼs nonkwá꞉ti ne Mamre ne raohentaʼkénhen ne Ephron né roʼníha ne ne Zohar ne ne Hitró꞉non.

¹⁰ Neʼthóh kahèn꞉ta ne ne Abraham shakohentahní꞉non ne Hitró꞉nonʼs. Thóh nón꞉we nihonwatiiaʼtáten ne Abraham tánon ne roneʼkénhen Sarah.

¹¹ Shahrénheie ne Abraham, ne Rawenni꞉io wahoiaʼtaté꞉rihste ne roièn꞉ʼa Isaac, tánon NʼIsaac ákta ne Beerlahai-roi nón꞉we nihanákerehkwe.

Tsi Rahwatsiratátie Ne Ishmael

¹² Ne kí꞉ken tsi nontahahwatsiratátie ne Ishmael, ne ne Abraham roienʼkénhen, áonha né Hagar ne Egyptró꞉non naʼkaiatoʼtén꞉ne ne꞉ne Sarah aonhnhaʼtsheraʼkénhen ne ne Abraham rotiwiraientá꞉on,

¹³ Ne kí꞉ken tsi nihotisennoʼtén꞉shonʼs NʼIshmael raonekenhteron; tsheraʼshón꞉aʼhs, ronwatihsennawíhon ne tioianénha tsi nihonanakerá꞉ton: Nebaioth, ne ne thakowá꞉nen nʼIshmael roièn꞉ʼa, tánon Kedar, Adbeel, Mibsam,

¹⁴ Mishma, Dumah, Massa,

¹⁵ Hadad, Tema, Jetur, Naphish, tánon ne Kedemah.

¹⁶ Ne kí꞉ken ne Ishmael raonekenhteronʼtsheraʼshón꞉ahs tánon ne kí꞉ken ne raotihsennaʼshón꞉ahs, ne raotinà꞉takon tánon tsi nón꞉we nihonnaʼtaienhskwe, tékeni iawén꞉re nihá꞉tihkweh shakotihentenséhahkwe ne raotitióhkwaʼs.

¹⁷ (Ne kíʼ tsi nihrónhnhehskwe nʼIshmael énska tewenʼniáwe tánon áhsen niwáhsen-tsá꞉ta niiohserá꞉kehkwe; nohnà꞉ken tontahatón꞉rie tánon wahrénheie, tánon iahshakotiaʼtáhrhahse ne rontátenonhkweʼs nohén꞉ton thonenhé꞉ion tsi ní꞉ioht ne ráonha.)

¹⁸ Tsi rahwatsiratátie nʼIshmael thóh nón꞉we nihatinákerehkwe tsi kanakerahserá꞉ien tsi naʼtetiátere ne Havilah tánon ne Shur, ne ne tsitkarahkwínekens nonkwá꞉ti ne Egypt tsi nieiothahí꞉non ne Assyria. Aí꞉non naʼtehónterehkwe tsi ratinákerehkwe ne ronatiaʼké꞉shonʼs nʼAbraham raohwá꞉tsires.

Shahnennákerate Ne Esau Tánon Ne Jacob

¹⁹ Ne kí꞉ken tsi rahwatsiratátie NʼIsaac, ne ne Abraham roienʼkénhen:

²⁰ NʼIsaac kaié꞉ri niwáhsen shaʼtehaohseriiá꞉kon shahotíniake ne Rebekah, ne ne Bethuel shakoièn꞉ʼa (Aramró꞉non ne ne Paddan-aram), ne ne Laban iatenoʼsénha Aramró꞉non.

²¹ NʼIsaac raonhá꞉ke ne Roiá꞉ner iahaterén꞉naien ne ne ró꞉ne aorihwá꞉ke, tiorí꞉wa tsi iáh teiowiraièn꞉taʼskwe; tánon kíʼ ne Roiá꞉ner waʼthorihwaʼserákwahse ne raoterén꞉naient, tánon ne ró꞉ne Rebekah iohrhá꞉rehkwe naiakowiraièn꞉taʼne.

²² Tehníkhen iowiraientá꞉sere, tánon nohén꞉ton nahnennákerate, iaʼthiatatrékhon ne kaià꞉takon. Waʼkén꞉ron, “Nontié꞉ren tsi knahó꞉tenʼk kí tho ní꞉ioht tsi naontià꞉tawen?” Sók kíʼ Roiá꞉ner nonkwá niaháhe naiotó꞉kenhse.

