Galatians 5 - Ohiatonhseratokénti

Sewaienawakónhak Ne Sewataʼtewennihiótsera

¹ Atatewennihiótsera sehʼionkwáien—Kerístos sesonkwanerénshion! Káti, neh ónkwe tsi tiakotatewenniʼióʼon, tóhsa káti sewatʼthóntat ne shékon sewanáskwa ahonsehsewáton.

² Sewatahónsatat! Í꞉i, Kór kwaróris tóhkaʼ ensewathóntate ne aientʼtsiwarakwétaron, neh kéntons nètho Kerístos tsi kwáh iáh thènen tehástha ne sewariwáke.

³ Séhkon énskat iensewáteratsʼte enskwaʼronkáten ónka neh rónkwe nenhathóntate nahonwahwarakwétaron tsi kwáh roteriwaiénni nahatewénnaraʼkwe ne kaianerenserakwékon.

⁴ Tsinítion ne sewateniéntʼtha nahonsehsewateriwakwathákwaʼse tsi natesewátere ne Rawenni꞉io ne tsi sewatewennarákwa ne kaianerénsera kwáh wesewatateniá꞉rhake tsi natesewátere ne Kerístos. Kwáh ástste nòkwati sewahiatontiéton tsi nòkwa ne Rawenni꞉io raoténrat.

⁵ Nonkwatiá꞉kes, nonkwaskanéktsera ne Rawenni꞉io kwáh enseshonkwariwakwatákwaʼse tsi natethewátere ne rahónha; ó꞉ni thóh ní꞉ioht tsi ionkwaráreh neh tsi nikasátste ne Rawenni꞉io rahonikónra iohiotátie tsi nitionkwetákwen.

⁶ Asèken ne nónen Kerístos Ié꞉sos tehionkwateriwasóntere, kwáh nèn꞉ne iáh thènen thatekatíhas aiontatewarakwétaronke tóhkaʼ ó꞉ni iáh, kwáh iáh thènen tewatsterístha; tsi nahóten iorihowánen nehne tewetákwen tsi iohiótens ne kanoronkwaʼtserákon.

⁷ Tsi niʼioiánereʼkwe tsi ní꞉ioht tsi ehtsisewaniahésenʼne ne Kerístos! Ónhka wahetsihiónnen tsi wesewátʼkawe tsi nisewatewennarákwaʼkwe ne tkariwaiéri? Onnaháiere tsi tatsisewanónthonse?

⁸ Oriwihioʼónwe tsi iáh Rawenni꞉io thóh tehoiéren, Asèken rahónha ne iahonkaráwis ne rahonkwéta asáton.

⁹ “Kénk níkon tehiotonhontióʼon náionsthe ne iontʼthenkwátha nahontʼthènko ne iosherhátken,” tsi nihónton.

¹⁰ Thiʼietákwen ne Roiá꞉ner tsi tenthetsisewaiaténhawe nahontesewetakwénhake tsi ní꞉i ní꞉ioht kíʼ naorihoténsons. Rawenni꞉io nen꞉ne enhoréwate nètho rónkwe, ónhka akénhake, tsi nikáien tetsisewanikónrare ó꞉ni tetsisewanonwarawenréhton.

¹¹ Nók kíʼ ní꞉i, tewatenrosónhas, tóhkaʼ sékon ne ahonkateriwaʼnotatiéseke tsi kwa tehiotonwentióʼon naʼiesawarakwétaron—tsi nihónton nákorensons tsi sekon ne niwakateriwanote—káti nontiéren ne Sitaeró꞉nons ahiontʼkaréwate? Tsi kwáh oriwí꞉io tsi séhkon nihiontʼkarewátha ne kariwanírats tsi séhkon ne kateriwanótʼtha ne kaiatakenhátsera thóh kaiasáke ne Kerístos iatehahiáti.

¹² Aiáwens néhtho ronónkwes ne ietʼtsinikonrakarewátha kwáh iatahonnótʼthen; iahetsihiátʼkaf tánon tehontateneniatháko!

