Ezra 8 - Ohiatonhseratokénti

Nonkweshón꞉as Ne Tethoné꞉non Ne Ronanahkerá꞉kwenhne

¹ Ne kí꞉ken ne ratisenhnarónhnions nononhtsikowatʼtsons ne rahotitióhkwas ne iehonahnakerá꞉kwenhne ne Babylonia nón꞉we tánon tsi natethoné꞉non ne Ezra ne Jerusalem nó꞉nen ne Artaxerxes shihakoraʼkó꞉wa kénhne:

^2-14 Ne Gershom, ne tsi ratitióhkwaien ne Phinehas Daniel, né꞉ne tsi rathitá꞉raien ne Ithamar nón꞉we nihahiátare ne Hattush ne roʼní꞉ha né꞉ne Shecaniah, né꞉ne tsi ratiʼtá꞉raien ne Táwit nón꞉we nihahiá꞉tare ne Zechariah, né꞉ne tsi rathiʼtá꞉raien ne Parosh nón꞉we nihahiá꞉tare, skát꞉ke ne 150 nihá꞉ti ronónhkwe ne rahotará꞉kon (wateweién꞉ton kahiaʼtónhnion tsi nihatiwatsiró꞉tens) ne Eliehoenai ne roʼní꞉ha né꞉ne Zerahiah, né꞉ne Pahath Moab, nahotaró꞉ten skát꞉ke ne 200 nihá꞉ti ronhnónkwe ne Shecaniah, ne roʼní꞉ha né꞉ne Jahaziel, né꞉ne Zattu nahotaró꞉ten, skát꞉ke ne 300 noihá꞉ti ronhnónhkwe ne Ebed né roʼní꞉ha né꞉ne Jonathan, né꞉ne Adin nahotharó꞉ten, skát꞉ke ne 50 nihá꞉ti ronhnónhkwe ne Jeshaiah ne roʼní꞉ha né꞉ne Athaliah, né꞉ne Elam nahotaró꞉ten, skát꞉ke ne 70 nihá꞉ti ronhnónkwe ne Zebadiah ne roʼní꞉ha né꞉ne Michael, né꞉ne Shephatiah nahotaró꞉ten, skát꞉ke 80 nihá꞉ti ronhnónkwe ne Obadiah ne roʼní꞉ha né꞉ne Jehiel, né꞉ne Joab nahotaró꞉ten, ská꞉ke ne 218 nihá꞉ti ronhnónkwe ne Shelomith, ne roʼní꞉ha né꞉ne Josiphiah, né꞉ne shotitióhkwa ne Bani nahotiʼtaró꞉ten, skát꞉ke ne 160 nihá꞉ti ronhnónkwe ne Zechariah ne roʼní꞉ha né꞉ne Bebai, né꞉ne shothitióhkwa ne Bebai nahotiʼtaró꞉tens skát꞉ke ne 28 nihá꞉ti ronhnónhkwe ne Johanan ne roʼní꞉ha né꞉ne Hakkatan, né꞉ne Azgad nahotaró꞉ten, skát꞉ke ne 110 nihá꞉ti ronhnónhkwe ne Eliphelet, ne roʼní꞉ha né꞉ne Jeuel, tánon ne Shemaiah, né꞉ne Adonikam nahotaró꞉ten, skát꞉ke ne 60 nihá꞉ti ronhnónhkwe (ne nénhne nonakénhne tethoné꞉non) ne Uthai tánon ne Zaccur, ne nénhne ne Bigvai nahotitaró꞉ten, skát꞉ke ne 70 nihá꞉ti ronhnónhkwe

Ne Ezra Washakononhsatsérase Ne Levites Nononhsatokentihkó꞉wa

¹⁵ Kwáh kanenhrakwé꞉kon tsi wakhehiaʼtharó꞉roke ne kanatserátʼtha ne tsi nieiawé꞉non ne tsitkaná꞉thaien ne Ahava, tánon thóh nón꞉we nahakwahthatosehró꞉ten ne náhsenh nónhta nikarì꞉wes. Wakerihwatshénhri tsi áhsenh nihá꞉ti ratitsihénstatsis thóh ratihiaʼtá꞉rakwe nonhkwenhtióhkwakon, ók iáh ónhka ne Leviró꞉nons tahahiató꞉ten.

¹⁶ Iakhehiaʼterihwanié꞉ten ne tióhton nihá꞉ti ne ohén꞉ton iehónhnete: né꞉ne Eliezer, Ariel, Shemaiah, Elnathan, Jarib, Elnathan, Nathan, Zechariah, tánon ne Meshullam, tánon ne teʼnihiá꞉se sakoterihonhnién꞉nis, né꞉ne Joiarib, tánon ne Elnathan.

