Galatians 2 - Ohiatonhseratokénti

Kór Tánon Ne Ronátiakes Ne Ronteriwanót꞉thas

¹ Kaiéri nihioseráke onakènke Jerusalem nionʼsáke Barnabas wahákeʼne, Titus iahihiaténhawe.

² Tsioríhwa tsi thóh wakéthe neh tsi Rawenni꞉io wahatróri ne ónenk tsi thóh iénke. Nék khók wahakwatʼkennísa ne ronaterihóntons wakenikonraiéntaʼte ne kariwí꞉io ateriwanotátsera tsi nikehiateriwanótani ne iáh tehatisitaerónons. Iáh tatewakathonwentió꞉ni natioténsera ne iothoʼhétston tóhkaʼ ó꞉ni nónwa wenniseráte nakénheie.

³ Ne tiontiatenróʼon Titus, iawerohátsien tsi Greek nahanekwensóhten, iáh tethonwanontónni nahotewarakwétaron,

⁴ iawerohátsien tsi ótsiake éhtho ní꞉ioht tsi tehonathonwentió꞉nine. Akénhake thoʼnetákwen, kí꞉ken ronnónkwe wahonkhihiatsiathóʼroksʼse tsi kwáh nek khók nahonteriwathóʼrathe, nehne ahathiriwatʼtsénri tsi nòkwa naʼtatewennihiótsera tsi natehionkwateriwashóntere rahonháke ne Kerístos Ié꞉sos. Neh tehonathonwentió꞉nine nahionkhinaskónnike,

⁵ iáh kíʼ tatehionkhinikonrakénnion, Asèken neh tehionkwathonwentiónnine nahiakwanónstathe ne oriwiʼiohónwe ne kariwí꞉io níse sewariwáke.

⁶ Nók tsi niháti nakénhake sakotihéntense ne tiakawetákwen neh thóh rónneskwe iáh thènen tsiehothiʼiéston tsi nahóten wakateriwanóthe. (Tánon ó꞉ni tsi nahathisenʼnowanénhake tsi sakotihéntense iáh thènen tekéntons nakeriwáke, asèken ne Rawenni꞉io iáh neh kanèka tethariwarákwa.)

⁷ Kék, wahontʼkátho ne Rawenni꞉io tsi í꞉i thakáwi nakateriwathéntiaʼte nakhehiateriwanót꞉thaʼse ne iáh tehatisitaerónons, kwáh tsi ní꞉ioht tsi thóʼwi ne Tiér nahatheriwaténtiathe nasakoteriwanót꞉thaʼse ne Sitaeró꞉nons.

⁸ Asèken neh sahahiáta ne Rawenni꞉io tsi níhohiotén꞉en rahonháke ne Tiér nehne ahothiʼiénawaʼse ne Sitaeró꞉nons kwáh neh sáka tsi thóh nihoiéren ní꞉i natiotenserákon ne nahothiʼiénawaʼse ne iáh tehatisitaeronons.

⁹ Sák, Tiér, tánon ne Sán, akénhake sakothihénthense, wahathiʼiéntherene ne Rawenni꞉io rakáwi kí꞉ken kahiotenseratóken; sók kíʼ wahonkhinéntʼtsa ní꞉i tánon ne Barnabas, neh nawenéhake tsi tionkwatenróʼon. Wahakwateriwaʼserónni Barnabas tánon ní꞉i nehne iáh tehathisitaeronons nón rahothitiókwakon non nenʼhionkenihióten nók neh ronnónha Sitaeró꞉non neh rahothitiókwakon non nenhothihióten.

¹⁰ Thóh khók níkon rathiriwanóntatkwe naietʼthiʼieiéraʼne ne rotíten ne rathiʼiátare ne rahotitiókwakon, nehne kwáh thóh ní꞉ioht tsi tewasteríhenskwe neh nátiere.

Kór Wahóriste Ne Tiér Neh Antioch Nónwe

¹¹ Nók nónen ne Tiér siahanatarénen ne Antioch, tahiwennóko akohénton ne tiakawetákwen, “Tsioríhwa wataterientawénrie tsi naháiere.”

¹² Sák tóhkaʼ niháti ronnónkwe iesakotheniéton ne Antioch, nók nohentonsiahónnewe ne Tiér sók náha roʼtaterennathénni tahóntonte ne thoʼnetákwens ne iáh tehatisitaeronnons. Nók siahónnewe kí꞉ken ronnónkwes, iáh theshothontáton ne shékon skátʼke tahonsahonaskáhonke. Neh tioríwa thóh naháiere sakokʼshá꞉niswe tsi niháti ne rónton ne thonetákwens ne iáh tehatisitaerónons ónenk tsi enhonwathiwarakwétaron.