¹³ Nók níse, tewatenrosónhas, ieietʼtsiʼnónkon nahonsehsewatatewenní꞉ioʼke. Nók tóhsa sewaríʼon kí꞉ken ahtatewenniʼiótsera nahontesewaniarótaroke ó꞉ni tsi nahontonskanékseke ne sewaiéronke. Kék, sewaríhon ne kanoronkwátsera nahonteriwathentsate tsi natesewátere.

¹⁴ Asèken akwékon ne kaianerénseras énskak khók tsi ní꞉ioht tsi tkawenónni: “Senorónkwak ne tesewanonsanéken tsi níse nisatatenorónkwa.”

¹⁵ Nók tóhka thóh nensheweiennoténhake tsi ní꞉ioht ne kárhio, tesewatatkarewátha ó꞉ni tesewatatkenrenserónnis tsi natesewátere, káti sewatatenikonrárak, nontiérek kwáh sewakwékon ensewawéntho.

Nonikónra Tánon Tsi Nihiakonʼnótens Nónkwe

¹⁶ Tsi nahóten kíʼ káton: tsi sewaríhon ne Ronikonriʼióston nahontahaniarótaroke ne tsi tiónnhe, khanènne iáh tahiotesennaiéntaʼne nahiawerientí꞉io tsi niwaskáneks ne tsi nihiakonnó꞉tens nonkwesónhas.

¹⁷ Asèken kíʼ tiónkwe tsi nahóten tehionkwatonwentió꞉ni tsi naitewátiere iotʼkónte ne Rahonikónra ne Rawenni꞉io tsi neh natehotonwentiónni tsi naitewátiere, tánon tsi nahóten ne Rahonikónra ne Rawenni꞉io tehotonwentió꞉ni tsi naitewátiere iotʼkónte nehne tiónkwe tsi nahóten tehionkwatonwentió꞉ni tsi naitewátiere. Tetsáron kí꞉ken tehiatátʼtions, tánon neh kí꞉ken kéntons tsi iáh tahónton thóh náshiere tsi naʼtesatonwentió꞉ni.

¹⁸ Nók kíʼ nónen ne Ronikonriʼióston iahenténse, iáh ónen tatetiotonwentióʼon nahonsahsatewénnarakwe ne kaianerénsera.

¹⁹ Kwáh íken tsi wéhne tsi nihiakonʼnóten nónkwe. Iontathénestha tsi nihiakotehénsera, tehiakoiatátion, iáh tehiakotʼkwéniens tsi niʼieweiennótens;

²⁰ konwatisénnaiens kaiatonnisónhas ó꞉ni iontenénnaras. Nonkwesónhas tenhotiriwaráseron ó꞉ni enhonterihioháton; tánon enhatinosháseke, enhotinakwenhénhake, ó꞉ni enhonatetʼtséntake. Enhonnitiokonniánion;

²¹ ronatekéfʼfen, rotinonwarátons, tehontatenakwakwénnis, ó꞉ni séhkon óia nihiorihótens tsi nihatiʼieránions. Ónen kíʼ wakwaronkáten tsi niwatiéren ne tiotserénton: ónhka kí꞉ken ne thóh niʼieweiennóten kwáh iáh taiehientéraʼne ne Rawenni꞉io Rahonakerásera.

²² Nók neh Ronikonriʼióston tatʼkáwas ne kanonronkwátsera, atʼtsennónniat, skénnen, kanikonkasthéntsera, ahtaniténron, tkariwaiéri, ahiakoriwatokénhake,

²³ tiakoriwaiéri, akahóna tiakoniarótaron. Iáh tahóten tekaianerenseráien nahiotʼkónten kí꞉ken nahorihóten.

²⁴ Tánon tsi niʼiákon ne Kerístos Ié꞉sos rahonkwéta íken konwárhio akwékon nakoronhiakénseras ó꞉ni nakoskanéktseras.

²⁵ Ne Ronikonriʼióston tesonkwáwi natónnhets; kwáh káti tehiotonwentióʼon nahontahaniarótaroke ne tsi tiónnhe.

²⁶ Kwáh iáh tehionkwaríwaien naʼitewathatonníheke tóhkaʼ ó꞉ni ne taitewathateriwaientáten tsi naʼtethewátere tóhkaʼ ó꞉ni ne taitewathatenósha.