Galatians 4 - Ohiatonhseratokénti

¹ Kén ní꞉ioht tsi sewanonthónnionf. Tóhkaʼ ne kaníhsera enrénheie tánon watsiokowatserowánen iateniotátere ne sakoiohokónhas rahothiriwáke, thiʼ ratiksaokónhas iáh sénha tahothihianerásten tsi ní꞉ioht ne ranáskwa tsi nióre ienhontehiáron, iawerohátien tsi kwáh ronónha rahonákwen íken tsi nihoiéntakwe ne ronwaníha.

² Ónenk tsi ensakotiwénnarakwe ne ronwathinikónrare tsi nióre thóh nenthonthíhionke tsi niehonáton ne ronwaníha.

³ Tánon thóh nihionkwanakʼthótenne nohénton sáhrawe ne Kerístos. Tewanáskwaʼkwe tsi nòkwa nahotokʼkhátseras ne tsi ionwentsiáte ó꞉ni naosatsʼténseras neh nohénton sahonkwanikonraiéntane náhoten nènne ne kariwakwarishióntsera.

⁴ Nók nónen shiaʼhontenniseríhewe ne Rawenni꞉io shiatoriwaiéntase, tahothéniethe ne Roiénha. Tsi wáraʼwe iakónkwe kanisténsera wahónton neh ronwaiénha waháton tsi warennákerathe, tánon neh skátʼke rathiteróntakwe nehne thoʼnethákwen ne Sitaerononké꞉ha kaianerénsera.

⁵ Kwáh tewakwékon ahonsashionkwaniákenthe ó꞉ni tsi niháti ne neh rohnatienawáston ne kaianerénsera, thóh nahontáwe nahónton Rawenni꞉io shonkwaienokónhas aitewáton.

⁶ Nawenéston tsi rahónha sonkwaienokónhas, Rawenni꞉io tahathéniethe ne Rahonikonratokénti ne Roiénha nahionkwatsiénhase nonkwerianésons, Nonikonratokénti rahónha ratátis, “Rákeni, Tatsiénha.”

⁷ Ónen káti iáh teseshenáskwa nók iesaiénha. Tánon tsi ónen rahónha iaiénha, Ní꞉io kwáh entesakáwen ne sakoienokónhas tsi nihóien.

Kór Tesakoteriénthare Ne Galatians

⁸ Tsi nitsawénon iáh thetsisewaientérine ne Ní꞉io, tánon káti neh ietʼtsi naskónniskwe ne kwáh iáh thènen tehotisastenseráien iáh ronónha tèken ne niʼioʼokónhas.

⁹ Nók kíʼ tsi ónen tsi sewaientéri ne Ní꞉io—tóhkaʼ ó꞉ni tehiotonwentióʼon nakíron, ónen ne Rawenni꞉io tsi sewaientéri—onhnihiotiéren tsi ísewerhe thóh niahonséhsewe néhtho iáh thènen tehotisatsʼtenseráien tánon iotathiténrat tsi kwáh iáh thènen sathekéna tsi nihatihiathótens.

¹⁰ Kwáh nenʼné꞉e áktha tsi sewanikónrare ne wenniserathokenhátons, nennítas, tsi niwakʼkwenrárons tsi niʼiósheres.

¹¹ Tewakathatenikónrare ne sewariwáke! Káton onhtèken neh tsi níkon kwahiótense kwáh iáh thènen tsatehionénon?

¹² Tekanórons tewatathékens ó꞉ni tewatenósens, kwaniténtase thóh ní꞉ioht tsi tiónnhek tsi níʼ ní꞉ioht katatewenní꞉io tsi nòkwa kíʼ naorihoténsons, Asèken thóh nitiatótenne tsi níse nihioʼtónne ne iáh tesewasitaerónons—sewatatewenní꞉iokwe tsi nòkwa ne kaianerénsera.

¹³ Sewehiáre tsi nontiéren kwateriwanótani ne kariwí꞉ios sontontiérente; ne aoríwa neh tsi wakenonwatʼtaníhakwe.

¹⁴ Nók ki tsi ní꞉ioht tsi konnhekwe iawetowanen wesehwentorakwen, iáh teskwakenronníʼon iáh ó꞉ni teseskwatekwáton. Kék, tsi nióre tsi wateskwarhóton kwáh ne sáka tsi síken ní꞉ioht ne kwáh rahónha ne Kerístos Ié꞉sos wahtsisewatawehiáten.

¹⁵ Tsi nióre tsi sewatʼtsenonníhakwe! Kanieiawénon ne sewatonnharákʼtsera? Kwáh orihwí꞉io wakónni tsi kwáh tsík knahoténsonk ahontesewatatokʼtakwénni ní꞉i akeriwáke iekaníhare ó꞉ni ahisewatákwen ne sewakarasónhas tánon Í꞉i ahontaskwáwi.

¹⁶ Ónen káti ken tentewatátʼtion tsi kwaróris noriwí꞉io?

