Galatians 3 - Ohiatonhseratokénti

Ne Ronikonratokénti Ne Tewatʼkawáton Tsi Tewetákwen Iáh Neh Kahioténseras

¹ Oh, tisewatónʼnokthe Galatians, onʼniwatenhareʼnhatseróten tsi sewatenhennháron? Asèken sewatʼkáthoskwe tsi nikéntons tsi rawenhéion ne Ié꞉sos Kerístos kwáh thóh nihió꞉ken tsi ní꞉ioht nahonkerás꞉ton ne tsi kaswenkaróhare rahiátare ne Kerístos rawenhéion ne kaiasáke.

² Thóh takeríhon tioríwa konriwanóntons: tsi saienáʼon nónikonratokénti neh ken tsi satienawáston ne kaianerénsera? Kwáh iáh, Asèken ne Ronikonratokénti tsi wahiatsiénhase thóhʼne khók shiontasétakwe nateriwanothátsera shasáronke tsi nókwa ne Kerístos tánon tatsisewétakwe naʼtsisewaniákenthe.

³ Sewahthónni kén ne tsi sewanonthonniónkwa? Tsi thisewatásawen tesewatheriwasónterakwe ne Rawenni꞉io; ónen káti kén neh ísewere iaisewása ne tionhatsíwak sewasasténsera akénhake.

⁴ Nakwékon tsi nisaiatawén꞉en iáh kén thènen tekéntons? Oriwiʼiohʼónwe tsi nisaiatawén꞉en kwáh ontheʼtokáha weshiónnen nasanonthonniónko tsi nihiorihowánen tsi thóh nahawénseron.

⁵ Thiáwis kén ne Rawenni꞉io ne rahosatsténsera ne Ronikonratokénti tánon neh ahisahióten ne ioriwanerakwaténions tsi natesewátere tsioríhwa tsi thóh nisewaiéra tsi nikariwanóntons ne kaianerénsera kátonken neh tsi sewát꞉konte ne kariwí꞉ios tánon tesewétakwe

⁶ Tesewahiatóret tsi nihariwaientériskwe ne Abraham; tsi niwáton noriwatokénti, “Ne Abraham tawethákwen꞉ne ne Rawenni꞉io, ne káti ne Rawenni꞉io wahokwénienste nahothonkwetakwarísion.”

⁷ Kwa tehiothonwentióʼon naisewanikonraiéntane, káti neh꞉ne kwáh Abraham sakoienokónhas neh tsi niháti thonwetákwen ne Ní꞉io.

⁸ Noriwatokénti iekariwákens nètho Rawenni꞉io tsi ensesakoriwaserónnien ne iáh tehathisitaerónons tsi natehóntere ne rahónha, tewetákwen nón néntewe. Tánon rahonháke ne Abraham nón kí꞉ken ne kariwí꞉ios nikarihowanáton noriwatokéntis: “Iséke ne Rawenni꞉io ensakohiatatériste nonkwetakwékon.”

⁹ Abraham tawetákwenne ó꞉ni ronwahiatateríston; neh káti tsi nihiákon tsakawetákwen tsi iontatsathateríston kwáh tsi ní꞉ioht ne rahónha.

¹⁰ Nók tsi niʼiákon neh ieniahésen ne kaianerénsera ahonsahiakokwatákwaʼse tsi natehóntere ne Rawenni꞉io neh sakorewatákwa, asèken tsi niwáton noriwatokénti, “Rawenni꞉io shakorewátha nónhka ne iáh orihwakwé꞉kon tehiontewenhnaráhkwa ne Rawenni꞉io raoianerénhseras ó꞉ni ne rahorihonhnienʼní꞉tsheras.”

¹¹ Nónwa, kwáh teioswát꞉the tsi iáh ónhka tetiakoteriwaseronniénni tsi niwaton ne kaianerénsera, asèken noriwatokénti wáton, “ne tionkweʼtaié꞉ri thóh ne nón꞉we nironhnonhnhétse tsi nithanetákwen.”

¹² Nók ne kaianerénsera iáh thènen tatekeníneren ne tewetákwen. Kék, tsi niwáton noriwatokénti, “Ónhkaʼkiʼ akénhake oriwakwékon thóh niʼiehiéra tsi nikariwanóntons ne kaianerénsera tsi enhiakónnheke.”

¹³ Nók tsi wetewatʼrewáthakwe Kerístos sahshonkwahiatáko tsi niʼiakorewátha tsi nitkáhas ne kaianerénsera. Nónen ne kaiasáke sahonwahiatiháren, rahónha wahtathatékwase ne karewathátsera tsi naʼtehionkwaterientawénrie. Asèken noriwatokénti wáton, “Nónka neh iakohiaténton ne karontáke neh tsi Rawenni꞉io sakorewáthon.”

¹⁴ Kerístos neh aoríwa kíʼ thóh naháiere neh nahónton ne kahiataterítsera tsi nihorahrástenni ne Rawenni꞉io neh Abraham nontiérenk ahontahonwénnon ne iáh tehathisitaeronons tsi néntewe rahonháke ne Kerístos Ié꞉sos, neh káti thóh ne tewetákwen nontiérenk entewaiéna ne Onikonratokénti tsi nihoraráston ne Rawenni꞉io.