¹⁷ Tsi thénhteron ne Iddo hiakhehiaʼtó꞉ri, ne ononhtsikó꞉wa í꞉ken ne tsi ratinákere ne Casiphia, nahonwariwanón꞉tonhse tánon ne tehotirihwaienawá꞉kons, nononhsatokentihkó꞉wane rotihiò꞉te, nahonthahionkhihiaʼthatonhkwetathenié꞉ten nahonwahiò꞉tenhse Rawenni꞉io Nononhsatokentihkó꞉wane.

¹⁸ É꞉tho rahotenhratserá꞉kon ne Rawenni꞉io Sherebiah, tahonwathéniete, né꞉ne rokwé꞉nion rónhkwe, Levite nahahiathó꞉ten né꞉ne Mahli nahotharó꞉ten; tánon ne shaʼté꞉kon iawénhre nihá꞉ti shakohiohokón꞉as ó꞉ni ne ronhthatekenhokón꞉as tahontenhró꞉sen.

¹⁹ Tánon Hashabiah ó꞉ni tahonwathéniete tánon ne Jeshaiah ne nénhne ne Merari nahotharó꞉ten, skát꞉ke ne tewáhsenh nihá꞉ti ronhthaté꞉nons.

²⁰ Ne iehotihiathaké꞉thote 220 nihá꞉ti kwe ne ronónha sakotisoʼthonkonhkén꞉en né꞉ne Ronhnonhtí꞉iokwe Táwit sakohiatará꞉kwenhne tánon ne rahonkweʼtashón꞉as nahonwatisnié꞉non ne Levites. Ratikwé꞉kon ratisenhnaronhniónskwe tsi nihothisenhnotenhsónskwe.

Ezra Washakohéntenhse Nonhkweshón꞉as Nahonhnenhtonhtiéte

²¹ É꞉tho nákta ne Ahava tsi kanatierathátie wakerihwí꞉sa ne iakwahkwé꞉kon ahionkwenhtóntiete tánon é꞉take aiakwahthatón꞉ni rahohén꞉ton nónhkwah Ní꞉io tánon ashakwahrihwanón꞉tonhse nasonkwenhéntenhse tsi natenhiakwatʼtháhawe tánon nasonhkwahtenhnikónhraren ó꞉ni ne iakihiohokón꞉as ó꞉ni akwé꞉kon nonkwahwenhshón꞉as.

²² Kwáh í꞉ken tsi ahonkatehén꞉en nahirihwanonhtónhnike ne ronhnonhtí꞉io ne rahotióhkwa rotishá꞉tens ronhtí꞉ios nahionhkhiʼiathanonsthatonhátie tsi nokwáh ne hionhkhí꞉sons tsi nikarí꞉wes tewathahí꞉ne, tiorì꞉wa tsi rihró꞉ri né꞉tho ónhkwah Ní꞉io tsi shakohiaʼthaterístha tsi nihiá꞉kon nenhonwaniáhese, ók ki iáh tehawerienhtí꞉ios nónhka ahonwatswathé꞉nien.

²³ Káti wahonkwentónhtiete tánon wahakwahterén꞉naien ne Rawenni꞉io nasonhkwahiathanónsthate, tánon watharihwaʼsehrá꞉ko nonhkwahterénhnaient.

Tsi Nakonhwahwí꞉hon Nononsatokentihkó꞉wa

²⁴ Wakhehiaʼtharakwenhá꞉ton ne hionhkhihentenhsehátie né꞉ne ratitsihénstatsis Sherebiah, Hashabiah, tánon shé꞉kon oié꞉ri nihá꞉ti ronátiaʼkes.

²⁵ Ethò꞉ne ó꞉nen wakhontʼtseriháren ne kawistará꞉kens, nowistanó꞉rons, tánon ne tsi nihiontsʼtashónhas né꞉ne ronhnonhtí꞉io tánon ne ronhwatsienhaién꞉ni, ó꞉ni ne ronhwatenikonhrá꞉wis ó꞉ni ne ronaterihón꞉tons, tánon nonhkweshón꞉as Nisraerró꞉nonhke thonatʼkhawánion nahónsthonke Nononhsatokentihkó꞉wane, tánon ratitsihénstatsis tatkhéhion.