¹⁷ Thíʼ ronatiakhésons ronnenésta tsi kwáh íken tsi thoʼtinikonrathihéntos ne tionháke, nók tsi nahóten rónnere iáh teioiánere. Kwáh nek khók tehonathonwentió꞉ni ne tahionkhikháshion, thóh nahontáwe nonníse nahontesewanikonrathihéntʼto ne ronónhake tsi kíʼ ní꞉ioht ne ronónha.

¹⁸ Kíʼ, ioiánere nahontaiakonikonrathihéntʼto neh knahótenk tsi nióre ne ioiánere akarihontáko—kwáh kíʼ tiókonte thóh ní꞉ioht, tánon iáh kíʼ thóh kàken tsík nónen skátʼke ítewes.

¹⁹ Nók oh tekanóron kwaienokónha! Kwáh káti shékon ne teskaieróntare tsi ní꞉ioht ne kanisténsera iakowiraientásere, kwáh thóh ní꞉ioht tsi tewakawehéstha ne sewariwáke tsi nióre ienkáhewe níse naʼtsisewanonteratiéseke ne Kerístos.

²⁰ Tsi nióre tsi kaskáneks ne skátʼke ahitewakwekónhake nónwa, neh nahónton neh kwáh óia nakonnoténhake ne tionháke. Tsi nióre tsi tewakatatenikónrare ne sewariwáke!

Ne Tethonwanatenienténston Ne Hagar Tánon Sarah

²¹ Thóh kwariwanóntons tsi nítion nehne ísewere ne kaianerénsera ahontesewaniarótaronke: iáh ken tesewatʼthónte tsi niwáton ne kaianerénsera.

²² Wáton ne Abraham tékeni tehonekenterontseraiéntakwe, saiátat ne ronisténha nehne kanaskwakén꞉en, nóia ronisténha iáh nenné꞉e teienáskwa tekènne.

²³ Ne Abraham tánon ne kanaskwaken꞉en tsiotʼtonwisen ne rothiwiraientáʼon thóh ní꞉ioht tsi rawennakeráton tsi kiʼní꞉ioht tsi ionnákerats nowirá꞉a, tsi niʼiawén꞉en ne Abraham tsi rothiwiraientáʼon ne róne, neh iáh nen꞉nehe teienaskwakén꞉en, neh aoríwa waʼhothiwiraiéntane neh tsi Rawenni꞉io rorahratsténni ne Abraham iatatróna.

²⁴ Kíʼ oriwasónhas naʼiakonikonraiéntaʼne tsi kwáh neh saoríwa: nók tethewatenienténston teioriwákes ne Rawenni꞉io rahoteriwaseronniátseras. Hagar, neh iakotátiase ne tionontáhere Sinai thoʼnónwe tiotásawe nónkwe ienáskwa wahónton tsi nòkwa ne kaianerénsera.

²⁵ Tánon nónwa ne Jerusalem kwáh nehne aionontaráke ne Sinai thóh nón ne Arabia, iakonaskónni nahonkwetaʼsónhas.

²⁶ Nók ne Sarah, ne iáh teienáskwa, neh iakotátiase ne karonhiakékha Jerusalem. Neh ionkhinisténha.

²⁷ Tsi niwáton noriwatokénti, “Sewatʼtsennonníhak ne iáh tesewawiraiénton tsi sewatʼthonwísen! Tesewahénret ó꞉ni tesewahséntʼto atʼtsennonniatserákon, í꞉se ne iáh nonwénton tesewaienteráʼon naisewaronhiáken naisewawiraiéntane! Asèken ne iónkwe ne tehiotetʼkháshion shékon wéso entsiowiraiéntane tsi ní꞉ioht ne iónkwe ne iáh nonwénton tatehiotetʼkháshion.”

²⁸ Nónwa, í꞉se, nonkwatenrosónhas, Ní꞉io rahoksáta íken neh iorihónni tsi nihorahrátston, kwáh tsi niʼiawén꞉en ne Isaac.

²⁹ Tánon tsi nítion nehne ionkwanakerátston ne onikonratokénti neh ionkwaronhiakéntha tsi niháti neh ionkhíre naitewatiénawaste ne kaianerénsera, kwáh tsi ní꞉ioht ne Isaac, rahónha ne raksá꞉a ne warahrátston, nehne Ishmael rokenrenserónniskwe, neh ronísten nehne kanáskwakwe.

³⁰ Nók nahóten káti neh wáton noriwatokénti nètho aoriwáke? “Seiarékwat ne kanáskwa ó꞉ni ne roiénha, asèken ne kanáskwa roiénha iáh nènne satahonawénkonwe ne kaientátseras tsi ní꞉ioht ne iáh tekanáskwa roiénha.”

³¹ Káti, tekanóron tewatatèkens ó꞉ni tewatenósens, iáh neh tèhionk khiʼiénha ne kanáskwa tsiotʼtonwísen, kaiatotáron ne kaianerénsera. Nók neh ionkʼkhiʼiénha ne iáh tekanáskwa tsiotʼtonwísen, sonkwaʼiénen ne Rawenni꞉io neh tsi nitionkwetákwen.