Galatians 1 - Ohiatonhseratokénti

¹ Kór kí꞉ken nón nitsawénon, ronwanháhon nahateriwanóten iáh onhkwéne nón tetsawénon iáh ó꞉ni ónhkwe teiakorihónni, nók Ié꞉sos Kerístos nónwe nitsawénon tánon ne Ní꞉io nehne Kaníhsera, tsi rahónha shokétskwen ne Ié꞉sos ne kenheiátʼne.

² Ratikwékon natatekénseras neh kén꞉en sakanikónra wahatiónni tsi iahakhiʼiatheniétase ne kanonweratóntseras thonetákwens ne Galatia nónwe:

³ Aiáwens ne Rawenni꞉io sonkwaníha ó꞉ni ne Roiá꞉ner Ié꞉sos Kerístos ahtsítsion kenténrat ó꞉ni skénnen.

⁴ Neh nahónton kwáh skénnen ahonsashonkwátʼkaʼwe tsi nikariwáneren nónwa nikaháwis, Kerístos iaʼtehahiáti iahatatátʼkaʼwe waharonhiáken nonkwariwanerahákʼtsera, wahatewénnaraʼkwe tsi nithonikonró꞉ten nonkwaNí꞉io ó꞉ni Sonkwaníha.

⁵ Tetsitewanonweráton ne Ní꞉io tsi nienhénwe ó꞉ni tsi nénwe! Ehʼthoʼnaiáwenne.

Énskak Khók Ne Kariwí꞉io

⁶ Wakenerákwas! Tsi niʼiosthóre waʼtsisewatiakwarísi tsi nikáien ne ietsisewanáton rahotenretserákon ne Kerístos, tánon óia nikarihóten ne kariwí꞉io sehsewaiéna.

⁷ Oriwihioʼónwe, kwáh iáh “noiatekáien ne kariwí꞉io,” nók neh kíʼ ní꞉i enkíron nónkak nónkwe ietʼtsinikonrakarewátha tánon ronteniéntʼtha ne tahatiténi ne Kerístos rahoriwatokentísons.

⁸ Nók kisʼnònne tóhkaʼ í꞉i tóhkaʼ ó꞉ni ne raronhiakerónon karonhiáke nahontáre nahtsiʼ sewateriwanótʼtase ne kariwí꞉io neh óia nahiotónhake tsi nikwateriwanótani, ónenk tsi enhatʼréwathe!

⁹ Ónen tiotserénton neh iónkwen, tánon shékon kíʼ neh enskíron: tóhkaʼ ónkak enʼietʼtsihiateriwanótʼtase ne kariwí꞉io nóia nahiotónhake tsi nisewarónken, ónenk tsi enhatʼréwathe.

¹⁰ Éhʼken ní꞉ioht tsi shí꞉ken ní꞉ioht ne kateniéntʼtha nakʼkwéni nónkwe ahionkeriwaníratʼtse? Kwáh iáh! Nahóten tewakathonwentió꞉ni nehne Rawenni꞉io ahakeriwaníratʼtse! Kateniéntʼta kén naksennowanénhake nonkwétake? Tóhkaʼ shékon ne kateniéntʼta neh naiáwenne, Iáh kíʼ tahihiotenséhake ne Kerístos.

Tsi Niʼiáwenhen Ne Kór Tsi Rateriwanótʼtha

¹¹ Takwaríhon nakwaróri, tewatenrosónhas, nètho kariwí꞉ios ne kateriwanótʼtha iáh ónhkwe tehiakoteriwahnothátsera.

¹² Iáh onkwéʼne tetsiawénon tsi nahóten watienáhon, iáh ó꞉ni ónhka tehionkerihonniénni. Kwáh rahonhatsíwa ne Ié꞉sos Kerístos rakerihotashénni.

¹³ Sewariwarónken tsi ní꞉ioht tsi kónnhekwe neh shikeriwanorónkwaʼkwe ne Sitaeró꞉non kariwiʼiostóntsera, tsi nikheronhiakéntaʼkwe ne thonʼwétakwe ne Rawenni꞉io kwáh iáh thènen tekáien ne kenténron tánon kwáh iatkatatʼtiáhate nakatkónten.

¹⁴ Í꞉i sénha wakeriwi ʼióstonne tsi nókwa ne Sitaeró꞉non kariwiʼiosthóntsera tsi ní꞉ioht ne ronátiakes ne Sitaeró꞉non ne saʼtetionkwáhionskwe, tánon kwáh wakakwísron tsi wakatheniénten nákʼsere noriwakaionnéha akeriwiʼiosthóntsera.

¹⁵ Nók ne rahotenretserákon ne Rawenni꞉io ratiatarákwen nohénton sakennákerate tánon wahakénhane nahihiótense. Tánon neh siatoriwaiéntase

¹⁶ nahawéneste ne Roiénha nakonháke, ne káti nahónton nakateriwanóten ne kariwí꞉ios ne rahonháke tsi nókwa ne iáh tehathisitaerónons, iáh ónhka tiekhehiátʼkense nahionkatenikónron,

¹⁷ iáh ó꞉ni Jerusalem tiewakénon nakhehiatʼkénsera neh thoʼnatierénton ne rathikwekónne tsi ní꞉i ní꞉ioht. Khék, kwáh óksak Arabia nón niaháke, ethò꞉ne Damascus nionsá꞉ke.

¹⁸ Áhsen nihioseráke onakènke Jerusalem niaháke Tiér wahihiatʼkénsera nahakróri noriwasónha, tánon teiahiakʼseráke wahatiarískone.

¹⁹ Iáh ónhka nahkóren tetʼkhéken ne rathikwekónne nek khók ne Sák, nehne Roiá꞉ner iatatekénha.

²⁰ Tsi nahóten khiátons kwáh tóhkenske íken. Rawenni꞉io roteriéntare tsi iáh tekanowéntha

²¹ Onakènke Syria tánon ó꞉ni Cilicia niaháke.

²² Neh sikaháwis ne tsi ionterennaientákwas nón nihatihiátare iáh tehiontsentérine.

²³ Nek khók ronateriéntaraʼkwe nakorénson tsi nihónton: “Ne rónkwe neh sonkwaronhiakéntaʼkwe ó꞉nen rateriwanótʼtha ne tewetákwen nénska roteniénten naháthonte!”

²⁴ Tánon káti wahonwasénnaien ne Rawenni꞉io í꞉i wakerihón꞉ni.