²³ Ne Roiá꞉ner wahrènhahse, “Tehotitióhkwake tsà꞉takon niiá꞉ti, tánon teionkwé꞉take nenhshenákeratste kwáh kíʼ tenhotirihwakháhshionke; saiá꞉ta sénha enhaʼshásteke tsi ní꞉ioht ne shaià꞉ta, ne thó꞉ion ne ne ranáhskwa enkénhake tsi nonkwá ne kenʼ nithoión꞉ha.”

²⁴ Shiaʼkáhewe naiowiraièn꞉taʼne, tehníkhen kíʼ tó꞉kenhske waʼowiraièn꞉taʼne.

²⁵ Ne tahatié꞉renhte wahrennákerate onekwènhtara nihaiatóʼ꞉ten, tánon raiaʼtakwé꞉kon ronnonhwéhrhote tsi ní꞉ioht natià꞉tawi nononhwéhrhon nahó꞉ten ionniá꞉ton, sók kiʼ Esau wahonwaná꞉tonhkwe.

²⁶ Eʼthó꞉ne iatateʼkén꞉ʼa nón꞉wa sahrennákerate, tsi wahrennákerate kwáh iohní꞉ron tsi roienawá꞉kon ne raʼkotarà꞉ke ne Esau; sók kiʼ Jacob wahonwaná꞉tonhkwe. Né Rebekah shaʼakonákeratste ne Esau tánon ne Jacob, NʼIsaac iá꞉iaʼk niwáhsen shaʼtehaohseriiá꞉kon.

²⁷ Ne tehniksá꞉ʼa shahiatehiá꞉ron, ne Esau kwáh í꞉ken tsi rorenʼnhá꞉ʼon naható꞉rate, ne ne rón꞉kwe raonʼweskwaníhahkwe atsté꞉shon tió꞉konte ahré꞉sheke, ók ne Jacob kwáh ne í꞉ken tsi sahkthí꞉ken tió꞉konte nenʼ neʼeh atoserá꞉kon rèn꞉teron.

²⁸ NʼIsaac ronorónhkhwah ne Esau, tiorí꞉wa tsi ne nenʼneʼeh tharákwas naható꞉rate; nok ne Rebekah Jacob ne ronorónhkhwa.

²⁹ Énska kí nenʼneʼeh ne Jacob rotkátstonhkwe ne tekakhwaiehstánion, Esau sá꞉rawe rotorathón꞉ne. Kwáh í꞉ken tsi iáh ohthé꞉nen teháhsta tánon ratonhkáriaʼkskwe.

³⁰ Ne Esau wahawènhahse ne Jacob, “Toʼ ostón꞉ha tákenonht thí꞉ken onekwènhtara nikanontaró꞉ten, aseʼkénh kwáh í꞉ken tsi katonhkáriaʼks.” (Katí ne aorí꞉wa ne ronwahsenná꞉wi ne Edom: ne ne kén꞉tons “Onekwènhtara.”)

³¹ Ne Jacob wahén꞉ron, “Tasatié꞉renht takahtsakwaríhshiaʼs tsi nitisanakerá꞉ton naesaianerenhseraièn꞉take.”

³² Ne Esau wahén꞉ron, “Ó꞉nen thó꞉ha akíheie: nahó꞉ten neʼ káhsta tsi nitewakenakerá꞉ton naontianerenhseraièn꞉take?”

³³ Jacob wahén꞉ron, “Tasatié꞉renk takahrharátsten.” Sók kíʼ wahohrharátsten, tánon wahohtsakwaríhshiaʼse ne Jacob ne tsi nithonakerá꞉ton ne thé꞉nen ahoianerenhseraièn꞉take.

³⁴ Eʼthó꞉ne ó꞉nen ne Jacob wahonaʼtará꞉non꞉te tánon wahonontará꞉nonte nonékwa tekakhwaiehstánion, waʼthatská꞉hon ó꞉ni wahahnekí꞉ra tánon thosahá꞉taʼne sahaiá꞉kenʼne. Tho ní꞉ioht ne Esau tsi iáh ohthé꞉nen tehakweniènhsthahkwe tsi nahoianerenhseraièn꞉take tsi nithawennakerá꞉ton.