Galatians 6 - OhiatonhseratokéntiThesewataʼtiénawas 1 Tewatenrosónhas, tóhkaʼ ónhkak naiakohiathotaréʼon tsík nahiotónhake tsi nahiakotiérenke ne wahétʼken, tsi nítion ne sewanikonróskon tehiotonwentióʼon nahonsatsisewatakwarísi; nók ónenk tsi enthisariwaiérike. Tánon sathatennikonrá꞉ren, nehne tóhsa nón níse aiesanikonrotáko. 2 Tesewatatsʼniénon tsi sewáhaf ne sewahrénias, neh kíʼ enkakwéni naʼihsewatewénnarakwe ne Kerístos raoianerénsera. 3 Tóhkaʼ ísere onkakʼkówa níse nók kwáh iáh thènen satesenatèken, kwáh íken tsi satatenikonrahténni. 4 Kwáh kíʼ teʼiotonwentióʼon neh iaʼtesháti tsi tasathatiatorétase. Tóhka ioiánere, ethòne kíʼ enwáton ne tasathaterénsaron tsi nahoténson saiotén꞉en, nehne kwáh tóhsa tahontasatenákeraste nakóren tsi naiakohiotén꞉en. 5 Asèken ónenk tsi kwáh tsi sewahiatátʼtsion ensewatʼkétate ne sewahriénah. 6 Tóhkaʼ thóh ní꞉ioht tsi iesarihonniénni ne kariwiʼiosthóntsera ahoteriwanothátsera, sateriwaiénniʼki neh taihseniʼiéna tsi nahoténsons ne ioʼiáneres ne iesarihonniénni. 7 Tóhsa sewatatenikonráh꞉ten; iáh ónhka tehonwanonwarorithónnis ne Rawenni꞉io. Kwáh neh ensheʼsientʼtwáko tsi nahoténsons saiéntʼton. 8 Tóhkaʼ thoʼnónwe nen tsiéntho tsi kahétaien ne kariwakʼsénʼke, tsi neh ensanitonniónnen nahsientʼtkwáko ne kenhéiat; tóhkaʼ thoʼnónwe nen tsiéntho tsi kahétaien ne tkariwaiéri, neh tkariwaiéri neh entʼkaháwithe nasientʼtwáko ne ionnheónwe. 9 Thoʼsa káti tethewawísenhe nahionkwaʼióten ne ioiánere; tóhkaʼ iáh tahitewanikonrókten, ienkáhewe tsi entewaientʼtwáko. 10 Ne káti, tsi niʼioriwáke enhionkwatesennaiéntane, kwáh ioianeréhak tsi naietʼthihiatiérase nakorénson, kwáh ó꞉ni sénha tsi niháti neh nón nihatiʼiátare non kwentiókwakon ne tewetákwen. Kwáh Rahónha Ne Kór Wasakoronkáten Nonkwesónhas Tánon Watesakononweráton Ne Thoʼnetákwens 11 Sewatʼkátho nikahiatonkowánens wákasthe tsi nónwa ionsakwahiátonse neh kwáh í꞉i katshanáke wákasthe! 12 Nonkwesónha ne rontheniéntʼtha nahontaietsiʼianónthonse naihsewatewarakwétaron, ronónha neh tehonatonwentió꞉ni tahontaterénsaronte ne rathiʼiéronke akohénton nónkwe. Thóh kíʼ sáne nihathiʼiérha, neh tsi iáh tehónnere nonkwesónha ahonwathiʼronhiákente nók kíʼ sénhak enhonwathironiákente tóhkaʼ enhonteriwanóten neh Kerístos tsi kaiasáke rawenhéion. 13 Tsi niʼiákon ne iontatewarakwétaron iáh tehontewennarákwa ne kaianerénsera; neh tehonatonwentióni níse aihsewatewarakwétaron nehne tahontaterénsaron tsi wesewathóntate ne aietʼtsiwarakwétaron. 14 Káti ní꞉i, tsi naiotónhake, nek khók tenkerénsaron ne Sonkwaiáner Ié꞉sos Kerístos raohiása; tsi nikéntons ne raohiása ne tsi ionwentsiáte iawenhéion nakeriwáke, tánon ní꞉i kwáh thóh ní꞉ioht tsi ní꞉ioht nahonkihéion ne tsi ionwentsiáte. 15 Kwáh nèn꞉ne iáh thènen thatekatíhas aiontatewarakwétaronke tóhkaʼ ó꞉ni iáh; nók nahóten ne iorihowánen tsi áse tiakotónʼon. 16 Nók tsi niháti ne neh rathíʼsere kí꞉ken nakaianerenseróten ne tsi ronónnhe, aiáwens ne skénnen ó꞉ni nataniténron ahathikwekónhake—skátʼke rathikwekónhak ne Rawenni꞉io rahonkwetaʼsónha! 17 Tsi iatenkókʼten: tóhsa ónhka ónen thènen tetionkenikonrá꞉ren, tsioríhwa tsi niwakatewirariónnions ne tsierónke wénestha tsi kenáskwa rahonháke ne Ié꞉sos. 18 Aiáwens ne raoténrat ne Sonkwaiare Ié꞉sos Kerístos sewakwékon ahisewakwekónhake, tewatenrosónhas. Éhʼtho naiáwenʼne. |
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
Canadian Bible Society