^26-27 Ne kí꞉ken tsi nahoʼténhsons takhehiawí꞉hon: kawistará꞉ken - 25 thent 100 kawistará꞉kens hionsthashón꞉as - 150 nikakonhtserá꞉ke owistanó꞉ron - 7,500 nikakonhtserá꞉ke 20 niakát꞉kases owistanó꞉rons - 1,000 nikawístake satekéna owistanó꞉rons ne kwáh ioiáneres tehiotwistárons otsí꞉nekwar kátsesonhas, satetsonatʼthe nowistanó꞉ron tsi nikanó꞉rons

²⁸ Wakheró꞉ri, “Sewahiathatokéntis tsi nokwáh ne Roiá꞉ner, ne Shakoní꞉io ne ietsisoʼthonkonhkén꞉en, tánon ó꞉ni akwé꞉kon ne kawistará꞉kens ó꞉ni ne kawistanó꞉rons tsi nihionsthashón꞉as iahisewatʼkaʼwe rahonhà꞉ke tsi kwáh thóh nisewanikonhró꞉ten.

²⁹ Kwáh sewathenhnikónhraren sewateweién꞉ton tsi nió꞉re iensewáh꞉we Nononsatokentihkó꞉wane. Thó꞉ne ratitsihénstatsis tsi ronhtsenhtháhkwa sewakonhtseriháren tánon taietʼtsíhion ne ohén꞉ton iehonhné꞉ton ne ratitsihénstatsis ó꞉ni ne Levites, tánon ne shakotihéntenhse nonhkweshón꞉as Nisraerró꞉nonhke ne Jerusalem.”

³⁰ Káti ne ratitsihénstatsis ó꞉ni ne Levites wahatiié꞉na ne kawistará꞉kens, nowistanó꞉rons, tánon ne tsi nihionsthashón꞉as, tsi nienhatí꞉hawe Nonsatokentihkó꞉wane ne Jerusalem.

Tsi Niahónhne Ne Jerusalem

³¹ Né꞉ne tékeni-iawénhre siwenhniserakéhaton ne tsotenhnitatierénhton tsonhkwahthéntion ne Ahava tsi kanatierathátie né Jerusalem nonhthahiákwe. Nokwáh Ní꞉io iakwahkwekonhátie tánon sonhkwahiathanonsthatonhátie tsi nokwáh ne hionhkhí꞉sons ne tó꞉sa ahontahionhkhihiatiaʼtón꞉ti tánon nahionhkhinenhrénhten tsi nihiakwatʼthahine.

³² Nó꞉ne shahakwáhwe ne Jerusalem, áhsen nón꞉ta sahiakwahtoríhsen.

³³ Ethò꞉ne ne kaierí꞉haton siwenhniserakéhaton Ononsatokentihkó꞉wane niahá꞉kwe, wahakwakonhtserihʼharónnion ne kawistará꞉kens, nowistanó꞉rons, tánon ne tsi nihionstasónhas, ethò꞉ne ó꞉nen tashakwáhion ne Meremoth ratsihénstatsi, né꞉ne Uriah roiénha. Ne skát꞉ke rónhneskwe né꞉ne Eleazar né꞉ne roʼní꞉ha ne Phinehas tánon teʼnihiáse Levites, né꞉ne Jozabad né roʼní꞉ha né꞉ne Jeshua tánon ne Noadiah ne roʼní꞉ha né꞉ne Binnui.

³⁴ Akwé꞉kon niewaséh꞉ton tánon kakontseriháre, tánon kwáh akwé꞉kon tot ónt꞉thiaton.

³⁵ Ratikwé꞉kon ne sót꞉ti ne rananahkerá꞉kwenhne ethò꞉ne ó꞉nen tahatihásheron ne tkaiesthánion nahontsahathónhake tsi ahonteskónhthake ne Rawenni꞉io rahorihwà꞉ke ne Israerró꞉nonke. Ne tahatiiesthánion 12 nihá꞉ti té꞉ro né꞉ne kanenhrakwé꞉kon akorihwà꞉ke Nisraerró꞉nonke, 96 nihá꞉ti teiotinakarontón꞉a ratítsinn, tánon 77 nihá꞉ti teiotinakarontón꞉a owí꞉ra; tánon shé꞉kon 12 nihá꞉ti kaiaʼtákeras ne nénhne nahonsahontonhnakanón꞉niate ne ronónha tsi nokwáh ne karihwanéren. Ratikwé꞉kon ki konhtitsénhnens wahonwanateskónhten rahohén꞉ton ne Roiá꞉ner.

³⁶ Káti ó꞉ni iahatíhawe ne kaiatónhsera ne ronhnontí꞉io teshakó꞉wi tánon ne tahonwénhnon ne ratikoráhsons ó꞉ni ne ronaterihónʼtons ne tsi iaʼtewatséntos nokwáh ne Euphrates Wathonhontsá꞉ien, ethò꞉ne ó꞉nenh ne ronónha tahonwanatswanónhna nonhkweshón꞉as tánon Nononsatokentihkó꞉wane.