¹³ Ne ronatiakhésons ne Sitaeró꞉nons ne thoʼnetákwens ronónha ó꞉ni tahontásawen akónwara wahontatónni skátne ne Tiér; Barnabas ó꞉ni iahonwanikonrénhawe tsi nióre tsi akónwara ronatatónni.

¹⁴ Sakatʼkátho tsi iáh tehathísereʼne ne iotʼthahakwarísion ne oriwiʼiohhónwe ne kariwí꞉ios, waiʼhiénhase ne Tiér rahothihénton ne thonʼnethákwens, “Sasitaerónon tsi sanakeráton, shatiakwarísion ne Sitaeró꞉non rahotiʼianerénseras nók kíʼ thóh ní꞉ioht tsi sónnhe tsi ní꞉ioht ne iáh tehatisitaerónnon, onhkáti niʼiohtséren tsi satheniéntʼtha nasehiónʼnien kí꞉ken iáh tehatisitaerónons nahontewénnaraʼkwe ne Sitaeró꞉nons rahotiʼianerénsera neh níse satewentéton?”

Sitaeró꞉nons Tánon Ne Iáh Tehathisitaeronons Ne Shothiniakéntha Ne Tewetákwen

¹⁵ Oriwiʼiohónwe, Tewasitaeronons tsi ionkwanakeráton tánon iáh “tehionkwariwánerens tsi ní꞉ioht ne iáh tehatisitaerónons.”

¹⁶ Kati ionkwateriéntare nètho nónkwe kwahse entiakoianeraste tsi nòkwah ne Rawenniioke nek khók enkakwéni niataiotkawe tsi thonwetákwen ne Ié꞉sos Kerístos, iáh nonhwénhton ne tho nakaiehiere naoten ne kaianerenhsera kariwanonhtons. Í꞉i, ó꞉ni, tetsitewetákwen ne Kerístos Ié꞉sos neh nahónton aonsaonkwateriwakwaʼtákwase tsi naʼtethewátere ne Rawenni꞉io iataiotkawe nonkwetakwenhtsera rahonhà꞉ke ne Keristos, tanon tosa tho nakaieren tsi naoten ne kaianerensera kariwanonhtons. Asèken iáh onka tetiakoianerastenhnis tsi nòkwah ne Rawenniio neh thoʼnaiehiere tsi naoten ne kaianerensera kariwanonhtons.

¹⁷ Tóhkaʼ káti, ne nón kwaskanéktsera nahonsahionkwateriwaʼserónnien tsi natethewátere ne Rawenni꞉io neh tsi tehionkwateriwasóntere ne Kerístos, hionkhihiatatʼtsénries nahionkwariwáneren, kwáh tsi nakonhake ne iáh tehatisitaerónons sók are— neh ken kiʼkéntons nètho Kerístos ne rarihonhnis kariwanerahaktsera? Kwáh iáh ne tekentons.

¹⁸ Toka hontakatasawen nahonsatieronhtonhni ne kaianerenhsera nètho wakeriwathonton, etʼthone wakatatiatotashi ne onkak te teháiaks kaianerensera.

¹⁹ Tsi nióre ne kaianerenhsera tsi kanikonraren, akénhake, wakiheion—kaianerenhsera wakenonhwarhiakhon kwáh iatekaiati—neh nahónton nakonhnheke ne Rawenni꞉io rahoriwake. Kwáh iehionkenonhwarhiakhon skatne ne Keristos thóh raoiasake.

²⁰ Nakonhatsíwa iáh ónen teskónnhe, nók Kerístos akonháke non nisrónnhe. Kí꞉ken atónnhets nónwa tsi konnhétie, tsi konnhétie ne tsi thiʼietákwen ne Rawenni꞉io Roiénha, tsi nikáien ne rakenoronkwáʼon tánon rotʼkáwen ne tsi rónnhe nakeriwáke.

²¹ Kwáh iáh tekatʼthóntas nakʼkénron ne Rawenni꞉io rahoténrat. Nók kíʼ tóhkaʼ nónkak tiakoteriwaseronniénni tsi natehóntere ne Rawenni꞉io ne kaianerénsera iorihónni, neh kéntons ne Kerístos iáh thènen tsatehionénon tsi rawenhéion!