Ne Kaianerénsera Iáh Tkakakwéni Ne Tahonsakaténi Nahóten Ne Rawenni꞉io Rohrahrásthon

¹⁵ Tekanórons tewathatékens ó꞉ni tewatenósens, neh énkasthe tsi tenkeriwárasthe tsi niʼiáwens niaʼtewenniseráke tánon tsi nahóten ne Rawenni꞉io rohrahrátston: nónen ne tehionkwétake iathotiriwaiéntase noríhwa tánon wahiatatʼtsénnaren tsi wahiateriwaserónni, iáh ónhka taiekwéni ne tahonsahiéʼiake tóhkaʼ ó꞉ni knahótenk iahiéieste.

¹⁶ Neh, Rawenni꞉io tsi niʼohrahratsʼténni ne Abraham tánon saiáta ne rahowátsire. Noriwatokénti iáh tewástha ne “iakotiokowánen,” Kíʼ owénna “tionkwétak khók” rótons, tánon nètho rónkwe nehne Kerístos.

¹⁷ Tsi nahóten kíton nètho Rawenni꞉io wahahianerenserónni tsi nathehiátere ne Abraham tánon waharáhratste tsi enkátake. Ne Kaianerénsera neh tewatʼkáwen kaiéri tewenniáwe tánon ásen niwásen niʼioseráke onakènke, iáh takakwéni takaiá꞉ke nètho ateriwaseronniátsera tánon ne ahonsakarákewe ne Rawenni꞉io rohrahrátston.

¹⁸ Tóhkaʼ tsi nahóten ne Rawenni꞉io sakówis neh akaniahesénhake ne Kaianerénsera, iáh káti ónen neh teskaniahésen tsi nihorahrátston. Nók neh aoríhwa ne Rawenni꞉io rohrahratsténni ne kaiataterítsera ne Abraham, neh iorihonníʼon tsi thóʼwi ne Abraham.

¹⁹ Nahóten káti, iorihontákwen ne Kaianerénsera? Iekaiéston neh nakakwatáko tsi awénesthe nahóten nenne naʼterientawenrhétsera, tánon neh iekentónʼon tsi enkátake tsi níóre nètho Kerístos, ne tsi nithotʼwatsirínon ne Abraham énrawe, tsi nikáien ne rahonháke nón nihiónni tsi niwarahrátston. Rawenni꞉io rathironhiakerónons tasakáwen ne rahohianerénseras nahontahónhion ne Mahís, neh tsi rahónha tehariwákʼkhaskwe tsi natehónteron ne Rawenni꞉io tánon ne onkwesónhas.

²⁰ Neh tehariwákʼkas thóh nek khók tenhonwathonhóntiose tóhkaʼ tenihiáse knahótenk wahiateriwaserónni, nók ne Rawenni꞉io iathʼhohiátiste neh sahorahrátsten ne Abraham.

Nahóten Káti Ne Kaianerénsera Akarihontáko

²¹ Neh kén kiʼkéntons nètho kaianerénsera iótkonte tsi nahoténsons ne Rawenni꞉io rohrarátstons? Iáhten, kwáh iáh thènen! Asèken tóhkaʼ nonkwesónhas ahothiʼienáʼon ne kaianerénsera nahónton nahontakáhawe atónnhets, kwáh káti onhkwetaʼkwékon ahónton ahonsaiakoteriwaserónnien tsi natehóntere ne Rawenni꞉io neh tsi rontewennarákwa.

²² Nók nʼoriwatokénti wáton kwáh ohontsiakwékon thóh iakohiathotaréʼon ahosatsʼtenserákon ne kariwáneren; káti tsi nahóten ne Rawenni꞉io sakorahratsʼténni entesakáwen tóhkaʼ enthonwétakwe ne Ié꞉sos Kerístos.

²³ Nohénton sahonkiʼrihotáshien ne tewetákwen thóh rahonháke ne Kerístos tsi naiotónhake tsi ahonsahionkwateriwaʼkwatákwaʼse tsi nathetewátere ne Rawenni꞉io, nehne kaianerénsera hionkwanikonráhraʼkwe. Iáh thetewatatewenníʼiokwe ionkwanóthonskwe, tsi niʼiohʼtónne, tsi nióre wetewakwéni thetewétakwe tsi táre ne Sakohiatákwas.

²⁴ Tánon káti ne Kaianerénsera neh tionkwaniarótaronne tsi nióre ne Kerístos wáraʼwe, ehnahontáwe nontiérenk káti entionkwateriwaʼkwatákwaʼse tsi nathetewátere ne Rawenni꞉io teiahonkóton tewetákwen.

²⁵ Ónen iakáhewe ne tewetákwen ónhwe, ne kaʼianerénsera iáh ónen tatetionkwaniarótaron.

²⁶ Tewetákwen nón nitsawénon tsi kwáh sewakwékon Rawenni꞉io tsiʼsewaʼioʼokónha sewatónʼon ne tsi tesewateriwasóntere ne Kerístos Ié꞉sos.

²⁷ Tsi sewatenekwahéston wathisewateriwasónteren ne Kerístos, ónen káti watisewatewehiáren, nahiaiéron, neh tsi rónnhe ne Kerístos rahonhatsíwa.

²⁸ Kwáh káti iáh thénen tathetiatʼthíhen ne Sitaeró꞉nons tánon ne Iatehatisitaerónons, tsi natehónteron ne rathináskwas ó꞉ni ne rontatewenní꞉io onkwesónha, tsi natehóntere ne ronnónkwe tánon ne konnónkwe; kwáh sewakwékon tsi énskat iéken tsi tesewateriwasóntere ne Kerístos Ié꞉sos.

²⁹ Tóhkaʼ níse Kerístos rahonkwéta íken, Abraham káti nónwe tioientákwen tsi nithisatʼtwatsirínon ó꞉ni enshèna tsi nahóten rorahrátston ne Rawenni꞉io.